| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. உபதிஸ்ஸஸுத்தங்
2. Upatissasuttaṃ
236. ஸாவத்தி²யங் விஹரதி. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
236. Sāvatthiyaṃ viharati. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘இத⁴ மய்ஹங், ஆவுஸோ, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘அத்தி² நு கோ² தங் கிஞ்சி லோகஸ்மிங் யஸ்ஸ மே விபரிணாமஞ்ஞதா²பா⁴வா உப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’தி? தஸ்ஸ மய்ஹங், ஆவுஸோ, ஏதத³ஹோஸி – ‘நத்தி² கோ² தங் கிஞ்சி லோகஸ்மிங் யஸ்ஸ மே விபரிணாமஞ்ஞதா²பா⁴வா உப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’’’தி.
‘‘Idha mayhaṃ, āvuso, rahogatassa paṭisallīnassa evaṃ cetaso parivitakko udapādi – ‘atthi nu kho taṃ kiñci lokasmiṃ yassa me vipariṇāmaññathābhāvā uppajjeyyuṃ sokaparidevadukkhadomanassupāyāsā’ti? Tassa mayhaṃ, āvuso, etadahosi – ‘natthi kho taṃ kiñci lokasmiṃ yassa me vipariṇāmaññathābhāvā uppajjeyyuṃ sokaparidevadukkhadomanassupāyāsā’’’ti.
ஏவங் வுத்தே, ஆயஸ்மா ஆனந்தோ³ ஆயஸ்மந்தங் ஸாரிபுத்தங் ஏதத³வோச – ‘‘ஸத்து²பி கோ² தே, ஆவுஸோ ஸாரிபுத்த, விபரிணாமஞ்ஞதா²பா⁴வா நுப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘ஸத்து²பி கோ² மே, ஆவுஸோ, விபரிணாமஞ்ஞதா²பா⁴வா நுப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா, அபி ச மே ஏவமஸ்ஸ – ‘மஹேஸக்கோ² வத, போ⁴, ஸத்தா² அந்தரஹிதோ மஹித்³தி⁴கோ மஹானுபா⁴வோ. ஸசே ஹி ப⁴க³வா சிரங் தீ³க⁴மத்³தா⁴னங் திட்டெ²ய்ய தத³ஸ்ஸ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’ந்தி. ததா² ஹி பனாயஸ்மதோ ஸாரிபுத்தஸ்ஸ தீ³க⁴ரத்தங் அஹங்காரமமங்காரமானானுஸயா ஸுஸமூஹதா. தஸ்மா ஆயஸ்மதோ ஸாரிபுத்தஸ்ஸ ஸத்து²பி விபரிணாமஞ்ஞதா²பா⁴வா நுப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’’தி. து³தியங்.
Evaṃ vutte, āyasmā ānando āyasmantaṃ sāriputtaṃ etadavoca – ‘‘satthupi kho te, āvuso sāriputta, vipariṇāmaññathābhāvā nuppajjeyyuṃ sokaparidevadukkhadomanassupāyāsā’’ti? ‘‘Satthupi kho me, āvuso, vipariṇāmaññathābhāvā nuppajjeyyuṃ sokaparidevadukkhadomanassupāyāsā, api ca me evamassa – ‘mahesakkho vata, bho, satthā antarahito mahiddhiko mahānubhāvo. Sace hi bhagavā ciraṃ dīghamaddhānaṃ tiṭṭheyya tadassa bahujanahitāya bahujanasukhāya lokānukampāya atthāya hitāya sukhāya devamanussāna’nti. Tathā hi panāyasmato sāriputtassa dīgharattaṃ ahaṅkāramamaṅkāramānānusayā susamūhatā. Tasmā āyasmato sāriputtassa satthupi vipariṇāmaññathābhāvā nuppajjeyyuṃ sokaparidevadukkhadomanassupāyāsā’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. உபதிஸ்ஸஸுத்தவண்ணனா • 2. Upatissasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. உபதிஸ்ஸஸுத்தவண்ணனா • 2. Upatissasuttavaṇṇanā
