| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
44. உபோஸத²னித்³தே³ஸவண்ணனா
44. Uposathaniddesavaṇṇanā
411. ஸுத்துத்³தே³ஸோ ஸங்க⁴ஸ்ஸேவ. ஸேஸானந்தி த்³வின்னங் திண்ணங் வா.
411.Suttuddeso saṅghasseva. Sesānanti dvinnaṃ tiṇṇaṃ vā.
412. புப்³ப³கரணே புப்³ப³கிச்சே, பத்தகல்லே ஸமானிதேதி ஸப்³ப³பட²மங் கத்தப்³ப³ங் புப்³ப³கரணங். தத³னந்தரங் கத்தப்³ப³ங் புப்³ப³கிச்சங் நாம. எத்த² –
412.Pubbakaraṇepubbakicce, pattakalle samāniteti sabbapaṭhamaṃ kattabbaṃ pubbakaraṇaṃ. Tadanantaraṃ kattabbaṃ pubbakiccaṃ nāma. Ettha –
‘‘ஸம்மஜ்ஜனீ பதீ³போ ச, உத³கங் ஆஸனேன ச;
‘‘Sammajjanī padīpo ca, udakaṃ āsanena ca;
உபோஸத²ஸ்ஸ ஏதானி, புப்³ப³கரணந்தி வுச்சதி.
Uposathassa etāni, pubbakaraṇanti vuccati.
‘‘ச²ந்த³பாரிஸுத்³தி⁴உதுக்கா²னங், பி⁴க்கு²க³ணனா ச ஓவாதோ³;
‘‘Chandapārisuddhiutukkhānaṃ, bhikkhugaṇanā ca ovādo;
உபோஸத²ஸ்ஸ ஏதானி, புப்³ப³கிச்சந்தி வுச்சதீ’’தி –. (மஹாவ॰ அட்ட²॰ 168);
Uposathassa etāni, pubbakiccanti vuccatī’’ti –. (mahāva. aṭṭha. 168);
ஏவங் அட்ட²கதா²யங் வுத்தனயேன புப்³ப³கரணஞ்ச புப்³ப³கிச்சஞ்ச வேதி³தப்³ப³ங்.
Evaṃ aṭṭhakathāyaṃ vuttanayena pubbakaraṇañca pubbakiccañca veditabbaṃ.
‘‘உபோஸதோ² யாவதிகா ச பி⁴க்கூ² கம்மப்பத்தா,
‘‘Uposatho yāvatikā ca bhikkhū kammappattā,
ஸபா⁴கா³பத்தியோ ச ந விஜ்ஜந்தி;
Sabhāgāpattiyo ca na vijjanti;
வஜ்ஜனீயா ச புக்³க³லா தஸ்மிங் ந ஹொந்தி,
Vajjanīyā ca puggalā tasmiṃ na honti,
பத்தகல்லந்தி வுச்சதீ’’தி –. (மஹாவ॰ அட்ட²॰ 168);
Pattakallanti vuccatī’’ti –. (mahāva. aṭṭha. 168);
வுத்தவஸேன பத்தகல்லே ஸமானிதே, பஜ்ஜிதேதி அத்தோ². ‘‘பஞ்சிமே, பி⁴க்க²வே, பாதிமொக்கு²த்³தே³ஸா. நிதா³னங் உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் பட²மோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் து³தியோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா தேரஸ ஸங்கா⁴தி³ஸேஸே உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் ததியோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா தேரஸ ஸங்கா⁴தி³ஸேஸே உத்³தி³ஸித்வா த்³வே அனியதே உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் சதுத்தோ² பாதிமொக்கு²த்³தே³ஸோ. வித்தா²ரேனேவ பஞ்சமோ. இமே கோ² பி⁴க்க²வே பஞ்ச பாதிமொக்கு²த்³தே³ஸா’’தி (மஹாவ॰ 150) வுத்தத்தா ஸோ ஸுத்துத்³தே³ஸோ பஞ்சதா⁴ விபா⁴விதோதி அத்தோ².
Vuttavasena pattakalle samānite, pajjiteti attho. ‘‘Pañcime, bhikkhave, pātimokkhuddesā. Nidānaṃ uddisitvā avasesaṃ sutena sāvetabbaṃ, ayaṃ paṭhamo pātimokkhuddeso. Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ, ayaṃ dutiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ, ayaṃ tatiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ, ayaṃ catuttho pātimokkhuddeso. Vitthāreneva pañcamo. Ime kho bhikkhave pañca pātimokkhuddesā’’ti (mahāva. 150) vuttattā so suttuddeso pañcadhā vibhāvitoti attho.
413. வினாந்தராயந்தி (மஹாவ॰ 150) ராஜந்தராயாதி³த³ஸவித⁴ங் அந்தராயங் வினா ஸங்கே²பேனுத்³தே³ஸோ வினிவாரிதோ படிக்கி²த்தோதி அத்தோ². தே²ரோவாதி ஸங்க⁴த்தே²ரோவ. எத்தா²தி பஞ்சஸு உத்³தே³ஸேஸு. ‘‘த்³வீஸு வா தீஸு வா விஸதே³ஸு தே²ரோவ இஸ்ஸரோ’’தி அட்ட²கதா²யங் வுத்தத்தா அவத்தந்தேபி அந்தராயே ஸங்கி²த்தேன உத்³தி³ஸிதுங் வட்டதீதி அதி⁴ப்பாயோ. கத்த² வுத்தந்தி சே? ‘‘யோ தத்த² பி⁴க்கு² ப்³யத்தோ படிப³லோ, தஸ்ஸாதெ⁴ய்ய’’ந்தி (மஹாவ॰ 155) வுத்தபாளியா அட்ட²கதா²யங் ‘‘யோ தத்த² பி⁴க்கு² ப்³யத்தோ படிப³லோதி எத்த² கிஞ்சாபி த³ஹரஸ்ஸாபி ப்³யத்தஸ்ஸ பாதிமொக்கோ² அனுஞ்ஞாதோ, அத² கோ² எத்த² அயமதி⁴ப்பாயோ – ஸசே ஸங்க⁴த்தே²ரஸ்ஸ பஞ்ச வா சத்தாரோ வா தயோ வா பாதிமொக்கு²த்³தே³ஸா நாக³ச்ச²ந்தி, த்³வே பன அக²ண்டா³ ஸுவிஸதா³ வாசுக்³க³தா ஹொந்தி, தே²ராயத்தோவ பாதிமொக்கோ². ஸசே பன எத்தகம்பி விஸத³ங் காதுங் ந ஸக்கோதி, ப்³யத்தஸ்ஸ பி⁴க்கு²னோ ஆயத்தோவ ஹோதீ’’தி அத்தோ² வுத்தோ. பாளியம்பி வுத்தமேவ ‘‘தேஹி, பி⁴க்க²வே, பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகங் பாஹேதப்³போ³ ‘க³ச்ச², ஆவுஸோ, ஸங்கி²த்தேன வா வித்தா²ரேன வா பாதிமொக்க²ங் பரியாபுணித்வா ஆக³ச்சா²’’’தி (மஹாவ॰ 163).
413.Vināntarāyanti (mahāva. 150) rājantarāyādidasavidhaṃ antarāyaṃ vinā saṅkhepenuddeso vinivārito paṭikkhittoti attho. Therovāti saṅghattherova. Etthāti pañcasu uddesesu. ‘‘Dvīsu vā tīsu vā visadesu therova issaro’’ti aṭṭhakathāyaṃ vuttattā avattantepi antarāye saṃkhittena uddisituṃ vaṭṭatīti adhippāyo. Kattha vuttanti ce? ‘‘Yo tattha bhikkhu byatto paṭibalo, tassādheyya’’nti (mahāva. 155) vuttapāḷiyā aṭṭhakathāyaṃ ‘‘yo tattha bhikkhu byatto paṭibaloti ettha kiñcāpi daharassāpi byattassa pātimokkho anuññāto, atha kho ettha ayamadhippāyo – sace saṅghattherassa pañca vā cattāro vā tayo vā pātimokkhuddesā nāgacchanti, dve pana akhaṇḍā suvisadā vācuggatā honti, therāyattova pātimokkho. Sace pana ettakampi visadaṃ kātuṃ na sakkoti, byattassa bhikkhuno āyattova hotī’’ti attho vutto. Pāḷiyampi vuttameva ‘‘tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo ‘gaccha, āvuso, saṃkhittena vā vitthārena vā pātimokkhaṃ pariyāpuṇitvā āgacchā’’’ti (mahāva. 163).
414. உத்³தி³ஸந்தே வாதி (மஹாவ॰ 172) பாதிமொக்கே² உத்³தி³ஸியமானே ஸமா வா தோ²கதரா வா யதி³ ஆக³ச்செ²ய்யுங், உத்³தி³ட்ட²ங் ஸுஉத்³தி³ட்ட²ங், தேஹி ஸத்³தி⁴ங் நிஸீதி³த்வா அவஸேஸகங் ஸோதப்³ப³ந்தி அத்தோ².
414.Uddisante vāti (mahāva. 172) pātimokkhe uddisiyamāne samā vā thokatarā vā yadi āgaccheyyuṃ, uddiṭṭhaṃ suuddiṭṭhaṃ, tehi saddhiṃ nisīditvā avasesakaṃ sotabbanti attho.
415. உத்³தி³ட்ட²மத்தே (மஹாவ॰ 172) வா ஸகலாய வா ஏகச்சாய வா பரிஸாய வுட்டி²தாய ஸமா வா தோ²கதரா வா யதி³ ஆக³ச்செ²ய்யுந்தி ஸம்ப³ந்தோ⁴. பாரிஸுத்³தி⁴ந்தி பாரிஸுத்³தி⁴உபோஸத²ங். கரெய்யேஸந்தி கரெய்ய ஏஸங், ஏதேஸங் ஸந்திகேதி அத்தோ². ப³ஹுகாத² சேதி அத² ப³ஹுகா சே, புன ஆக³தா ப³ஹுகா சேதி அத்தோ² ,. ‘‘உத்³தி³ஸ்ஸமானே, உத்³தி³ட்ட²மத்தே ஏகச்சாய வுட்டி²தாய ஸகலாய வுட்டி²தாயா’’தி (மஹாவ॰ 172) ஆக³தேஸு ஸப்³ப³விகப்பேஸு புப்³ப³கிச்சங் கத்வா புன ஆதி³தோ பட்டா²ய பாதிமொக்க²ங் உத்³தி³ஸேதி அத்தோ².
415.Uddiṭṭhamatte (mahāva. 172) vā sakalāya vā ekaccāya vā parisāya vuṭṭhitāya samā vā thokatarā vā yadi āgaccheyyunti sambandho. Pārisuddhinti pārisuddhiuposathaṃ. Kareyyesanti kareyya esaṃ, etesaṃ santiketi attho. Bahukātha ceti atha bahukā ce, puna āgatā bahukā ceti attho ,. ‘‘Uddissamāne, uddiṭṭhamatte ekaccāya vuṭṭhitāya sakalāya vuṭṭhitāyā’’ti (mahāva. 172) āgatesu sabbavikappesu pubbakiccaṃ katvā puna ādito paṭṭhāya pātimokkhaṃ uddiseti attho.
416. இதரானந்தி ஆக³ந்துகானங். ஸசேதரோதி ஸசே சாதுத்³த³ஸிகோதி அத்தோ². ஸமானேதரேனுவத்தந்தூதி ஸமா வா ஊனா வா இதரே ஆக³ந்துகா புரிமானங் ஆவாஸிகானங் அனுவத்தந்தூதி அத்தோ². ஸசேதி⁴காதி ஆக³ந்துகா ஸசே அதி⁴கா, புரிமா ஆவாஸிகா அனுவத்தந்தூதி அத்தோ². ஸேஸெப்யயங் நயோதி ‘‘ஆக³ந்துகானங் பன்னரஸோ ஹோதி, ஆவாஸிகானங் சாதுத்³த³ஸோ’’தி இதரேபி ஸமதோ²கா ஆக³ந்துகா ஆவாஸிகானங் அனுவத்தந்தூதிஆதி³னா நயேன வினிச்ச²யோ வேதி³தப்³போ³தி அத்தோ².
416.Itarānanti āgantukānaṃ. Sacetaroti sace cātuddasikoti attho. Samānetarenuvattantūti samā vā ūnā vā itare āgantukā purimānaṃ āvāsikānaṃ anuvattantūti attho. Sacedhikāti āgantukā sace adhikā, purimā āvāsikā anuvattantūti attho. Sesepyayaṃ nayoti ‘‘āgantukānaṃ pannaraso hoti, āvāsikānaṃ cātuddaso’’ti itarepi samathokā āgantukā āvāsikānaṃ anuvattantūtiādinā nayena vinicchayo veditabboti attho.
417. மூலட்டா²தி ஆவாஸிகா. ஸமதோ²கானங் ஆக³ந்துகானங். ஸாமக்³கி³ங் தெ³ந்து காமதோதி யதி³ இச்ச²ந்தி, தெ³ந்தூதி அத்தோ².
417.Mūlaṭṭhāti āvāsikā. Samathokānaṃ āgantukānaṃ. Sāmaggiṃ dentu kāmatoti yadi icchanti, dentūti attho.
418. நோ சே தெ³ந்தி, ஆக³ந்துகேஹி ப³ஹி க³ந்த்வான உபோஸதோ² காதப்³போ³தி அத்தோ². அனிச்சா²ய ஸாமக்³கீ³ தெ³ய்யாதி ஸம்ப³ந்தோ⁴.
418. No ce denti, āgantukehi bahi gantvāna uposatho kātabboti attho. Anicchāya sāmaggī deyyāti sambandho.
419. ‘‘ந பி⁴க்க²வே பாதிமொக்கு²த்³தே³ஸகேன ஸஞ்சிச்ச ந ஸாவேதப்³ப³ங். யோ ந ஸாவெய்ய, ஆபத்தி து³க்கடஸ்ஸா’’திவுத்தத்தா (மஹாவ॰ 154) ‘‘ஸாவெய்ய ஸுத்த’’ந்தி வுத்தங். ‘‘அனுஜானாமி, பி⁴க்க²வே, பாதிமொக்கு²த்³தே³ஸகேன வாயமிதுங் கத²ங் ஸாவெய்யந்தி, வாயமந்தஸ்ஸ அனாபத்தீ’’தி (மஹாவ॰ 154) வுத்தத்தா ‘‘ஸஞ்சிச்ச அஸ்ஸாவெந்தஸ்ஸ து³க்கட’’ந்தி வுத்தங்.
419. ‘‘Na bhikkhave pātimokkhuddesakena sañcicca na sāvetabbaṃ. Yo na sāveyya, āpatti dukkaṭassā’’tivuttattā (mahāva. 154) ‘‘sāveyya sutta’’nti vuttaṃ. ‘‘Anujānāmi, bhikkhave, pātimokkhuddesakena vāyamituṃ kathaṃ sāveyyanti, vāyamantassa anāpattī’’ti (mahāva. 154) vuttattā ‘‘sañcicca assāventassa dukkaṭa’’nti vuttaṃ.
420. ததா²தி து³க்கடந்தி அத்தோ². கல்லோதி அகி³லானோ. பேஸிதோதி ஆணத்தோ. ‘‘ந பி⁴க்க²வே தே²ரேன ஆணத்தேன அகி³லானேன ந ஸம்மஜ்ஜிதப்³ப³ங். யோ ந ஸம்மஜ்ஜெய்ய, ஆபத்தி து³க்கடஸ்ஸா’’திஆதி³ (மஹாவ॰ 159) வுத்தங்.
420.Tathāti dukkaṭanti attho. Kalloti agilāno. Pesitoti āṇatto. ‘‘Na bhikkhave therena āṇattena agilānena na sammajjitabbaṃ. Yo na sammajjeyya, āpatti dukkaṭassā’’tiādi (mahāva. 159) vuttaṃ.
421-3. இதா³னி பாரிஸுத்³தி⁴உபோஸத²ங் த³ஸ்ஸேதுங் ‘‘ஸம்மஜ்ஜித்வா’’திஆதி³ வுத்தங். அஞ்ஜலிங் (மஹாவ॰ 168) பக்³க³ய்ஹாதி ஸம்ப³ந்தோ⁴. தேதி அவஸேஸா த்³வே ஏவங் ஸமுதீ³ரியா வத்தப்³பா³தி அத்தோ². ஏகங்ஸங் உத்தராஸங்கா³தி³கரணவஸேன ஸமத்தபுப்³பா³ரம்பே⁴ன தே த்³வே பி⁴க்கூ² நவேன ஏவமீரியா வத்தப்³பா³தி அத்தோ².
421-3. Idāni pārisuddhiuposathaṃ dassetuṃ ‘‘sammajjitvā’’tiādi vuttaṃ. Añjaliṃ (mahāva. 168) paggayhāti sambandho. Teti avasesā dve evaṃ samudīriyā vattabbāti attho. Ekaṃsaṃ uttarāsaṅgādikaraṇavasena samattapubbārambhena te dve bhikkhū navena evamīriyā vattabbāti attho.
424-5. இதா³னி த்³வீஹி கத்தப்³ப³ங் த³ஸ்ஸேதுங் ‘‘த்³வீஸு தே²ரேனா’’தி வுத்தங்.
424-5. Idāni dvīhi kattabbaṃ dassetuṃ ‘‘dvīsu therenā’’ti vuttaṃ.
426. எத்தாவதா ‘‘அனுஜானாமி, பி⁴க்க²வே, சதுன்னங் பாதிமொக்க²ங் உத்³தி³ஸிது’’ந்தி (மஹாவ॰ 168) ச ‘‘அனுஜானாமி, பி⁴க்க²வே, திண்ணங் பாரிஸுத்³தி⁴உபோஸத²ங் காது’’ந்தி (மஹாவ॰ 168) ச ‘‘அனுஜானாமி, பி⁴க்க²வே, த்³வின்னங் பாரிஸுத்³தி⁴உபோஸத²ங் காது’’ந்தி (மஹாவ॰ 168) ச வுத்தங் ஸங்கு⁴போஸத²ஞ்ச பாரிஸுத்³தி⁴உபோஸத²ஞ்ச த³ஸ்ஸெத்வா இதா³னி யத்த² ஏகோ பி⁴க்கு² விஹரதி, தஸ்ஸ அனுஞ்ஞாதங் அதி⁴ட்டா²னுபோஸத²ங் த³ஸ்ஸேதுங் ‘‘புப்³ப³கிச்ச’’ந்திஆதி³மாஹ. எத்த² ச புப்³ப³கிச்சங் நாம ஸம்மஜ்ஜனாதி³கங்யேவ.
426. Ettāvatā ‘‘anujānāmi, bhikkhave, catunnaṃ pātimokkhaṃ uddisitu’’nti (mahāva. 168) ca ‘‘anujānāmi, bhikkhave, tiṇṇaṃ pārisuddhiuposathaṃ kātu’’nti (mahāva. 168) ca ‘‘anujānāmi, bhikkhave, dvinnaṃ pārisuddhiuposathaṃ kātu’’nti (mahāva. 168) ca vuttaṃ saṅghuposathañca pārisuddhiuposathañca dassetvā idāni yattha eko bhikkhu viharati, tassa anuññātaṃ adhiṭṭhānuposathaṃ dassetuṃ ‘‘pubbakicca’’ntiādimāha. Ettha ca pubbakiccaṃ nāma sammajjanādikaṃyeva.
427. ஸங்கு⁴போஸத²பாரிஸுத்³தி⁴உபோஸத²அதி⁴ட்டா²னஉபோஸதா²னங் வஸேன தங் தங் உபோஸத²ங் யதி³ கயிருந்தி ஸம்ப³ந்தோ⁴.
427. Saṅghuposathapārisuddhiuposathaadhiṭṭhānauposathānaṃ vasena taṃ taṃ uposathaṃ yadi kayirunti sambandho.
428. வக்³கே³ (மஹாவ॰ 173) ச ஸமக்³கே³ ச ‘‘வக்³கோ³’’தி ஸஞ்ஞினோ ச ‘‘வக்³கோ³ நு கோ², ஸமக்³கோ³ நு கோ²’’தி ஏவங் விமதிஸ்ஸ ச து³க்கடங், ‘‘நஸ்ஸந்தேதே வினஸ்ஸந்தேதே, கோ தேஹி அத்தோ²’’தி ஏவங் அனாக³தானங் பி⁴க்கூ²னங் அத்தி²பா⁴வங் ஞத்வா பே⁴தா³தி⁴ப்பாயேன உபோஸத²ங் கரோதோ து²ல்லச்சயங் ஹோதீதி அத்தோ². தது³ப⁴யேபி ‘‘ஸமக்³கோ³’’தி ஸஞ்ஞினோ அனாபத்தி.
428. Vagge (mahāva. 173) ca samagge ca ‘‘vaggo’’ti saññino ca ‘‘vaggo nu kho, samaggo nu kho’’ti evaṃ vimatissa ca dukkaṭaṃ, ‘‘nassantete vinassantete, ko tehi attho’’ti evaṃ anāgatānaṃ bhikkhūnaṃ atthibhāvaṃ ñatvā bhedādhippāyena uposathaṃ karoto thullaccayaṃ hotīti attho. Tadubhayepi ‘‘samaggo’’ti saññino anāpatti.
429-430. ஸேஸஸஹத⁴ம்மிகா நாம பி⁴க்கு²ங் ட²பெத்வா அவஸேஸா சத்தாரோ. அப⁴ப்³ப³ஸ்ஸாதி எத்த² பண்ட³கதெ²ய்யஸங்வாஸக தித்தி²யபக்கந்தக திரச்சா²னக³த மாதுகா⁴தக பிதுகா⁴தக அரஹந்தகா⁴தக பி⁴க்கு²னிதூ³ஸக ஸங்க⁴பே⁴த³க லோஹிதுப்பாத³கஉப⁴தொப்³யஞ்ஜனகா அப⁴ப்³பா³ க³ஹிதா. எத்த² பன நாக³மாணவகாத³யோ திரச்சா²னக³தபக்கி²காதி வேதி³தப்³பா³. ஏதேஸங் நிஸின்னபரிஸாயஞ்ச பாதிமொக்க²ங் ந உத்³தி³ஸேதி ஸம்ப³ந்தோ⁴.
429-430.Sesasahadhammikā nāma bhikkhuṃ ṭhapetvā avasesā cattāro. Abhabbassāti ettha paṇḍakatheyyasaṃvāsaka titthiyapakkantaka tiracchānagata mātughātaka pitughātaka arahantaghātaka bhikkhunidūsaka saṅghabhedaka lohituppādakaubhatobyañjanakā abhabbā gahitā. Ettha pana nāgamāṇavakādayo tiracchānagatapakkhikāti veditabbā. Etesaṃ nisinnaparisāyañca pātimokkhaṃ na uddiseti sambandho.
ததா²தி யோ பன ஸங்கோ⁴ ஸபா⁴கா³பத்திகோ, ஸோபி ந உத்³தி³ஸே, பரிவுத்தே²ன ச²ந்தே³னபி ந உத்³தி³ஸேதி அத்தோ². எத்த² பன சதுப்³பி³த⁴ங் பாரிவாஸியங் பரிஸபாரிவாஸியங் ரத்திபாரிவாஸியங் ச²ந்த³பாரிவாஸியங் அஜ்ஜா²ஸயபாரிவாஸியந்தி.
Tathāti yo pana saṅgho sabhāgāpattiko, sopi na uddise, parivutthena chandenapi na uddiseti attho. Ettha pana catubbidhaṃ pārivāsiyaṃ parisapārivāsiyaṃ rattipārivāsiyaṃ chandapārivāsiyaṃ ajjhāsayapārivāsiyanti.
எத்த² பன பி⁴க்கூ² கேனசிதே³வ கரணீயேன ஸன்னிபதிதா மேகா⁴தீ³ஹி உபத்³து³தா ‘‘அனோகாஸா மயங், அஞ்ஞத்ர க³ச்சா²மா’’தி ச²ந்த³ங் அவிஸ்ஸஜ்ஜெத்வாவ உட்ட²ஹந்தி. இத³ங் பரிஸபாரிவாஸியங். கிஞ்சாபி பரிஸபாரிவாஸியங், ச²ந்த³ஸ்ஸ பன அவிஸ்ஸட்ட²த்தா கம்மங் காதுங் வட்டதி.
Ettha pana bhikkhū kenacideva karaṇīyena sannipatitā meghādīhi upaddutā ‘‘anokāsā mayaṃ, aññatra gacchāmā’’ti chandaṃ avissajjetvāva uṭṭhahanti. Idaṃ parisapārivāsiyaṃ. Kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.
புனபி பி⁴க்கூ²னங் ‘‘உபோஸதா²தீ³னி கரிஸ்ஸாமா’’தி ரத்திங் ஸன்னிபதித்வா த⁴ம்மங் ஸுணந்தானங்யேவ அருணோ உக்³க³ச்ச²தி. ஸசே ‘‘சாதுத்³த³ஸிகங் கரிஸ்ஸாமா’’தி நிஸின்னா, ‘‘பன்னரஸோ’’தி காதுங் வட்டதி. ஸசே பன்னரஸிகங் காதுங் நிஸின்னா, பாடிபதே³ அனுபோஸதே² உபோஸத²ங் காதுங் ந வட்டதி, அஞ்ஞங் பன ஸங்க⁴கிச்சங் காதுங் வட்டதி. இத³ங் ரத்திபாரிவாஸியங் நாம.
Punapi bhikkhūnaṃ ‘‘uposathādīni karissāmā’’ti rattiṃ sannipatitvā dhammaṃ suṇantānaṃyeva aruṇo uggacchati. Sace ‘‘cātuddasikaṃ karissāmā’’ti nisinnā, ‘‘pannaraso’’ti kātuṃ vaṭṭati. Sace pannarasikaṃ kātuṃ nisinnā, pāṭipade anuposathe uposathaṃ kātuṃ na vaṭṭati, aññaṃ pana saṅghakiccaṃ kātuṃ vaṭṭati. Idaṃ rattipārivāsiyaṃ nāma.
புன பி⁴க்கூ² ‘‘யங்கிஞ்சிதே³வ அப்³பா⁴னாதி³கம்மங் கரிஸ்ஸாமா’’தி ஸன்னிபதிதா ஹொந்தி, தத்ரேகோ நக்க²த்தபாட²கோ ஏவங் வத³தி ‘‘அஜ்ஜ நக்க²த்தங் தா³ருண’’ந்தி, தே தஸ்ஸ வசனேன ச²ந்த³ங் விஸ்ஸஜ்ஜெத்வா தத்தே²வ நிஸின்னா ஹொந்தி. அத²ஞ்ஞோ ஆக³ந்த்வா ‘‘கிங் நக்க²த்தேன, கரோதா²’’தி வத³தி. இத³ங் ச²ந்த³பாரிவாஸியஞ்சேவ அஜ்ஜா²ஸயபாரிவாஸியஞ்ச. தஸ்மிங் பாரிவாஸியே புன ச²ந்த³பாரிஸுத்³தி⁴ங் அனானெத்வா கம்மங் காதுங் ந வட்டதி. இத³ங் ஸந்தா⁴ய ‘‘ச²ந்தே³ன பரிவுத்தே²னா’’தி வுத்தங்.
Puna bhikkhū ‘‘yaṃkiñcideva abbhānādikammaṃ karissāmā’’ti sannipatitā honti, tatreko nakkhattapāṭhako evaṃ vadati ‘‘ajja nakkhattaṃ dāruṇa’’nti, te tassa vacanena chandaṃ vissajjetvā tattheva nisinnā honti. Athañño āgantvā ‘‘kiṃ nakkhattena, karothā’’ti vadati. Idaṃ chandapārivāsiyañceva ajjhāsayapārivāsiyañca. Tasmiṃ pārivāsiye puna chandapārisuddhiṃ anānetvā kammaṃ kātuṃ na vaṭṭati. Idaṃ sandhāya ‘‘chandena parivutthenā’’ti vuttaṃ.
431. ஆபன்னமாபத்திங் (மஹாவ॰ 169; மஹாவ॰ அட்ட²॰ 169) அதே³ஸயித்வான வா ‘‘அஹங், ஆவுஸோ, இத்த²ன்னாமாய ஆபத்தியா வேமதிகோ, யதா³ நிப்³பே³மதிகோ ப⁴விஸ்ஸாமி, தங் ஆபத்திங் படிகரிஸ்ஸாமீ’’தி வத்வா விமதிங் அனாவிகத்வான வா ‘‘ந ச பி⁴க்க²வே அனுபோஸதே² உபோஸதோ² காதப்³போ³ அஞ்ஞத்ர ஸங்க⁴ஸாமக்³கி³யா’’தி (மஹாவ॰ 183) வுத்தத்தா அனுபோஸதே²பி வா காதுங் ந ச கப்பதீதி அத்தோ².
431.Āpannamāpattiṃ (mahāva. 169; mahāva. aṭṭha. 169) adesayitvāna vā ‘‘ahaṃ, āvuso, itthannāmāya āpattiyā vematiko, yadā nibbematiko bhavissāmi, taṃ āpattiṃ paṭikarissāmī’’ti vatvā vimatiṃ anāvikatvāna vā ‘‘na ca bhikkhave anuposathe uposatho kātabbo aññatra saṅghasāmaggiyā’’ti (mahāva. 183) vuttattā anuposathepi vā kātuṃ na ca kappatīti attho.
432. ‘‘ந ச பி⁴க்க²வே தத³ஹுபோஸதே² ஸபி⁴க்கு²கா ஆவாஸா அபி⁴க்கு²கோ ஆவாஸோ வா அனாவாஸோ வா க³ந்தப்³போ³ அஞ்ஞத்ர ஸங்கே⁴ன அஞ்ஞத்ர அந்தராயா’’தி (மஹாவ॰ 181) வுத்தத்தா ‘‘அட்டி²தோபோஸதா²வாஸா’’தி (மஹாவ॰ அட்ட²॰ 181) வுத்தங். ந வஜே ந க³ச்சே². அதி⁴ட்டா²துங் ஸீமமேவ வாதி ஸசே விஹாரே உபோஸத²ங் கரொந்தி, உபோஸதா²தி⁴ட்டா²னத்த²ங் ஸீமாபி நதீ³பி ந க³ந்தப்³பா³. ஸசே பனெத்த² கோசி பி⁴க்கு² ஹோதி, தஸ்ஸ ஸந்திகங் க³ந்துங் வட்டதி. விஸ்ஸட்ட²உபோஸதா²பி ஆவாஸா க³ந்துங் வட்டதி, ஏவங் க³தோ அதி⁴ட்டா²தும்பி லப⁴தீதி. உபோஸத²வினிச்ச²யோ.
432. ‘‘Na ca bhikkhave tadahuposathe sabhikkhukā āvāsā abhikkhuko āvāso vā anāvāso vā gantabbo aññatra saṅghena aññatra antarāyā’’ti (mahāva. 181) vuttattā ‘‘aṭṭhitoposathāvāsā’’ti (mahāva. aṭṭha. 181) vuttaṃ. Na vaje na gacche. Adhiṭṭhātuṃ sīmameva vāti sace vihāre uposathaṃ karonti, uposathādhiṭṭhānatthaṃ sīmāpi nadīpi na gantabbā. Sace panettha koci bhikkhu hoti, tassa santikaṃ gantuṃ vaṭṭati. Vissaṭṭhauposathāpi āvāsā gantuṃ vaṭṭati, evaṃ gato adhiṭṭhātumpi labhatīti. Uposathavinicchayo.
உபோஸத²னித்³தே³ஸவண்ணனா நிட்டி²தா.
Uposathaniddesavaṇṇanā niṭṭhitā.
