| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
8. උපස්‌සුතිසික්‌ඛාපදවණ්‌ණනා
8. Upassutisikkhāpadavaṇṇanā
471. අට්‌ඨමෙ – අධිකරණජාතානන්‌ති එතෙහි භණ්‌ඩනාදීහි උප්‌පන්‌නවිවාදාධිකරණානං. උපස්‌සුතින්‌ති සුතිසමීපං; යත්‌ථ ඨත්‌වා සක්‌කා හොති තෙසං වචනං සොතුං, තත්‌ථාති අත්‌ථො. ගච්‌ඡති ආපත්‌ති දුක්‌කටස්‌සාති එත්‌ථ පදවාරෙ පදවාරෙ දුක්‌කටං. මන්‌තෙන්‌තන්‌ති අඤ්‌ඤෙන සද්‌ධිං අඤ්‌ඤස්‌මිං මන්‌තයමානෙ; ‘‘මන්‌තෙන්‌තෙ’’ති වා පාඨො, අයමෙවත්‌ථො.
471. Aṭṭhame – adhikaraṇajātānanti etehi bhaṇḍanādīhi uppannavivādādhikaraṇānaṃ. Upassutinti sutisamīpaṃ; yattha ṭhatvā sakkā hoti tesaṃ vacanaṃ sotuṃ, tatthāti attho. Gacchati āpatti dukkaṭassāti ettha padavāre padavāre dukkaṭaṃ. Mantentanti aññena saddhiṃ aññasmiṃ mantayamāne; ‘‘mantente’’ti vā pāṭho, ayamevattho.
473. වූපසමිස්‌සාමීති උපසමං ගමිස්‌සාමි, කලහං න කරිස්‌සාමි. අත්‌තානං පරිමොචෙස්‌සාමීති මම අකාරකභාවං කථෙත්‌වා අත්‌තානං මොචෙස්‌සාමි. සෙසමෙත්‌ථ උත්‌තානමෙව.
473.Vūpasamissāmīti upasamaṃ gamissāmi, kalahaṃ na karissāmi. Attānaṃ parimocessāmīti mama akārakabhāvaṃ kathetvā attānaṃ mocessāmi. Sesamettha uttānameva.
ථෙය්‍යසත්‌ථසමුට්‌ඨානං – කායචිත්‌තතො කායවාචාචිත්‌තතො ච සමුට්‌ඨාති, සියා කිරියං සොතුකාමතාය ගමනවසෙන, සියා අකිරියං ඨිතට්‌ඨානං ආගන්‌ත්‌වා මන්‌තයමානානං අජානාපනවසෙන, රූපියං අඤ්‌ඤවාදකං උපස්‌සුතීති ඉමානි හි තීණි සික්‌ඛාපදානි එකපරිච්‌ඡෙදානි, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මං, වචීකම්‌මං, අකුසලචිත්‌තං, දුක්‌ඛවෙදනන්‌ති.
Theyyasatthasamuṭṭhānaṃ – kāyacittato kāyavācācittato ca samuṭṭhāti, siyā kiriyaṃ sotukāmatāya gamanavasena, siyā akiriyaṃ ṭhitaṭṭhānaṃ āgantvā mantayamānānaṃ ajānāpanavasena, rūpiyaṃ aññavādakaṃ upassutīti imāni hi tīṇi sikkhāpadāni ekaparicchedāni, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
උපස්‌සුතිසික්‌ඛාපදං අට්‌ඨමං.
Upassutisikkhāpadaṃ aṭṭhamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 8. සහධම්‌මිකවග්‌ගො • 8. Sahadhammikavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 8. උපස්‌සුතිසික්‌ඛාපදවණ්‌ණනා • 8. Upassutisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 8. උපස්‌සුතිසික්‌ඛාපදවණ්‌ණනා • 8. Upassutisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 8. උපස්‌සුතිසික්‌ඛාපදවණ්‌ණනා • 8. Upassutisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 8. උපස්‌සුතිසික්‌ඛාපදං • 8. Upassutisikkhāpadaṃ
