| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. ဥပဋ္ဌာနသုတ္တဝဏ္ဏနာ
2. Upaṭṭhānasuttavaṇṇanā
၂၂၂. ကာယဒရထော ဟောတိယေဝ နိယမေန, န စိတ္တဒရထော တသ္သ မဂ္ဂေနေဝ သမုဂ္ဃာဋိတတ္တာ။
222.Kāyadaratho hotiyeva niyamena, na cittadaratho tassa maggeneva samugghāṭitattā.
ဇရာတုရောတိ ဇရာဘိဘဝနေန အာတုရောယေဝ။ ပဒဒ္ဝယေပိ ဧသေဝ နယော။ ဥပရိဋ္ဌတာယ ပရိတော ဒီဃပုထုလတာယ အတိဝိယ ဝိဇ္ဈတီတိ သတ္တိသလ္လဂ္ဂဟဏံ။ ဧဝံ ဟိသ္သ တဏ္ဟာသလ္လသ္သ သဒိသတာ။ အဝိဇ္ဇာယ ပန သမ္မောဟာပာဒနေန ဒုက္ခာပာဒနေန စ ဝိသသဒိသတာ။ ရုပ္ပတောတိ ဝိကာရံ အာပာဒိယမာနသ္သ ပီဠိယမာနသ္သာတိ အတ္ထောတိ အာဟ ‘‘ဃဋ္ဋိယမာနသ္သာ’’တိ။
Jarāturoti jarābhibhavanena āturoyeva. Padadvayepi eseva nayo. Upariṭṭhatāya parito dīghaputhulatāya ativiya vijjhatīti sattisallaggahaṇaṃ. Evaṃ hissa taṇhāsallassa sadisatā. Avijjāya pana sammohāpādanena dukkhāpādanena ca visasadisatā. Ruppatoti vikāraṃ āpādiyamānassa pīḷiyamānassāti atthoti āha ‘‘ghaṭṭiyamānassā’’ti.
ပဗ္ဗဇိတန္တိ သသန္တာနတော ပဗ္ဗဇိတံ ဝာ ရာဂာဒိမလတော ပဗ္ဗဇိတံ ဝာ။ တသ္မာတိ ယသ္မာ ထေရသ္သေဝေတံ ဝစနံ, တသ္မာ အယံ ဣဒာနိ ဝုစ္စမာနော ဧတ္ထ ဂာထာယ အတ္ထော။ ဒေဝတာယ ဟီတိအာဒိ ဝုတ္တသ္သေဝ အတ္ထသ္သ ပာကဋကရဏံ။ ဧတ္ထာတိ သေသဂာထာသု။ အတ္ထသ္သ ဝုတ္တနယတ္တာ ‘‘အနုတ္တာနပဒဝဏ္ဏနာ’’တိ အာဟ။ ဝိနယာတိ ဟေတုမ္ဟိ နိသ္သက္ကဝစနန္တိ တသ္သ ဟေတုမ္ဟိ ကရဏဝစနေန အတ္ထမာဟ ‘‘ဝိနယေနာ’’တိ။ တထာ ‘‘သမတိက္ကမာ’’တိ ဧတ္ထာပိ။ ပရမပရိသုဒ္ဓံ သံကိလေသသမုစ္ဆိန္ဒနတော။ အာရဒ္ဓဝီရိယန္တိ သမ္ဘာဝိတဝီရိယံ။ သမ္ဘာဝနဉ္စသ္သ ပဂ္ဂဏ္ဟနံ ပရိပူရဏဉ္စာတိ အာဟ ‘‘ပဂ္ဂဟိတဝီရိယံ ပရိပုဏ္ဏဝီရိယ’’န္တိ။
Pabbajitanti sasantānato pabbajitaṃ vā rāgādimalato pabbajitaṃ vā. Tasmāti yasmā therassevetaṃ vacanaṃ, tasmā ayaṃ idāni vuccamāno ettha gāthāya attho. Devatāya hītiādi vuttasseva atthassa pākaṭakaraṇaṃ. Etthāti sesagāthāsu. Atthassa vuttanayattā ‘‘anuttānapadavaṇṇanā’’ti āha. Vinayāti hetumhi nissakkavacananti tassa hetumhi karaṇavacanena atthamāha ‘‘vinayenā’’ti. Tathā ‘‘samatikkamā’’ti etthāpi. Paramaparisuddhaṃ saṃkilesasamucchindanato. Āraddhavīriyanti sambhāvitavīriyaṃ. Sambhāvanañcassa paggaṇhanaṃ paripūraṇañcāti āha ‘‘paggahitavīriyaṃ paripuṇṇavīriya’’nti.
ဥပဋ္ဌာနသုတ္တဝဏ္ဏနာ နိဋ္ဌိတာ။
Upaṭṭhānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ဥပဋ္ဌာနသုတ္တံ • 2. Upaṭṭhānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. ဥပဋ္ဌာနသုတ္တဝဏ္ဏနာ • 2. Upaṭṭhānasuttavaṇṇanā
