| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. உபயவக்³கோ³
6. Upayavaggo
1. உபயஸுத்தங்
1. Upayasuttaṃ
53. ஸாவத்தி²னிதா³னங் . ‘‘உபயோ 1, பி⁴க்க²வே, அவிமுத்தோ, அனுபயோ விமுத்தோ. ரூபுபயங் 2 வா, பி⁴க்க²வே, விஞ்ஞாணங் திட்ட²மானங் திட்டெ²ய்ய, ரூபாரம்மணங் ரூபப்பதிட்ட²ங் நந்தூ³பஸேசனங் வுத்³தி⁴ங் விரூள்ஹிங் வேபுல்லங் ஆபஜ்ஜெய்ய. வேத³னுபயங் வா…பே॰… ஸஞ்ஞுபயங் வா…பே॰… ஸங்கா²ருபயங் வா, பி⁴க்க²வே, விஞ்ஞாணங் திட்ட²மானங் திட்டெ²ய்ய, ஸங்கா²ராரம்மணங் ஸங்கா²ரப்பதிட்ட²ங் நந்தூ³பஸேசனங் வுத்³தி⁴ங் விரூள்ஹிங் வேபுல்லங் ஆபஜ்ஜெய்ய’’.
53. Sāvatthinidānaṃ . ‘‘Upayo 3, bhikkhave, avimutto, anupayo vimutto. Rūpupayaṃ 4 vā, bhikkhave, viññāṇaṃ tiṭṭhamānaṃ tiṭṭheyya, rūpārammaṇaṃ rūpappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya. Vedanupayaṃ vā…pe… saññupayaṃ vā…pe… saṅkhārupayaṃ vā, bhikkhave, viññāṇaṃ tiṭṭhamānaṃ tiṭṭheyya, saṅkhārārammaṇaṃ saṅkhārappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya’’.
‘‘யோ, பி⁴க்க²வே, ஏவங் வதெ³ய்ய – ‘அஹமஞ்ஞத்ர ரூபா அஞ்ஞத்ர வேத³னாய அஞ்ஞத்ர ஸஞ்ஞாய அஞ்ஞத்ர ஸங்கா²ரேஹி விஞ்ஞாணஸ்ஸ ஆக³திங் வா க³திங் வா சுதிங் வா உபபத்திங் வா வுத்³தி⁴ங் வா விரூள்ஹிங் வா வேபுல்லங் வா பஞ்ஞாபெஸ்ஸாமீ’தி, நேதங் டா²னங் விஜ்ஜதி.
‘‘Yo, bhikkhave, evaṃ vadeyya – ‘ahamaññatra rūpā aññatra vedanāya aññatra saññāya aññatra saṅkhārehi viññāṇassa āgatiṃ vā gatiṃ vā cutiṃ vā upapattiṃ vā vuddhiṃ vā virūḷhiṃ vā vepullaṃ vā paññāpessāmī’ti, netaṃ ṭhānaṃ vijjati.
‘‘ரூபதா⁴துயா சே, பி⁴க்க²வே, பி⁴க்கு²னோ ராகோ³ பஹீனோ ஹோதி. ராக³ஸ்ஸ பஹானா வொச்சி²ஜ்ஜதாரம்மணங் பதிட்டா² விஞ்ஞாணஸ்ஸ ந ஹோதி. வேத³னாதா⁴துயா சே, பி⁴க்க²வே… ஸஞ்ஞாதா⁴துயா சே பி⁴க்க²வே… ஸங்கா²ரதா⁴துயா சே பி⁴க்க²வே… விஞ்ஞாணதா⁴துயா சே, பி⁴க்க²வே, பி⁴க்கு²னோ ராகோ³ பஹீனோ ஹோதி. ராக³ஸ்ஸ பஹானா வொச்சி²ஜ்ஜதாரம்மணங் பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தங் விஞ்ஞாணங் அவிரூள்ஹங் அனபி⁴ஸங்க²ச்சவிமுத்தங் . விமுத்தத்தா டி²தங். டி²தத்தா ஸந்துஸிதங். ஸந்துஸிதத்தா ந பரிதஸ்ஸதி. அபரிதஸ்ஸங் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி. பட²மங்.
‘‘Rūpadhātuyā ce, bhikkhave, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Vedanādhātuyā ce, bhikkhave… saññādhātuyā ce bhikkhave… saṅkhāradhātuyā ce bhikkhave… viññāṇadhātuyā ce, bhikkhave, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Tadappatiṭṭhitaṃ viññāṇaṃ avirūḷhaṃ anabhisaṅkhaccavimuttaṃ . Vimuttattā ṭhitaṃ. Ṭhitattā santusitaṃ. Santusitattā na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. உபயஸுத்தவண்ணனா • 1. Upayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. உபயஸுத்தவண்ணனா • 1. Upayasuttavaṇṇanā
