| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. উপৰানসুত্তং
8. Upavānasuttaṃ
১৮৯. একং সমযং আযস্মা চ উপৰানো আযস্মা চ সারিপুত্তো কোসম্বিযং ৰিহরন্তি ঘোসিতারামে। অথ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেনাযস্মা উপৰানো তেনুপসঙ্কমি; উপসঙ্কমিত্ৰা আযস্মতা উপৰানেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো আযস্মা সারিপুত্তো আযস্মন্তং উপৰানং এতদৰোচ –
189. Ekaṃ samayaṃ āyasmā ca upavāno āyasmā ca sāriputto kosambiyaṃ viharanti ghositārāme. Atha kho āyasmā sāriputto sāyanhasamayaṃ paṭisallānā vuṭṭhito yenāyasmā upavāno tenupasaṅkami; upasaṅkamitvā āyasmatā upavānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā sāriputto āyasmantaṃ upavānaṃ etadavoca –
‘‘জানেয্য নু খো, আৰুসো উপৰান, ভিক্খু ‘পচ্চত্তং যোনিসোমনসিকারা এৰং সুসমারদ্ধা মে সত্ত বোজ্ঝঙ্গা ফাসুৰিহারায সংৰত্তন্তী’’’তি? ‘‘জানেয্য খো, আৰুসো সারিপুত্ত , ভিক্খু ‘পচ্চত্তং যোনিসোমনসিকারা এৰং সুসমারদ্ধা মে সত্ত বোজ্ঝঙ্গা ফাসুৰিহারায সংৰত্তন্তী’’’তি।
‘‘Jāneyya nu kho, āvuso upavāna, bhikkhu ‘paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantī’’’ti? ‘‘Jāneyya kho, āvuso sāriputta , bhikkhu ‘paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantī’’’ti.
‘‘সতিসম্বোজ্ঝঙ্গং খো, আৰুসো, ভিক্খু আরব্ভমানো পজানাতি ‘চিত্তঞ্চ মে সুৰিমুত্তং, থিনমিদ্ধঞ্চ মে সুসমূহতং, উদ্ধচ্চকুক্কুচ্চঞ্চ মে সুপ্পটিৰিনীতং, আরদ্ধঞ্চ মে ৰীরিযং, অট্ঠিংকত্ৰা মনসি করোমি, নো চ লীন’ন্তি…পে॰… উপেক্খাসম্বোজ্ঝঙ্গং আৰুসো, ভিক্খু আরব্ভমানো পজানাতি ‘চিত্তঞ্চ মে সুৰিমুত্তং, থিনমিদ্ধঞ্চ মে সুসমূহতং, উদ্ধচ্চকুক্কুচ্চঞ্চ মে সুপ্পটিৰিনীতং, আরদ্ধঞ্চ মে ৰীরিযং, অট্ঠিংকত্ৰা মনসি করোমি, নো চ লীন’ন্তি। এৰং খো, আৰুসো সারিপুত্ত, ভিক্খু জানেয্য ‘পচ্চত্তং যোনিসোমনসিকারা এৰং সুসমারদ্ধা মে সত্ত বোজ্ঝঙ্গা ফাসুৰিহারায সংৰত্তন্তী’’তি। অট্ঠমং।
‘‘Satisambojjhaṅgaṃ kho, āvuso, bhikkhu ārabbhamāno pajānāti ‘cittañca me suvimuttaṃ, thinamiddhañca me susamūhataṃ, uddhaccakukkuccañca me suppaṭivinītaṃ, āraddhañca me vīriyaṃ, aṭṭhiṃkatvā manasi karomi, no ca līna’nti…pe… upekkhāsambojjhaṅgaṃ āvuso, bhikkhu ārabbhamāno pajānāti ‘cittañca me suvimuttaṃ, thinamiddhañca me susamūhataṃ, uddhaccakukkuccañca me suppaṭivinītaṃ, āraddhañca me vīriyaṃ, aṭṭhiṃkatvā manasi karomi, no ca līna’nti. Evaṃ kho, āvuso sāriputta, bhikkhu jāneyya ‘paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantī’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. উপৰানসুত্তৰণ্ণনা • 8. Upavānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. উপৰানসুত্তৰণ্ণনা • 8. Upavānasuttavaṇṇanā
