| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. උපවාණසුත්‌තං
6. Upavāṇasuttaṃ
26. සාවත්‌ථියං විහරති. අථ ඛො ආයස්‌මා උපවාණො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා උපවාණො භගවන්‌තං එතදවොච –
26. Sāvatthiyaṃ viharati. Atha kho āyasmā upavāṇo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upavāṇo bhagavantaṃ etadavoca –
‘‘සන්‌ති, භන්‌තෙ, එකෙ සමණබ්‍රාහ්‌මණා සයංකතං දුක්‌ඛං පඤ්‌ඤපෙන්‌ති. සන්‌ති පන, භන්‌තෙ, එකෙ සමණබ්‍රාහ්‌මණා පරංකතං දුක්‌ඛං පඤ්‌ඤපෙන්‌ති. සන්‌ති පන, භන්‌තෙ, එකෙ සමණබ්‍රාහ්‌මණා සයංකතඤ්‌ච පරංකතඤ්‌ච දුක්‌ඛං පඤ්‌ඤපෙන්‌ති. සන්‌ති පන, භන්‌තෙ, එකෙ සමණබ්‍රාහ්‌මණා අසයංකාරං අපරංකාරං අධිච්‌චසමුප්‌පන්‌නං දුක්‌ඛං පඤ්‌ඤපෙන්‌ති. ඉධ නො, භන්‌තෙ, භගවා කිංවාදී කිමක්‌ඛායී කථං බ්‍යාකරමානා ච මයං වුත්‌තවාදිනො චෙව භගවතො අස්‌සාම, න ච භගවන්‌තං අභූතෙන අබ්‌භාචික්‌ඛෙය්‍යාම, ධම්‌මස්‌ස චානුධම්‌මං බ්‍යාකරෙය්‍යාම, න ච කොචි සහධම්‌මිකො වාදානුපාතො ගාරය්‌හං ඨානං ආගච්‌ඡෙය්‍යා’’ති?
‘‘Santi, bhante, eke samaṇabrāhmaṇā sayaṃkataṃ dukkhaṃ paññapenti. Santi pana, bhante, eke samaṇabrāhmaṇā paraṃkataṃ dukkhaṃ paññapenti. Santi pana, bhante, eke samaṇabrāhmaṇā sayaṃkatañca paraṃkatañca dukkhaṃ paññapenti. Santi pana, bhante, eke samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti. Idha no, bhante, bhagavā kiṃvādī kimakkhāyī kathaṃ byākaramānā ca mayaṃ vuttavādino ceva bhagavato assāma, na ca bhagavantaṃ abhūtena abbhācikkheyyāma, dhammassa cānudhammaṃ byākareyyāma, na ca koci sahadhammiko vādānupāto gārayhaṃ ṭhānaṃ āgaccheyyā’’ti?
‘‘පටිච්‌චසමුප්‌පන්‌නං ඛො, උපවාණ, දුක්‌ඛං වුත්‌තං මයා. කිං පටිච්‌ච? ඵස්‌සං පටිච්‌ච. ඉති වදං වුත්‌තවාදී චෙව මෙ අස්‌ස, න ච මං අභූතෙන අබ්‌භාචික්‌ඛෙය්‍ය, ධම්‌මස්‌ස චානුධම්‌මං බ්‍යාකරෙය්‍ය, න ච කොචි සහධම්‌මිකො වාදානුපාතො ගාරය්‌හං ඨානං ආගච්‌ඡෙය්‍ය.
‘‘Paṭiccasamuppannaṃ kho, upavāṇa, dukkhaṃ vuttaṃ mayā. Kiṃ paṭicca? Phassaṃ paṭicca. Iti vadaṃ vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānupāto gārayhaṃ ṭhānaṃ āgaccheyya.
‘‘තත්‍ර, උපවාණ, යෙ තෙ සමණබ්‍රාහ්‌මණා සයංකතං දුක්‌ඛං පඤ්‌ඤපෙන්‌ති, තදපි ඵස්‌සපච්‌චයා. යෙපි තෙ…පෙ.… යෙපි තෙ…පෙ.… යෙපි තෙ සමණබ්‍රාහ්‌මණා අසයංකාරං අපරංකාරං අධිච්‌චසමුප්‌පන්‌නං දුක්‌ඛං පඤ්‌ඤපෙන්‌ති තදපි ඵස්‌සපච්‌චයා.
‘‘Tatra, upavāṇa, ye te samaṇabrāhmaṇā sayaṃkataṃ dukkhaṃ paññapenti, tadapi phassapaccayā. Yepi te…pe… yepi te…pe… yepi te samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti tadapi phassapaccayā.
‘‘තත්‍ර , උපවාණ, යෙ තෙ සමණබ්‍රාහ්‌මණා සයංකතං දුක්‌ඛං පඤ්‌ඤපෙන්‌ති, තෙ වත අඤ්‌ඤ ඵස්‌සා පටිසංවෙදිස්‌සන්‌තීති නෙතං ඨානං විජ්‌ජති. යෙපි තෙ…පෙ.… යෙපි තෙ…පෙ.… යෙපි තෙ සමණබ්‍රාහ්‌මණා අසයංකාරං අපරංකාරං අධිච්‌චසමුප්‌පන්‌නං දුක්‌ඛං පඤ්‌ඤපෙන්‌ති, තෙ වත අඤ්‌ඤත්‍ර ඵස්‌සා පටිසංවෙදිස්‌සන්‌තීති නෙතං ඨානං විජ්‌ජතී’’ති. ඡට්‌ඨං.
‘‘Tatra , upavāṇa, ye te samaṇabrāhmaṇā sayaṃkataṃ dukkhaṃ paññapenti, te vata añña phassā paṭisaṃvedissantīti netaṃ ṭhānaṃ vijjati. Yepi te…pe… yepi te…pe… yepi te samaṇabrāhmaṇā asayaṃkāraṃ aparaṃkāraṃ adhiccasamuppannaṃ dukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjatī’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. භූමිජසුත්‌තවණ්‌ණනා • 5. Bhūmijasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. උපවාණසුත්‌තවණ්‌ණනා • 6. Upavāṇasuttavaṇṇanā
