| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৪. চতুত্থৰগ্গো
4. Catutthavaggo
(৩৭) ৫. উপেক্খাসমন্নাগতকথা
(37) 5. Upekkhāsamannāgatakathā
৩৯৭. অরহা ছহি উপেক্খাহি সমন্নাগতোতি? আমন্তা। অরহা ছহি ফস্সেহি, ছহি ৰেদনাহি, ছহি সঞ্ঞাহি…পে॰… ছহি পঞ্ঞাহি সমন্নাগতোতি? ন হেৰং ৰত্তব্বে…পে॰…।
397. Arahā chahi upekkhāhi samannāgatoti? Āmantā. Arahā chahi phassehi, chahi vedanāhi, chahi saññāhi…pe… chahi paññāhi samannāgatoti? Na hevaṃ vattabbe…pe….
অরহা ছহি উপেক্খাহি সমন্নাগতোতি? আমন্তা। অরহা চক্খুনা রূপং পস্সন্তো সোতেন সদ্দং সুণাতি, ঘানেন গন্ধং ঘাযতি, জিৰ্হায রসং সাযতি, কাযেন ফোট্ঠব্বং ফুসতি, মনসা ধম্মং ৰিজানাতি…পে॰… মনসা ধম্মং ৰিজানন্তো চক্খুনা রূপং পস্সতি, সোতেন সদ্দং সুণাতি, ঘানেন গন্ধং ঘাযতি, জিৰ্হায রসং সাযতি, কাযেন ফোট্ঠব্বং ফুসতীতি? ন হেৰং ৰত্তব্বে…পে॰…।
Arahā chahi upekkhāhi samannāgatoti? Āmantā. Arahā cakkhunā rūpaṃ passanto sotena saddaṃ suṇāti, ghānena gandhaṃ ghāyati, jivhāya rasaṃ sāyati, kāyena phoṭṭhabbaṃ phusati, manasā dhammaṃ vijānāti…pe… manasā dhammaṃ vijānanto cakkhunā rūpaṃ passati, sotena saddaṃ suṇāti, ghānena gandhaṃ ghāyati, jivhāya rasaṃ sāyati, kāyena phoṭṭhabbaṃ phusatīti? Na hevaṃ vattabbe…pe….
অরহা ছহি উপেক্খাহি সমন্নাগতোতি? আমন্তা। সততং সমিতং অব্বোকিণ্ণং ছহি উপেক্খাহি সমন্নাগতো সমোহিতো 1, ছ উপেক্খাযো পচ্চুপট্ঠিতাতি? ন হেৰং ৰত্তব্বে…পে॰…।
Arahā chahi upekkhāhi samannāgatoti? Āmantā. Satataṃ samitaṃ abbokiṇṇaṃ chahi upekkhāhi samannāgato samohito 2, cha upekkhāyo paccupaṭṭhitāti? Na hevaṃ vattabbe…pe….
ন ৰত্তব্বং – ‘‘অরহা ছহি উপেক্খাহি সমন্নাগতো’’তি? আমন্তা। ননু অরহা ছল়ঙ্গুপেক্খোতি? আমন্তা। হঞ্চি অরহা ছল়ঙ্গুপেক্খো, তেন ৰত রে ৰত্তব্বে – ‘‘অরহা ছহি উপেক্খাহি সমন্নাগতো’’তি…পে॰…।
Na vattabbaṃ – ‘‘arahā chahi upekkhāhi samannāgato’’ti? Āmantā. Nanu arahā chaḷaṅgupekkhoti? Āmantā. Hañci arahā chaḷaṅgupekkho, tena vata re vattabbe – ‘‘arahā chahi upekkhāhi samannāgato’’ti…pe….
উপেক্খাসমন্নাগতকথা নিট্ঠিতা।
Upekkhāsamannāgatakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৫. উপেক্খাসমন্নাগতকথাৰণ্ণনা • 5. Upekkhāsamannāgatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৫. উপেক্খাসমন্নাগতকথাৰণ্ণনা • 5. Upekkhāsamannāgatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৫. উপেক্খাসমন্নাগতকথাৰণ্ণনা • 5. Upekkhāsamannāgatakathāvaṇṇanā
