| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. උපස්‌සයසුත්‌තවණ්‌ණනා
10. Upassayasuttavaṇṇanā
153. ලාභසක්‌කාරහෙතුපි එකච්‌චෙ භික්‌ඛූ භික්‌ඛුනුපස්‌සයං ගන්‌ත්‌වා භික්‌ඛුනියො ඔවදන්‌ති, එවමෙවං අයං පන ථෙරො න ලාභසක්‌කාරහෙතු භික්‌ඛුනුපස්‌සයගමනං යාචති, අථ කස්‌මාති ආහ ‘‘කම්‌මට්‌ඨානත්‌ථිකා’’තිආදි. එසො හි ආනන්‌දත්‌ථෙරො උස්‌සුක්‌කාපෙත්‌වා පටිපත්‌තිගුණං දස්‌සෙන්‌තො යස්‌මා තා භික්‌ඛුනියො චතුසච්‌චකම්‌මට්‌ඨානිකා, තස්‌මා පඤ්‌චන්‌නං උපාදානක්‌ඛන්‌ධානං උදයබ්‌බයාදිපකාසනියා ධම්‌මකථාය විපස්‌සනාපටිපත්‌තිසම්‌පදං දස්‌සෙසි. අනිච්‌චාදිලක්‌ඛණානි චෙව උදයබ්‌බයාදිකෙ ච සම්‌මා දස්‌සෙසි. හත්‌ථෙන ගහෙත්‌වා විය පච්‌චක්‌ඛතො දස්‌සෙසි. සමාදපෙසීති තත්‌ථ ලක්‌ඛණාරම්‌මණිකවිපස්‌සනං සමාදපෙසි. යථා වීථිපටිපන්‌නො හුත්‌වා පවත්‌තති, එවං ගණ්‌හාපෙසි. සමුත්‌තෙජෙසීති විපස්‌සනාය ආරද්‌ධාය සඞ්‌ඛාරානං උදයබ්‌බයාදීසු උපට්‌ඨහන්‌තෙසු යථාකාලං පග්‌ගහසමුපෙක්‌ඛණෙහි බොජ්‌ඣඞ්‌ගානං අනුපවත්‌තනෙන භාවනාමජ්‌ඣිමවීථිං පාපෙත්‌වා යථා විපස්‌සනාඤාණං සුප්‌පසන්‌නං හුත්‌වා වහති, එවං ඉන්‌ද්‍රියානං විසදභාවකරණෙන විපස්‌සනාචිත්‌තං සම්‌මා උත්‌තෙජෙසි, නිබ්‌බානවසෙන වා සමාදපෙසි. සම්‌පහංසෙසීති තථා පවත්‌තියමානාය විපස්‌සනාය සමප්‌පවත්‌තභාවනාවසෙන උපරි ලද්‌ධබ්‌බභාවනාවසෙන චිත්‌තං සම්‌පහංසෙසි, ලද්‌ධස්‌සාදවසෙන සුට්‌ඨු තොසෙසි. එවමෙත්‌ථ අත්‌ථො වෙදිතබ්‌බො.
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
මනුතෙ පරිඤ්‌ඤාදිවසෙන සච්‌චානි බුජ්‌ඣතීති මුනි. තෙති තං. උපයොගත්‌ථෙ හි ඉදං සාමිවචනං. උත්‌තරීති උපරි, තව යථාභූතසභාවතො පරතොති අත්‌ථො. පක්‌ඛපතිතො අගතිගමනං අතිරෙකඔකාසො. උපපරික්‌ඛීති අනුවිච්‌ච නිවාරකො න බහුමතො. බුද්‌ධපටිභාගො ථෙරො. ‘‘බාලා භික්‌ඛුනී දුබ්‌භාසිතං ආහා’’ති අවත්‌වා ‘‘ඛමථ, භන්‌තෙ’’ති වදන්‌තෙන පක්‌ඛපාතෙන විය වුත්‌තං හොතීති ආහ ‘‘එකා භික්‌ඛුනී න වාරිතා’’තිආදි.
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
චුතා සලිඞ්‌ගතො නට්‌ඨා, දෙසන්‌තරපක්‌කමෙන අදස්‌සනං න ගතා. කණ්‌ටකසාඛා වියාති කුරණ්‌ටකඅපාමග්‌ගකණ්‌ටකලසිකාහි සාඛා විය.
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
උපස්‌සයසුත්‌තවණ්‌ණනා නිට්‌ඨිතා.
Upassayasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. උපස්‌සයසුත්‌තං • 10. Upassayasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. උපස්‌සයසුත්‌තවණ්‌ණනා • 10. Upassayasuttavaṇṇanā
