| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. உபவானத்தே²ரஅபதா³னவண்ணனா
10. Upavānattheraapadānavaṇṇanā
த³ஸமாபதா³னே பது³முத்தரோ நாம ஜினோதிஆதி³கங் ஆயஸ்மதோ உபவானத்தே²ரஸ்ஸ அபதா³னங். அயங் கிர புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ கேனசி கம்மச்சி²த்³தே³ன பது³முத்தரஸ்ஸ ப⁴க³வதோ காலே த³ல்லித்³த³குலே நிப்³ப³த்தித்வா விஞ்ஞுதங் பத்தோ ப⁴க³வதி பரினிப்³பு³தே தஸ்ஸ தா⁴துங் க³ஹெத்வா மனுஸ்ஸதே³வனாக³க³ருளயக்க²கும்ப⁴ண்ட³க³ந்த⁴ப்³பே³ஹி ஸத்தரதனமயே ஸத்தயோஜனிகே தூ²பே கதே தத்த² ஸுதோ⁴தங் அத்தனோ உத்தராஸங்க³ங் வேளக்³கே³ ஆப³ந்தி⁴த்வா த⁴ஜங் கத்வா பூஜங் அகாஸி. தங் க³ஹெத்வா அபி⁴ஸம்மதகோ நாம யக்க²ஸேனாபதி தே³வேஹி சேதியபூஜாரக்க²ணத்த²ங் ட²பிதோ அதி³ஸ்ஸமானகாயோ ஆகாஸே தா⁴ரெந்தோ சேதியங் திக்க²த்துங் பத³க்கி²ணங் அகாஸி. தங் தி³ஸ்வா பி⁴ய்யோஸோமத்தாய பஸன்னமானஸோ அஹோஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் ப்³ராஹ்மணகுலே நிப்³ப³த்தித்வா உபவானோதி லத்³த⁴னாமோ வயப்பத்தோ ஜேதவனபடிக்³க³ஹணே பு³த்³தா⁴னுபா⁴வங் தி³ஸ்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனாய கம்மங் கரொந்தோ ச²ளபி⁴ஞ்ஞோ அஹோஸி. அதா²யஸ்மா உபவானோ ப⁴க³வதோ உபட்டா²கோ அஹோஸி . தேன ச ஸமயேன ப⁴க³வதோ வாதாபா³தோ⁴ உப்பஜ்ஜி. தே²ரஸ்ஸ கி³ஹிஸஹாயோ தே³வஹிதோ நாம ப்³ராஹ்மணோ ஸாவத்தி²யங் படிவஸதி. ஸோ தே²ரங் சதூஹி பச்சயேஹி பவாரேஸி. அதா²யஸ்மா உபவானோ நிவாஸெத்வா பத்தசீவரங் க³ஹெத்வா தஸ்ஸ ப்³ராஹ்மணஸ்ஸ நிவேஸனங் உபக³ஞ்சி². ப்³ராஹ்மணோ ‘‘கேனசி மஞ்ஞே பயோஜனேன தே²ரோ ஆக³தோ ப⁴விஸ்ஸதீ’’தி ஞத்வா ‘‘வதெ³ய்யாத², ப⁴ந்தே, கேனத்தோ²’’தி ஆஹ. தே²ரோ தஸ்ஸ ப்³ராஹ்மணஸ்ஸ பயோஜனங் ஆசிக்க²ந்தோ –
Dasamāpadāne padumuttaro nāma jinotiādikaṃ āyasmato upavānattherassa apadānaṃ. Ayaṃ kira purimabuddhesu katādhikāro tattha tattha bhave vivaṭṭūpanissayāni puññāni upacinanto kenaci kammacchiddena padumuttarassa bhagavato kāle dalliddakule nibbattitvā viññutaṃ patto bhagavati parinibbute tassa dhātuṃ gahetvā manussadevanāgagaruḷayakkhakumbhaṇḍagandhabbehi sattaratanamaye sattayojanike thūpe kate tattha sudhotaṃ attano uttarāsaṅgaṃ veḷagge ābandhitvā dhajaṃ katvā pūjaṃ akāsi. Taṃ gahetvā abhisammatako nāma yakkhasenāpati devehi cetiyapūjārakkhaṇatthaṃ ṭhapito adissamānakāyo ākāse dhārento cetiyaṃ tikkhattuṃ padakkhiṇaṃ akāsi. Taṃ disvā bhiyyosomattāya pasannamānaso ahosi. So tena puññakammena devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbattitvā upavānoti laddhanāmo vayappatto jetavanapaṭiggahaṇe buddhānubhāvaṃ disvā paṭiladdhasaddho pabbajitvā vipassanāya kammaṃ karonto chaḷabhiñño ahosi. Athāyasmā upavāno bhagavato upaṭṭhāko ahosi . Tena ca samayena bhagavato vātābādho uppajji. Therassa gihisahāyo devahito nāma brāhmaṇo sāvatthiyaṃ paṭivasati. So theraṃ catūhi paccayehi pavāresi. Athāyasmā upavāno nivāsetvā pattacīvaraṃ gahetvā tassa brāhmaṇassa nivesanaṃ upagañchi. Brāhmaṇo ‘‘kenaci maññe payojanena thero āgato bhavissatī’’ti ñatvā ‘‘vadeyyātha, bhante, kenattho’’ti āha. Thero tassa brāhmaṇassa payojanaṃ ācikkhanto –
‘‘அரஹங் ஸுக³தோ லோகே, வாதேஹாபா³தி⁴கோ முனி;
‘‘Arahaṃ sugato loke, vātehābādhiko muni;
ஸசே உண்ஹோத³கங் அத்தி², முனினோ தே³ஹி ப்³ராஹ்மண.
Sace uṇhodakaṃ atthi, munino dehi brāhmaṇa.
‘‘பூஜிதோ பூஜனெய்யானங், ஸக்கரெய்யான ஸக்கதோ;
‘‘Pūjito pūjaneyyānaṃ, sakkareyyāna sakkato;
அபசிதோபசெய்யானங், தஸ்ஸ இச்சா²மி ஹாதவே’’தி. (தே²ரகா³॰ 185-186) –
Apacitopaceyyānaṃ, tassa icchāmi hātave’’ti. (theragā. 185-186) –
கா³தா²த்³வயங் அபா⁴ஸி.
Gāthādvayaṃ abhāsi.
தஸ்ஸத்தோ² – யோ இமஸ்மிங் லோகே பூஜனெய்யானங் பூஜேதப்³பே³ஹி ஸக்காதீ³ஹி தே³வேஹி மஹாப்³ரஹ்மாதீ³ஹி ச ப்³ரஹ்மேஹி பூஜிதோ, ஸக்கரெய்யானங் ஸக்காதப்³பே³ஹி பி³ம்பி³ஸாரகோஸலராஜாதீ³ஹி ஸக்கதோ, அபசெய்யானங் அபசாயிதப்³பே³ஹி மஹேஸீஹி கீ²ணாஸவேஹி அபசிதோ, கிலேஸேஹி ஆரகத்தாதி³னா அரஹங், ஸோப⁴னக³மனாதி³னா ஸுக³தோ ஸப்³ப³ஞ்ஞூ முனி மய்ஹங் ஸத்தா² தே³வதே³வோ ஸக்கானங் அதிஸக்கோ ப்³ரஹ்மானங் அதிப்³ரஹ்மா, ஸோ தா³னி வாதேஹி வாதஹேது வாதக்கோ²ப⁴னிமித்தங் ஆபா³தி⁴கோ ஜாதோ. ஸசே , ப்³ராஹ்மண, உண்ஹோத³கங் அத்தி², தஸ்ஸ வாதாபா³த⁴வூபஸமனத்த²ங் தங் ஹாதவே உபனேதுங் இச்சா²மீதி.
Tassattho – yo imasmiṃ loke pūjaneyyānaṃ pūjetabbehi sakkādīhi devehi mahābrahmādīhi ca brahmehi pūjito, sakkareyyānaṃ sakkātabbehi bimbisārakosalarājādīhi sakkato, apaceyyānaṃ apacāyitabbehi mahesīhi khīṇāsavehi apacito, kilesehi ārakattādinā arahaṃ, sobhanagamanādinā sugato sabbaññū muni mayhaṃ satthā devadevo sakkānaṃ atisakko brahmānaṃ atibrahmā, so dāni vātehi vātahetu vātakkhobhanimittaṃ ābādhiko jāto. Sace , brāhmaṇa, uṇhodakaṃ atthi, tassa vātābādhavūpasamanatthaṃ taṃ hātave upanetuṃ icchāmīti.
தங் ஸுத்வா ப்³ராஹ்மணோ உண்ஹோத³கங் தத³னுரூபங் வாதஹரஞ்ச பே⁴ஸஜ்ஜங் ப⁴க³வதோ உபனாமேஸி. தேன ச ஸத்து² ரோகோ³ வூபஸமி. தஸ்ஸ ப⁴க³வா அனுமோத³னங் அகாஸி.
Taṃ sutvā brāhmaṇo uṇhodakaṃ tadanurūpaṃ vātaharañca bhesajjaṃ bhagavato upanāmesi. Tena ca satthu rogo vūpasami. Tassa bhagavā anumodanaṃ akāsi.
122. அதா²யஸ்மா உபவானோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரோ நாம ஜினோதிஆதி³மாஹ. தத்த² பது³முத்தரோதிஆதீ³னி புப்³பே³ வுத்தத்தா²னேவ.
122. Athāyasmā upavāno aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttaro nāma jinotiādimāha. Tattha padumuttarotiādīni pubbe vuttatthāneva.
123. மஹாஜனா ஸமாக³ம்மாதி ஸகலஜம்பு³தீ³பவாஸினோ ராஸிபூ⁴தாதி அத்தோ². சிதகங் கத்வாதி யோஜனுப்³பே³த⁴ங் சந்த³னராஸிசிதகங் கத்வா ப⁴க³வதோ ஸரீரங் தத்த² அபி⁴ரோபயிங்ஸூதி ஸம்ப³ந்தோ⁴.
123.Mahājanā samāgammāti sakalajambudīpavāsino rāsibhūtāti attho. Citakaṃ katvāti yojanubbedhaṃ candanarāsicitakaṃ katvā bhagavato sarīraṃ tattha abhiropayiṃsūti sambandho.
124. ஸரீரகிச்சங் கத்வானாதி ஆத³ஹனாதி அக்³கி³னா த³ஹனகிச்சங் கத்வாதி அத்தோ².
124.Sarīrakiccaṃkatvānāti ādahanāti agginā dahanakiccaṃ katvāti attho.
127-28. ஜங்கா⁴ மணிமயா ஆஸீதி மனுஸ்ஸேஹி கததூ²பே ஜங்கா⁴ புப்ப²வாஹத்த²ங் சரிதட்டா²னங் மணிமயா இந்த³னீலமணினா கதாதி அத்தோ². மயம்பீதி ஸப்³பே³ தே³வா தூ²பங் கரிஸ்ஸாமாதி அத்தோ².
127-28.Jaṅghā maṇimayā āsīti manussehi katathūpe jaṅghā pupphavāhatthaṃ caritaṭṭhānaṃ maṇimayā indanīlamaṇinā katāti attho. Mayampīti sabbe devā thūpaṃ karissāmāti attho.
129. தா⁴து ஆவேணிகா நத்தீ²தி தே³வமனுஸ்ஸேஹி விஸுங் விஸுங் சேதியங் காதுங் ஆவேணிகா விஸுங் தா⁴து நத்தி², தங் த³ஸ்ஸெந்தோ ஸரீரங் ஏகபிண்டி³தந்தி ஆஹ. அதி⁴ட்டா²னப³லேன ஸகலஸரீரதா⁴து ஏகக⁴னஸிலாமயபடிமா விய ஏகமேவ அஹோஸீதி அத்தோ². இமம்ஹி பு³த்³த⁴தூ²பம்ஹீதி ஸகலஜம்பு³தீ³பவாஸீஹி கதம்ஹி இமம்ஹி ஸுவண்ணதூ²பம்ஹி மயங் ஸப்³பே³ ஸமாக³ந்த்வா கஞ்சுகதூ²பங் கரிஸ்ஸாமாதி அத்தோ².
129.Dhātu āveṇikā natthīti devamanussehi visuṃ visuṃ cetiyaṃ kātuṃ āveṇikā visuṃ dhātu natthi, taṃ dassento sarīraṃ ekapiṇḍitanti āha. Adhiṭṭhānabalena sakalasarīradhātu ekaghanasilāmayapaṭimā viya ekameva ahosīti attho. Imamhi buddhathūpamhīti sakalajambudīpavāsīhi katamhi imamhi suvaṇṇathūpamhi mayaṃ sabbe samāgantvā kañcukathūpaṃ karissāmāti attho.
133. இந்த³னீலங் மஹானீலந்தி இந்தீ³வரபுப்ப²வண்ணாப⁴ங் மணி இந்த³னீலமணி. ததோ அதி⁴கவண்ணதா மஹாமணி இந்த³னீலமணயோ ச மஹானீலமணயோ ச ஜோதிரஸமணிஜாதிரங்க³மணயோ ச ஏகதோ ஸன்னிபாதெத்வா ராஸீ கத்வா ஸுவண்ணதூ²பே கஞ்சுகதூ²பங் கத்வா அசா²த³யுந்தி ஸம்ப³ந்தோ⁴.
133.Indanīlaṃ mahānīlanti indīvarapupphavaṇṇābhaṃ maṇi indanīlamaṇi. Tato adhikavaṇṇatā mahāmaṇi indanīlamaṇayo ca mahānīlamaṇayo ca jotirasamaṇijātiraṅgamaṇayo ca ekato sannipātetvā rāsī katvā suvaṇṇathūpe kañcukathūpaṃ katvā achādayunti sambandho.
144. பச்சேகங் பு³த்³த⁴ஸெட்ட²ஸ்ஸாதி பு³த்³து⁴த்தமஸ்ஸ பதி ஏகங் விஸுங் உபரிச²த³னேன தூ²பங் அகங்ஸூதி அத்தோ².
144.Paccekaṃbuddhaseṭṭhassāti buddhuttamassa pati ekaṃ visuṃ uparichadanena thūpaṃ akaṃsūti attho.
147. கும்ப⁴ண்டா³ கு³ய்ஹகா ததா²தி கும்ப⁴மத்தானி அண்டா³னி யேஸங் தே³வானங் தே கும்ப⁴ண்டா³, படிச்சா²தெ³த்வா நிகு³ஹித்வா படிச்சா²த³னதோ க³ருளா கு³ய்ஹகா நாம ஜாதா, தே கும்ப⁴ண்டா³ கு³ய்ஹகாபி தூ²பங் அகங்ஸூதி அத்தோ².
147.Kumbhaṇḍā guyhakātathāti kumbhamattāni aṇḍāni yesaṃ devānaṃ te kumbhaṇḍā, paṭicchādetvā niguhitvā paṭicchādanato garuḷā guyhakā nāma jātā, te kumbhaṇḍā guyhakāpi thūpaṃ akaṃsūti attho.
151. அதிபொ⁴ந்தி ந தஸ்ஸாபா⁴தி தஸ்ஸ சேதியஸ்ஸ பப⁴ங் சந்த³ஸூரியதாரகானங் பபா⁴ ந அதிபொ⁴ந்தி, ந அஜ்ஜொ²த்த²ரந்தீதி அத்தோ².
151.Atibhonti na tassābhāti tassa cetiyassa pabhaṃ candasūriyatārakānaṃ pabhā na atibhonti, na ajjhottharantīti attho.
158. அஹம்பி காரங் கஸ்ஸாமீதி தாதி³னோ லோகனாத²ஸ்ஸ தூ²பஸ்மிங் அஹம்பி காரங் புஞ்ஞகிரியங் குஸலகம்மங் த⁴ஜபடாகபூஜங் கரிஸ்ஸாமீதி அத்தோ².
158.Ahampi kāraṃ kassāmīti tādino lokanāthassa thūpasmiṃ ahampi kāraṃ puññakiriyaṃ kusalakammaṃ dhajapaṭākapūjaṃ karissāmīti attho.
உபவானத்தே²ரஅபதா³னவண்ணனா ஸமத்தா.
Upavānattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. உபவானத்தே²ரஅபதா³னங் • 10. Upavānattheraapadānaṃ
