| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. ឧបដ្ឋានសុត្តវណ្ណនា
2. Upaṭṭhānasuttavaṇṇanā
២២២. កាយទរថោ ហោតិយេវ និយមេន, ន ចិត្តទរថោ តស្ស មគ្គេនេវ សមុគ្ឃាដិតត្តា។
222.Kāyadaratho hotiyeva niyamena, na cittadaratho tassa maggeneva samugghāṭitattā.
ជរាតុរោតិ ជរាភិភវនេន អាតុរោយេវ។ បទទ្វយេបិ ឯសេវ នយោ។ ឧបរិដ្ឋតាយ បរិតោ ទីឃបុថុលតាយ អតិវិយ វិជ្ឈតីតិ សត្តិសល្លគ្គហណំ។ ឯវំ ហិស្ស តណ្ហាសល្លស្ស សទិសតា។ អវិជ្ជាយ បន សម្មោហាបាទនេន ទុក្ខាបាទនេន ច វិសសទិសតា។ រុប្បតោតិ វិការំ អាបាទិយមានស្ស បីឡិយមានស្សាតិ អត្ថោតិ អាហ ‘‘ឃដ្ដិយមានស្សា’’តិ។
Jarāturoti jarābhibhavanena āturoyeva. Padadvayepi eseva nayo. Upariṭṭhatāya parito dīghaputhulatāya ativiya vijjhatīti sattisallaggahaṇaṃ. Evaṃ hissa taṇhāsallassa sadisatā. Avijjāya pana sammohāpādanena dukkhāpādanena ca visasadisatā. Ruppatoti vikāraṃ āpādiyamānassa pīḷiyamānassāti atthoti āha ‘‘ghaṭṭiyamānassā’’ti.
បព្ពជិតន្តិ សសន្តានតោ បព្ពជិតំ វា រាគាទិមលតោ បព្ពជិតំ វា។ តស្មាតិ យស្មា ថេរស្សេវេតំ វចនំ, តស្មា អយំ ឥទានិ វុច្ចមានោ ឯត្ថ គាថាយ អត្ថោ។ ទេវតាយ ហីតិអាទិ វុត្តស្សេវ អត្ថស្ស បាកដករណំ។ ឯត្ថាតិ សេសគាថាសុ។ អត្ថស្ស វុត្តនយត្តា ‘‘អនុត្តានបទវណ្ណនា’’តិ អាហ។ វិនយាតិ ហេតុម្ហិ និស្សក្កវចនន្តិ តស្ស ហេតុម្ហិ ករណវចនេន អត្ថមាហ ‘‘វិនយេនា’’តិ។ តថា ‘‘សមតិក្កមា’’តិ ឯត្ថាបិ។ បរមបរិសុទ្ធំ សំកិលេសសមុច្ឆិន្ទនតោ។ អារទ្ធវីរិយន្តិ សម្ភាវិតវីរិយំ។ សម្ភាវនញ្ចស្ស បគ្គណ្ហនំ បរិបូរណញ្ចាតិ អាហ ‘‘បគ្គហិតវីរិយំ បរិបុណ្ណវីរិយ’’ន្តិ។
Pabbajitanti sasantānato pabbajitaṃ vā rāgādimalato pabbajitaṃ vā. Tasmāti yasmā therassevetaṃ vacanaṃ, tasmā ayaṃ idāni vuccamāno ettha gāthāya attho. Devatāya hītiādi vuttasseva atthassa pākaṭakaraṇaṃ. Etthāti sesagāthāsu. Atthassa vuttanayattā ‘‘anuttānapadavaṇṇanā’’ti āha. Vinayāti hetumhi nissakkavacananti tassa hetumhi karaṇavacanena atthamāha ‘‘vinayenā’’ti. Tathā ‘‘samatikkamā’’ti etthāpi. Paramaparisuddhaṃ saṃkilesasamucchindanato. Āraddhavīriyanti sambhāvitavīriyaṃ. Sambhāvanañcassa paggaṇhanaṃ paripūraṇañcāti āha ‘‘paggahitavīriyaṃ paripuṇṇavīriya’’nti.
ឧបដ្ឋានសុត្តវណ្ណនា និដ្ឋិតា។
Upaṭṭhānasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ២. ឧបដ្ឋានសុត្តំ • 2. Upaṭṭhānasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ២. ឧបដ្ឋានសុត្តវណ្ណនា • 2. Upaṭṭhānasuttavaṇṇanā
