| Library / Tipiṭaka / తిపిటక • Tipiṭaka / కథావత్థుపాళి • Kathāvatthupāḷi |
౪. చతుత్థవగ్గో
4. Catutthavaggo
(౩౭) ౫. ఉపేక్ఖాసమన్నాగతకథా
(37) 5. Upekkhāsamannāgatakathā
౩౯౭. అరహా ఛహి ఉపేక్ఖాహి సమన్నాగతోతి? ఆమన్తా. అరహా ఛహి ఫస్సేహి, ఛహి వేదనాహి, ఛహి సఞ్ఞాహి…పే॰… ఛహి పఞ్ఞాహి సమన్నాగతోతి? న హేవం వత్తబ్బే…పే॰….
397. Arahā chahi upekkhāhi samannāgatoti? Āmantā. Arahā chahi phassehi, chahi vedanāhi, chahi saññāhi…pe… chahi paññāhi samannāgatoti? Na hevaṃ vattabbe…pe….
అరహా ఛహి ఉపేక్ఖాహి సమన్నాగతోతి? ఆమన్తా. అరహా చక్ఖునా రూపం పస్సన్తో సోతేన సద్దం సుణాతి, ఘానేన గన్ధం ఘాయతి, జివ్హాయ రసం సాయతి, కాయేన ఫోట్ఠబ్బం ఫుసతి, మనసా ధమ్మం విజానాతి…పే॰… మనసా ధమ్మం విజానన్తో చక్ఖునా రూపం పస్సతి, సోతేన సద్దం సుణాతి, ఘానేన గన్ధం ఘాయతి, జివ్హాయ రసం సాయతి, కాయేన ఫోట్ఠబ్బం ఫుసతీతి? న హేవం వత్తబ్బే…పే॰….
Arahā chahi upekkhāhi samannāgatoti? Āmantā. Arahā cakkhunā rūpaṃ passanto sotena saddaṃ suṇāti, ghānena gandhaṃ ghāyati, jivhāya rasaṃ sāyati, kāyena phoṭṭhabbaṃ phusati, manasā dhammaṃ vijānāti…pe… manasā dhammaṃ vijānanto cakkhunā rūpaṃ passati, sotena saddaṃ suṇāti, ghānena gandhaṃ ghāyati, jivhāya rasaṃ sāyati, kāyena phoṭṭhabbaṃ phusatīti? Na hevaṃ vattabbe…pe….
అరహా ఛహి ఉపేక్ఖాహి సమన్నాగతోతి? ఆమన్తా. సతతం సమితం అబ్బోకిణ్ణం ఛహి ఉపేక్ఖాహి సమన్నాగతో సమోహితో 1, ఛ ఉపేక్ఖాయో పచ్చుపట్ఠితాతి? న హేవం వత్తబ్బే…పే॰….
Arahā chahi upekkhāhi samannāgatoti? Āmantā. Satataṃ samitaṃ abbokiṇṇaṃ chahi upekkhāhi samannāgato samohito 2, cha upekkhāyo paccupaṭṭhitāti? Na hevaṃ vattabbe…pe….
న వత్తబ్బం – ‘‘అరహా ఛహి ఉపేక్ఖాహి సమన్నాగతో’’తి? ఆమన్తా. నను అరహా ఛళఙ్గుపేక్ఖోతి? ఆమన్తా. హఞ్చి అరహా ఛళఙ్గుపేక్ఖో, తేన వత రే వత్తబ్బే – ‘‘అరహా ఛహి ఉపేక్ఖాహి సమన్నాగతో’’తి…పే॰….
Na vattabbaṃ – ‘‘arahā chahi upekkhāhi samannāgato’’ti? Āmantā. Nanu arahā chaḷaṅgupekkhoti? Āmantā. Hañci arahā chaḷaṅgupekkho, tena vata re vattabbe – ‘‘arahā chahi upekkhāhi samannāgato’’ti…pe….
ఉపేక్ఖాసమన్నాగతకథా నిట్ఠితా.
Upekkhāsamannāgatakathā niṭṭhitā.
Footnotes:
Related texts:
అట్ఠకథా • Aṭṭhakathā / అభిధమ్మపిటక (అట్ఠకథా) • Abhidhammapiṭaka (aṭṭhakathā) / పఞ్చపకరణ-అట్ఠకథా • Pañcapakaraṇa-aṭṭhakathā / ౫. ఉపేక్ఖాసమన్నాగతకథావణ్ణనా • 5. Upekkhāsamannāgatakathāvaṇṇanā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-మూలటీకా • Pañcapakaraṇa-mūlaṭīkā / ౫. ఉపేక్ఖాసమన్నాగతకథావణ్ణనా • 5. Upekkhāsamannāgatakathāvaṇṇanā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-అనుటీకా • Pañcapakaraṇa-anuṭīkā / ౫. ఉపేక్ఖాసమన్నాగతకథావణ్ణనా • 5. Upekkhāsamannāgatakathāvaṇṇanā
