| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. உபவாணஸுத்தங்
6. Upavāṇasuttaṃ
26. ஸாவத்தி²யங் விஹரதி. அத² கோ² ஆயஸ்மா உபவாணோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா உபவாணோ ப⁴க³வந்தங் ஏதத³வோச –
26. Sāvatthiyaṃ viharati. Atha kho āyasmā upavāṇo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upavāṇo bhagavantaṃ etadavoca –
‘‘ஸந்தி, ப⁴ந்தே, ஏகே ஸமணப்³ராஹ்மணா ஸயங்கதங் து³க்க²ங் பஞ்ஞபெந்தி. ஸந்தி பன, ப⁴ந்தே, ஏகே ஸமணப்³ராஹ்மணா பரங்கதங் து³க்க²ங் பஞ்ஞபெந்தி. ஸந்தி பன, ப⁴ந்தே, ஏகே ஸமணப்³ராஹ்மணா ஸயங்கதஞ்ச பரங்கதஞ்ச து³க்க²ங் பஞ்ஞபெந்தி. ஸந்தி பன, ப⁴ந்தே, ஏகே ஸமணப்³ராஹ்மணா அஸயங்காரங் அபரங்காரங் அதி⁴ச்சஸமுப்பன்னங் து³க்க²ங் பஞ்ஞபெந்தி. இத⁴ நோ, ப⁴ந்தே, ப⁴க³வா கிங்வாதீ³ கிமக்கா²யீ கத²ங் ப்³யாகரமானா ச மயங் வுத்தவாதி³னோ சேவ ப⁴க³வதோ அஸ்ஸாம, ந ச ப⁴க³வந்தங் அபூ⁴தேன அப்³பா⁴சிக்கெ²ய்யாம, த⁴ம்மஸ்ஸ சானுத⁴ம்மங் ப்³யாகரெய்யாம, ந ச கோசி ஸஹத⁴ம்மிகோ வாதா³னுபாதோ கா³ரய்ஹங் டா²னங் ஆக³ச்செ²ய்யா’’தி?
‘‘Santi, bhante, eke samaṇabrāhmaṇā sayaṃkataṃ dukkhaṃ paññapenti. Santi pana, bhante, eke samaṇabrāhmaṇā paraṃkataṃ dukkhaṃ paññapenti. Santi pana, bhante, eke samaṇabrāhmaṇā sayaṃkatañca paraṃkatañca dukkhaṃ paññapenti. Santi pana, bhante, eke samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti. Idha no, bhante, bhagavā kiṃvādī kimakkhāyī kathaṃ byākaramānā ca mayaṃ vuttavādino ceva bhagavato assāma, na ca bhagavantaṃ abhūtena abbhācikkheyyāma, dhammassa cānudhammaṃ byākareyyāma, na ca koci sahadhammiko vādānupāto gārayhaṃ ṭhānaṃ āgaccheyyā’’ti?
‘‘படிச்சஸமுப்பன்னங் கோ², உபவாண, து³க்க²ங் வுத்தங் மயா. கிங் படிச்ச? ப²ஸ்ஸங் படிச்ச. இதி வத³ங் வுத்தவாதீ³ சேவ மே அஸ்ஸ, ந ச மங் அபூ⁴தேன அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி ஸஹத⁴ம்மிகோ வாதா³னுபாதோ கா³ரய்ஹங் டா²னங் ஆக³ச்செ²ய்ய.
‘‘Paṭiccasamuppannaṃ kho, upavāṇa, dukkhaṃ vuttaṃ mayā. Kiṃ paṭicca? Phassaṃ paṭicca. Iti vadaṃ vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānupāto gārayhaṃ ṭhānaṃ āgaccheyya.
‘‘தத்ர, உபவாண, யே தே ஸமணப்³ராஹ்மணா ஸயங்கதங் து³க்க²ங் பஞ்ஞபெந்தி, தத³பி ப²ஸ்ஸபச்சயா. யேபி தே…பே॰… யேபி தே…பே॰… யேபி தே ஸமணப்³ராஹ்மணா அஸயங்காரங் அபரங்காரங் அதி⁴ச்சஸமுப்பன்னங் து³க்க²ங் பஞ்ஞபெந்தி தத³பி ப²ஸ்ஸபச்சயா.
‘‘Tatra, upavāṇa, ye te samaṇabrāhmaṇā sayaṃkataṃ dukkhaṃ paññapenti, tadapi phassapaccayā. Yepi te…pe… yepi te…pe… yepi te samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti tadapi phassapaccayā.
‘‘தத்ர , உபவாண, யே தே ஸமணப்³ராஹ்மணா ஸயங்கதங் து³க்க²ங் பஞ்ஞபெந்தி, தே வத அஞ்ஞ ப²ஸ்ஸா படிஸங்வேதி³ஸ்ஸந்தீதி நேதங் டா²னங் விஜ்ஜதி. யேபி தே…பே॰… யேபி தே…பே॰… யேபி தே ஸமணப்³ராஹ்மணா அஸயங்காரங் அபரங்காரங் அதி⁴ச்சஸமுப்பன்னங் து³க்க²ங் பஞ்ஞபெந்தி, தே வத அஞ்ஞத்ர ப²ஸ்ஸா படிஸங்வேதி³ஸ்ஸந்தீதி நேதங் டா²னங் விஜ்ஜதீ’’தி. ச²ட்ட²ங்.
‘‘Tatra , upavāṇa, ye te samaṇabrāhmaṇā sayaṃkataṃ dukkhaṃ paññapenti, te vata añña phassā paṭisaṃvedissantīti netaṃ ṭhānaṃ vijjati. Yepi te…pe… yepi te…pe… yepi te samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjatī’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பூ⁴மிஜஸுத்தவண்ணனா • 5. Bhūmijasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. உபவாணஸுத்தவண்ணனா • 6. Upavāṇasuttavaṇṇanā
