| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. උපවානසුත්‌තං
8. Upavānasuttaṃ
189. එකං සමයං ආයස්‌මා ච උපවානො ආයස්‌මා ච සාරිපුත්‌තො කොසම්‌බියං විහරන්‌ති ඝොසිතාරාමෙ. අථ ඛො ආයස්‌මා සාරිපුත්‌තො සායන්‌හසමයං පටිසල්‌ලානා වුට්‌ඨිතො යෙනායස්‌මා උපවානො තෙනුපසඞ්‌කමි; උපසඞ්‌කමිත්‌වා ආයස්‌මතා උපවානෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා සාරිපුත්‌තො ආයස්‌මන්‌තං උපවානං එතදවොච –
189. Ekaṃ samayaṃ āyasmā ca upavāno āyasmā ca sāriputto kosambiyaṃ viharanti ghositārāme. Atha kho āyasmā sāriputto sāyanhasamayaṃ paṭisallānā vuṭṭhito yenāyasmā upavāno tenupasaṅkami; upasaṅkamitvā āyasmatā upavānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā sāriputto āyasmantaṃ upavānaṃ etadavoca –
‘‘ජානෙය්‍ය නු ඛො, ආවුසො උපවාන, භික්‌ඛු ‘පච්‌චත්‌තං යොනිසොමනසිකාරා එවං සුසමාරද්‌ධා මෙ සත්‌ත බොජ්‌ඣඞ්‌ගා ඵාසුවිහාරාය සංවත්‌තන්‌තී’’’ති? ‘‘ජානෙය්‍ය ඛො, ආවුසො සාරිපුත්‌ත , භික්‌ඛු ‘පච්‌චත්‌තං යොනිසොමනසිකාරා එවං සුසමාරද්‌ධා මෙ සත්‌ත බොජ්‌ඣඞ්‌ගා ඵාසුවිහාරාය සංවත්‌තන්‌තී’’’ති.
‘‘Jāneyya nu kho, āvuso upavāna, bhikkhu ‘paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantī’’’ti? ‘‘Jāneyya kho, āvuso sāriputta , bhikkhu ‘paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantī’’’ti.
‘‘සතිසම්‌බොජ්‌ඣඞ්‌ගං ඛො, ආවුසො, භික්‌ඛු ආරබ්‌භමානො පජානාති ‘චිත්‌තඤ්‌ච මෙ සුවිමුත්‌තං, ථිනමිද්‌ධඤ්‌ච මෙ සුසමූහතං, උද්‌ධච්‌චකුක්‌කුච්‌චඤ්‌ච මෙ සුප්‌පටිවිනීතං, ආරද්‌ධඤ්‌ච මෙ වීරියං, අට්‌ඨිංකත්‌වා මනසි කරොමි, නො ච ලීන’න්‌ති…පෙ.… උපෙක්‌ඛාසම්‌බොජ්‌ඣඞ්‌ගං ආවුසො, භික්‌ඛු ආරබ්‌භමානො පජානාති ‘චිත්‌තඤ්‌ච මෙ සුවිමුත්‌තං, ථිනමිද්‌ධඤ්‌ච මෙ සුසමූහතං, උද්‌ධච්‌චකුක්‌කුච්‌චඤ්‌ච මෙ සුප්‌පටිවිනීතං, ආරද්‌ධඤ්‌ච මෙ වීරියං, අට්‌ඨිංකත්‌වා මනසි කරොමි, නො ච ලීන’න්‌ති. එවං ඛො, ආවුසො සාරිපුත්‌ත, භික්‌ඛු ජානෙය්‍ය ‘පච්‌චත්‌තං යොනිසොමනසිකාරා එවං සුසමාරද්‌ධා මෙ සත්‌ත බොජ්‌ඣඞ්‌ගා ඵාසුවිහාරාය සංවත්‌තන්‌තී’’ති. අට්‌ඨමං.
‘‘Satisambojjhaṅgaṃ kho, āvuso, bhikkhu ārabbhamāno pajānāti ‘cittañca me suvimuttaṃ, thinamiddhañca me susamūhataṃ, uddhaccakukkuccañca me suppaṭivinītaṃ, āraddhañca me vīriyaṃ, aṭṭhiṃkatvā manasi karomi, no ca līna’nti…pe… upekkhāsambojjhaṅgaṃ āvuso, bhikkhu ārabbhamāno pajānāti ‘cittañca me suvimuttaṃ, thinamiddhañca me susamūhataṃ, uddhaccakukkuccañca me suppaṭivinītaṃ, āraddhañca me vīriyaṃ, aṭṭhiṃkatvā manasi karomi, no ca līna’nti. Evaṃ kho, āvuso sāriputta, bhikkhu jāneyya ‘paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. උපවානසුත්‌තවණ්‌ණනා • 8. Upavānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. උපවානසුත්‌තවණ්‌ණනා • 8. Upavānasuttavaṇṇanā
