| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. ਉਪਸ੍ਸਯਸੁਤ੍ਤવਣ੍ਣਨਾ
10. Upassayasuttavaṇṇanā
੧੫੩. ਦਸਮੇ ਆਯਾਮ, ਭਨ੍ਤੇਤਿ ਕਸ੍ਮਾ ਭਿਕ੍ਖੁਨੀਉਪਸ੍ਸਯਗਮਨਂ ਯਾਚਤਿ? ਨ ਲਾਭਸਕ੍ਕਾਰਹੇਤੁ, ਕਮ੍ਮਟ੍ਠਾਨਤ੍ਥਿਕਾ ਪਨੇਤ੍ਥ ਭਿਕ੍ਖੁਨਿਯੋ ਅਤ੍ਥਿ, ਤਾ ਉਸ੍ਸੁਕ੍ਕਾਪੇਤ੍વਾ ਕਮ੍ਮਟ੍ਠਾਨਂ ਕਥਾਪੇਸ੍ਸਾਮੀਤਿ ਯਾਚਤਿ। ਨਨੁ ਚ ਸੋ ਸਯਮ੍ਪਿ ਤੇਪਿਟਕੋ ਬਹੁਸ੍ਸੁਤੋ, ਕਿਂ ਸਯਂ ਕਥੇਤੁਂ ਨ ਸਕ੍ਕੋਤੀਤਿ? ਨੋ ਨ ਸਕ੍ਕੋਤਿ। ਬੁਦ੍ਧਪਟਿਭਾਗਸ੍ਸ ਪਨ ਸਾવਕਸ੍ਸ ਕਥਂ ਸਦ੍ਧਾਤਬ੍ਬਂ ਮਞ੍ਞਿਸ੍ਸਨ੍ਤੀਤਿ ਯਾਚਤਿ। ਬਹੁਕਿਚ੍ਚੋ ਤ੍વਂ ਬਹੁਕਰਣੀਯੋਤਿ ਕਿਂ ਥੇਰੋ ਨવਕਮ੍ਮਾਦਿਪਸੁਤੋ, ਯੇਨ ਨਂ ਏવਮਾਹਾਤਿ? ਨੋ, ਸਤ੍ਥਰਿ ਪਨ ਪਰਿਨਿਬ੍ਬੁਤੇ ਚਤਸ੍ਸੋ ਪਰਿਸਾ ਆਨਨ੍ਦਤ੍ਥੇਰਂ ਉਪਸਙ੍ਕਮਿਤ੍વਾ, ‘‘ਭਨ੍ਤੇ, ਇਦਾਨਿ ਕਸ੍ਸ ਪਤ੍ਤਚੀવਰਂ ਗਹੇਤ੍વਾ ਚਰਥ, ਕਸ੍ਸ ਪਰਿવੇਣਂ ਸਮ੍ਮਜ੍ਜਥ, ਕਸ੍ਸ ਮੁਖੋਦਕਂ ਦੇਥਾ’’ਤਿ ਰੋਦਨ੍ਤਿ ਪਰਿਦੇવਨ੍ਤਿ। ਥੇਰੋ ‘‘ਅਨਿਚ੍ਚਾ ਸਙ੍ਖਾਰਾ, વੁਦ੍ਧਸਰੀਰੇਪਿ ਨਿਲ੍ਲਜ੍ਜੋવ ਮਚ੍ਚੁਰਾਜਾ ਪਹਰਿ। ਏਸਾ ਸਙ੍ਖਾਰਾਨਂ ਧਮ੍ਮਤਾ, ਮਾ ਸੋਚਿਤ੍ਥ, ਮਾ ਪਰਿਦੇવਿਤ੍ਥਾ’’ਤਿ ਪਰਿਸਂ ਸਞ੍ਞਾਪੇਤਿ। ਇਦਮਸ੍ਸ ਬਹੁਕਿਚ੍ਚਂ। ਤਂ ਸਨ੍ਧਾਯ ਥੇਰੋ ਏવਮਾਹ। ਸਨ੍ਦਸ੍ਸੇਸੀਤਿ ਪਟਿਪਤ੍ਤਿਗੁਣਂ ਦਸ੍ਸੇਸਿ। ਸਮਾਦਪੇਸੀਤਿ ਗਣ੍ਹਾਪੇਸਿ। ਸਮੁਤ੍ਤੇਜੇਸੀਤਿ ਸਮੁਸ੍ਸਾਹੇਸਿ। ਸਮ੍ਪਹਂਸੇਸੀਤਿ ਪਟਿਲਦ੍ਧਗੁਣੇਨ ਮੋਦਾਪੇਸਿ।
153. Dasame āyāma, bhanteti kasmā bhikkhunīupassayagamanaṃ yācati? Na lābhasakkārahetu, kammaṭṭhānatthikā panettha bhikkhuniyo atthi, tā ussukkāpetvā kammaṭṭhānaṃ kathāpessāmīti yācati. Nanu ca so sayampi tepiṭako bahussuto, kiṃ sayaṃ kathetuṃ na sakkotīti? No na sakkoti. Buddhapaṭibhāgassa pana sāvakassa kathaṃ saddhātabbaṃ maññissantīti yācati. Bahukicco tvaṃ bahukaraṇīyoti kiṃ thero navakammādipasuto, yena naṃ evamāhāti? No, satthari pana parinibbute catasso parisā ānandattheraṃ upasaṅkamitvā, ‘‘bhante, idāni kassa pattacīvaraṃ gahetvā caratha, kassa pariveṇaṃ sammajjatha, kassa mukhodakaṃ dethā’’ti rodanti paridevanti. Thero ‘‘aniccā saṅkhārā, vuddhasarīrepi nillajjova maccurājā pahari. Esā saṅkhārānaṃ dhammatā, mā socittha, mā paridevitthā’’ti parisaṃ saññāpeti. Idamassa bahukiccaṃ. Taṃ sandhāya thero evamāha. Sandassesīti paṭipattiguṇaṃ dassesi. Samādapesīti gaṇhāpesi. Samuttejesīti samussāhesi. Sampahaṃsesīti paṭiladdhaguṇena modāpesi.
ਥੁਲ੍ਲਤਿਸ੍ਸਾਤਿ ਸਰੀਰੇਨ ਥੂਲਾ, ਨਾਮੇਨ ਤਿਸ੍ਸਾ। વੇਦੇਹਮੁਨਿਨੋਤਿ ਪਣ੍ਡਿਤਮੁਨਿਨੋ। ਪਣ੍ਡਿਤੋ ਹਿ ਞਾਣਸਙ੍ਖਾਤੇਨ વੇਦੇਨ ਈਹਤਿ ਸਬ੍ਬਕਿਚ੍ਚਾਨਿ ਕਰੋਤਿ, ਤਸ੍ਮਾ ‘‘વੇਦੇਹੋ’’ਤਿ વੁਚ੍ਚਤਿ। વੇਦੇਹੋ ਚ ਸੋ ਮੁਨਿ ਚਾਤਿ, વੇਦੇਹਮੁਨਿ। ਧਮ੍ਮਂ ਭਾਸਿਤਬ੍ਬਂ ਮਞ੍ਞਤੀਤਿ ਤਿਪਿਟਕਧਰਸ੍ਸ ਧਮ੍ਮਭਣ੍ਡਾਗਾਰਿਕਸ੍ਸ ਸਮ੍ਮੁਖੇ ਸਯਂ ਅਰਞ੍ਞવਾਸੀ ਪਂਸੁਕੂਲਿਕੋ ਸਮਾਨੋ ‘‘ਧਮ੍ਮਕਥਿਕੋ ਅਹ’’ਨ੍ਤਿ ਧਮ੍ਮਂ ਭਾਸਿਤਬ੍ਬਂ ਮਞ੍ਞਤਿ। ਇਦਂ ਕਿਂ ਪਨ, ਕਥਂ ਪਨਾਤਿ? ਅવਜਾਨਮਾਨਾ ਭਣਤਿ। ਅਸ੍ਸੋਸੀਤਿ ਅਞ੍ਞੇਨ ਆਗਨ੍ਤ੍વਾ ਆਰੋਚਿਤવਸੇਨ ਅਸ੍ਸੋਸਿ। ਆਗਮੇਹਿ ਤ੍વਂ, ਆવੁਸੋਤਿ ਤਿਟ੍ਠ ਤ੍વਂ, ਆવੁਸੋ। ਮਾ ਤੇ ਸਙ੍ਘੋ ਉਤ੍ਤਰਿ ਉਪਪਰਿਕ੍ਖੀਤਿ ਮਾ ਭਿਕ੍ਖੁਸਙ੍ਘੋ ਅਤਿਰੇਕਓਕਾਸੇ ਤਂ ਉਪਪਰਿਕ੍ਖੀਤਿ। ਇਦਂ વੁਤ੍ਤਂ ਹੋਤਿ – ‘‘ਆਨਨ੍ਦੇਨ ਬੁਦ੍ਧਪਟਿਭਾਗੋ ਸਾવਕੋ વਾਰਿਤੋ, ਏਕਾ ਭਿਕ੍ਖੁਨੀ ਨ વਾਰਿਤਾ, ਤਾਯ ਸਦ੍ਧਿਂ ਸਨ੍ਥવੋ વਾ ਸਿਨੇਹੋ વਾ ਭવਿਸ੍ਸਤੀ’’ਤਿ ਮਾ ਤਂ ਸਙ੍ਘੋ ਏવਂ ਅਮਞ੍ਞੀਤਿ।
Thullatissāti sarīrena thūlā, nāmena tissā. Vedehamuninoti paṇḍitamunino. Paṇḍito hi ñāṇasaṅkhātena vedena īhati sabbakiccāni karoti, tasmā ‘‘vedeho’’ti vuccati. Vedeho ca so muni cāti, vedehamuni. Dhammaṃbhāsitabbaṃ maññatīti tipiṭakadharassa dhammabhaṇḍāgārikassa sammukhe sayaṃ araññavāsī paṃsukūliko samāno ‘‘dhammakathiko aha’’nti dhammaṃ bhāsitabbaṃ maññati. Idaṃ kiṃ pana, kathaṃ panāti? Avajānamānā bhaṇati. Assosīti aññena āgantvā ārocitavasena assosi. Āgamehi tvaṃ, āvusoti tiṭṭha tvaṃ, āvuso. Mā te saṅgho uttari upaparikkhīti mā bhikkhusaṅgho atirekaokāse taṃ upaparikkhīti. Idaṃ vuttaṃ hoti – ‘‘ānandena buddhapaṭibhāgo sāvako vārito, ekā bhikkhunī na vāritā, tāya saddhiṃ santhavo vā sineho vā bhavissatī’’ti mā taṃ saṅgho evaṃ amaññīti.
ਇਦਾਨਿ ਅਤ੍ਤਨੋ ਬੁਦ੍ਧਪਟਿਭਾਗਭਾવਂ ਦੀਪੇਨ੍ਤੋ ਤਂ ਕਿਂ ਮਞ੍ਞਸਿ, ਆવੁਸੋਤਿਆਦਿਮਾਹ? ਸਤ੍ਤਰਤਨਨ੍ਤਿ ਸਤ੍ਤਹਤ੍ਥਪ੍ਪਮਾਣਂ। ਨਾਗਨ੍ਤਿ ਹਤ੍ਥਿਂ। ਅਡ੍ਢਟ੍ਠਰਤਨਂ વਾਤਿ ਅਡ੍ਢਰਤਨੇਨ ਊਨਅਟ੍ਠਰਤਨਂ, ਪੁਰਿਮਪਾਦਤੋ ਪਟ੍ਠਾਯ ਯਾવ ਕੁਮ੍ਭਾ વਿਦਤ੍ਥਾਧਿਕਸਤ੍ਤਹਤ੍ਥੁਬ੍ਬੇਧਨ੍ਤਿ ਅਤ੍ਥੋ। ਤਾਲਪਤ੍ਤਿਕਾਯਾਤਿ ਤਰੁਣਤਾਲਪਣ੍ਣੇਨ। ਚવਿਤ੍ਥਾਤਿ ਚੁਤਾ, ਨ ਮਤਾ વਾ ਨਟ੍ਠਾ વਾ, ਬੁਦ੍ਧਪਟਿਭਾਗਸ੍ਸ ਪਨ ਸਾવਕਸ੍ਸ ਉਪવਾਦਂ વਤ੍વਾ ਮਹਾਕਸ੍ਸਪਤ੍ਥੇਰੇ ਛਹਿ ਅਭਿਞ੍ਞਾਹਿ ਸੀਹਨਾਦਂ ਨਦਨ੍ਤੇ ਤਸ੍ਸਾ ਕਾਸਾવਾਨਿ ਕਣ੍ਟਕਸਾਖਾ વਿਯ ਕਚ੍ਛੁਸਾਖਾ વਿਯ ਚ ਸਰੀਰਂ ਖਾਦਿਤੁਂ ਆਰਦ੍ਧਾਨਿ, ਤਾਨਿ ਹਾਰੇਤ੍વਾ ਸੇਤਕਾਨਿ ਨਿવਤ੍ਥਕ੍ਖਣੇਯੇવਸ੍ਸਾ ਚਿਤ੍ਤਸ੍ਸਾਦੋ ਉਦਪਾਦੀਤਿ। ਦਸਮਂ।
Idāni attano buddhapaṭibhāgabhāvaṃ dīpento taṃ kiṃ maññasi, āvusotiādimāha? Sattaratananti sattahatthappamāṇaṃ. Nāganti hatthiṃ. Aḍḍhaṭṭharatanaṃ vāti aḍḍharatanena ūnaaṭṭharatanaṃ, purimapādato paṭṭhāya yāva kumbhā vidatthādhikasattahatthubbedhanti attho. Tālapattikāyāti taruṇatālapaṇṇena. Cavitthāti cutā, na matā vā naṭṭhā vā, buddhapaṭibhāgassa pana sāvakassa upavādaṃ vatvā mahākassapatthere chahi abhiññāhi sīhanādaṃ nadante tassā kāsāvāni kaṇṭakasākhā viya kacchusākhā viya ca sarīraṃ khādituṃ āraddhāni, tāni hāretvā setakāni nivatthakkhaṇeyevassā cittassādo udapādīti. Dasamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਉਪਸ੍ਸਯਸੁਤ੍ਤਂ • 10. Upassayasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. ਉਪਸ੍ਸਯਸੁਤ੍ਤવਣ੍ਣਨਾ • 10. Upassayasuttavaṇṇanā
