| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. উপৰানত্থেরঅপদানৰণ্ণনা
10. Upavānattheraapadānavaṇṇanā
দসমাপদানে পদুমুত্তরো নাম জিনোতিআদিকং আযস্মতো উপৰানত্থেরস্স অপদানং। অযং কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো কেনচি কম্মচ্ছিদ্দেন পদুমুত্তরস্স ভগৰতো কালে দল্লিদ্দকুলে নিব্বত্তিত্ৰা ৰিঞ্ঞুতং পত্তো ভগৰতি পরিনিব্বুতে তস্স ধাতুং গহেত্ৰা মনুস্সদেৰনাগগরুল়যক্খকুম্ভণ্ডগন্ধব্বেহি সত্তরতনমযে সত্তযোজনিকে থূপে কতে তত্থ সুধোতং অত্তনো উত্তরাসঙ্গং ৰেল়গ্গে আবন্ধিত্ৰা ধজং কত্ৰা পূজং অকাসি। তং গহেত্ৰা অভিসম্মতকো নাম যক্খসেনাপতি দেৰেহি চেতিযপূজারক্খণত্থং ঠপিতো অদিস্সমানকাযো আকাসে ধারেন্তো চেতিযং তিক্খত্তুং পদক্খিণং অকাসি। তং দিস্ৰা ভিয্যোসোমত্তায পসন্নমানসো অহোসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তিত্ৰা উপৰানোতি লদ্ধনামো ৰযপ্পত্তো জেতৰনপটিগ্গহণে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো ছল়ভিঞ্ঞো অহোসি। অথাযস্মা উপৰানো ভগৰতো উপট্ঠাকো অহোসি । তেন চ সমযেন ভগৰতো ৰাতাবাধো উপ্পজ্জি। থেরস্স গিহিসহাযো দেৰহিতো নাম ব্রাহ্মণো সাৰত্থিযং পটিৰসতি। সো থেরং চতূহি পচ্চযেহি পৰারেসি। অথাযস্মা উপৰানো নিৰাসেত্ৰা পত্তচীৰরং গহেত্ৰা তস্স ব্রাহ্মণস্স নিৰেসনং উপগঞ্ছি। ব্রাহ্মণো ‘‘কেনচি মঞ্ঞে পযোজনেন থেরো আগতো ভৰিস্সতী’’তি ঞত্ৰা ‘‘ৰদেয্যাথ, ভন্তে, কেনত্থো’’তি আহ। থেরো তস্স ব্রাহ্মণস্স পযোজনং আচিক্খন্তো –
Dasamāpadāne padumuttaro nāma jinotiādikaṃ āyasmato upavānattherassa apadānaṃ. Ayaṃ kira purimabuddhesu katādhikāro tattha tattha bhave vivaṭṭūpanissayāni puññāni upacinanto kenaci kammacchiddena padumuttarassa bhagavato kāle dalliddakule nibbattitvā viññutaṃ patto bhagavati parinibbute tassa dhātuṃ gahetvā manussadevanāgagaruḷayakkhakumbhaṇḍagandhabbehi sattaratanamaye sattayojanike thūpe kate tattha sudhotaṃ attano uttarāsaṅgaṃ veḷagge ābandhitvā dhajaṃ katvā pūjaṃ akāsi. Taṃ gahetvā abhisammatako nāma yakkhasenāpati devehi cetiyapūjārakkhaṇatthaṃ ṭhapito adissamānakāyo ākāse dhārento cetiyaṃ tikkhattuṃ padakkhiṇaṃ akāsi. Taṃ disvā bhiyyosomattāya pasannamānaso ahosi. So tena puññakammena devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbattitvā upavānoti laddhanāmo vayappatto jetavanapaṭiggahaṇe buddhānubhāvaṃ disvā paṭiladdhasaddho pabbajitvā vipassanāya kammaṃ karonto chaḷabhiñño ahosi. Athāyasmā upavāno bhagavato upaṭṭhāko ahosi . Tena ca samayena bhagavato vātābādho uppajji. Therassa gihisahāyo devahito nāma brāhmaṇo sāvatthiyaṃ paṭivasati. So theraṃ catūhi paccayehi pavāresi. Athāyasmā upavāno nivāsetvā pattacīvaraṃ gahetvā tassa brāhmaṇassa nivesanaṃ upagañchi. Brāhmaṇo ‘‘kenaci maññe payojanena thero āgato bhavissatī’’ti ñatvā ‘‘vadeyyātha, bhante, kenattho’’ti āha. Thero tassa brāhmaṇassa payojanaṃ ācikkhanto –
‘‘অরহং সুগতো লোকে, ৰাতেহাবাধিকো মুনি।
‘‘Arahaṃ sugato loke, vātehābādhiko muni;
সচে উণ্হোদকং অত্থি, মুনিনো দেহি ব্রাহ্মণ॥
Sace uṇhodakaṃ atthi, munino dehi brāhmaṇa.
‘‘পূজিতো পূজনেয্যানং, সক্করেয্যান সক্কতো।
‘‘Pūjito pūjaneyyānaṃ, sakkareyyāna sakkato;
অপচিতোপচেয্যানং, তস্স ইচ্ছামি হাতৰে’’তি॥ (থেরগা॰ ১৮৫-১৮৬) –
Apacitopaceyyānaṃ, tassa icchāmi hātave’’ti. (theragā. 185-186) –
গাথাদ্ৰযং অভাসি।
Gāthādvayaṃ abhāsi.
তস্সত্থো – যো ইমস্মিং লোকে পূজনেয্যানং পূজেতব্বেহি সক্কাদীহি দেৰেহি মহাব্রহ্মাদীহি চ ব্রহ্মেহি পূজিতো, সক্করেয্যানং সক্কাতব্বেহি বিম্বিসারকোসলরাজাদীহি সক্কতো, অপচেয্যানং অপচাযিতব্বেহি মহেসীহি খীণাসৰেহি অপচিতো, কিলেসেহি আরকত্তাদিনা অরহং, সোভনগমনাদিনা সুগতো সব্বঞ্ঞূ মুনি ময্হং সত্থা দেৰদেৰো সক্কানং অতিসক্কো ব্রহ্মানং অতিব্রহ্মা, সো দানি ৰাতেহি ৰাতহেতু ৰাতক্খোভনিমিত্তং আবাধিকো জাতো। সচে , ব্রাহ্মণ, উণ্হোদকং অত্থি, তস্স ৰাতাবাধৰূপসমনত্থং তং হাতৰে উপনেতুং ইচ্ছামীতি।
Tassattho – yo imasmiṃ loke pūjaneyyānaṃ pūjetabbehi sakkādīhi devehi mahābrahmādīhi ca brahmehi pūjito, sakkareyyānaṃ sakkātabbehi bimbisārakosalarājādīhi sakkato, apaceyyānaṃ apacāyitabbehi mahesīhi khīṇāsavehi apacito, kilesehi ārakattādinā arahaṃ, sobhanagamanādinā sugato sabbaññū muni mayhaṃ satthā devadevo sakkānaṃ atisakko brahmānaṃ atibrahmā, so dāni vātehi vātahetu vātakkhobhanimittaṃ ābādhiko jāto. Sace , brāhmaṇa, uṇhodakaṃ atthi, tassa vātābādhavūpasamanatthaṃ taṃ hātave upanetuṃ icchāmīti.
তং সুত্ৰা ব্রাহ্মণো উণ্হোদকং তদনুরূপং ৰাতহরঞ্চ ভেসজ্জং ভগৰতো উপনামেসি। তেন চ সত্থু রোগো ৰূপসমি। তস্স ভগৰা অনুমোদনং অকাসি।
Taṃ sutvā brāhmaṇo uṇhodakaṃ tadanurūpaṃ vātaharañca bhesajjaṃ bhagavato upanāmesi. Tena ca satthu rogo vūpasami. Tassa bhagavā anumodanaṃ akāsi.
১২২. অথাযস্মা উপৰানো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরো নাম জিনোতিআদিমাহ। তত্থ পদুমুত্তরোতিআদীনি পুব্বে ৰুত্তত্থানেৰ।
122. Athāyasmā upavāno aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttaro nāma jinotiādimāha. Tattha padumuttarotiādīni pubbe vuttatthāneva.
১২৩. মহাজনা সমাগম্মাতি সকলজম্বুদীপৰাসিনো রাসিভূতাতি অত্থো। চিতকং কত্ৰাতি যোজনুব্বেধং চন্দনরাসিচিতকং কত্ৰা ভগৰতো সরীরং তত্থ অভিরোপযিংসূতি সম্বন্ধো।
123.Mahājanā samāgammāti sakalajambudīpavāsino rāsibhūtāti attho. Citakaṃ katvāti yojanubbedhaṃ candanarāsicitakaṃ katvā bhagavato sarīraṃ tattha abhiropayiṃsūti sambandho.
১২৪. সরীরকিচ্চং কত্ৰানাতি আদহনাতি অগ্গিনা দহনকিচ্চং কত্ৰাতি অত্থো।
124.Sarīrakiccaṃkatvānāti ādahanāti agginā dahanakiccaṃ katvāti attho.
১২৭-২৮. জঙ্ঘা মণিমযা আসীতি মনুস্সেহি কতথূপে জঙ্ঘা পুপ্ফৰাহত্থং চরিতট্ঠানং মণিমযা ইন্দনীলমণিনা কতাতি অত্থো। মযম্পীতি সব্বে দেৰা থূপং করিস্সামাতি অত্থো।
127-28.Jaṅghā maṇimayā āsīti manussehi katathūpe jaṅghā pupphavāhatthaṃ caritaṭṭhānaṃ maṇimayā indanīlamaṇinā katāti attho. Mayampīti sabbe devā thūpaṃ karissāmāti attho.
১২৯. ধাতু আৰেণিকা নত্থীতি দেৰমনুস্সেহি ৰিসুং ৰিসুং চেতিযং কাতুং আৰেণিকা ৰিসুং ধাতু নত্থি, তং দস্সেন্তো সরীরং একপিণ্ডিতন্তি আহ। অধিট্ঠানবলেন সকলসরীরধাতু একঘনসিলামযপটিমা ৰিয একমেৰ অহোসীতি অত্থো। ইমম্হি বুদ্ধথূপম্হীতি সকলজম্বুদীপৰাসীহি কতম্হি ইমম্হি সুৰণ্ণথূপম্হি মযং সব্বে সমাগন্ত্ৰা কঞ্চুকথূপং করিস্সামাতি অত্থো।
129.Dhātu āveṇikā natthīti devamanussehi visuṃ visuṃ cetiyaṃ kātuṃ āveṇikā visuṃ dhātu natthi, taṃ dassento sarīraṃ ekapiṇḍitanti āha. Adhiṭṭhānabalena sakalasarīradhātu ekaghanasilāmayapaṭimā viya ekameva ahosīti attho. Imamhi buddhathūpamhīti sakalajambudīpavāsīhi katamhi imamhi suvaṇṇathūpamhi mayaṃ sabbe samāgantvā kañcukathūpaṃ karissāmāti attho.
১৩৩. ইন্দনীলং মহানীলন্তি ইন্দীৰরপুপ্ফৰণ্ণাভং মণি ইন্দনীলমণি। ততো অধিকৰণ্ণতা মহামণি ইন্দনীলমণযো চ মহানীলমণযো চ জোতিরসমণিজাতিরঙ্গমণযো চ একতো সন্নিপাতেত্ৰা রাসী কত্ৰা সুৰণ্ণথূপে কঞ্চুকথূপং কত্ৰা অছাদযুন্তি সম্বন্ধো।
133.Indanīlaṃ mahānīlanti indīvarapupphavaṇṇābhaṃ maṇi indanīlamaṇi. Tato adhikavaṇṇatā mahāmaṇi indanīlamaṇayo ca mahānīlamaṇayo ca jotirasamaṇijātiraṅgamaṇayo ca ekato sannipātetvā rāsī katvā suvaṇṇathūpe kañcukathūpaṃ katvā achādayunti sambandho.
১৪৪. পচ্চেকং বুদ্ধসেট্ঠস্সাতি বুদ্ধুত্তমস্স পতি একং ৰিসুং উপরিছদনেন থূপং অকংসূতি অত্থো।
144.Paccekaṃbuddhaseṭṭhassāti buddhuttamassa pati ekaṃ visuṃ uparichadanena thūpaṃ akaṃsūti attho.
১৪৭. কুম্ভণ্ডা গুয্হকা তথাতি কুম্ভমত্তানি অণ্ডানি যেসং দেৰানং তে কুম্ভণ্ডা, পটিচ্ছাদেত্ৰা নিগুহিত্ৰা পটিচ্ছাদনতো গরুল়া গুয্হকা নাম জাতা, তে কুম্ভণ্ডা গুয্হকাপি থূপং অকংসূতি অত্থো।
147.Kumbhaṇḍā guyhakātathāti kumbhamattāni aṇḍāni yesaṃ devānaṃ te kumbhaṇḍā, paṭicchādetvā niguhitvā paṭicchādanato garuḷā guyhakā nāma jātā, te kumbhaṇḍā guyhakāpi thūpaṃ akaṃsūti attho.
১৫১. অতিভোন্তি ন তস্সাভাতি তস্স চেতিযস্স পভং চন্দসূরিযতারকানং পভা ন অতিভোন্তি, ন অজ্ঝোত্থরন্তীতি অত্থো।
151.Atibhonti na tassābhāti tassa cetiyassa pabhaṃ candasūriyatārakānaṃ pabhā na atibhonti, na ajjhottharantīti attho.
১৫৮. অহম্পি কারং কস্সামীতি তাদিনো লোকনাথস্স থূপস্মিং অহম্পি কারং পুঞ্ঞকিরিযং কুসলকম্মং ধজপটাকপূজং করিস্সামীতি অত্থো।
158.Ahampi kāraṃ kassāmīti tādino lokanāthassa thūpasmiṃ ahampi kāraṃ puññakiriyaṃ kusalakammaṃ dhajapaṭākapūjaṃ karissāmīti attho.
উপৰানত্থেরঅপদানৰণ্ণনা সমত্তা।
Upavānattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. উপৰানত্থেরঅপদানং • 10. Upavānattheraapadānaṃ
