| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಉಪಸ್ಸಯಸುತ್ತವಣ್ಣನಾ
10. Upassayasuttavaṇṇanā
೧೫೩. ಲಾಭಸಕ್ಕಾರಹೇತುಪಿ ಏಕಚ್ಚೇ ಭಿಕ್ಖೂ ಭಿಕ್ಖುನುಪಸ್ಸಯಂ ಗನ್ತ್ವಾ ಭಿಕ್ಖುನಿಯೋ ಓವದನ್ತಿ, ಏವಮೇವಂ ಅಯಂ ಪನ ಥೇರೋ ನ ಲಾಭಸಕ್ಕಾರಹೇತು ಭಿಕ್ಖುನುಪಸ್ಸಯಗಮನಂ ಯಾಚತಿ, ಅಥ ಕಸ್ಮಾತಿ ಆಹ ‘‘ಕಮ್ಮಟ್ಠಾನತ್ಥಿಕಾ’’ತಿಆದಿ। ಏಸೋ ಹಿ ಆನನ್ದತ್ಥೇರೋ ಉಸ್ಸುಕ್ಕಾಪೇತ್ವಾ ಪಟಿಪತ್ತಿಗುಣಂ ದಸ್ಸೇನ್ತೋ ಯಸ್ಮಾ ತಾ ಭಿಕ್ಖುನಿಯೋ ಚತುಸಚ್ಚಕಮ್ಮಟ್ಠಾನಿಕಾ, ತಸ್ಮಾ ಪಞ್ಚನ್ನಂ ಉಪಾದಾನಕ್ಖನ್ಧಾನಂ ಉದಯಬ್ಬಯಾದಿಪಕಾಸನಿಯಾ ಧಮ್ಮಕಥಾಯ ವಿಪಸ್ಸನಾಪಟಿಪತ್ತಿಸಮ್ಪದಂ ದಸ್ಸೇಸಿ। ಅನಿಚ್ಚಾದಿಲಕ್ಖಣಾನಿ ಚೇವ ಉದಯಬ್ಬಯಾದಿಕೇ ಚ ಸಮ್ಮಾ ದಸ್ಸೇಸಿ। ಹತ್ಥೇನ ಗಹೇತ್ವಾ ವಿಯ ಪಚ್ಚಕ್ಖತೋ ದಸ್ಸೇಸಿ। ಸಮಾದಪೇಸೀತಿ ತತ್ಥ ಲಕ್ಖಣಾರಮ್ಮಣಿಕವಿಪಸ್ಸನಂ ಸಮಾದಪೇಸಿ। ಯಥಾ ವೀಥಿಪಟಿಪನ್ನೋ ಹುತ್ವಾ ಪವತ್ತತಿ, ಏವಂ ಗಣ್ಹಾಪೇಸಿ। ಸಮುತ್ತೇಜೇಸೀತಿ ವಿಪಸ್ಸನಾಯ ಆರದ್ಧಾಯ ಸಙ್ಖಾರಾನಂ ಉದಯಬ್ಬಯಾದೀಸು ಉಪಟ್ಠಹನ್ತೇಸು ಯಥಾಕಾಲಂ ಪಗ್ಗಹಸಮುಪೇಕ್ಖಣೇಹಿ ಬೋಜ್ಝಙ್ಗಾನಂ ಅನುಪವತ್ತನೇನ ಭಾವನಾಮಜ್ಝಿಮವೀಥಿಂ ಪಾಪೇತ್ವಾ ಯಥಾ ವಿಪಸ್ಸನಾಞಾಣಂ ಸುಪ್ಪಸನ್ನಂ ಹುತ್ವಾ ವಹತಿ, ಏವಂ ಇನ್ದ್ರಿಯಾನಂ ವಿಸದಭಾವಕರಣೇನ ವಿಪಸ್ಸನಾಚಿತ್ತಂ ಸಮ್ಮಾ ಉತ್ತೇಜೇಸಿ, ನಿಬ್ಬಾನವಸೇನ ವಾ ಸಮಾದಪೇಸಿ। ಸಮ್ಪಹಂಸೇಸೀತಿ ತಥಾ ಪವತ್ತಿಯಮಾನಾಯ ವಿಪಸ್ಸನಾಯ ಸಮಪ್ಪವತ್ತಭಾವನಾವಸೇನ ಉಪರಿ ಲದ್ಧಬ್ಬಭಾವನಾವಸೇನ ಚಿತ್ತಂ ಸಮ್ಪಹಂಸೇಸಿ, ಲದ್ಧಸ್ಸಾದವಸೇನ ಸುಟ್ಠು ತೋಸೇಸಿ। ಏವಮೇತ್ಥ ಅತ್ಥೋ ವೇದಿತಬ್ಬೋ।
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
ಮನುತೇ ಪರಿಞ್ಞಾದಿವಸೇನ ಸಚ್ಚಾನಿ ಬುಜ್ಝತೀತಿ ಮುನಿ। ತೇತಿ ತಂ। ಉಪಯೋಗತ್ಥೇ ಹಿ ಇದಂ ಸಾಮಿವಚನಂ। ಉತ್ತರೀತಿ ಉಪರಿ, ತವ ಯಥಾಭೂತಸಭಾವತೋ ಪರತೋತಿ ಅತ್ಥೋ। ಪಕ್ಖಪತಿತೋ ಅಗತಿಗಮನಂ ಅತಿರೇಕಓಕಾಸೋ। ಉಪಪರಿಕ್ಖೀತಿ ಅನುವಿಚ್ಚ ನಿವಾರಕೋ ನ ಬಹುಮತೋ। ಬುದ್ಧಪಟಿಭಾಗೋ ಥೇರೋ। ‘‘ಬಾಲಾ ಭಿಕ್ಖುನೀ ದುಬ್ಭಾಸಿತಂ ಆಹಾ’’ತಿ ಅವತ್ವಾ ‘‘ಖಮಥ, ಭನ್ತೇ’’ತಿ ವದನ್ತೇನ ಪಕ್ಖಪಾತೇನ ವಿಯ ವುತ್ತಂ ಹೋತೀತಿ ಆಹ ‘‘ಏಕಾ ಭಿಕ್ಖುನೀ ನ ವಾರಿತಾ’’ತಿಆದಿ।
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
ಚುತಾ ಸಲಿಙ್ಗತೋ ನಟ್ಠಾ, ದೇಸನ್ತರಪಕ್ಕಮೇನ ಅದಸ್ಸನಂ ನ ಗತಾ। ಕಣ್ಟಕಸಾಖಾ ವಿಯಾತಿ ಕುರಣ್ಟಕಅಪಾಮಗ್ಗಕಣ್ಟಕಲಸಿಕಾಹಿ ಸಾಖಾ ವಿಯ।
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
ಉಪಸ್ಸಯಸುತ್ತವಣ್ಣನಾ ನಿಟ್ಠಿತಾ।
Upassayasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ಉಪಸ್ಸಯಸುತ್ತಂ • 10. Upassayasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ಉಪಸ್ಸಯಸುತ್ತವಣ್ಣನಾ • 10. Upassayasuttavaṇṇanā
