| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
உபோஸதா²கா³ராதி³கதா²
Uposathāgārādikathā
141. அனுபரிவேணியந்தி ஏகஸீமமஹாவிஹாரே தஸ்மிங் தஸ்மிங் பரிவேணே. அஸங்கேதேனாதி ஸங்கேதங் அகத்வா. ஏகங் ஸமூஹனித்வாதி கம்மவாசாய ஸமூஹனித்வா.
141.Anupariveṇiyanti ekasīmamahāvihāre tasmiṃ tasmiṃ pariveṇe. Asaṅketenāti saṅketaṃ akatvā. Ekaṃ samūhanitvāti kammavācāya samūhanitvā.
142. யதோ பாதிமொக்க²ங் ஸுணாதீதி யத்த² கத்த²சி பி⁴க்கூ²னங் ஹத்த²பாஸே நிஸின்னோ யஸ்மா பாதிமொக்க²ங் ஸுணாதி; கதோவஸ்ஸ உபோஸதோ²தி அத்தோ². இத³ஞ்ச வத்து²வஸேன வுத்தங், ஹத்த²பாஸே நிஸின்னஸ்ஸ பன அஸுணந்தஸ்ஸாபி கதோவ ஹோதி உபோஸதோ². நிமித்தா கித்தேதப்³பா³தி உபோஸத²பமுக²ஸ்ஸ கு²த்³த³கானி வா மஹந்தானி வா பாஸாணஇட்ட²கதா³ருக²ண்ட³த³ண்ட³காதீ³னி யானி கானிசி நிமித்தானி அப்³போ⁴காஸே வா மாளகாதீ³ஸு வா யத்த² கத்த²சி ஸஞ்ஞங் கத்வா கித்தேதுங் வட்டதி. அத² வா நிமித்தா கித்தேதப்³பா³தி நிமித்துபகா³ வா அனிமித்துபகா³ வா பரிச்சே²த³ஜானநத்த²ங் கித்தேதப்³பா³.
142.Yato pātimokkhaṃ suṇātīti yattha katthaci bhikkhūnaṃ hatthapāse nisinno yasmā pātimokkhaṃ suṇāti; katovassa uposathoti attho. Idañca vatthuvasena vuttaṃ, hatthapāse nisinnassa pana asuṇantassāpi katova hoti uposatho. Nimittā kittetabbāti uposathapamukhassa khuddakāni vā mahantāni vā pāsāṇaiṭṭhakadārukhaṇḍadaṇḍakādīni yāni kānici nimittāni abbhokāse vā māḷakādīsu vā yattha katthaci saññaṃ katvā kittetuṃ vaṭṭati. Atha vā nimittā kittetabbāti nimittupagā vā animittupagā vā paricchedajānanatthaṃ kittetabbā.
தே²ரேஹி பி⁴க்கூ²ஹி பட²மதரங் ஸன்னிபதிதுந்தி எத்த² ஸசே மஹாதே²ரோ பட²மதரங் ந ஆக³ச்ச²தி, து³க்கடங். ஸப்³பே³ஹேவ ஏகஜ்ஜ²ங் ஸன்னிபதித்வா உபோஸதோ² காதப்³போ³தி எத்த² ஸசே போராணகோ ஆவாஸோ மஜ்ஜே² விஹாரஸ்ஸ ஹோதி, பஹோதி செத்த² பி⁴க்கூ²னங் நிஸஜ்ஜட்டா²னங், தத்த² ஸன்னிபதித்வா உபோஸதோ² காதப்³போ³. ஸசே போராணகோ பரிது³ப்³ப³லோ சேவ ஸம்பா³தோ⁴ ச அஞ்ஞோ பச்சா² உட்டி²தாவாஸோ அஸம்பா³தோ⁴, தத்த² உபோஸதோ² காதப்³போ³.
Therehi bhikkhūhi paṭhamataraṃ sannipatitunti ettha sace mahāthero paṭhamataraṃ na āgacchati, dukkaṭaṃ. Sabbeheva ekajjhaṃ sannipatitvā uposatho kātabboti ettha sace porāṇako āvāso majjhe vihārassa hoti, pahoti cettha bhikkhūnaṃ nisajjaṭṭhānaṃ, tattha sannipatitvā uposatho kātabbo. Sace porāṇako paridubbalo ceva sambādho ca añño pacchā uṭṭhitāvāso asambādho, tattha uposatho kātabbo.
யத்த² வா பன தே²ரோ பி⁴க்கு² விஹரதீதி எத்தா²பி ஸசே தே²ரஸ்ஸ விஹாரோ ஸப்³பே³ஸங் பஹோதி, பா²ஸுகோ ஹோதி, தத்த² உபோஸதோ² காதப்³போ³. ஸசே பன ஸோ பச்சந்தே விஸமப்பதே³ஸே ஹோதி, தே²ரஸ்ஸ வத்தப்³ப³ங் – ‘‘ப⁴ந்தே, தும்ஹாகங் விஹாரோ அபா²ஸுகதே³ஸோ, நத்தி² எத்த² ஸப்³பே³ஸங் ஓகாஸோ , அஸுகஸ்மிங் நாம ஆவாஸே ஓகாஸோ அத்தி², தத்த² க³ந்துங் வட்டதீ’’தி. ஸசே தே²ரோ நாக³ச்ச²தி, தஸ்ஸ ச²ந்த³பாரிஸுத்³தி⁴ங் ஆனெத்வா ஸப்³பே³ஸங் பஹோனகே பா²ஸுகட்டா²னே உபோஸதோ² காதப்³போ³.
Yattha vā pana thero bhikkhu viharatīti etthāpi sace therassa vihāro sabbesaṃ pahoti, phāsuko hoti, tattha uposatho kātabbo. Sace pana so paccante visamappadese hoti, therassa vattabbaṃ – ‘‘bhante, tumhākaṃ vihāro aphāsukadeso, natthi ettha sabbesaṃ okāso , asukasmiṃ nāma āvāse okāso atthi, tattha gantuṃ vaṭṭatī’’ti. Sace thero nāgacchati, tassa chandapārisuddhiṃ ānetvā sabbesaṃ pahonake phāsukaṭṭhāne uposatho kātabbo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
72. உபோஸதா²கா³ரகதா² • 72. Uposathāgārakathā
73. உபோஸத²ப்பமுகா²னுஜானநா • 73. Uposathappamukhānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபோஸதா²கா³ராதி³கதா²வண்ணனா • Uposathāgārādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபோஸதா²கா³ராதி³கதா²வண்ணனா • Uposathāgārādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபோஸதா²கா³ராதி³கதா²வண்ணனா • Uposathāgārādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 72. உபோஸதா²கா³ராதி³கதா² • 72. Uposathāgārādikathā
