| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
72. உபோஸதா²கா³ராதி³கதா²
72. Uposathāgārādikathā
141. அனுபரிவேணியந்தி எத்த² அனுஸத்³த³ஸ்ஸ விச்ச²த்த²ங், பரிவேணஸத்³த³ஸ்ஸ ச லிங்க³விபல்லாஸபா⁴வங் த³ஸ்ஸேதுங் வுத்தங் ‘‘தஸ்மிங் தஸ்மிங் பரிவேணே’’தி. பரிவேணஸத்³தோ³ ஹி நபுங்ஸகலிங்கோ³, இத⁴ பன லிங்க³விபல்லாஸங் கத்வா இத்தி²லிங்க³வஸேன வுத்தங். ‘‘ஸங்கேதங் அகத்வா’’தி இமினா அஸங்கேதேனாதி பத³ஸ்ஸ கிரியாவிஸேஸனத்தங் தீ³பேதி. ‘‘கம்மவாசாயா’’தி இமினா ஸமூஹனித்வாதி பத³ஸ்ஸ கரணங் த³ஸ்ஸேதி.
141.Anupariveṇiyanti ettha anusaddassa vicchatthaṃ, pariveṇasaddassa ca liṅgavipallāsabhāvaṃ dassetuṃ vuttaṃ ‘‘tasmiṃ tasmiṃ pariveṇe’’ti. Pariveṇasaddo hi napuṃsakaliṅgo, idha pana liṅgavipallāsaṃ katvā itthiliṅgavasena vuttaṃ. ‘‘Saṅketaṃ akatvā’’ti iminā asaṅketenāti padassa kiriyāvisesanattaṃ dīpeti. ‘‘Kammavācāyā’’ti iminā samūhanitvāti padassa karaṇaṃ dasseti.
142. யதோதி எத்த² தோபச்சயஸ்ஸ காரணத்தே² பவத்தபா⁴வங் த³ஸ்ஸெந்தோ ஆஹ ‘‘யஸ்மா’’தி. ‘‘ஹத்த²பாஸே’’தி இமினா ஹத்த²பாஸதோ ப³ஹி நிஸின்னே அகதோவஸ்ஸ உபோஸதோ² ஹோதீதி த³ஸ்ஸேதி. அஸ்ஸாதி பி⁴க்கு²னோ. வத்து²வஸேனாதி அட்டு²ப்பத்திவஸேன. உபோஸத²ஸ்ஸ பமுக²ஸ்ஸ அப்³போ⁴காஸே வா மாளகாதீ³ஸு வாதி ஸம்ப³ந்தோ⁴. நிமித்துபகா³ வா அனிமித்துபகா³ வாதி ஹெட்டா² அட்ட²ஸு நிமித்தேஸு வுத்தா நிமித்துபகா³ வா அனிமித்துபகா³ வா பப்³ப³தாத³யோ வா அஞ்ஞே வா கித்தேதப்³பா³.
142.Yatoti ettha topaccayassa kāraṇatthe pavattabhāvaṃ dassento āha ‘‘yasmā’’ti. ‘‘Hatthapāse’’ti iminā hatthapāsato bahi nisinne akatovassa uposatho hotīti dasseti. Assāti bhikkhuno. Vatthuvasenāti aṭṭhuppattivasena. Uposathassa pamukhassa abbhokāse vā māḷakādīsu vāti sambandho. Nimittupagā vā animittupagā vāti heṭṭhā aṭṭhasu nimittesu vuttā nimittupagā vā animittupagā vā pabbatādayo vā aññe vā kittetabbā.
பட²மதரங் ந ஆக³ச்ச²தி, து³க்கடந்தி உபோஸதே² கோ⁴ஸியமானே பட²மதரங் ந ஆக³ச்ச²தி, து³க்கடங். விஹாரஸ்ஸ மஜ்ஜே² ஹோதீதி யோஜனா. எத்தா²தி போராணகே ஆவாஸே. தத்தா²தி போராணகே ஆவாஸே. அஸம்பா³தோ⁴தி ஸங்க⁴ஸ்ஸ நிஸஜ்ஜட்டா²னபஹோனகோ. தத்தா²தி பச்சா² உட்டி²தே ஆவாஸே.
Paṭhamataraṃna āgacchati, dukkaṭanti uposathe ghosiyamāne paṭhamataraṃ na āgacchati, dukkaṭaṃ. Vihārassa majjhe hotīti yojanā. Etthāti porāṇake āvāse. Tatthāti porāṇake āvāse. Asambādhoti saṅghassa nisajjaṭṭhānapahonako. Tatthāti pacchā uṭṭhite āvāse.
ஸப்³பே³ஸங் நிஸஜ்ஜட்டா²னந்தி யோஜனா. தத்தா²தி தே²ரஸ்ஸ விஹாரே. ஸோதி தே²ரஸ்ஸ விஹாரோ. எத்தா²தி தும்ஹாகங் விஹாரே. ஸப்³பே³ஸங் ஓகாஸோ நத்தீ²தி ஸம்ப³ந்தோ⁴. தத்தா²தி தங் அஸுகங் நாம ஆவாஸங். ‘‘வட்டதீ’’தி வத்தப்³ப³ந்தி யோஜனா. தஸ்ஸாதி தே²ரஸ்ஸ.
Sabbesaṃ nisajjaṭṭhānanti yojanā. Tatthāti therassa vihāre. Soti therassa vihāro. Etthāti tumhākaṃ vihāre. Sabbesaṃ okāso natthīti sambandho. Tatthāti taṃ asukaṃ nāma āvāsaṃ. ‘‘Vaṭṭatī’’ti vattabbanti yojanā. Tassāti therassa.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
72. உபோஸதா²கா³ரகதா² • 72. Uposathāgārakathā
73. உபோஸத²ப்பமுகா²னுஜானநா • 73. Uposathappamukhānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உபோஸதா²கா³ராதி³கதா² • Uposathāgārādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபோஸதா²கா³ராதி³கதா²வண்ணனா • Uposathāgārādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபோஸதா²கா³ராதி³கதா²வண்ணனா • Uposathāgārādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபோஸதா²கா³ராதி³கதா²வண்ணனா • Uposathāgārādikathāvaṇṇanā
