| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੨. ਉਪਟ੍ਠਾਨਸੁਤ੍ਤવਣ੍ਣਨਾ
2. Upaṭṭhānasuttavaṇṇanā
੨੨੨. ਦੁਤਿਯੇ ਸੁਪਤੀਤਿ ਅਯਂ ਕਿਰ ਖੀਣਾਸવੋ, ਸੋ ਦੂਰੇ ਭਿਕ੍ਖਾਚਾਰਗਾਮਂ ਗਨ੍ਤ੍વਾ ਆਗਤੋ ਪਣ੍ਣਸਾਲਾਯ ਪਤ੍ਤਚੀવਰਂ ਪਟਿਸਾਮੇਤ੍વਾ ਅવਿਦੂਰੇ ਜਾਤਸ੍ਸਰਂ ਓਤਰਿਤ੍વਾ ਗਤ੍ਤਾਨਿ ਉਤੁਂ ਗਾਹਾਪੇਤ੍વਾ ਦਿવਾਟ੍ਠਾਨਂ ਸਮ੍ਮਜ੍ਜਿਤ੍વਾ ਤਤ੍ਥ ਨੀਚਮਞ੍ਚਕਂ ਪਞ੍ਞਾਪੇਤ੍વਾ ਨਿਦ੍ਦਂ ਅਨੋਕ੍ਕਮਨ੍ਤੋવ ਨਿਪਨ੍ਨੋ। ਖੀਣਾਸવਸ੍ਸਾਪਿ ਹਿ ਕਾਯਦਰਥੋ ਹੋਤਿਯੇવਾਤਿ ਤਸ੍ਸ વਿਨੋਦਨਤ੍ਥਂ, ਤਂ ਸਨ੍ਧਾਯ ਸੁਪਤੀਤਿ વੁਤ੍ਤਂ। ਅਜ੍ਝਭਾਸੀਤਿ ‘‘ਅਯਂ ਭਿਕ੍ਖੁ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍વਾ ਦਿવਾ ਸੁਪਤਿ, ਦਿવਾਸੋਪ੍ਪਞ੍ਚ ਨਾਮੇਤਂ વਡ੍ਢਿਤਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਨਾਸੇਤੀ’’ਤਿ ਮਞ੍ਞਮਾਨਾ ‘‘ਚੋਦੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍વਾ ਅਭਾਸਿ।
222. Dutiye supatīti ayaṃ kira khīṇāsavo, so dūre bhikkhācāragāmaṃ gantvā āgato paṇṇasālāya pattacīvaraṃ paṭisāmetvā avidūre jātassaraṃ otaritvā gattāni utuṃ gāhāpetvā divāṭṭhānaṃ sammajjitvā tattha nīcamañcakaṃ paññāpetvā niddaṃ anokkamantova nipanno. Khīṇāsavassāpi hi kāyadaratho hotiyevāti tassa vinodanatthaṃ, taṃ sandhāya supatīti vuttaṃ. Ajjhabhāsīti ‘‘ayaṃ bhikkhu satthu santike kammaṭṭhānaṃ gahetvā divā supati, divāsoppañca nāmetaṃ vaḍḍhitaṃ diṭṭhadhammikasamparāyikaṃ atthaṃ nāsetī’’ti maññamānā ‘‘codessāmi na’’nti cintetvā abhāsi.
ਆਤੁਰਸ੍ਸਾਤਿ ਜਰਾਤੁਰੋ ਰੋਗਾਤੁਰੋ ਕਿਲੇਸਾਤੁਰੋਤਿ ਤਯੋ ਆਤੁਰਾ, ਤੇਸੁ ਕਿਲੇਸਾਤੁਰਂ ਸਨ੍ਧਾਯੇવਮਾਹ। ਸਲ੍ਲવਿਦ੍ਧਸ੍ਸਾਤਿ ਸવਿਸੇਨ ਸਤ੍ਤਿਸਲ੍ਲੇਨ વਿਯ ਅવਿਜ੍ਜਾવਿਸવਿਟ੍ਠੇਨ ਤਣ੍ਹਾਸਲ੍ਲੇਨ ਹਦਯੇ વਿਦ੍ਧਸ੍ਸ। ਰੁਪ੍ਪਤੋਤਿ ਘਟ੍ਟਿਯਮਾਨਸ੍ਸ।
Āturassāti jarāturo rogāturo kilesāturoti tayo āturā, tesu kilesāturaṃ sandhāyevamāha. Sallaviddhassāti savisena sattisallena viya avijjāvisaviṭṭhena taṇhāsallena hadaye viddhassa. Ruppatoti ghaṭṭiyamānassa.
ਇਦਾਨਿਸ੍ਸ ਕਾਮੇਸੁ ਆਦੀਨવਂ ਕਥਯਨ੍ਤੀ ਅਨਿਚ੍ਚਾਤਿਆਦਿਮਾਹ। ਤਤ੍ਥ ਅਸਿਤਨ੍ਤਿ ਤਣ੍ਹਾਦਿਟ੍ਠਿਨਿਸ੍ਸਯੇਨ ਅਨਿਸ੍ਸਿਤਂ। ਕਸ੍ਮਾ ਪਬ੍ਬਜਿਤਂ ਤਪੇਤਿ ਏવਰੂਪਂ ਖੀਣਾਸવਂ ਦਿવਾਸੋਪ੍ਪਂ ਨ ਤਪਤਿ, ਤਾਦਿਸਂ ਪਨ ਕਸ੍ਮਾ ਨ ਤਪੇਸ੍ਸਤੀਤਿ? વਦਤਿ। ਥੇਰਸ੍ਸੇવ વਾ ਏਤਂ વਚਨਂ, ਤਸ੍ਮਾ ਅਯਮੇਤ੍ਥ ਅਤ੍ਥੋ – ਬਦ੍ਧੇਸੁ ਮੁਤ੍ਤਂ ਅਸਿਤਂ ਮਾਦਿਸਂ ਖੀਣਾਸવਪਬ੍ਬਜਿਤਂ ਕਸ੍ਮਾ ਦਿવਾਸੋਪ੍ਪਂ ਤਪੇ, ਨ ਤਪੇਸ੍ਸਤੀਤਿ? ਸੇਸਗਾਥਾਸੁਪਿ ਏਸੇવ ਨਯੋ। ਦੇવਤਾਯ ਹਿ વਚਨਪਕ੍ਖੇ – ‘‘ਏવਰੂਪਂ ਖੀਣਾਸવਪਬ੍ਬਜਿਤਂ ਦਿવਾਸੋਪ੍ਪਂ ਨ ਤਪਤਿ, ਤਾਦਿਸਂ ਪਨ ਕਸ੍ਮਾ ਨ ਤਪੇਸ੍ਸਤਿ? ਤਪੇਸ੍ਸਤਿਯੇવਾ’’ਤਿ ਅਤ੍ਥੋ। ਥੇਰਸ੍ਸ વਚਨਪਕ੍ਖੇ – ‘‘ਏવਰੂਪਂ ਮਾਦਿਸਂ ਖੀਣਾਸવਪਬ੍ਬਜਿਤਂ ਕਸ੍ਮਾ ਦਿવਾਸੋਪ੍ਪਂ ਤਪੇ? ਨ ਤਪਤਿਯੇવਾ’’ਤਿ ਅਤ੍ਥੋ। ਅਯਂ ਪਨੇਤ੍ਥ ਅਨੁਤ੍ਤਾਨਪਦવਣ੍ਣਨਾ। વਿਨਯਾਤਿ વਿਨਯੇਨ। ਸਮਤਿਕ੍ਕਮਾਤਿ વਟ੍ਟਮੂਲਿਕਾਯ ਅવਿਜ੍ਜਾਯ ਸਮਤਿਕ੍ਕਮੇਨ। ਤਂ ਞਾਣਨ੍ਤਿ ਤਂ ਚਤੁਸਚ੍ਚਞਾਣਂ। ਪਰਮੋਦਾਨਨ੍ਤਿ ਪਰਮਪਰਿਸੁਦ੍ਧਂ। ਪਬ੍ਬਜਿਤਨ੍ਤਿ ਏવਰੂਪੇਨ ਞਾਣੇਨ ਸਮਨ੍ਨਾਗਤਂ ਪਬ੍ਬਜਿਤਂ। વਿਜ੍ਜਾਯਾਤਿ ਚਤੁਤ੍ਥਮਗ੍ਗવਿਜ੍ਜਾਯ। ਆਰਦ੍ਧવੀਰਿਯਨ੍ਤਿ ਪਗ੍ਗਹਿਤવੀਰਿਯਂ ਪਰਿਪੁਣ੍ਣવੀਰਿਯਂ। ਦੁਤਿਯਂ।
Idānissa kāmesu ādīnavaṃ kathayantī aniccātiādimāha. Tattha asitanti taṇhādiṭṭhinissayena anissitaṃ. Kasmā pabbajitaṃ tapeti evarūpaṃ khīṇāsavaṃ divāsoppaṃ na tapati, tādisaṃ pana kasmā na tapessatīti? Vadati. Therasseva vā etaṃ vacanaṃ, tasmā ayamettha attho – baddhesu muttaṃ asitaṃ mādisaṃ khīṇāsavapabbajitaṃ kasmā divāsoppaṃ tape, na tapessatīti? Sesagāthāsupi eseva nayo. Devatāya hi vacanapakkhe – ‘‘evarūpaṃ khīṇāsavapabbajitaṃ divāsoppaṃ na tapati, tādisaṃ pana kasmā na tapessati? Tapessatiyevā’’ti attho. Therassa vacanapakkhe – ‘‘evarūpaṃ mādisaṃ khīṇāsavapabbajitaṃ kasmā divāsoppaṃ tape? Na tapatiyevā’’ti attho. Ayaṃ panettha anuttānapadavaṇṇanā. Vinayāti vinayena. Samatikkamāti vaṭṭamūlikāya avijjāya samatikkamena. Taṃ ñāṇanti taṃ catusaccañāṇaṃ. Paramodānanti paramaparisuddhaṃ. Pabbajitanti evarūpena ñāṇena samannāgataṃ pabbajitaṃ. Vijjāyāti catutthamaggavijjāya. Āraddhavīriyanti paggahitavīriyaṃ paripuṇṇavīriyaṃ. Dutiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੨. ਉਪਟ੍ਠਾਨਸੁਤ੍ਤਂ • 2. Upaṭṭhānasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੨. ਉਪਟ੍ਠਾਨਸੁਤ੍ਤવਣ੍ਣਨਾ • 2. Upaṭṭhānasuttavaṇṇanā
