| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. উপট্ঠানসুত্তৰণ্ণনা
2. Upaṭṭhānasuttavaṇṇanā
২২২. দুতিযে সুপতীতি অযং কির খীণাসৰো, সো দূরে ভিক্খাচারগামং গন্ত্ৰা আগতো পণ্ণসালায পত্তচীৰরং পটিসামেত্ৰা অৰিদূরে জাতস্সরং ওতরিত্ৰা গত্তানি উতুং গাহাপেত্ৰা দিৰাট্ঠানং সম্মজ্জিত্ৰা তত্থ নীচমঞ্চকং পঞ্ঞাপেত্ৰা নিদ্দং অনোক্কমন্তোৰ নিপন্নো। খীণাসৰস্সাপি হি কাযদরথো হোতিযেৰাতি তস্স ৰিনোদনত্থং, তং সন্ধায সুপতীতি ৰুত্তং। অজ্ঝভাসীতি ‘‘অযং ভিক্খু সত্থু সন্তিকে কম্মট্ঠানং গহেত্ৰা দিৰা সুপতি, দিৰাসোপ্পঞ্চ নামেতং ৰড্ঢিতং দিট্ঠধম্মিকসম্পরাযিকং অত্থং নাসেতী’’তি মঞ্ঞমানা ‘‘চোদেস্সামি ন’’ন্তি চিন্তেত্ৰা অভাসি।
222. Dutiye supatīti ayaṃ kira khīṇāsavo, so dūre bhikkhācāragāmaṃ gantvā āgato paṇṇasālāya pattacīvaraṃ paṭisāmetvā avidūre jātassaraṃ otaritvā gattāni utuṃ gāhāpetvā divāṭṭhānaṃ sammajjitvā tattha nīcamañcakaṃ paññāpetvā niddaṃ anokkamantova nipanno. Khīṇāsavassāpi hi kāyadaratho hotiyevāti tassa vinodanatthaṃ, taṃ sandhāya supatīti vuttaṃ. Ajjhabhāsīti ‘‘ayaṃ bhikkhu satthu santike kammaṭṭhānaṃ gahetvā divā supati, divāsoppañca nāmetaṃ vaḍḍhitaṃ diṭṭhadhammikasamparāyikaṃ atthaṃ nāsetī’’ti maññamānā ‘‘codessāmi na’’nti cintetvā abhāsi.
আতুরস্সাতি জরাতুরো রোগাতুরো কিলেসাতুরোতি তযো আতুরা, তেসু কিলেসাতুরং সন্ধাযেৰমাহ। সল্লৰিদ্ধস্সাতি সৰিসেন সত্তিসল্লেন ৰিয অৰিজ্জাৰিসৰিট্ঠেন তণ্হাসল্লেন হদযে ৰিদ্ধস্স। রুপ্পতোতি ঘট্টিযমানস্স।
Āturassāti jarāturo rogāturo kilesāturoti tayo āturā, tesu kilesāturaṃ sandhāyevamāha. Sallaviddhassāti savisena sattisallena viya avijjāvisaviṭṭhena taṇhāsallena hadaye viddhassa. Ruppatoti ghaṭṭiyamānassa.
ইদানিস্স কামেসু আদীনৰং কথযন্তী অনিচ্চাতিআদিমাহ। তত্থ অসিতন্তি তণ্হাদিট্ঠিনিস্সযেন অনিস্সিতং। কস্মা পব্বজিতং তপেতি এৰরূপং খীণাসৰং দিৰাসোপ্পং ন তপতি, তাদিসং পন কস্মা ন তপেস্সতীতি? ৰদতি। থেরস্সেৰ ৰা এতং ৰচনং, তস্মা অযমেত্থ অত্থো – বদ্ধেসু মুত্তং অসিতং মাদিসং খীণাসৰপব্বজিতং কস্মা দিৰাসোপ্পং তপে, ন তপেস্সতীতি? সেসগাথাসুপি এসেৰ নযো। দেৰতায হি ৰচনপক্খে – ‘‘এৰরূপং খীণাসৰপব্বজিতং দিৰাসোপ্পং ন তপতি, তাদিসং পন কস্মা ন তপেস্সতি? তপেস্সতিযেৰা’’তি অত্থো। থেরস্স ৰচনপক্খে – ‘‘এৰরূপং মাদিসং খীণাসৰপব্বজিতং কস্মা দিৰাসোপ্পং তপে? ন তপতিযেৰা’’তি অত্থো। অযং পনেত্থ অনুত্তানপদৰণ্ণনা। ৰিনযাতি ৰিনযেন। সমতিক্কমাতি ৰট্টমূলিকায অৰিজ্জায সমতিক্কমেন। তং ঞাণন্তি তং চতুসচ্চঞাণং। পরমোদানন্তি পরমপরিসুদ্ধং। পব্বজিতন্তি এৰরূপেন ঞাণেন সমন্নাগতং পব্বজিতং। ৰিজ্জাযাতি চতুত্থমগ্গৰিজ্জায। আরদ্ধৰীরিযন্তি পগ্গহিতৰীরিযং পরিপুণ্ণৰীরিযং। দুতিযং।
Idānissa kāmesu ādīnavaṃ kathayantī aniccātiādimāha. Tattha asitanti taṇhādiṭṭhinissayena anissitaṃ. Kasmā pabbajitaṃ tapeti evarūpaṃ khīṇāsavaṃ divāsoppaṃ na tapati, tādisaṃ pana kasmā na tapessatīti? Vadati. Therasseva vā etaṃ vacanaṃ, tasmā ayamettha attho – baddhesu muttaṃ asitaṃ mādisaṃ khīṇāsavapabbajitaṃ kasmā divāsoppaṃ tape, na tapessatīti? Sesagāthāsupi eseva nayo. Devatāya hi vacanapakkhe – ‘‘evarūpaṃ khīṇāsavapabbajitaṃ divāsoppaṃ na tapati, tādisaṃ pana kasmā na tapessati? Tapessatiyevā’’ti attho. Therassa vacanapakkhe – ‘‘evarūpaṃ mādisaṃ khīṇāsavapabbajitaṃ kasmā divāsoppaṃ tape? Na tapatiyevā’’ti attho. Ayaṃ panettha anuttānapadavaṇṇanā. Vinayāti vinayena. Samatikkamāti vaṭṭamūlikāya avijjāya samatikkamena. Taṃ ñāṇanti taṃ catusaccañāṇaṃ. Paramodānanti paramaparisuddhaṃ. Pabbajitanti evarūpena ñāṇena samannāgataṃ pabbajitaṃ. Vijjāyāti catutthamaggavijjāya. Āraddhavīriyanti paggahitavīriyaṃ paripuṇṇavīriyaṃ. Dutiyaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. উপট্ঠানসুত্তং • 2. Upaṭṭhānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. উপট্ঠানসুত্তৰণ্ণনা • 2. Upaṭṭhānasuttavaṇṇanā
