| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
8. උපස්‌සුතිසික්‌ඛාපදවණ්‌ණනා
8. Upassutisikkhāpadavaṇṇanā
සුය්‍යතීති සුති, සද්‌දො, සුතියා සමීපං උපස්‌සුතීති ආහ ‘‘සුතිසමීප’’න්‌ති, සද්‌දසමීපන්‌ති අත්‌ථො. යත්‌ථ පන ඨිතෙන සක්‌කා හොති සද්‌දං සොතුං , තත්‌ථ තිට්‌ඨන්‌තො සද්‌දසමීපෙ තිට්‌ඨති නාමාති ආහ ‘‘යත්‌ථ ඨත්‌වා’’තිආදි. අථ වා උපෙච්‌ච සුය්‍යති එත්‌ථාති උපස්‌සුති, ඨානං, යං ඨානං උපගතෙන සක්‌කා හොති කථෙන්‌තානං සද්‌දං සොතුං, තත්‌ථාති එවම්‌පෙත්‌ථ අත්‌ථො දට්‌ඨබ්‌බො. තුරිතගමනෙපීති පච්‌ඡතො ගච්‌ඡන්‌තස්‌ස පුරතො ගච්‌ඡන්‌තානං සද්‌දසවනත්‌ථං සීඝගමනෙපි. ඔහීයමානෙපීති පුරතො ගච්‌ඡන්‌තස්‌ස පච්‌ඡතො ගච්‌ඡන්‌තානං වචනසවනත්‌ථං ඔහීයමානෙපි.
Suyyatīti suti, saddo, sutiyā samīpaṃ upassutīti āha ‘‘sutisamīpa’’nti, saddasamīpanti attho. Yattha pana ṭhitena sakkā hoti saddaṃ sotuṃ , tattha tiṭṭhanto saddasamīpe tiṭṭhati nāmāti āha ‘‘yattha ṭhatvā’’tiādi. Atha vā upecca suyyati etthāti upassuti, ṭhānaṃ, yaṃ ṭhānaṃ upagatena sakkā hoti kathentānaṃ saddaṃ sotuṃ, tatthāti evampettha attho daṭṭhabbo. Turitagamanepīti pacchato gacchantassa purato gacchantānaṃ saddasavanatthaṃ sīghagamanepi. Ohīyamānepīti purato gacchantassa pacchato gacchantānaṃ vacanasavanatthaṃ ohīyamānepi.
වූපසමිස්‌සාමීති උපසමං ගමිස්‌සාමි, කලහං න කරිස්‌සාමි. අත්‌තානං පරිමොචෙස්‌සාමීති මම අකාරකභාවං කථෙත්‌වා අත්‌තානං පරිමොචෙස්‌සාමි. සියා කිරියන්‌ති කදාචි සොතුකාමතාය ගමනවසෙන සමුට්‌ඨානතො සියා කිරියං. සියා අකිරියන්‌ති කදාචි ඨිතට්‌ඨානං ආගන්‌ත්‌වා මන්‌තයමානානං අජානාපනවසෙන සමුට්‌ඨානතො සියා අකිරියං.
Vūpasamissāmīti upasamaṃ gamissāmi, kalahaṃ na karissāmi. Attānaṃ parimocessāmīti mama akārakabhāvaṃ kathetvā attānaṃ parimocessāmi. Siyā kiriyanti kadāci sotukāmatāya gamanavasena samuṭṭhānato siyā kiriyaṃ. Siyā akiriyanti kadāci ṭhitaṭṭhānaṃ āgantvā mantayamānānaṃ ajānāpanavasena samuṭṭhānato siyā akiriyaṃ.
උපස්‌සුතිසික්‌ඛාපදවණ්‌ණනා නිට්‌ඨිතා.
Upassutisikkhāpadavaṇṇanā niṭṭhitā.
