| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
৮. উপস্সুতিসিক্খাপদৰণ্ণনা
8. Upassutisikkhāpadavaṇṇanā
উপস্সুতিন্তি যথা উপকুজ্ঝং ‘‘সমীপকুজ্ঝ’’ন্তি ৰুচ্চতি, তথা উপস্সুতি ‘‘সমীপস্সুতী’’তি ৰেদিতব্বা। যত্থ ঠিতো সুণাতি, তং ঠানন্তি অত্থো। সুতীতি পনেত্থ পরেসং ৰচনসদ্দো চ। সো হি সুয্যতীতি সুতি নাম। উপসুয্যতি ৰা এত্থাতি উপস্সুতি। ওকাসো হি সুতি নাম। ইমেসং সুত্ৰাতি এত্থ ‘‘ৰচন’’ন্তি পাঠসেসো।
Upassutinti yathā upakujjhaṃ ‘‘samīpakujjha’’nti vuccati, tathā upassuti ‘‘samīpassutī’’ti veditabbā. Yattha ṭhito suṇāti, taṃ ṭhānanti attho. Sutīti panettha paresaṃ vacanasaddo ca. So hi suyyatīti suti nāma. Upasuyyati vā etthāti upassuti. Okāso hi suti nāma. Imesaṃ sutvāti ettha ‘‘vacana’’nti pāṭhaseso.
সমুট্ঠানাদীনি অতীতদ্ৰযসদিসানীতি ন গহেতব্বানি। থেয্যসত্থসমুট্ঠানং। সিযা কিরিযং গন্ত্ৰা সৰনে। সিযা অকিরিযং ঠিতট্ঠানং আগন্ত্ৰা ৰদন্তানং অজানাপনৰসেন সমুট্ঠানতো। ‘‘সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদন’’ন্তি লিখিতং।
Samuṭṭhānādīni atītadvayasadisānīti na gahetabbāni. Theyyasatthasamuṭṭhānaṃ. Siyā kiriyaṃ gantvā savane. Siyā akiriyaṃ ṭhitaṭṭhānaṃ āgantvā vadantānaṃ ajānāpanavasena samuṭṭhānato. ‘‘Saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedana’’nti likhitaṃ.
উপস্সুতিসিক্খাপদৰণ্ণনা নিট্ঠিতা।
Upassutisikkhāpadavaṇṇanā niṭṭhitā.
