| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. উপযৰগ্গো
6. Upayavaggo
১. উপযসুত্তং
1. Upayasuttaṃ
৫৩. সাৰত্থিনিদানং । ‘‘উপযো 1, ভিক্খৰে, অৰিমুত্তো, অনুপযো ৰিমুত্তো। রূপুপযং 2 ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য, রূপারম্মণং রূপপ্পতিট্ঠং নন্দূপসেচনং ৰুদ্ধিং ৰিরূল়্হিং ৰেপুল্লং আপজ্জেয্য। ৰেদনুপযং ৰা…পে॰… সঞ্ঞুপযং ৰা…পে॰… সঙ্খারুপযং ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য, সঙ্খারারম্মণং সঙ্খারপ্পতিট্ঠং নন্দূপসেচনং ৰুদ্ধিং ৰিরূল়্হিং ৰেপুল্লং আপজ্জেয্য’’।
53. Sāvatthinidānaṃ . ‘‘Upayo 3, bhikkhave, avimutto, anupayo vimutto. Rūpupayaṃ 4 vā, bhikkhave, viññāṇaṃ tiṭṭhamānaṃ tiṭṭheyya, rūpārammaṇaṃ rūpappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya. Vedanupayaṃ vā…pe… saññupayaṃ vā…pe… saṅkhārupayaṃ vā, bhikkhave, viññāṇaṃ tiṭṭhamānaṃ tiṭṭheyya, saṅkhārārammaṇaṃ saṅkhārappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya’’.
‘‘যো, ভিক্খৰে, এৰং ৰদেয্য – ‘অহমঞ্ঞত্র রূপা অঞ্ঞত্র ৰেদনায অঞ্ঞত্র সঞ্ঞায অঞ্ঞত্র সঙ্খারেহি ৰিঞ্ঞাণস্স আগতিং ৰা গতিং ৰা চুতিং ৰা উপপত্তিং ৰা ৰুদ্ধিং ৰা ৰিরূল়্হিং ৰা ৰেপুল্লং ৰা পঞ্ঞাপেস্সামী’তি, নেতং ঠানং ৰিজ্জতি।
‘‘Yo, bhikkhave, evaṃ vadeyya – ‘ahamaññatra rūpā aññatra vedanāya aññatra saññāya aññatra saṅkhārehi viññāṇassa āgatiṃ vā gatiṃ vā cutiṃ vā upapattiṃ vā vuddhiṃ vā virūḷhiṃ vā vepullaṃ vā paññāpessāmī’ti, netaṃ ṭhānaṃ vijjati.
‘‘রূপধাতুযা চে, ভিক্খৰে, ভিক্খুনো রাগো পহীনো হোতি। রাগস্স পহানা ৰোচ্ছিজ্জতারম্মণং পতিট্ঠা ৰিঞ্ঞাণস্স ন হোতি। ৰেদনাধাতুযা চে, ভিক্খৰে… সঞ্ঞাধাতুযা চে ভিক্খৰে… সঙ্খারধাতুযা চে ভিক্খৰে… ৰিঞ্ঞাণধাতুযা চে, ভিক্খৰে, ভিক্খুনো রাগো পহীনো হোতি। রাগস্স পহানা ৰোচ্ছিজ্জতারম্মণং পতিট্ঠা ৰিঞ্ঞাণস্স ন হোতি। তদপ্পতিট্ঠিতং ৰিঞ্ঞাণং অৰিরূল়্হং অনভিসঙ্খচ্চৰিমুত্তং । ৰিমুত্তত্তা ঠিতং। ঠিতত্তা সন্তুসিতং। সন্তুসিতত্তা ন পরিতস্সতি। অপরিতস্সং পচ্চত্তঞ্ঞেৰ পরিনিব্বাযতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি। পঠমং।
‘‘Rūpadhātuyā ce, bhikkhave, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Vedanādhātuyā ce, bhikkhave… saññādhātuyā ce bhikkhave… saṅkhāradhātuyā ce bhikkhave… viññāṇadhātuyā ce, bhikkhave, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Tadappatiṭṭhitaṃ viññāṇaṃ avirūḷhaṃ anabhisaṅkhaccavimuttaṃ . Vimuttattā ṭhitaṃ. Ṭhitattā santusitaṃ. Santusitattā na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. উপযসুত্তৰণ্ণনা • 1. Upayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. উপযসুত্তৰণ্ণনা • 1. Upayasuttavaṇṇanā
