| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೭೨. ಉಪೋಸಥಾಗಾರಾದಿಕಥಾ
72. Uposathāgārādikathā
೧೪೧. ಅನುಪರಿವೇಣಿಯನ್ತಿ ಏತ್ಥ ಅನುಸದ್ದಸ್ಸ ವಿಚ್ಛತ್ಥಂ, ಪರಿವೇಣಸದ್ದಸ್ಸ ಚ ಲಿಙ್ಗವಿಪಲ್ಲಾಸಭಾವಂ ದಸ್ಸೇತುಂ ವುತ್ತಂ ‘‘ತಸ್ಮಿಂ ತಸ್ಮಿಂ ಪರಿವೇಣೇ’’ತಿ। ಪರಿವೇಣಸದ್ದೋ ಹಿ ನಪುಂಸಕಲಿಙ್ಗೋ, ಇಧ ಪನ ಲಿಙ್ಗವಿಪಲ್ಲಾಸಂ ಕತ್ವಾ ಇತ್ಥಿಲಿಙ್ಗವಸೇನ ವುತ್ತಂ। ‘‘ಸಙ್ಕೇತಂ ಅಕತ್ವಾ’’ತಿ ಇಮಿನಾ ಅಸಙ್ಕೇತೇನಾತಿ ಪದಸ್ಸ ಕಿರಿಯಾವಿಸೇಸನತ್ತಂ ದೀಪೇತಿ। ‘‘ಕಮ್ಮವಾಚಾಯಾ’’ತಿ ಇಮಿನಾ ಸಮೂಹನಿತ್ವಾತಿ ಪದಸ್ಸ ಕರಣಂ ದಸ್ಸೇತಿ।
141.Anupariveṇiyanti ettha anusaddassa vicchatthaṃ, pariveṇasaddassa ca liṅgavipallāsabhāvaṃ dassetuṃ vuttaṃ ‘‘tasmiṃ tasmiṃ pariveṇe’’ti. Pariveṇasaddo hi napuṃsakaliṅgo, idha pana liṅgavipallāsaṃ katvā itthiliṅgavasena vuttaṃ. ‘‘Saṅketaṃ akatvā’’ti iminā asaṅketenāti padassa kiriyāvisesanattaṃ dīpeti. ‘‘Kammavācāyā’’ti iminā samūhanitvāti padassa karaṇaṃ dasseti.
೧೪೨. ಯತೋತಿ ಏತ್ಥ ತೋಪಚ್ಚಯಸ್ಸ ಕಾರಣತ್ಥೇ ಪವತ್ತಭಾವಂ ದಸ್ಸೇನ್ತೋ ಆಹ ‘‘ಯಸ್ಮಾ’’ತಿ। ‘‘ಹತ್ಥಪಾಸೇ’’ತಿ ಇಮಿನಾ ಹತ್ಥಪಾಸತೋ ಬಹಿ ನಿಸಿನ್ನೇ ಅಕತೋವಸ್ಸ ಉಪೋಸಥೋ ಹೋತೀತಿ ದಸ್ಸೇತಿ। ಅಸ್ಸಾತಿ ಭಿಕ್ಖುನೋ। ವತ್ಥುವಸೇನಾತಿ ಅಟ್ಠುಪ್ಪತ್ತಿವಸೇನ। ಉಪೋಸಥಸ್ಸ ಪಮುಖಸ್ಸ ಅಬ್ಭೋಕಾಸೇ ವಾ ಮಾಳಕಾದೀಸು ವಾತಿ ಸಮ್ಬನ್ಧೋ। ನಿಮಿತ್ತುಪಗಾ ವಾ ಅನಿಮಿತ್ತುಪಗಾ ವಾತಿ ಹೇಟ್ಠಾ ಅಟ್ಠಸು ನಿಮಿತ್ತೇಸು ವುತ್ತಾ ನಿಮಿತ್ತುಪಗಾ ವಾ ಅನಿಮಿತ್ತುಪಗಾ ವಾ ಪಬ್ಬತಾದಯೋ ವಾ ಅಞ್ಞೇ ವಾ ಕಿತ್ತೇತಬ್ಬಾ।
142.Yatoti ettha topaccayassa kāraṇatthe pavattabhāvaṃ dassento āha ‘‘yasmā’’ti. ‘‘Hatthapāse’’ti iminā hatthapāsato bahi nisinne akatovassa uposatho hotīti dasseti. Assāti bhikkhuno. Vatthuvasenāti aṭṭhuppattivasena. Uposathassa pamukhassa abbhokāse vā māḷakādīsu vāti sambandho. Nimittupagā vā animittupagā vāti heṭṭhā aṭṭhasu nimittesu vuttā nimittupagā vā animittupagā vā pabbatādayo vā aññe vā kittetabbā.
ಪಠಮತರಂ ನ ಆಗಚ್ಛತಿ, ದುಕ್ಕಟನ್ತಿ ಉಪೋಸಥೇ ಘೋಸಿಯಮಾನೇ ಪಠಮತರಂ ನ ಆಗಚ್ಛತಿ, ದುಕ್ಕಟಂ। ವಿಹಾರಸ್ಸ ಮಜ್ಝೇ ಹೋತೀತಿ ಯೋಜನಾ। ಏತ್ಥಾತಿ ಪೋರಾಣಕೇ ಆವಾಸೇ। ತತ್ಥಾತಿ ಪೋರಾಣಕೇ ಆವಾಸೇ। ಅಸಮ್ಬಾಧೋತಿ ಸಙ್ಘಸ್ಸ ನಿಸಜ್ಜಟ್ಠಾನಪಹೋನಕೋ। ತತ್ಥಾತಿ ಪಚ್ಛಾ ಉಟ್ಠಿತೇ ಆವಾಸೇ।
Paṭhamataraṃna āgacchati, dukkaṭanti uposathe ghosiyamāne paṭhamataraṃ na āgacchati, dukkaṭaṃ. Vihārassa majjhe hotīti yojanā. Etthāti porāṇake āvāse. Tatthāti porāṇake āvāse. Asambādhoti saṅghassa nisajjaṭṭhānapahonako. Tatthāti pacchā uṭṭhite āvāse.
ಸಬ್ಬೇಸಂ ನಿಸಜ್ಜಟ್ಠಾನನ್ತಿ ಯೋಜನಾ। ತತ್ಥಾತಿ ಥೇರಸ್ಸ ವಿಹಾರೇ। ಸೋತಿ ಥೇರಸ್ಸ ವಿಹಾರೋ। ಏತ್ಥಾತಿ ತುಮ್ಹಾಕಂ ವಿಹಾರೇ। ಸಬ್ಬೇಸಂ ಓಕಾಸೋ ನತ್ಥೀತಿ ಸಮ್ಬನ್ಧೋ। ತತ್ಥಾತಿ ತಂ ಅಸುಕಂ ನಾಮ ಆವಾಸಂ। ‘‘ವಟ್ಟತೀ’’ತಿ ವತ್ತಬ್ಬನ್ತಿ ಯೋಜನಾ। ತಸ್ಸಾತಿ ಥೇರಸ್ಸ।
Sabbesaṃ nisajjaṭṭhānanti yojanā. Tatthāti therassa vihāre. Soti therassa vihāro. Etthāti tumhākaṃ vihāre. Sabbesaṃ okāso natthīti sambandho. Tatthāti taṃ asukaṃ nāma āvāsaṃ. ‘‘Vaṭṭatī’’ti vattabbanti yojanā. Tassāti therassa.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೭೨. ಉಪೋಸಥಾಗಾರಕಥಾ • 72. Uposathāgārakathā
೭೩. ಉಪೋಸಥಪ್ಪಮುಖಾನುಜಾನನಾ • 73. Uposathappamukhānujānanā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಉಪೋಸಥಾಗಾರಾದಿಕಥಾ • Uposathāgārādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಉಪೋಸಥಾಗಾರಾದಿಕಥಾವಣ್ಣನಾ • Uposathāgārādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಉಪೋಸಥಾಗಾರಾದಿಕಥಾವಣ್ಣನಾ • Uposathāgārādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಉಪೋಸಥಾಗಾರಾದಿಕಥಾವಣ್ಣನಾ • Uposathāgārādikathāvaṇṇanā
