| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൪. ചതുത്ഥവഗ്ഗോ
4. Catutthavaggo
(൩൭) ൫. ഉപേക്ഖാസമന്നാഗതകഥാ
(37) 5. Upekkhāsamannāgatakathā
൩൯൭. അരഹാ ഛഹി ഉപേക്ഖാഹി സമന്നാഗതോതി? ആമന്താ. അരഹാ ഛഹി ഫസ്സേഹി, ഛഹി വേദനാഹി, ഛഹി സഞ്ഞാഹി…പേ॰… ഛഹി പഞ്ഞാഹി സമന്നാഗതോതി? ന ഹേവം വത്തബ്ബേ…പേ॰….
397. Arahā chahi upekkhāhi samannāgatoti? Āmantā. Arahā chahi phassehi, chahi vedanāhi, chahi saññāhi…pe… chahi paññāhi samannāgatoti? Na hevaṃ vattabbe…pe….
അരഹാ ഛഹി ഉപേക്ഖാഹി സമന്നാഗതോതി? ആമന്താ. അരഹാ ചക്ഖുനാ രൂപം പസ്സന്തോ സോതേന സദ്ദം സുണാതി, ഘാനേന ഗന്ധം ഘായതി, ജിവ്ഹായ രസം സായതി, കായേന ഫോട്ഠബ്ബം ഫുസതി, മനസാ ധമ്മം വിജാനാതി…പേ॰… മനസാ ധമ്മം വിജാനന്തോ ചക്ഖുനാ രൂപം പസ്സതി, സോതേന സദ്ദം സുണാതി, ഘാനേന ഗന്ധം ഘായതി, ജിവ്ഹായ രസം സായതി, കായേന ഫോട്ഠബ്ബം ഫുസതീതി? ന ഹേവം വത്തബ്ബേ…പേ॰….
Arahā chahi upekkhāhi samannāgatoti? Āmantā. Arahā cakkhunā rūpaṃ passanto sotena saddaṃ suṇāti, ghānena gandhaṃ ghāyati, jivhāya rasaṃ sāyati, kāyena phoṭṭhabbaṃ phusati, manasā dhammaṃ vijānāti…pe… manasā dhammaṃ vijānanto cakkhunā rūpaṃ passati, sotena saddaṃ suṇāti, ghānena gandhaṃ ghāyati, jivhāya rasaṃ sāyati, kāyena phoṭṭhabbaṃ phusatīti? Na hevaṃ vattabbe…pe….
അരഹാ ഛഹി ഉപേക്ഖാഹി സമന്നാഗതോതി? ആമന്താ. സതതം സമിതം അബ്ബോകിണ്ണം ഛഹി ഉപേക്ഖാഹി സമന്നാഗതോ സമോഹിതോ 1, ഛ ഉപേക്ഖായോ പച്ചുപട്ഠിതാതി? ന ഹേവം വത്തബ്ബേ…പേ॰….
Arahā chahi upekkhāhi samannāgatoti? Āmantā. Satataṃ samitaṃ abbokiṇṇaṃ chahi upekkhāhi samannāgato samohito 2, cha upekkhāyo paccupaṭṭhitāti? Na hevaṃ vattabbe…pe….
ന വത്തബ്ബം – ‘‘അരഹാ ഛഹി ഉപേക്ഖാഹി സമന്നാഗതോ’’തി? ആമന്താ. നനു അരഹാ ഛളങ്ഗുപേക്ഖോതി? ആമന്താ. ഹഞ്ചി അരഹാ ഛളങ്ഗുപേക്ഖോ, തേന വത രേ വത്തബ്ബേ – ‘‘അരഹാ ഛഹി ഉപേക്ഖാഹി സമന്നാഗതോ’’തി…പേ॰….
Na vattabbaṃ – ‘‘arahā chahi upekkhāhi samannāgato’’ti? Āmantā. Nanu arahā chaḷaṅgupekkhoti? Āmantā. Hañci arahā chaḷaṅgupekkho, tena vata re vattabbe – ‘‘arahā chahi upekkhāhi samannāgato’’ti…pe….
ഉപേക്ഖാസമന്നാഗതകഥാ നിട്ഠിതാ.
Upekkhāsamannāgatakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൫. ഉപേക്ഖാസമന്നാഗതകഥാവണ്ണനാ • 5. Upekkhāsamannāgatakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൫. ഉപേക്ഖാസമന്നാഗതകഥാവണ്ണനാ • 5. Upekkhāsamannāgatakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൫. ഉപേക്ഖാസമന്നാഗതകഥാവണ്ണനാ • 5. Upekkhāsamannāgatakathāvaṇṇanā
