| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੧੦. ਉਪਸ੍ਸਯਸੁਤ੍ਤવਣ੍ਣਨਾ
10. Upassayasuttavaṇṇanā
੧੫੩. ਲਾਭਸਕ੍ਕਾਰਹੇਤੁਪਿ ਏਕਚ੍ਚੇ ਭਿਕ੍ਖੂ ਭਿਕ੍ਖੁਨੁਪਸ੍ਸਯਂ ਗਨ੍ਤ੍વਾ ਭਿਕ੍ਖੁਨਿਯੋ ਓવਦਨ੍ਤਿ, ਏવਮੇવਂ ਅਯਂ ਪਨ ਥੇਰੋ ਨ ਲਾਭਸਕ੍ਕਾਰਹੇਤੁ ਭਿਕ੍ਖੁਨੁਪਸ੍ਸਯਗਮਨਂ ਯਾਚਤਿ, ਅਥ ਕਸ੍ਮਾਤਿ ਆਹ ‘‘ਕਮ੍ਮਟ੍ਠਾਨਤ੍ਥਿਕਾ’’ਤਿਆਦਿ। ਏਸੋ ਹਿ ਆਨਨ੍ਦਤ੍ਥੇਰੋ ਉਸ੍ਸੁਕ੍ਕਾਪੇਤ੍વਾ ਪਟਿਪਤ੍ਤਿਗੁਣਂ ਦਸ੍ਸੇਨ੍ਤੋ ਯਸ੍ਮਾ ਤਾ ਭਿਕ੍ਖੁਨਿਯੋ ਚਤੁਸਚ੍ਚਕਮ੍ਮਟ੍ਠਾਨਿਕਾ, ਤਸ੍ਮਾ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਦਯਬ੍ਬਯਾਦਿਪਕਾਸਨਿਯਾ ਧਮ੍ਮਕਥਾਯ વਿਪਸ੍ਸਨਾਪਟਿਪਤ੍ਤਿਸਮ੍ਪਦਂ ਦਸ੍ਸੇਸਿ। ਅਨਿਚ੍ਚਾਦਿਲਕ੍ਖਣਾਨਿ ਚੇવ ਉਦਯਬ੍ਬਯਾਦਿਕੇ ਚ ਸਮ੍ਮਾ ਦਸ੍ਸੇਸਿ। ਹਤ੍ਥੇਨ ਗਹੇਤ੍વਾ વਿਯ ਪਚ੍ਚਕ੍ਖਤੋ ਦਸ੍ਸੇਸਿ। ਸਮਾਦਪੇਸੀਤਿ ਤਤ੍ਥ ਲਕ੍ਖਣਾਰਮ੍ਮਣਿਕવਿਪਸ੍ਸਨਂ ਸਮਾਦਪੇਸਿ। ਯਥਾ વੀਥਿਪਟਿਪਨ੍ਨੋ ਹੁਤ੍વਾ ਪવਤ੍ਤਤਿ, ਏવਂ ਗਣ੍ਹਾਪੇਸਿ। ਸਮੁਤ੍ਤੇਜੇਸੀਤਿ વਿਪਸ੍ਸਨਾਯ ਆਰਦ੍ਧਾਯ ਸਙ੍ਖਾਰਾਨਂ ਉਦਯਬ੍ਬਯਾਦੀਸੁ ਉਪਟ੍ਠਹਨ੍ਤੇਸੁ ਯਥਾਕਾਲਂ ਪਗ੍ਗਹਸਮੁਪੇਕ੍ਖਣੇਹਿ ਬੋਜ੍ਝਙ੍ਗਾਨਂ ਅਨੁਪવਤ੍ਤਨੇਨ ਭਾવਨਾਮਜ੍ਝਿਮવੀਥਿਂ ਪਾਪੇਤ੍વਾ ਯਥਾ વਿਪਸ੍ਸਨਾਞਾਣਂ ਸੁਪ੍ਪਸਨ੍ਨਂ ਹੁਤ੍વਾ વਹਤਿ, ਏવਂ ਇਨ੍ਦ੍ਰਿਯਾਨਂ વਿਸਦਭਾવਕਰਣੇਨ વਿਪਸ੍ਸਨਾਚਿਤ੍ਤਂ ਸਮ੍ਮਾ ਉਤ੍ਤੇਜੇਸਿ, ਨਿਬ੍ਬਾਨવਸੇਨ વਾ ਸਮਾਦਪੇਸਿ। ਸਮ੍ਪਹਂਸੇਸੀਤਿ ਤਥਾ ਪવਤ੍ਤਿਯਮਾਨਾਯ વਿਪਸ੍ਸਨਾਯ ਸਮਪ੍ਪવਤ੍ਤਭਾવਨਾવਸੇਨ ਉਪਰਿ ਲਦ੍ਧਬ੍ਬਭਾવਨਾવਸੇਨ ਚਿਤ੍ਤਂ ਸਮ੍ਪਹਂਸੇਸਿ, ਲਦ੍ਧਸ੍ਸਾਦવਸੇਨ ਸੁਟ੍ਠੁ ਤੋਸੇਸਿ। ਏવਮੇਤ੍ਥ ਅਤ੍ਥੋ વੇਦਿਤਬ੍ਬੋ।
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
ਮਨੁਤੇ ਪਰਿਞ੍ਞਾਦਿવਸੇਨ ਸਚ੍ਚਾਨਿ ਬੁਜ੍ਝਤੀਤਿ ਮੁਨਿ। ਤੇਤਿ ਤਂ। ਉਪਯੋਗਤ੍ਥੇ ਹਿ ਇਦਂ ਸਾਮਿવਚਨਂ। ਉਤ੍ਤਰੀਤਿ ਉਪਰਿ, ਤવ ਯਥਾਭੂਤਸਭਾવਤੋ ਪਰਤੋਤਿ ਅਤ੍ਥੋ। ਪਕ੍ਖਪਤਿਤੋ ਅਗਤਿਗਮਨਂ ਅਤਿਰੇਕਓਕਾਸੋ। ਉਪਪਰਿਕ੍ਖੀਤਿ ਅਨੁવਿਚ੍ਚ ਨਿવਾਰਕੋ ਨ ਬਹੁਮਤੋ। ਬੁਦ੍ਧਪਟਿਭਾਗੋ ਥੇਰੋ। ‘‘ਬਾਲਾ ਭਿਕ੍ਖੁਨੀ ਦੁਬ੍ਭਾਸਿਤਂ ਆਹਾ’’ਤਿ ਅવਤ੍વਾ ‘‘ਖਮਥ, ਭਨ੍ਤੇ’’ਤਿ વਦਨ੍ਤੇਨ ਪਕ੍ਖਪਾਤੇਨ વਿਯ વੁਤ੍ਤਂ ਹੋਤੀਤਿ ਆਹ ‘‘ਏਕਾ ਭਿਕ੍ਖੁਨੀ ਨ વਾਰਿਤਾ’’ਤਿਆਦਿ।
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
ਚੁਤਾ ਸਲਿਙ੍ਗਤੋ ਨਟ੍ਠਾ, ਦੇਸਨ੍ਤਰਪਕ੍ਕਮੇਨ ਅਦਸ੍ਸਨਂ ਨ ਗਤਾ। ਕਣ੍ਟਕਸਾਖਾ વਿਯਾਤਿ ਕੁਰਣ੍ਟਕਅਪਾਮਗ੍ਗਕਣ੍ਟਕਲਸਿਕਾਹਿ ਸਾਖਾ વਿਯ।
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
ਉਪਸ੍ਸਯਸੁਤ੍ਤવਣ੍ਣਨਾ ਨਿਟ੍ਠਿਤਾ।
Upassayasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਉਪਸ੍ਸਯਸੁਤ੍ਤਂ • 10. Upassayasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧੦. ਉਪਸ੍ਸਯਸੁਤ੍ਤવਣ੍ਣਨਾ • 10. Upassayasuttavaṇṇanā
