| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཨུཔཏིསྶསུཏྟཾ
2. Upatissasuttaṃ
༢༣༦. སཱཝཏྠིཡཾ ཝིཧརཏི། ཏཏྲ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘ཨཱཝུསོ བྷིཀྑཝེ’’ཏི། ‘‘ཨཱཝུསོ’’ཏི ཁོ ཏེ བྷིཀྑཱུ ཨཱཡསྨཏོ སཱརིཔུཏྟསྶ པཙྩསྶོསུཾ། ཨཱཡསྨཱ སཱརིཔུཏྟོ ཨེཏདཝོཙ –
236. Sāvatthiyaṃ viharati. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘ཨིདྷ མཡ྄ཧཾ, ཨཱཝུསོ, རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘ཨཏྠི ནུ ཁོ ཏཾ ཀིཉྩི ལོཀསྨིཾ ཡསྶ མེ ཝིཔརིཎཱམཉྙཐཱབྷཱཝཱ ཨུཔྤཛྫེཡྻུཾ སོཀཔརིདེཝདུཀྑདོམནསྶུཔཱཡཱསཱ’ཏི? ཏསྶ མཡ྄ཧཾ, ཨཱཝུསོ, ཨེཏདཧོསི – ‘ནཏྠི ཁོ ཏཾ ཀིཉྩི ལོཀསྨིཾ ཡསྶ མེ ཝིཔརིཎཱམཉྙཐཱབྷཱཝཱ ཨུཔྤཛྫེཡྻུཾ སོཀཔརིདེཝདུཀྑདོམནསྶུཔཱཡཱསཱ’’’ཏི།
‘‘Idha mayhaṃ, āvuso, rahogatassa paṭisallīnassa evaṃ cetaso parivitakko udapādi – ‘atthi nu kho taṃ kiñci lokasmiṃ yassa me vipariṇāmaññathābhāvā uppajjeyyuṃ sokaparidevadukkhadomanassupāyāsā’ti? Tassa mayhaṃ, āvuso, etadahosi – ‘natthi kho taṃ kiñci lokasmiṃ yassa me vipariṇāmaññathābhāvā uppajjeyyuṃ sokaparidevadukkhadomanassupāyāsā’’’ti.
ཨེཝཾ ཝུཏྟེ, ཨཱཡསྨཱ ཨཱནནྡོ ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘སཏྠུཔི ཁོ ཏེ, ཨཱཝུསོ སཱརིཔུཏྟ, ཝིཔརིཎཱམཉྙཐཱབྷཱཝཱ ནུཔྤཛྫེཡྻུཾ སོཀཔརིདེཝདུཀྑདོམནསྶུཔཱཡཱསཱ’’ཏི? ‘‘སཏྠུཔི ཁོ མེ, ཨཱཝུསོ, ཝིཔརིཎཱམཉྙཐཱབྷཱཝཱ ནུཔྤཛྫེཡྻུཾ སོཀཔརིདེཝདུཀྑདོམནསྶུཔཱཡཱསཱ, ཨཔི ཙ མེ ཨེཝམསྶ – ‘མཧེསཀྑོ ཝཏ, བྷོ, སཏྠཱ ཨནྟརཧིཏོ མཧིདྡྷིཀོ མཧཱནུབྷཱཝོ། སཙེ ཧི བྷགཝཱ ཙིརཾ དཱིགྷམདྡྷཱནཾ ཏིཊྛེཡྻ ཏདསྶ བཧུཛནཧིཏཱཡ བཧུཛནསུཁཱཡ ལོཀཱནུཀམྤཱཡ ཨཏྠཱཡ ཧིཏཱཡ སུཁཱཡ དེཝམནུསྶཱན’ནྟི། ཏཐཱ ཧི པནཱཡསྨཏོ སཱརིཔུཏྟསྶ དཱིགྷརཏྟཾ ཨཧངྐཱརམམངྐཱརམཱནཱནུསཡཱ སུསམཱུཧཏཱ། ཏསྨཱ ཨཱཡསྨཏོ སཱརིཔུཏྟསྶ སཏྠུཔི ཝིཔརིཎཱམཉྙཐཱབྷཱཝཱ ནུཔྤཛྫེཡྻུཾ སོཀཔརིདེཝདུཀྑདོམནསྶུཔཱཡཱསཱ’’ཏི། དུཏིཡཾ།
Evaṃ vutte, āyasmā ānando āyasmantaṃ sāriputtaṃ etadavoca – ‘‘satthupi kho te, āvuso sāriputta, vipariṇāmaññathābhāvā nuppajjeyyuṃ sokaparidevadukkhadomanassupāyāsā’’ti? ‘‘Satthupi kho me, āvuso, vipariṇāmaññathābhāvā nuppajjeyyuṃ sokaparidevadukkhadomanassupāyāsā, api ca me evamassa – ‘mahesakkho vata, bho, satthā antarahito mahiddhiko mahānubhāvo. Sace hi bhagavā ciraṃ dīghamaddhānaṃ tiṭṭheyya tadassa bahujanahitāya bahujanasukhāya lokānukampāya atthāya hitāya sukhāya devamanussāna’nti. Tathā hi panāyasmato sāriputtassa dīgharattaṃ ahaṅkāramamaṅkāramānānusayā susamūhatā. Tasmā āyasmato sāriputtassa satthupi vipariṇāmaññathābhāvā nuppajjeyyuṃ sokaparidevadukkhadomanassupāyāsā’’ti. Dutiyaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. ཨུཔཏིསྶསུཏྟཝཎྞནཱ • 2. Upatissasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. ཨུཔཏིསྶསུཏྟཝཎྞནཱ • 2. Upatissasuttavaṇṇanā
