| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
77. උපොසථභෙදාදි
77. Uposathabhedādi
149. අථ ඛො භික්‌ඛූනං එතදහොසි – ‘‘කති නු ඛො උපොසථා’’ති? භගවතො එතමත්‌ථං ආරොචෙසුං. ද්‌වෙමෙ, භික්‌ඛවෙ, උපොසථා – චාතුද්‌දසිකො ච පන්‌නරසිකො ච. ඉමෙ ඛො, භික්‌ඛවෙ, ද්‌වෙ උපොසථාති.
149. Atha kho bhikkhūnaṃ etadahosi – ‘‘kati nu kho uposathā’’ti? Bhagavato etamatthaṃ ārocesuṃ. Dveme, bhikkhave, uposathā – cātuddasiko ca pannarasiko ca. Ime kho, bhikkhave, dve uposathāti.
අථ ඛො භික්‌ඛූනං එතදහොසි – ‘‘කති නු ඛො උපොසථකම්‌මානී’’ති? භගවතො එතමත්‌ථං ආරොචෙසුං. චත්‌තාරිමානි, භික්‌ඛවෙ, උපොසථකම්‌මානි – අධම්‌මෙන වග්‌ගං උපොසථකම්‌මං, අධම්‌මෙන සමග්‌ගං උපොසථකම්‌මං, ධම්‌මෙන වග්‌ගං උපොසථකම්‌මං, ධම්‌මෙන සමග්‌ගං උපොසථකම්‌මන්‌ති. තත්‍ර, භික්‌ඛවෙ, යදිදං අධම්‌මෙන වග්‌ගං උපොසථකම්‌මං, න, භික්‌ඛවෙ, එවරූපං උපොසථකම්‌මං, කාතබ්‌බං. න ච මයා එවරූපං උපොසථකම්‌මං අනුඤ්‌ඤාතං. තත්‍ර, භික්‌ඛවෙ, යදිදං අධම්‌මෙන සමග්‌ගං උපොසථකම්‌මං, න, භික්‌ඛවෙ, එවරූපං උපොසථකම්‌මං කාතබ්‌බං. න ච මයා එවරූපං උපොසථකම්‌මං අනුඤ්‌ඤාතං. තත්‍ර, භික්‌ඛවෙ, යදිදං ධම්‌මෙන වග්‌ගං උපොසථකම්‌මං, න, භික්‌ඛවෙ, එවරූපං උපොසථකම්‌මං කාතබ්‌බං. න ච මයා එවරූපං උපොසථකම්‌මං අනුඤ්‌ඤාතං. තත්‍ර, භික්‌ඛවෙ, යදිදං ධම්‌මෙන සමග්‌ගං උපොසථකම්‌මං, එවරූපං, භික්‌ඛවෙ, උපොසථකම්‌මං කාතබ්‌බං, එවරූපඤ්‌ච මයා උපොසථකම්‌මං අනුඤ්‌ඤාතං. තස්‌මාතිහ, භික්‌ඛවෙ, එවරූපං උපොසථකම්‌මං කරිස්‌සාම යදිදං ධම්‌මෙන සමග්‌ගන්‌ති – එවඤ්‌හි වො, භික්‌ඛවෙ, සික්‌ඛිතබ්‌බන්‌ති.
Atha kho bhikkhūnaṃ etadahosi – ‘‘kati nu kho uposathakammānī’’ti? Bhagavato etamatthaṃ ārocesuṃ. Cattārimāni, bhikkhave, uposathakammāni – adhammena vaggaṃ uposathakammaṃ, adhammena samaggaṃ uposathakammaṃ, dhammena vaggaṃ uposathakammaṃ, dhammena samaggaṃ uposathakammanti. Tatra, bhikkhave, yadidaṃ adhammena vaggaṃ uposathakammaṃ, na, bhikkhave, evarūpaṃ uposathakammaṃ, kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ adhammena samaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena vaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena samaggaṃ uposathakammaṃ, evarūpaṃ, bhikkhave, uposathakammaṃ kātabbaṃ, evarūpañca mayā uposathakammaṃ anuññātaṃ. Tasmātiha, bhikkhave, evarūpaṃ uposathakammaṃ karissāma yadidaṃ dhammena samagganti – evañhi vo, bhikkhave, sikkhitabbanti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / උපොසථභෙදාදිකථා • Uposathabhedādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / උපොසථභෙදාදිකථාවණ්‌ණනා • Uposathabhedādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / උපොසථභෙදාදිකථාවණ්‌ණනා • Uposathabhedādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / උපොසථභෙදාදිකථාවණ්‌ණනා • Uposathabhedādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 77. උපොසථභෙදාදිකථා • 77. Uposathabhedādikathā
