| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. উপৰাণসুত্তং
6. Upavāṇasuttaṃ
২৬. সাৰত্থিযং ৰিহরতি। অথ খো আযস্মা উপৰাণো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা উপৰাণো ভগৰন্তং এতদৰোচ –
26. Sāvatthiyaṃ viharati. Atha kho āyasmā upavāṇo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upavāṇo bhagavantaṃ etadavoca –
‘‘সন্তি, ভন্তে, একে সমণব্রাহ্মণা সযংকতং দুক্খং পঞ্ঞপেন্তি। সন্তি পন, ভন্তে, একে সমণব্রাহ্মণা পরংকতং দুক্খং পঞ্ঞপেন্তি। সন্তি পন, ভন্তে, একে সমণব্রাহ্মণা সযংকতঞ্চ পরংকতঞ্চ দুক্খং পঞ্ঞপেন্তি। সন্তি পন, ভন্তে, একে সমণব্রাহ্মণা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি। ইধ নো, ভন্তে, ভগৰা কিংৰাদী কিমক্খাযী কথং ব্যাকরমানা চ মযং ৰুত্তৰাদিনো চেৰ ভগৰতো অস্সাম, ন চ ভগৰন্তং অভূতেন অব্ভাচিক্খেয্যাম, ধম্মস্স চানুধম্মং ব্যাকরেয্যাম, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্যা’’তি?
‘‘Santi, bhante, eke samaṇabrāhmaṇā sayaṃkataṃ dukkhaṃ paññapenti. Santi pana, bhante, eke samaṇabrāhmaṇā paraṃkataṃ dukkhaṃ paññapenti. Santi pana, bhante, eke samaṇabrāhmaṇā sayaṃkatañca paraṃkatañca dukkhaṃ paññapenti. Santi pana, bhante, eke samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti. Idha no, bhante, bhagavā kiṃvādī kimakkhāyī kathaṃ byākaramānā ca mayaṃ vuttavādino ceva bhagavato assāma, na ca bhagavantaṃ abhūtena abbhācikkheyyāma, dhammassa cānudhammaṃ byākareyyāma, na ca koci sahadhammiko vādānupāto gārayhaṃ ṭhānaṃ āgaccheyyā’’ti?
‘‘পটিচ্চসমুপ্পন্নং খো, উপৰাণ, দুক্খং ৰুত্তং মযা। কিং পটিচ্চ? ফস্সং পটিচ্চ। ইতি ৰদং ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্য।
‘‘Paṭiccasamuppannaṃ kho, upavāṇa, dukkhaṃ vuttaṃ mayā. Kiṃ paṭicca? Phassaṃ paṭicca. Iti vadaṃ vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānupāto gārayhaṃ ṭhānaṃ āgaccheyya.
‘‘তত্র, উপৰাণ, যে তে সমণব্রাহ্মণা সযংকতং দুক্খং পঞ্ঞপেন্তি, তদপি ফস্সপচ্চযা। যেপি তে…পে॰… যেপি তে…পে॰… যেপি তে সমণব্রাহ্মণা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি তদপি ফস্সপচ্চযা।
‘‘Tatra, upavāṇa, ye te samaṇabrāhmaṇā sayaṃkataṃ dukkhaṃ paññapenti, tadapi phassapaccayā. Yepi te…pe… yepi te…pe… yepi te samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti tadapi phassapaccayā.
‘‘তত্র , উপৰাণ, যে তে সমণব্রাহ্মণা সযংকতং দুক্খং পঞ্ঞপেন্তি, তে ৰত অঞ্ঞ ফস্সা পটিসংৰেদিস্সন্তীতি নেতং ঠানং ৰিজ্জতি। যেপি তে…পে॰… যেপি তে…পে॰… যেপি তে সমণব্রাহ্মণা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতী’’তি। ছট্ঠং।
‘‘Tatra , upavāṇa, ye te samaṇabrāhmaṇā sayaṃkataṃ dukkhaṃ paññapenti, te vata añña phassā paṭisaṃvedissantīti netaṃ ṭhānaṃ vijjati. Yepi te…pe… yepi te…pe… yepi te samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjatī’’ti. Chaṭṭhaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. ভূমিজসুত্তৰণ্ণনা • 5. Bhūmijasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. উপৰাণসুত্তৰণ্ণনা • 6. Upavāṇasuttavaṇṇanā
