| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಉಪೋಸಥಾಗಾರಾದಿಕಥಾ
Uposathāgārādikathā
೧೪೧. ಅನುಪರಿವೇಣಿಯನ್ತಿ ಏಕಸೀಮಮಹಾವಿಹಾರೇ ತಸ್ಮಿಂ ತಸ್ಮಿಂ ಪರಿವೇಣೇ। ಅಸಙ್ಕೇತೇನಾತಿ ಸಙ್ಕೇತಂ ಅಕತ್ವಾ। ಏಕಂ ಸಮೂಹನಿತ್ವಾತಿ ಕಮ್ಮವಾಚಾಯ ಸಮೂಹನಿತ್ವಾ।
141.Anupariveṇiyanti ekasīmamahāvihāre tasmiṃ tasmiṃ pariveṇe. Asaṅketenāti saṅketaṃ akatvā. Ekaṃ samūhanitvāti kammavācāya samūhanitvā.
೧೪೨. ಯತೋ ಪಾತಿಮೋಕ್ಖಂ ಸುಣಾತೀತಿ ಯತ್ಥ ಕತ್ಥಚಿ ಭಿಕ್ಖೂನಂ ಹತ್ಥಪಾಸೇ ನಿಸಿನ್ನೋ ಯಸ್ಮಾ ಪಾತಿಮೋಕ್ಖಂ ಸುಣಾತಿ; ಕತೋವಸ್ಸ ಉಪೋಸಥೋತಿ ಅತ್ಥೋ। ಇದಞ್ಚ ವತ್ಥುವಸೇನ ವುತ್ತಂ, ಹತ್ಥಪಾಸೇ ನಿಸಿನ್ನಸ್ಸ ಪನ ಅಸುಣನ್ತಸ್ಸಾಪಿ ಕತೋವ ಹೋತಿ ಉಪೋಸಥೋ। ನಿಮಿತ್ತಾ ಕಿತ್ತೇತಬ್ಬಾತಿ ಉಪೋಸಥಪಮುಖಸ್ಸ ಖುದ್ದಕಾನಿ ವಾ ಮಹನ್ತಾನಿ ವಾ ಪಾಸಾಣಇಟ್ಠಕದಾರುಖಣ್ಡದಣ್ಡಕಾದೀನಿ ಯಾನಿ ಕಾನಿಚಿ ನಿಮಿತ್ತಾನಿ ಅಬ್ಭೋಕಾಸೇ ವಾ ಮಾಳಕಾದೀಸು ವಾ ಯತ್ಥ ಕತ್ಥಚಿ ಸಞ್ಞಂ ಕತ್ವಾ ಕಿತ್ತೇತುಂ ವಟ್ಟತಿ। ಅಥ ವಾ ನಿಮಿತ್ತಾ ಕಿತ್ತೇತಬ್ಬಾತಿ ನಿಮಿತ್ತುಪಗಾ ವಾ ಅನಿಮಿತ್ತುಪಗಾ ವಾ ಪರಿಚ್ಛೇದಜಾನನತ್ಥಂ ಕಿತ್ತೇತಬ್ಬಾ।
142.Yato pātimokkhaṃ suṇātīti yattha katthaci bhikkhūnaṃ hatthapāse nisinno yasmā pātimokkhaṃ suṇāti; katovassa uposathoti attho. Idañca vatthuvasena vuttaṃ, hatthapāse nisinnassa pana asuṇantassāpi katova hoti uposatho. Nimittā kittetabbāti uposathapamukhassa khuddakāni vā mahantāni vā pāsāṇaiṭṭhakadārukhaṇḍadaṇḍakādīni yāni kānici nimittāni abbhokāse vā māḷakādīsu vā yattha katthaci saññaṃ katvā kittetuṃ vaṭṭati. Atha vā nimittā kittetabbāti nimittupagā vā animittupagā vā paricchedajānanatthaṃ kittetabbā.
ಥೇರೇಹಿ ಭಿಕ್ಖೂಹಿ ಪಠಮತರಂ ಸನ್ನಿಪತಿತುನ್ತಿ ಏತ್ಥ ಸಚೇ ಮಹಾಥೇರೋ ಪಠಮತರಂ ನ ಆಗಚ್ಛತಿ, ದುಕ್ಕಟಂ। ಸಬ್ಬೇಹೇವ ಏಕಜ್ಝಂ ಸನ್ನಿಪತಿತ್ವಾ ಉಪೋಸಥೋ ಕಾತಬ್ಬೋತಿ ಏತ್ಥ ಸಚೇ ಪೋರಾಣಕೋ ಆವಾಸೋ ಮಜ್ಝೇ ವಿಹಾರಸ್ಸ ಹೋತಿ, ಪಹೋತಿ ಚೇತ್ಥ ಭಿಕ್ಖೂನಂ ನಿಸಜ್ಜಟ್ಠಾನಂ, ತತ್ಥ ಸನ್ನಿಪತಿತ್ವಾ ಉಪೋಸಥೋ ಕಾತಬ್ಬೋ। ಸಚೇ ಪೋರಾಣಕೋ ಪರಿದುಬ್ಬಲೋ ಚೇವ ಸಮ್ಬಾಧೋ ಚ ಅಞ್ಞೋ ಪಚ್ಛಾ ಉಟ್ಠಿತಾವಾಸೋ ಅಸಮ್ಬಾಧೋ, ತತ್ಥ ಉಪೋಸಥೋ ಕಾತಬ್ಬೋ।
Therehi bhikkhūhi paṭhamataraṃ sannipatitunti ettha sace mahāthero paṭhamataraṃ na āgacchati, dukkaṭaṃ. Sabbeheva ekajjhaṃ sannipatitvā uposatho kātabboti ettha sace porāṇako āvāso majjhe vihārassa hoti, pahoti cettha bhikkhūnaṃ nisajjaṭṭhānaṃ, tattha sannipatitvā uposatho kātabbo. Sace porāṇako paridubbalo ceva sambādho ca añño pacchā uṭṭhitāvāso asambādho, tattha uposatho kātabbo.
ಯತ್ಥ ವಾ ಪನ ಥೇರೋ ಭಿಕ್ಖು ವಿಹರತೀತಿ ಏತ್ಥಾಪಿ ಸಚೇ ಥೇರಸ್ಸ ವಿಹಾರೋ ಸಬ್ಬೇಸಂ ಪಹೋತಿ, ಫಾಸುಕೋ ಹೋತಿ, ತತ್ಥ ಉಪೋಸಥೋ ಕಾತಬ್ಬೋ। ಸಚೇ ಪನ ಸೋ ಪಚ್ಚನ್ತೇ ವಿಸಮಪ್ಪದೇಸೇ ಹೋತಿ, ಥೇರಸ್ಸ ವತ್ತಬ್ಬಂ – ‘‘ಭನ್ತೇ, ತುಮ್ಹಾಕಂ ವಿಹಾರೋ ಅಫಾಸುಕದೇಸೋ, ನತ್ಥಿ ಏತ್ಥ ಸಬ್ಬೇಸಂ ಓಕಾಸೋ , ಅಸುಕಸ್ಮಿಂ ನಾಮ ಆವಾಸೇ ಓಕಾಸೋ ಅತ್ಥಿ, ತತ್ಥ ಗನ್ತುಂ ವಟ್ಟತೀ’’ತಿ। ಸಚೇ ಥೇರೋ ನಾಗಚ್ಛತಿ, ತಸ್ಸ ಛನ್ದಪಾರಿಸುದ್ಧಿಂ ಆನೇತ್ವಾ ಸಬ್ಬೇಸಂ ಪಹೋನಕೇ ಫಾಸುಕಟ್ಠಾನೇ ಉಪೋಸಥೋ ಕಾತಬ್ಬೋ।
Yattha vā pana thero bhikkhu viharatīti etthāpi sace therassa vihāro sabbesaṃ pahoti, phāsuko hoti, tattha uposatho kātabbo. Sace pana so paccante visamappadese hoti, therassa vattabbaṃ – ‘‘bhante, tumhākaṃ vihāro aphāsukadeso, natthi ettha sabbesaṃ okāso , asukasmiṃ nāma āvāse okāso atthi, tattha gantuṃ vaṭṭatī’’ti. Sace thero nāgacchati, tassa chandapārisuddhiṃ ānetvā sabbesaṃ pahonake phāsukaṭṭhāne uposatho kātabbo.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೭೨. ಉಪೋಸಥಾಗಾರಕಥಾ • 72. Uposathāgārakathā
೭೩. ಉಪೋಸಥಪ್ಪಮುಖಾನುಜಾನನಾ • 73. Uposathappamukhānujānanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಉಪೋಸಥಾಗಾರಾದಿಕಥಾವಣ್ಣನಾ • Uposathāgārādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಉಪೋಸಥಾಗಾರಾದಿಕಥಾವಣ್ಣನಾ • Uposathāgārādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಉಪೋಸಥಾಗಾರಾದಿಕಥಾವಣ್ಣನಾ • Uposathāgārādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೭೨. ಉಪೋಸಥಾಗಾರಾದಿಕಥಾ • 72. Uposathāgārādikathā
