| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
10. убассаяасуд̇д̇аван̣н̣анаа
10. Upassayasuttavaṇṇanā
153. д̣̇асамз ааяаама, бханд̇зд̇и гасмаа бхигкунийубассаяаг̇аманам̣ яаажад̇и? на лаабхасаггаарахзд̇у, гаммадтаанад̇т̇игаа банзд̇т̇а бхигкунияо ад̇т̇и, д̇аа уссуггаабзд̇ваа гаммадтаанам̣ гат̇аабзссаамийд̇и яаажад̇и. нану жа со саяамби д̇збидаго б̣ахуссуд̇о, гим̣ саяам̣ гат̇зд̇ум̣ на саггод̇ийд̇и? но на саггод̇и. б̣уд̣̇д̇хабадибхааг̇асса бана саавагасса гат̇ам̣ сад̣̇д̇хаад̇аб̣б̣ам̣ ман̃н̃иссанд̇ийд̇и яаажад̇и. б̣ахугижжо д̇вам̣ б̣ахугаран̣ийяод̇и гим̣ т̇зро навагаммаад̣̇ибасуд̇о, язна нам̣ звамаахаад̇и? но, сад̇т̇ари бана бариниб̣б̣уд̇з жад̇ассо барисаа аананд̣̇ад̇т̇зрам̣ убасан̇гамид̇ваа, ‘‘бханд̇з, ид̣̇аани гасса бад̇д̇ажийварам̣ г̇ахзд̇ваа жарат̇а, гасса баривзн̣ам̣ саммаж̇ж̇ат̇а, гасса мукод̣̇агам̣ д̣̇зт̇аа’’д̇и род̣̇анд̇и барид̣̇званд̇и. т̇зро ‘‘анижжаа сан̇каараа, вуд̣̇д̇хасарийрзби ниллаж̇ж̇ова мажжурааж̇аа бахари. зсаа сан̇каараанам̣ д̇хаммад̇аа, маа сожид̇т̇а, маа барид̣̇звид̇т̇аа’’д̇и барисам̣ сан̃н̃аабзд̇и. ид̣̇амасса б̣ахугижжам̣. д̇ам̣ санд̇хааяа т̇зро звамааха. санд̣̇ассзсийд̇и бадибад̇д̇иг̇ун̣ам̣ д̣̇ассзси. самаад̣̇абзсийд̇и г̇ан̣хаабзси. самуд̇д̇зж̇зсийд̇и самуссаахзси. самбахам̣сзсийд̇и бадилад̣̇д̇хаг̇ун̣зна мод̣̇аабзси.
153. Dasame āyāma, bhanteti kasmā bhikkhunīupassayagamanaṃ yācati? Na lābhasakkārahetu, kammaṭṭhānatthikā panettha bhikkhuniyo atthi, tā ussukkāpetvā kammaṭṭhānaṃ kathāpessāmīti yācati. Nanu ca so sayampi tepiṭako bahussuto, kiṃ sayaṃ kathetuṃ na sakkotīti? No na sakkoti. Buddhapaṭibhāgassa pana sāvakassa kathaṃ saddhātabbaṃ maññissantīti yācati. Bahukicco tvaṃ bahukaraṇīyoti kiṃ thero navakammādipasuto, yena naṃ evamāhāti? No, satthari pana parinibbute catasso parisā ānandattheraṃ upasaṅkamitvā, ‘‘bhante, idāni kassa pattacīvaraṃ gahetvā caratha, kassa pariveṇaṃ sammajjatha, kassa mukhodakaṃ dethā’’ti rodanti paridevanti. Thero ‘‘aniccā saṅkhārā, vuddhasarīrepi nillajjova maccurājā pahari. Esā saṅkhārānaṃ dhammatā, mā socittha, mā paridevitthā’’ti parisaṃ saññāpeti. Idamassa bahukiccaṃ. Taṃ sandhāya thero evamāha. Sandassesīti paṭipattiguṇaṃ dassesi. Samādapesīti gaṇhāpesi. Samuttejesīti samussāhesi. Sampahaṃsesīti paṭiladdhaguṇena modāpesi.
т̇уллад̇иссаад̇и сарийрзна т̇уулаа, наамзна д̇иссаа. взд̣̇зхамунинод̇и бан̣д̣ид̇амунино. бан̣д̣ид̇о хи н̃аан̣асан̇каад̇зна взд̣̇зна ийхад̇и саб̣б̣агижжаани гарод̇и, д̇асмаа ‘‘взд̣̇зхо’’д̇и вужжад̇и. взд̣̇зхо жа со муни жаад̇и, взд̣̇зхамуни. д̇хаммам̣ бхаасид̇аб̣б̣ам̣ ман̃н̃ад̇ийд̇и д̇ибидагад̇харасса д̇хаммабхан̣д̣ааг̇ааригасса саммукз саяам̣ аран̃н̃аваасий бам̣сугуулиго самаано ‘‘д̇хаммагат̇иго аха’’нд̇и д̇хаммам̣ бхаасид̇аб̣б̣ам̣ ман̃н̃ад̇и. ид̣̇ам̣ гим̣ бана, гат̇ам̣ банаад̇и? аваж̇аанамаанаа бхан̣ад̇и. ассосийд̇и ан̃н̃зна ааг̇анд̇ваа аарожид̇авасзна ассоси. ааг̇амзхи д̇вам̣, аавусод̇и д̇идта д̇вам̣, аавусо. маа д̇з сан̇гхо уд̇д̇ари убабаригкийд̇и маа бхигкусан̇гхо ад̇ирзгаогаасз д̇ам̣ убабаригкийд̇и. ид̣̇ам̣ вуд̇д̇ам̣ ход̇и – ‘‘аананд̣̇зна б̣уд̣̇д̇хабадибхааг̇о сааваго ваарид̇о, згаа бхигкуний на ваарид̇аа, д̇ааяа сад̣̇д̇хим̣ сант̇аво ваа синзхо ваа бхависсад̇ий’’д̇и маа д̇ам̣ сан̇гхо звам̣ аман̃н̃ийд̇и.
Thullatissāti sarīrena thūlā, nāmena tissā. Vedehamuninoti paṇḍitamunino. Paṇḍito hi ñāṇasaṅkhātena vedena īhati sabbakiccāni karoti, tasmā ‘‘vedeho’’ti vuccati. Vedeho ca so muni cāti, vedehamuni. Dhammaṃbhāsitabbaṃ maññatīti tipiṭakadharassa dhammabhaṇḍāgārikassa sammukhe sayaṃ araññavāsī paṃsukūliko samāno ‘‘dhammakathiko aha’’nti dhammaṃ bhāsitabbaṃ maññati. Idaṃ kiṃ pana, kathaṃ panāti? Avajānamānā bhaṇati. Assosīti aññena āgantvā ārocitavasena assosi. Āgamehi tvaṃ, āvusoti tiṭṭha tvaṃ, āvuso. Mā te saṅgho uttari upaparikkhīti mā bhikkhusaṅgho atirekaokāse taṃ upaparikkhīti. Idaṃ vuttaṃ hoti – ‘‘ānandena buddhapaṭibhāgo sāvako vārito, ekā bhikkhunī na vāritā, tāya saddhiṃ santhavo vā sineho vā bhavissatī’’ti mā taṃ saṅgho evaṃ amaññīti.
ид̣̇аани ад̇д̇ано б̣уд̣̇д̇хабадибхааг̇абхаавам̣ д̣̇ийбзнд̇о д̇ам̣ гим̣ ман̃н̃аси, аавусод̇иаад̣̇имааха? сад̇д̇арад̇ананд̇и сад̇д̇ахад̇т̇аббамаан̣ам̣. нааг̇анд̇и хад̇т̇им̣. ад̣дхадтарад̇анам̣ ваад̇и ад̣дхарад̇анзна уунаадтарад̇анам̣, буримабаад̣̇ад̇о бадтааяа яаава гумбхаа вид̣̇ад̇т̇аад̇хигасад̇д̇ахад̇т̇уб̣б̣зд̇ханд̇и ад̇т̇о. д̇аалабад̇д̇игааяаад̇и д̇арун̣ад̇аалабан̣н̣зна. жавид̇т̇аад̇и жуд̇аа, на мад̇аа ваа надтаа ваа, б̣уд̣̇д̇хабадибхааг̇асса бана саавагасса убаваад̣̇ам̣ вад̇ваа махаагассабад̇т̇зрз чахи абхин̃н̃аахи сийханаад̣̇ам̣ над̣̇анд̇з д̇ассаа гаасааваани ган̣дагасаакаа вияа гажчусаакаа вияа жа сарийрам̣ каад̣̇ид̇ум̣ аарад̣̇д̇хаани, д̇аани хаарзд̇ваа сзд̇агаани нивад̇т̇агкан̣зязвассаа жид̇д̇ассаад̣̇о уд̣̇абаад̣̇ийд̇и. д̣̇асамам̣.
Idāni attano buddhapaṭibhāgabhāvaṃ dīpento taṃ kiṃ maññasi, āvusotiādimāha? Sattaratananti sattahatthappamāṇaṃ. Nāganti hatthiṃ. Aḍḍhaṭṭharatanaṃ vāti aḍḍharatanena ūnaaṭṭharatanaṃ, purimapādato paṭṭhāya yāva kumbhā vidatthādhikasattahatthubbedhanti attho. Tālapattikāyāti taruṇatālapaṇṇena. Cavitthāti cutā, na matā vā naṭṭhā vā, buddhapaṭibhāgassa pana sāvakassa upavādaṃ vatvā mahākassapatthere chahi abhiññāhi sīhanādaṃ nadante tassā kāsāvāni kaṇṭakasākhā viya kacchusākhā viya ca sarīraṃ khādituṃ āraddhāni, tāni hāretvā setakāni nivatthakkhaṇeyevassā cittassādo udapādīti. Dasamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. убассаяасуд̇д̇ам̣ • 10. Upassayasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 10. убассаяасуд̇д̇аван̣н̣анаа • 10. Upassayasuttavaṇṇanā
