| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
72. උපොසථාගාරාදිකථා
72. Uposathāgārādikathā
141. අනුපරිවෙණියන්‌ති එත්‌ථ අනුසද්‌දස්‌ස විච්‌ඡත්‌ථං, පරිවෙණසද්‌දස්‌ස ච ලිඞ්‌ගවිපල්‌ලාසභාවං දස්‌සෙතුං වුත්‌තං ‘‘තස්‌මිං තස්‌මිං පරිවෙණෙ’’ති. පරිවෙණසද්‌දො හි නපුංසකලිඞ්‌ගො, ඉධ පන ලිඞ්‌ගවිපල්‌ලාසං කත්‌වා ඉත්‌ථිලිඞ්‌ගවසෙන වුත්‌තං. ‘‘සඞ්‌කෙතං අකත්‌වා’’ති ඉමිනා අසඞ්‌කෙතෙනාති පදස්‌ස කිරියාවිසෙසනත්‌තං දීපෙති. ‘‘කම්‌මවාචායා’’ති ඉමිනා සමූහනිත්‌වාති පදස්‌ස කරණං දස්‌සෙති.
141.Anupariveṇiyanti ettha anusaddassa vicchatthaṃ, pariveṇasaddassa ca liṅgavipallāsabhāvaṃ dassetuṃ vuttaṃ ‘‘tasmiṃ tasmiṃ pariveṇe’’ti. Pariveṇasaddo hi napuṃsakaliṅgo, idha pana liṅgavipallāsaṃ katvā itthiliṅgavasena vuttaṃ. ‘‘Saṅketaṃ akatvā’’ti iminā asaṅketenāti padassa kiriyāvisesanattaṃ dīpeti. ‘‘Kammavācāyā’’ti iminā samūhanitvāti padassa karaṇaṃ dasseti.
142. යතොති එත්‌ථ තොපච්‌චයස්‌ස කාරණත්‌ථෙ පවත්‌තභාවං දස්‌සෙන්‌තො ආහ ‘‘යස්‌මා’’ති. ‘‘හත්‌ථපාසෙ’’ති ඉමිනා හත්‌ථපාසතො බහි නිසින්‌නෙ අකතොවස්‌ස උපොසථො හොතීති දස්‌සෙති. අස්‌සාති භික්‌ඛුනො. වත්‌ථුවසෙනාති අට්‌ඨුප්‌පත්‌තිවසෙන. උපොසථස්‌ස පමුඛස්‌ස අබ්‌භොකාසෙ වා මාළකාදීසු වාති සම්‌බන්‌ධො. නිමිත්‌තුපගා වා අනිමිත්‌තුපගා වාති හෙට්‌ඨා අට්‌ඨසු නිමිත්‌තෙසු වුත්‌තා නිමිත්‌තුපගා වා අනිමිත්‌තුපගා වා පබ්‌බතාදයො වා අඤ්‌ඤෙ වා කිත්‌තෙතබ්‌බා.
142.Yatoti ettha topaccayassa kāraṇatthe pavattabhāvaṃ dassento āha ‘‘yasmā’’ti. ‘‘Hatthapāse’’ti iminā hatthapāsato bahi nisinne akatovassa uposatho hotīti dasseti. Assāti bhikkhuno. Vatthuvasenāti aṭṭhuppattivasena. Uposathassa pamukhassa abbhokāse vā māḷakādīsu vāti sambandho. Nimittupagā vā animittupagā vāti heṭṭhā aṭṭhasu nimittesu vuttā nimittupagā vā animittupagā vā pabbatādayo vā aññe vā kittetabbā.
පඨමතරං න ආගච්‌ඡති, දුක්‌කටන්‌ති උපොසථෙ ඝොසියමානෙ පඨමතරං න ආගච්‌ඡති, දුක්‌කටං. විහාරස්‌ස මජ්‌ඣෙ හොතීති යොජනා. එත්‌ථාති පොරාණකෙ ආවාසෙ. තත්‌ථාති පොරාණකෙ ආවාසෙ. අසම්‌බාධොති සඞ්‌ඝස්‌ස නිසජ්‌ජට්‌ඨානපහොනකො. තත්‌ථාති පච්‌ඡා උට්‌ඨිතෙ ආවාසෙ.
Paṭhamataraṃna āgacchati, dukkaṭanti uposathe ghosiyamāne paṭhamataraṃ na āgacchati, dukkaṭaṃ. Vihārassa majjhe hotīti yojanā. Etthāti porāṇake āvāse. Tatthāti porāṇake āvāse. Asambādhoti saṅghassa nisajjaṭṭhānapahonako. Tatthāti pacchā uṭṭhite āvāse.
සබ්‌බෙසං නිසජ්‌ජට්‌ඨානන්‌ති යොජනා. තත්‌ථාති ථෙරස්‌ස විහාරෙ. සොති ථෙරස්‌ස විහාරො. එත්‌ථාති තුම්‌හාකං විහාරෙ. සබ්‌බෙසං ඔකාසො නත්‌ථීති සම්‌බන්‌ධො. තත්‌ථාති තං අසුකං නාම ආවාසං. ‘‘වට්‌ටතී’’ති වත්‌තබ්‌බන්‌ති යොජනා. තස්‌සාති ථෙරස්‌ස.
Sabbesaṃ nisajjaṭṭhānanti yojanā. Tatthāti therassa vihāre. Soti therassa vihāro. Etthāti tumhākaṃ vihāre. Sabbesaṃ okāso natthīti sambandho. Tatthāti taṃ asukaṃ nāma āvāsaṃ. ‘‘Vaṭṭatī’’ti vattabbanti yojanā. Tassāti therassa.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
72. උපොසථාගාරකථා • 72. Uposathāgārakathā
73. උපොසථප්‌පමුඛානුජානනා • 73. Uposathappamukhānujānanā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / උපොසථාගාරාදිකථා • Uposathāgārādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / උපොසථාගාරාදිකථාවණ්‌ණනා • Uposathāgārādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / උපොසථාගාරාදිකථාවණ්‌ණනා • Uposathāgārādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / උපොසථාගාරාදිකථාවණ්‌ණනා • Uposathāgārādikathāvaṇṇanā
