| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
উপোসথাগারাদিকথা
Uposathāgārādikathā
১৪১. অনুপরিৰেণিযন্তি একসীমমহাৰিহারে তস্মিং তস্মিং পরিৰেণে। অসঙ্কেতেনাতি সঙ্কেতং অকত্ৰা। একং সমূহনিত্ৰাতি কম্মৰাচায সমূহনিত্ৰা।
141.Anupariveṇiyanti ekasīmamahāvihāre tasmiṃ tasmiṃ pariveṇe. Asaṅketenāti saṅketaṃ akatvā. Ekaṃ samūhanitvāti kammavācāya samūhanitvā.
১৪২. যতো পাতিমোক্খং সুণাতীতি যত্থ কত্থচি ভিক্খূনং হত্থপাসে নিসিন্নো যস্মা পাতিমোক্খং সুণাতি; কতোৰস্স উপোসথোতি অত্থো। ইদঞ্চ ৰত্থুৰসেন ৰুত্তং, হত্থপাসে নিসিন্নস্স পন অসুণন্তস্সাপি কতোৰ হোতি উপোসথো। নিমিত্তা কিত্তেতব্বাতি উপোসথপমুখস্স খুদ্দকানি ৰা মহন্তানি ৰা পাসাণইট্ঠকদারুখণ্ডদণ্ডকাদীনি যানি কানিচি নিমিত্তানি অব্ভোকাসে ৰা মাল়কাদীসু ৰা যত্থ কত্থচি সঞ্ঞং কত্ৰা কিত্তেতুং ৰট্টতি। অথ ৰা নিমিত্তা কিত্তেতব্বাতি নিমিত্তুপগা ৰা অনিমিত্তুপগা ৰা পরিচ্ছেদজাননত্থং কিত্তেতব্বা।
142.Yato pātimokkhaṃ suṇātīti yattha katthaci bhikkhūnaṃ hatthapāse nisinno yasmā pātimokkhaṃ suṇāti; katovassa uposathoti attho. Idañca vatthuvasena vuttaṃ, hatthapāse nisinnassa pana asuṇantassāpi katova hoti uposatho. Nimittā kittetabbāti uposathapamukhassa khuddakāni vā mahantāni vā pāsāṇaiṭṭhakadārukhaṇḍadaṇḍakādīni yāni kānici nimittāni abbhokāse vā māḷakādīsu vā yattha katthaci saññaṃ katvā kittetuṃ vaṭṭati. Atha vā nimittā kittetabbāti nimittupagā vā animittupagā vā paricchedajānanatthaṃ kittetabbā.
থেরেহি ভিক্খূহি পঠমতরং সন্নিপতিতুন্তি এত্থ সচে মহাথেরো পঠমতরং ন আগচ্ছতি, দুক্কটং। সব্বেহেৰ একজ্ঝং সন্নিপতিত্ৰা উপোসথো কাতব্বোতি এত্থ সচে পোরাণকো আৰাসো মজ্ঝে ৰিহারস্স হোতি, পহোতি চেত্থ ভিক্খূনং নিসজ্জট্ঠানং, তত্থ সন্নিপতিত্ৰা উপোসথো কাতব্বো। সচে পোরাণকো পরিদুব্বলো চেৰ সম্বাধো চ অঞ্ঞো পচ্ছা উট্ঠিতাৰাসো অসম্বাধো, তত্থ উপোসথো কাতব্বো।
Therehi bhikkhūhi paṭhamataraṃ sannipatitunti ettha sace mahāthero paṭhamataraṃ na āgacchati, dukkaṭaṃ. Sabbeheva ekajjhaṃ sannipatitvā uposatho kātabboti ettha sace porāṇako āvāso majjhe vihārassa hoti, pahoti cettha bhikkhūnaṃ nisajjaṭṭhānaṃ, tattha sannipatitvā uposatho kātabbo. Sace porāṇako paridubbalo ceva sambādho ca añño pacchā uṭṭhitāvāso asambādho, tattha uposatho kātabbo.
যত্থ ৰা পন থেরো ভিক্খু ৰিহরতীতি এত্থাপি সচে থেরস্স ৰিহারো সব্বেসং পহোতি, ফাসুকো হোতি, তত্থ উপোসথো কাতব্বো। সচে পন সো পচ্চন্তে ৰিসমপ্পদেসে হোতি, থেরস্স ৰত্তব্বং – ‘‘ভন্তে, তুম্হাকং ৰিহারো অফাসুকদেসো, নত্থি এত্থ সব্বেসং ওকাসো , অসুকস্মিং নাম আৰাসে ওকাসো অত্থি, তত্থ গন্তুং ৰট্টতী’’তি। সচে থেরো নাগচ্ছতি, তস্স ছন্দপারিসুদ্ধিং আনেত্ৰা সব্বেসং পহোনকে ফাসুকট্ঠানে উপোসথো কাতব্বো।
Yattha vā pana thero bhikkhu viharatīti etthāpi sace therassa vihāro sabbesaṃ pahoti, phāsuko hoti, tattha uposatho kātabbo. Sace pana so paccante visamappadese hoti, therassa vattabbaṃ – ‘‘bhante, tumhākaṃ vihāro aphāsukadeso, natthi ettha sabbesaṃ okāso , asukasmiṃ nāma āvāse okāso atthi, tattha gantuṃ vaṭṭatī’’ti. Sace thero nāgacchati, tassa chandapārisuddhiṃ ānetvā sabbesaṃ pahonake phāsukaṭṭhāne uposatho kātabbo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৭২. উপোসথাগারকথা • 72. Uposathāgārakathā
৭৩. উপোসথপ্পমুখানুজাননা • 73. Uposathappamukhānujānanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপোসথাগারাদিকথাৰণ্ণনা • Uposathāgārādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপোসথাগারাদিকথাৰণ্ণনা • Uposathāgārādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপোসথাগারাদিকথাৰণ্ণনা • Uposathāgārādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭২. উপোসথাগারাদিকথা • 72. Uposathāgārādikathā
