| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. ဥပသ္သယသုတ္တဝဏ္ဏနာ
10. Upassayasuttavaṇṇanā
၁၅၃. ဒသမေ အာယာမ, ဘန္တေတိ ကသ္မာ ဘိက္ခုနီဥပသ္သယဂမနံ ယာစတိ? န လာဘသက္ကာရဟေတု, ကမ္မဋ္ဌာနတ္ထိကာ ပနေတ္ထ ဘိက္ခုနိယော အတ္ထိ, တာ ဥသ္သုက္ကာပေတ္ဝာ ကမ္မဋ္ဌာနံ ကထာပေသ္သာမီတိ ယာစတိ။ နနု စ သော သယမ္ပိ တေပိဋကော ဗဟုသ္သုတော, ကိံ သယံ ကထေတုံ န သက္ကောတီတိ? နော န သက္ကောတိ။ ဗုဒ္ဓပဋိဘာဂသ္သ ပန သာဝကသ္သ ကထံ သဒ္ဓာတဗ္ဗံ မညိသ္သန္တီတိ ယာစတိ။ ဗဟုကိစ္စော တ္ဝံ ဗဟုကရဏီယောတိ ကိံ ထေရော နဝကမ္မာဒိပသုတော, ယေန နံ ဧဝမာဟာတိ? နော, သတ္ထရိ ပန ပရိနိဗ္ဗုတေ စတသ္သော ပရိသာ အာနန္ဒတ္ထေရံ ဥပသင္ကမိတ္ဝာ, ‘‘ဘန္တေ, ဣဒာနိ ကသ္သ ပတ္တစီဝရံ ဂဟေတ္ဝာ စရထ, ကသ္သ ပရိဝေဏံ သမ္မဇ္ဇထ, ကသ္သ မုခောဒကံ ဒေထာ’’တိ ရောဒန္တိ ပရိဒေဝန္တိ။ ထေရော ‘‘အနိစ္စာ သင္ခာရာ, ဝုဒ္ဓသရီရေပိ နိလ္လဇ္ဇောဝ မစ္စုရာဇာ ပဟရိ။ ဧသာ သင္ခာရာနံ ဓမ္မတာ, မာ သောစိတ္ထ, မာ ပရိဒေဝိတ္ထာ’’တိ ပရိသံ သညာပေတိ။ ဣဒမသ္သ ဗဟုကိစ္စံ။ တံ သန္ဓာယ ထေရော ဧဝမာဟ။ သန္ဒသ္သေသီတိ ပဋိပတ္တိဂုဏံ ဒသ္သေသိ။ သမာဒပေသီတိ ဂဏ္ဟာပေသိ။ သမုတ္တေဇေသီတိ သမုသ္သာဟေသိ။ သမ္ပဟံသေသီတိ ပဋိလဒ္ဓဂုဏေန မောဒာပေသိ။
153. Dasame āyāma, bhanteti kasmā bhikkhunīupassayagamanaṃ yācati? Na lābhasakkārahetu, kammaṭṭhānatthikā panettha bhikkhuniyo atthi, tā ussukkāpetvā kammaṭṭhānaṃ kathāpessāmīti yācati. Nanu ca so sayampi tepiṭako bahussuto, kiṃ sayaṃ kathetuṃ na sakkotīti? No na sakkoti. Buddhapaṭibhāgassa pana sāvakassa kathaṃ saddhātabbaṃ maññissantīti yācati. Bahukicco tvaṃ bahukaraṇīyoti kiṃ thero navakammādipasuto, yena naṃ evamāhāti? No, satthari pana parinibbute catasso parisā ānandattheraṃ upasaṅkamitvā, ‘‘bhante, idāni kassa pattacīvaraṃ gahetvā caratha, kassa pariveṇaṃ sammajjatha, kassa mukhodakaṃ dethā’’ti rodanti paridevanti. Thero ‘‘aniccā saṅkhārā, vuddhasarīrepi nillajjova maccurājā pahari. Esā saṅkhārānaṃ dhammatā, mā socittha, mā paridevitthā’’ti parisaṃ saññāpeti. Idamassa bahukiccaṃ. Taṃ sandhāya thero evamāha. Sandassesīti paṭipattiguṇaṃ dassesi. Samādapesīti gaṇhāpesi. Samuttejesīti samussāhesi. Sampahaṃsesīti paṭiladdhaguṇena modāpesi.
ထုလ္လတိသ္သာတိ သရီရေန ထူလာ, နာမေန တိသ္သာ။ ဝေဒေဟမုနိနောတိ ပဏ္ဍိတမုနိနော။ ပဏ္ဍိတော ဟိ ဉာဏသင္ခာတေန ဝေဒေန ဤဟတိ သဗ္ဗကိစ္စာနိ ကရောတိ, တသ္မာ ‘‘ဝေဒေဟော’’တိ ဝုစ္စတိ။ ဝေဒေဟော စ သော မုနိ စာတိ, ဝေဒေဟမုနိ။ ဓမ္မံ ဘာသိတဗ္ဗံ မညတီတိ တိပိဋကဓရသ္သ ဓမ္မဘဏ္ဍာဂာရိကသ္သ သမ္မုခေ သယံ အရညဝာသီ ပံသုကူလိကော သမာနော ‘‘ဓမ္မကထိကော အဟ’’န္တိ ဓမ္မံ ဘာသိတဗ္ဗံ မညတိ။ ဣဒံ ကိံ ပန, ကထံ ပနာတိ? အဝဇာနမာနာ ဘဏတိ။ အသ္သောသီတိ အညေန အာဂန္တ္ဝာ အာရောစိတဝသေန အသ္သောသိ။ အာဂမေဟိ တ္ဝံ, အာဝုသောတိ တိဋ္ဌ တ္ဝံ, အာဝုသော။ မာ တေ သင္ဃော ဥတ္တရိ ဥပပရိက္ခီတိ မာ ဘိက္ခုသင္ဃော အတိရေကဩကာသေ တံ ဥပပရိက္ခီတိ။ ဣဒံ ဝုတ္တံ ဟောတိ – ‘‘အာနန္ဒေန ဗုဒ္ဓပဋိဘာဂော သာဝကော ဝာရိတော, ဧကာ ဘိက္ခုနီ န ဝာရိတာ, တာယ သဒ္ဓိံ သန္ထဝော ဝာ သိနေဟော ဝာ ဘဝိသ္သတီ’’တိ မာ တံ သင္ဃော ဧဝံ အမညီတိ။
Thullatissāti sarīrena thūlā, nāmena tissā. Vedehamuninoti paṇḍitamunino. Paṇḍito hi ñāṇasaṅkhātena vedena īhati sabbakiccāni karoti, tasmā ‘‘vedeho’’ti vuccati. Vedeho ca so muni cāti, vedehamuni. Dhammaṃbhāsitabbaṃ maññatīti tipiṭakadharassa dhammabhaṇḍāgārikassa sammukhe sayaṃ araññavāsī paṃsukūliko samāno ‘‘dhammakathiko aha’’nti dhammaṃ bhāsitabbaṃ maññati. Idaṃ kiṃ pana, kathaṃ panāti? Avajānamānā bhaṇati. Assosīti aññena āgantvā ārocitavasena assosi. Āgamehi tvaṃ, āvusoti tiṭṭha tvaṃ, āvuso. Mā te saṅgho uttari upaparikkhīti mā bhikkhusaṅgho atirekaokāse taṃ upaparikkhīti. Idaṃ vuttaṃ hoti – ‘‘ānandena buddhapaṭibhāgo sāvako vārito, ekā bhikkhunī na vāritā, tāya saddhiṃ santhavo vā sineho vā bhavissatī’’ti mā taṃ saṅgho evaṃ amaññīti.
ဣဒာနိ အတ္တနော ဗုဒ္ဓပဋိဘာဂဘာဝံ ဒီပေန္တော တံ ကိံ မညသိ, အာဝုသောတိအာဒိမာဟ? သတ္တရတနန္တိ သတ္တဟတ္ထပ္ပမာဏံ။ နာဂန္တိ ဟတ္ထိံ။ အဍ္ဎဋ္ဌရတနံ ဝာတိ အဍ္ဎရတနေန ဦနအဋ္ဌရတနံ, ပုရိမပာဒတော ပဋ္ဌာယ ယာဝ ကုမ္ဘာ ဝိဒတ္ထာဓိကသတ္တဟတ္ထုဗ္ဗေဓန္တိ အတ္ထော။ တာလပတ္တိကာယာတိ တရုဏတာလပဏ္ဏေန။ စဝိတ္ထာတိ စုတာ, န မတာ ဝာ နဋ္ဌာ ဝာ, ဗုဒ္ဓပဋိဘာဂသ္သ ပန သာဝကသ္သ ဥပဝာဒံ ဝတ္ဝာ မဟာကသ္သပတ္ထေရေ ဆဟိ အဘိညာဟိ သီဟနာဒံ နဒန္တေ တသ္သာ ကာသာဝာနိ ကဏ္ဋကသာခာ ဝိယ ကစ္ဆုသာခာ ဝိယ စ သရီရံ ခာဒိတုံ အာရဒ္ဓာနိ, တာနိ ဟာရေတ္ဝာ သေတကာနိ နိဝတ္ထက္ခဏေယေဝသ္သာ စိတ္တသ္သာဒော ဥဒပာဒီတိ။ ဒသမံ။
Idāni attano buddhapaṭibhāgabhāvaṃ dīpento taṃ kiṃ maññasi, āvusotiādimāha? Sattaratananti sattahatthappamāṇaṃ. Nāganti hatthiṃ. Aḍḍhaṭṭharatanaṃ vāti aḍḍharatanena ūnaaṭṭharatanaṃ, purimapādato paṭṭhāya yāva kumbhā vidatthādhikasattahatthubbedhanti attho. Tālapattikāyāti taruṇatālapaṇṇena. Cavitthāti cutā, na matā vā naṭṭhā vā, buddhapaṭibhāgassa pana sāvakassa upavādaṃ vatvā mahākassapatthere chahi abhiññāhi sīhanādaṃ nadante tassā kāsāvāni kaṇṭakasākhā viya kacchusākhā viya ca sarīraṃ khādituṃ āraddhāni, tāni hāretvā setakāni nivatthakkhaṇeyevassā cittassādo udapādīti. Dasamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဥပသ္သယသုတ္တံ • 10. Upassayasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဥပသ္သယသုတ္တဝဏ္ဏနာ • 10. Upassayasuttavaṇṇanā
