| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១០. ឧបស្សយសុត្តវណ្ណនា
10. Upassayasuttavaṇṇanā
១៥៣. លាភសក្ការហេតុបិ ឯកច្ចេ ភិក្ខូ ភិក្ខុនុបស្សយំ គន្ត្វា ភិក្ខុនិយោ ឱវទន្តិ, ឯវមេវំ អយំ បន ថេរោ ន លាភសក្ការហេតុ ភិក្ខុនុបស្សយគមនំ យាចតិ, អថ កស្មាតិ អាហ ‘‘កម្មដ្ឋានត្ថិកា’’តិអាទិ។ ឯសោ ហិ អានន្ទត្ថេរោ ឧស្សុក្កាបេត្វា បដិបត្តិគុណំ ទស្សេន្តោ យស្មា តា ភិក្ខុនិយោ ចតុសច្ចកម្មដ្ឋានិកា, តស្មា បញ្ចន្នំ ឧបាទានក្ខន្ធានំ ឧទយព្ពយាទិបកាសនិយា ធម្មកថាយ វិបស្សនាបដិបត្តិសម្បទំ ទស្សេសិ។ អនិច្ចាទិលក្ខណានិ ចេវ ឧទយព្ពយាទិកេ ច សម្មា ទស្សេសិ។ ហត្ថេន គហេត្វា វិយ បច្ចក្ខតោ ទស្សេសិ។ សមាទបេសីតិ តត្ថ លក្ខណារម្មណិកវិបស្សនំ សមាទបេសិ។ យថា វីថិបដិបន្នោ ហុត្វា បវត្តតិ, ឯវំ គណ្ហាបេសិ។ សមុត្តេជេសីតិ វិបស្សនាយ អារទ្ធាយ សង្ខារានំ ឧទយព្ពយាទីសុ ឧបដ្ឋហន្តេសុ យថាកាលំ បគ្គហសមុបេក្ខណេហិ ពោជ្ឈង្គានំ អនុបវត្តនេន ភាវនាមជ្ឈិមវីថិំ បាបេត្វា យថា វិបស្សនាញាណំ សុប្បសន្នំ ហុត្វា វហតិ, ឯវំ ឥន្ទ្រិយានំ វិសទភាវករណេន វិបស្សនាចិត្តំ សម្មា ឧត្តេជេសិ, និព្ពានវសេន វា សមាទបេសិ។ សម្បហំសេសីតិ តថា បវត្តិយមានាយ វិបស្សនាយ សមប្បវត្តភាវនាវសេន ឧបរិ លទ្ធព្ពភាវនាវសេន ចិត្តំ សម្បហំសេសិ, លទ្ធស្សាទវសេន សុដ្ឋុ តោសេសិ។ ឯវមេត្ថ អត្ថោ វេទិតព្ពោ។
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
មនុតេ បរិញ្ញាទិវសេន សច្ចានិ ពុជ្ឈតីតិ មុនិ។ តេតិ តំ។ ឧបយោគត្ថេ ហិ ឥទំ សាមិវចនំ។ ឧត្តរីតិ ឧបរិ, តវ យថាភូតសភាវតោ បរតោតិ អត្ថោ។ បក្ខបតិតោ អគតិគមនំ អតិរេកឱកាសោ។ ឧបបរិក្ខីតិ អនុវិច្ច និវារកោ ន ពហុមតោ។ ពុទ្ធបដិភាគោ ថេរោ។ ‘‘ពាលា ភិក្ខុនី ទុព្ភាសិតំ អាហា’’តិ អវត្វា ‘‘ខមថ, ភន្តេ’’តិ វទន្តេន បក្ខបាតេន វិយ វុត្តំ ហោតីតិ អាហ ‘‘ឯកា ភិក្ខុនី ន វារិតា’’តិអាទិ។
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
ចុតា សលិង្គតោ នដ្ឋា, ទេសន្តរបក្កមេន អទស្សនំ ន គតា។ កណ្ដកសាខា វិយាតិ កុរណ្ដកអបាមគ្គកណ្ដកលសិកាហិ សាខា វិយ។
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
ឧបស្សយសុត្តវណ្ណនា និដ្ឋិតា។
Upassayasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. ឧបស្សយសុត្តំ • 10. Upassayasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. ឧបស្សយសុត្តវណ្ណនា • 10. Upassayasuttavaṇṇanā
