| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. உபட்டா²னஸுத்தவண்ணனா
2. Upaṭṭhānasuttavaṇṇanā
222. து³தியே ஸுபதீதி அயங் கிர கீ²ணாஸவோ, ஸோ தூ³ரே பி⁴க்கா²சாரகா³மங் க³ந்த்வா ஆக³தோ பண்ணஸாலாய பத்தசீவரங் படிஸாமெத்வா அவிதூ³ரே ஜாதஸ்ஸரங் ஓதரித்வா க³த்தானி உதுங் கா³ஹாபெத்வா தி³வாட்டா²னங் ஸம்மஜ்ஜித்வா தத்த² நீசமஞ்சகங் பஞ்ஞாபெத்வா நித்³த³ங் அனோக்கமந்தோவ நிபன்னோ. கீ²ணாஸவஸ்ஸாபி ஹி காயத³ரதோ² ஹோதியேவாதி தஸ்ஸ வினோத³னத்த²ங், தங் ஸந்தா⁴ய ஸுபதீதி வுத்தங். அஜ்ஜ²பா⁴ஸீதி ‘‘அயங் பி⁴க்கு² ஸத்து² ஸந்திகே கம்மட்டா²னங் க³ஹெத்வா தி³வா ஸுபதி, தி³வாஸொப்பஞ்ச நாமேதங் வட்³டி⁴தங் தி³ட்ட²த⁴ம்மிகஸம்பராயிகங் அத்த²ங் நாஸேதீ’’தி மஞ்ஞமானா ‘‘சோதெ³ஸ்ஸாமி ந’’ந்தி சிந்தெத்வா அபா⁴ஸி.
222. Dutiye supatīti ayaṃ kira khīṇāsavo, so dūre bhikkhācāragāmaṃ gantvā āgato paṇṇasālāya pattacīvaraṃ paṭisāmetvā avidūre jātassaraṃ otaritvā gattāni utuṃ gāhāpetvā divāṭṭhānaṃ sammajjitvā tattha nīcamañcakaṃ paññāpetvā niddaṃ anokkamantova nipanno. Khīṇāsavassāpi hi kāyadaratho hotiyevāti tassa vinodanatthaṃ, taṃ sandhāya supatīti vuttaṃ. Ajjhabhāsīti ‘‘ayaṃ bhikkhu satthu santike kammaṭṭhānaṃ gahetvā divā supati, divāsoppañca nāmetaṃ vaḍḍhitaṃ diṭṭhadhammikasamparāyikaṃ atthaṃ nāsetī’’ti maññamānā ‘‘codessāmi na’’nti cintetvā abhāsi.
ஆதுரஸ்ஸாதி ஜராதுரோ ரோகா³துரோ கிலேஸாதுரோதி தயோ ஆதுரா, தேஸு கிலேஸாதுரங் ஸந்தா⁴யேவமாஹ. ஸல்லவித்³த⁴ஸ்ஸாதி ஸவிஸேன ஸத்திஸல்லேன விய அவிஜ்ஜாவிஸவிட்டே²ன தண்ஹாஸல்லேன ஹத³யே வித்³த⁴ஸ்ஸ. ருப்பதோதி க⁴ட்டியமானஸ்ஸ.
Āturassāti jarāturo rogāturo kilesāturoti tayo āturā, tesu kilesāturaṃ sandhāyevamāha. Sallaviddhassāti savisena sattisallena viya avijjāvisaviṭṭhena taṇhāsallena hadaye viddhassa. Ruppatoti ghaṭṭiyamānassa.
இதா³னிஸ்ஸ காமேஸு ஆதீ³னவங் கத²யந்தீ அனிச்சாதிஆதி³மாஹ. தத்த² அஸிதந்தி தண்ஹாதி³ட்டி²னிஸ்ஸயேன அனிஸ்ஸிதங். கஸ்மா பப்³ப³ஜிதங் தபேதி ஏவரூபங் கீ²ணாஸவங் தி³வாஸொப்பங் ந தபதி, தாதி³ஸங் பன கஸ்மா ந தபெஸ்ஸதீதி? வத³தி. தே²ரஸ்ஸேவ வா ஏதங் வசனங், தஸ்மா அயமெத்த² அத்தோ² – ப³த்³தே⁴ஸு முத்தங் அஸிதங் மாதி³ஸங் கீ²ணாஸவபப்³ப³ஜிதங் கஸ்மா தி³வாஸொப்பங் தபே, ந தபெஸ்ஸதீதி? ஸேஸகா³தா²ஸுபி ஏஸேவ நயோ. தே³வதாய ஹி வசனபக்கே² – ‘‘ஏவரூபங் கீ²ணாஸவபப்³ப³ஜிதங் தி³வாஸொப்பங் ந தபதி, தாதி³ஸங் பன கஸ்மா ந தபெஸ்ஸதி? தபெஸ்ஸதியேவா’’தி அத்தோ². தே²ரஸ்ஸ வசனபக்கே² – ‘‘ஏவரூபங் மாதி³ஸங் கீ²ணாஸவபப்³ப³ஜிதங் கஸ்மா தி³வாஸொப்பங் தபே? ந தபதியேவா’’தி அத்தோ². அயங் பனெத்த² அனுத்தானபத³வண்ணனா. வினயாதி வினயேன. ஸமதிக்கமாதி வட்டமூலிகாய அவிஜ்ஜாய ஸமதிக்கமேன. தங் ஞாணந்தி தங் சதுஸச்சஞாணங். பரமோதா³னந்தி பரமபரிஸுத்³த⁴ங். பப்³ப³ஜிதந்தி ஏவரூபேன ஞாணேன ஸமன்னாக³தங் பப்³ப³ஜிதங். விஜ்ஜாயாதி சதுத்த²மக்³க³விஜ்ஜாய. ஆரத்³த⁴வீரியந்தி பக்³க³ஹிதவீரியங் பரிபுண்ணவீரியங். து³தியங்.
Idānissa kāmesu ādīnavaṃ kathayantī aniccātiādimāha. Tattha asitanti taṇhādiṭṭhinissayena anissitaṃ. Kasmā pabbajitaṃ tapeti evarūpaṃ khīṇāsavaṃ divāsoppaṃ na tapati, tādisaṃ pana kasmā na tapessatīti? Vadati. Therasseva vā etaṃ vacanaṃ, tasmā ayamettha attho – baddhesu muttaṃ asitaṃ mādisaṃ khīṇāsavapabbajitaṃ kasmā divāsoppaṃ tape, na tapessatīti? Sesagāthāsupi eseva nayo. Devatāya hi vacanapakkhe – ‘‘evarūpaṃ khīṇāsavapabbajitaṃ divāsoppaṃ na tapati, tādisaṃ pana kasmā na tapessati? Tapessatiyevā’’ti attho. Therassa vacanapakkhe – ‘‘evarūpaṃ mādisaṃ khīṇāsavapabbajitaṃ kasmā divāsoppaṃ tape? Na tapatiyevā’’ti attho. Ayaṃ panettha anuttānapadavaṇṇanā. Vinayāti vinayena. Samatikkamāti vaṭṭamūlikāya avijjāya samatikkamena. Taṃ ñāṇanti taṃ catusaccañāṇaṃ. Paramodānanti paramaparisuddhaṃ. Pabbajitanti evarūpena ñāṇena samannāgataṃ pabbajitaṃ. Vijjāyāti catutthamaggavijjāya. Āraddhavīriyanti paggahitavīriyaṃ paripuṇṇavīriyaṃ. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. உபட்டா²னஸுத்தங் • 2. Upaṭṭhānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. உபட்டா²னஸுத்தவண்ணனா • 2. Upaṭṭhānasuttavaṇṇanā
