| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৭৭. উপোসথভেদাদি
77. Uposathabhedādi
১৪৯. অথ খো ভিক্খূনং এতদহোসি – ‘‘কতি নু খো উপোসথা’’তি? ভগৰতো এতমত্থং আরোচেসুং। দ্ৰেমে, ভিক্খৰে, উপোসথা – চাতুদ্দসিকো চ পন্নরসিকো চ। ইমে খো, ভিক্খৰে, দ্ৰে উপোসথাতি।
149. Atha kho bhikkhūnaṃ etadahosi – ‘‘kati nu kho uposathā’’ti? Bhagavato etamatthaṃ ārocesuṃ. Dveme, bhikkhave, uposathā – cātuddasiko ca pannarasiko ca. Ime kho, bhikkhave, dve uposathāti.
অথ খো ভিক্খূনং এতদহোসি – ‘‘কতি নু খো উপোসথকম্মানী’’তি? ভগৰতো এতমত্থং আরোচেসুং। চত্তারিমানি, ভিক্খৰে, উপোসথকম্মানি – অধম্মেন ৰগ্গং উপোসথকম্মং, অধম্মেন সমগ্গং উপোসথকম্মং, ধম্মেন ৰগ্গং উপোসথকম্মং, ধম্মেন সমগ্গং উপোসথকম্মন্তি। তত্র, ভিক্খৰে, যদিদং অধম্মেন ৰগ্গং উপোসথকম্মং, ন, ভিক্খৰে, এৰরূপং উপোসথকম্মং, কাতব্বং। ন চ মযা এৰরূপং উপোসথকম্মং অনুঞ্ঞাতং। তত্র, ভিক্খৰে, যদিদং অধম্মেন সমগ্গং উপোসথকম্মং, ন, ভিক্খৰে, এৰরূপং উপোসথকম্মং কাতব্বং। ন চ মযা এৰরূপং উপোসথকম্মং অনুঞ্ঞাতং। তত্র, ভিক্খৰে, যদিদং ধম্মেন ৰগ্গং উপোসথকম্মং, ন, ভিক্খৰে, এৰরূপং উপোসথকম্মং কাতব্বং। ন চ মযা এৰরূপং উপোসথকম্মং অনুঞ্ঞাতং। তত্র, ভিক্খৰে, যদিদং ধম্মেন সমগ্গং উপোসথকম্মং, এৰরূপং, ভিক্খৰে, উপোসথকম্মং কাতব্বং, এৰরূপঞ্চ মযা উপোসথকম্মং অনুঞ্ঞাতং। তস্মাতিহ, ভিক্খৰে, এৰরূপং উপোসথকম্মং করিস্সাম যদিদং ধম্মেন সমগ্গন্তি – এৰঞ্হি ৰো, ভিক্খৰে, সিক্খিতব্বন্তি।
Atha kho bhikkhūnaṃ etadahosi – ‘‘kati nu kho uposathakammānī’’ti? Bhagavato etamatthaṃ ārocesuṃ. Cattārimāni, bhikkhave, uposathakammāni – adhammena vaggaṃ uposathakammaṃ, adhammena samaggaṃ uposathakammaṃ, dhammena vaggaṃ uposathakammaṃ, dhammena samaggaṃ uposathakammanti. Tatra, bhikkhave, yadidaṃ adhammena vaggaṃ uposathakammaṃ, na, bhikkhave, evarūpaṃ uposathakammaṃ, kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ adhammena samaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena vaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena samaggaṃ uposathakammaṃ, evarūpaṃ, bhikkhave, uposathakammaṃ kātabbaṃ, evarūpañca mayā uposathakammaṃ anuññātaṃ. Tasmātiha, bhikkhave, evarūpaṃ uposathakammaṃ karissāma yadidaṃ dhammena samagganti – evañhi vo, bhikkhave, sikkhitabbanti.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / উপোসথভেদাদিকথা • Uposathabhedādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপোসথভেদাদিকথাৰণ্ণনা • Uposathabhedādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপোসথভেদাদিকথাৰণ্ণনা • Uposathabhedādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপোসথভেদাদিকথাৰণ্ণনা • Uposathabhedādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭৭. উপোসথভেদাদিকথা • 77. Uposathabhedādikathā
