| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
25. உபோஸத²பவாரணாவினிச்ச²யகதா²
25. Uposathapavāraṇāvinicchayakathā
168. ஏவங் ஸீமாவினிச்ச²யங் கதெ²த்வா இதா³னி உபோஸத²பவாரணாவினிச்ச²யங் கதே²துங் ‘‘உபோஸத²பவாரணாதி எத்த²’’த்யாதி³மாஹ. தத்த² உபோஸத²ஸத்³தோ³ தாவ –
168. Evaṃ sīmāvinicchayaṃ kathetvā idāni uposathapavāraṇāvinicchayaṃ kathetuṃ ‘‘uposathapavāraṇāti ettha’’tyādimāha. Tattha uposathasaddo tāva –
‘‘உத்³தே³ஸே பாதிமொக்க²ஸ்ஸ, பண்ணத்தியமுபோஸதோ²;
‘‘Uddese pātimokkhassa, paṇṇattiyamuposatho;
உபவாஸே ச அட்ட²ங்கே³, உபோஸத²தி³னே ஸியா’’தி. –
Upavāse ca aṭṭhaṅge, uposathadine siyā’’ti. –
வசனதோ பாதிமொக்கு²த்³தே³ஸே பண்ணத்தியங் உபவாஸே அட்ட²ங்க³ஸீலே உபோஸத²தி³னே ச வத்ததி. ததா² ஹேஸ ‘‘ஆயாமாவுஸோ கப்பின உபோஸத²ங் க³மிஸ்ஸாமா’’திஆதீ³ஸு (தீ³॰ நி॰ அட்ட²॰ 1.150; ம॰ நி॰ அட்ட²॰ 3.85) பாதிமொக்கு²த்³தே³ஸே ஆக³தோ, ‘‘உபோஸதோ² நாம நாக³ராஜா’’திஆதீ³ஸு (தீ³॰ நி॰ 2.246) பண்ணத்தியங், ‘‘ஸுத்³த⁴ஸ்ஸ வே ஸதா³ பெ²க்³கு³, ஸுத்³த⁴ஸ்ஸ உபோஸதோ² ஸதா³’’திஆதீ³ஸு (ம॰ நி॰ 1.79) உபவாஸே, ‘‘ஏவங் அட்ட²ங்க³ஸமன்னாக³தோ கோ², விஸாகே², உபோஸதோ² உபவுத்தோ²’’திஆதீ³ஸு (அ॰ நி॰ 8.43) அட்ட²ங்க³ஸீலே. ‘‘ந, பி⁴க்க²வே, உபோஸதே² ஸபி⁴க்கு²காஆவாஸா அபி⁴க்கு²கோ ஆவாஸோ’’திஆதீ³ஸு (பாசி॰ 1048) உபோஸத²தி³னே வத்ததி. ‘‘பாரிஸுத்³தி⁴உபோஸதோ² அதி⁴ட்டா²னுபோஸதோ²’’திஆதீ³ஸு பாரிஸுத்³தி⁴அதி⁴ட்டா²னேஸுபி வத்ததி. தே பன பாதிமொக்கு²த்³தே³ஸே அந்தோக³தா⁴தி கத்வா விஸுங் ந வுத்தா. இத⁴ பன பாதிமொக்கு²த்³தே³ஸே உபோஸத²தி³னே ச வத்ததி. தத்த² பாதிமொக்கு²த்³தே³ஸே உபவஸனங் உபோஸதோ², ஸீலேன உபேதா ஹுத்வா வஸனந்த்யத்தோ². உபோஸத²தி³னே உபவஸந்தி எத்தா²தி உபோஸதோ², ஏதஸ்மிங் தி³வஸே ஸீலேன உபேதா ஹுத்வா வஸந்தீத்யத்தோ².
Vacanato pātimokkhuddese paṇṇattiyaṃ upavāse aṭṭhaṅgasīle uposathadine ca vattati. Tathā hesa ‘‘āyāmāvuso kappina uposathaṃ gamissāmā’’tiādīsu (dī. ni. aṭṭha. 1.150; ma. ni. aṭṭha. 3.85) pātimokkhuddese āgato, ‘‘uposatho nāma nāgarājā’’tiādīsu (dī. ni. 2.246) paṇṇattiyaṃ, ‘‘suddhassa ve sadā pheggu, suddhassa uposatho sadā’’tiādīsu (ma. ni. 1.79) upavāse, ‘‘evaṃ aṭṭhaṅgasamannāgato kho, visākhe, uposatho upavuttho’’tiādīsu (a. ni. 8.43) aṭṭhaṅgasīle. ‘‘Na, bhikkhave, uposathe sabhikkhukāāvāsā abhikkhuko āvāso’’tiādīsu (pāci. 1048) uposathadine vattati. ‘‘Pārisuddhiuposatho adhiṭṭhānuposatho’’tiādīsu pārisuddhiadhiṭṭhānesupi vattati. Te pana pātimokkhuddese antogadhāti katvā visuṃ na vuttā. Idha pana pātimokkhuddese uposathadine ca vattati. Tattha pātimokkhuddese upavasanaṃ uposatho, sīlena upetā hutvā vasanantyattho. Uposathadine upavasanti etthāti uposatho, etasmiṃ divase sīlena upetā hutvā vasantītyattho.
பவாரணா-ஸத்³தோ³ பன ‘‘பவாரணா படிக்கே²பே, கதி²தாஜ்ஜே²ஸனாய சா’’தி அபி⁴தா⁴னப்பதீ³பிகாயங் வசனதோ படிக்கே²பே அஜ்ஜே²ஸனே ச வத்ததி. தத்த² ‘‘யோ பன பி⁴க்கு² பு⁴த்தாவீ பவாரிதோ அனதிரித்தங் கா²த³னீயங் வா போ⁴ஜனீயங் வா கா²தெ³ய்ய வா பு⁴ஞ்ஜெய்ய வா, பாசித்திய’’ந்திஆதீ³ஸு (பாசி॰ 238) படிக்கே²பே, ‘‘ஸங்கோ⁴ பவாரெய்யா’’திஆதீ³ஸு (மஹாவ॰ 210) அஜ்ஜே²ஸனே, ‘‘அஜ்ஜபவாரணா சாதுத்³த³ஸீ’’திஆதீ³ஸு (மஹாவ॰ அட்ட²॰ 212) பவாரணாதி³வஸே. ஸோ பன அஜ்ஜே²ஸனதி³வஸோயேவாதி விஸுங் ந வுத்தோ. இத⁴ பன அஜ்ஜே²ஸனே வத்ததி, தஸ்மா பவாரீயதே பவாரணா, பகாரேன இச்சீ²யதெத்யத்தோ². ப-புப்³ப³ வரதா⁴து சுராதி³க³ணிகாயங்.
Pavāraṇā-saddo pana ‘‘pavāraṇā paṭikkhepe, kathitājjhesanāya cā’’ti abhidhānappadīpikāyaṃ vacanato paṭikkhepe ajjhesane ca vattati. Tattha ‘‘yo pana bhikkhu bhuttāvī pavārito anatirittaṃ khādanīyaṃ vā bhojanīyaṃ vā khādeyya vā bhuñjeyya vā, pācittiya’’ntiādīsu (pāci. 238) paṭikkhepe, ‘‘saṅgho pavāreyyā’’tiādīsu (mahāva. 210) ajjhesane, ‘‘ajjapavāraṇā cātuddasī’’tiādīsu (mahāva. aṭṭha. 212) pavāraṇādivase. So pana ajjhesanadivasoyevāti visuṃ na vutto. Idha pana ajjhesane vattati, tasmā pavārīyate pavāraṇā, pakārena icchīyatetyattho. Pa-pubba varadhātu curādigaṇikāyaṃ.
எத்த² ச கிஞ்சாபி பாளியங் உபோஸத²க்க²ந்த⁴கானந்தரங் வஸ்ஸூபனாயிகக்க²ந்த⁴கோ, தத³னந்தரங் பவாரணக்க²ந்த⁴கோ ஸங்கீ³தோ, ததா²பி உபோஸத²பவாரணகம்மானங் யேபு⁴ய்யேன ஸமானத்தா யமகமிவ பூ⁴தத்தா மிஸ்ஸெத்வா கதெ²ந்தோ ஸுவிஞ்ஞெய்யோ ஹோதி ஸல்லஹுகக³ந்தோ² சாதி மந்த்வா க²ந்த⁴கத்³வயஸங்க³ஹிதங் அத்த²ங் ஏகேனேவ பரிச்சே²தே³ன த³ஸ்ஸேதி ஆசரியோ. தத்த² சாதுத்³த³ஸிகோ பன்னரஸிகோ ஸாமக்³கீ³உபோஸதோ²தி தி³வஸவஸேன தயோ உபோஸதா² ஹொந்தீதி ஸம்ப³ந்தோ⁴. சதுத்³த³ஸியங் நியுத்தோ சாதுத்³த³ஸிகோ, ஏவங் பன்னரஸிகோ. ஸாமக்³கீ³உபோஸதோ² நாம ஸங்க⁴ஸாமக்³கி³கதி³வஸே காதப்³ப³உபோஸதோ². ஹேமந்தகி³ம்ஹவஸ்ஸானங் திண்ணங் உதூனந்தி எத்த² ஹேமந்தஉது நாம அபரகத்திககாளபக்க²ஸ்ஸ பாடிபத³தோ பட்டா²ய ப²க்³கு³னபுண்ணமபரியோஸானா சத்தாரோ மாஸா. கி³ம்ஹஉது நாம ப²க்³கு³னஸ்ஸ காளபக்க²பாடிபத³தோ பட்டா²ய ஆஸாள்ஹிபுண்ணமபரியோஸானா சத்தாரோ மாஸா. வஸ்ஸானஉது நாம ஆஸாள்ஹஸ்ஸ காளபக்க²பாடிபத³தோ பட்டா²ய அபரகத்திகபுண்ணமபரியோஸானா சத்தாரோ மாஸா. ததியஸத்தமபக்கே²ஸு த்³வே த்³வே கத்வா ச² சாதுத்³த³ஸிகாதி ஹேமந்தஸ்ஸ உதுனோ ததியே ச ஸத்தமே ச பக்கே² த்³வே சாதுத்³த³ஸிகா, மிக³ஸிரமாஸஸ்ஸ காளபக்கே², மாக⁴மாஸஸ்ஸ காளபக்கே² சாதி அத்தோ². ஏவங் கி³ம்ஹஸ்ஸ உதுனோ ததியே சித்தமாஸஸ்ஸ காளபக்கே² ஸத்தமே ஜெட்ட²மாஸஸ்ஸ காளபக்கே² ச, வஸ்ஸானஸ்ஸ உதுனோ ததியே ஸாவணஸ்ஸ காளபக்கே² ச ஸத்தமே அஸ்ஸயுஜமாஸஸ்ஸ காளபக்கே² சாதி அத்தோ². ஸேஸா பன்னரஸிகாதி ஸேஸா அட்டா²ரஸ பன்னரஸிகா.
Ettha ca kiñcāpi pāḷiyaṃ uposathakkhandhakānantaraṃ vassūpanāyikakkhandhako, tadanantaraṃ pavāraṇakkhandhako saṅgīto, tathāpi uposathapavāraṇakammānaṃ yebhuyyena samānattā yamakamiva bhūtattā missetvā kathento suviññeyyo hoti sallahukagantho cāti mantvā khandhakadvayasaṅgahitaṃ atthaṃ ekeneva paricchedena dasseti ācariyo. Tattha cātuddasiko pannarasiko sāmaggīuposathoti divasavasena tayo uposathā hontīti sambandho. Catuddasiyaṃ niyutto cātuddasiko, evaṃ pannarasiko. Sāmaggīuposatho nāma saṅghasāmaggikadivase kātabbauposatho. Hemantagimhavassānaṃ tiṇṇaṃ utūnanti ettha hemantautu nāma aparakattikakāḷapakkhassa pāṭipadato paṭṭhāya phaggunapuṇṇamapariyosānā cattāro māsā. Gimhautu nāma phaggunassa kāḷapakkhapāṭipadato paṭṭhāya āsāḷhipuṇṇamapariyosānā cattāro māsā. Vassānautu nāma āsāḷhassa kāḷapakkhapāṭipadato paṭṭhāya aparakattikapuṇṇamapariyosānā cattāro māsā. Tatiyasattamapakkhesu dve dve katvā cha cātuddasikāti hemantassa utuno tatiye ca sattame ca pakkhe dve cātuddasikā, migasiramāsassa kāḷapakkhe, māghamāsassa kāḷapakkhe cāti attho. Evaṃ gimhassa utuno tatiye cittamāsassa kāḷapakkhe sattame jeṭṭhamāsassa kāḷapakkhe ca, vassānassa utuno tatiye sāvaṇassa kāḷapakkhe ca sattame assayujamāsassa kāḷapakkhe cāti attho. Sesā pannarasikāti sesā aṭṭhārasa pannarasikā.
ஹோதி செத்த² –
Hoti cettha –
‘‘கத்திகஸ்ஸ ச காளம்ஹா;
‘‘Kattikassa ca kāḷamhā;
யாவ ப²க்³கு³னபுண்ணமா;
Yāva phaggunapuṇṇamā;
ஹேமந்தகாலோதி விஞ்ஞெய்யோ;
Hemantakāloti viññeyyo;
அட்ட² ஹொந்தி உபோஸதா².
Aṭṭha honti uposathā.
‘‘ப²க்³கு³னஸ்ஸ ச காளம்ஹா;
‘‘Phaggunassa ca kāḷamhā;
யாவ ஆஸாள்ஹிபுண்ணமா;
Yāva āsāḷhipuṇṇamā;
கி³ம்ஹகாலோதி விஞ்ஞெய்யோ;
Gimhakāloti viññeyyo;
அட்ட² ஹொந்தி உபோஸதா².
Aṭṭha honti uposathā.
‘‘ஆஸாள்ஹஸ்ஸ ச காளம்ஹா;
‘‘Āsāḷhassa ca kāḷamhā;
யாவ கத்திகபுண்ணமா;
Yāva kattikapuṇṇamā;
வஸ்ஸகாலோதி விஞ்ஞெய்யோ;
Vassakāloti viññeyyo;
அட்ட² ஹொந்தி உபோஸதா².
Aṭṭha honti uposathā.
‘‘உதூனங் பன திண்ணன்னங், பக்கே² ததியஸத்தமே;
‘‘Utūnaṃ pana tiṇṇannaṃ, pakkhe tatiyasattame;
சதுத்³த³ஸோதி பாதிமொக்க²ங், உத்³தி³ஸந்தி நயஞ்ஞுனோ’’தி. (கங்கா²॰ அபி⁴॰ டீ॰ நிதா³னவண்ணனா);
Catuddasoti pātimokkhaṃ, uddisanti nayaññuno’’ti. (kaṅkhā. abhi. ṭī. nidānavaṇṇanā);
ஏவங் ஏகஸங்வச்ச²ரே சதுவீஸதி உபோஸதா²தி ஏவங் இமினா வுத்தனயேன ஹேமந்தாதீ³னங் திண்ணங் உதூனங் ஏகேகஸ்மிங் உதும்ஹி பச்சேகங் அட்ட²அட்ட²உபோஸத²த்தா உதுத்தயஸமோதா⁴னபூ⁴தே ஏகஸ்மிங் ஸங்வச்ச²ரே சதுவீஸதி உபோஸதா² ஹொந்தீதி அத்தோ². இத³ங் தாவ பகதிசாரித்தந்தி இத³ங் ஏகஸ்மிங் ஸங்வச்ச²ரே ச²சாதுத்³த³ஸிகஅட்டா²ரஸபன்னரஸிகஉபோஸத²கரணங் தாவ பட²மங் பகதியா ஸபா⁴வேன சாரித்தங் காதப்³ப³ங் கம்மங் ஹோதி, ந ப³ஹுதராவாஸிகாதி³னா காரணேன காதப்³ப³ந்தி அத்தோ².
Evaṃ ekasaṃvacchare catuvīsati uposathāti evaṃ iminā vuttanayena hemantādīnaṃ tiṇṇaṃ utūnaṃ ekekasmiṃ utumhi paccekaṃ aṭṭhaaṭṭhauposathattā ututtayasamodhānabhūte ekasmiṃ saṃvacchare catuvīsati uposathā hontīti attho. Idaṃ tāva pakaticārittanti idaṃ ekasmiṃ saṃvacchare chacātuddasikaaṭṭhārasapannarasikauposathakaraṇaṃ tāva paṭhamaṃ pakatiyā sabhāvena cārittaṃ kātabbaṃ kammaṃ hoti, na bahutarāvāsikādinā kāraṇena kātabbanti attho.
ததா²ரூபபச்சயே ஸதி அஞ்ஞஸ்மிம்பி சாதுத்³த³ஸே உபோஸத²ங் காதுங் வட்டதீதி ‘‘ஸகிங் பக்க²ஸ்ஸ சாதுத்³த³ஸே வா பன்னரஸே வா பாதிமொக்க²ங் உத்³தி³ஸிது’’ந்தி (மஹாவ॰ 136) வசனதோ ‘‘யோ பன ஆக³ந்துகேஹி ஆவாஸிகானங் அனுவத்திதப்³ப³’’ந்திஆதி³வசனதோ (மஹாவ॰ 178) ச ததா²ரூபபச்சயே ஸதி அஞ்ஞஸ்மிம்பி சாதுத்³த³ஸே உபோஸத²ங் காதுங் வட்டதீதி அத்தோ². தத்த² ஸகிந்தி ஏகவாரங். ஆவாஸிகானங் அனுவத்திதப்³ப³ந்தி ஆவாஸிகேஹி ‘‘அஜ்ஜுபோஸதோ² சாதுத்³த³ஸோ’’தி புப்³ப³கிச்சே கரியமானே அனுவத்திதப்³ப³ங், ந படிக்கோஸிதப்³ப³ங். ஆதி³-ஸத்³தே³ன ‘‘ஆவாஸிகேஹி ஆக³ந்துகானங் அனுவத்திதப்³ப³’’ந்தி வசனங், ‘‘அனுஜானாமி, பி⁴க்க²வே, தேஹி பி⁴க்கூ²ஹி த்³வே தயோ உபோஸதே² சாதுத்³த³ஸிகே காதுங், கத²ங் மயங் தேஹி பி⁴க்கூ²ஹி பட²மதரங் பவாரெய்யாமா’’தி (மஹாவ॰ 240) வசனஞ்ச ஸங்க³ண்ஹாதி. எத்த² ச பட²மஸுத்தஸ்ஸ ஏகேகஸ்ஸ உதுனோ ததியஸத்தமபக்க²ஸ்ஸ சாதுத்³த³ஸே வா அவஸேஸஸ்ஸ பன்னரஸே வா ஸகிங் பாதிமொக்க²ங் உத்³தி³ஸிதப்³ப³ந்தி. பகதிசாரித்தவஸேனபி அத்த²ஸம்ப⁴வதோ ‘‘ஆக³ந்துகேஹீ’’திஆதீ³னி ஸுத்தானி த³ஸ்ஸிதானீதி வேதி³தப்³ப³ங். ததா²ரூபபச்சயே ஸதீதி அஞ்ஞஸ்மிம்பி சாதுத்³த³ஸே உபோஸத²ங் காதுங் அனுரூபே ஆவாஸிகா ப³ஹுதரா ஹொந்தீதி ஏவமாதி³கே பச்சயே ஸதி. அஞ்ஞஸ்மிம்பி சாதுத்³த³ஸேதி திண்ணங் உதூனங் ததியஸத்தமபக்க²சாதுத்³த³ஸதோ அஞ்ஞஸ்மிங் சாதுத்³த³ஸே.
Tathārūpapaccayesati aññasmimpi cātuddase uposathaṃ kātuṃ vaṭṭatīti ‘‘sakiṃ pakkhassa cātuddase vā pannarase vā pātimokkhaṃ uddisitu’’nti (mahāva. 136) vacanato ‘‘yo pana āgantukehi āvāsikānaṃ anuvattitabba’’ntiādivacanato (mahāva. 178) ca tathārūpapaccaye sati aññasmimpi cātuddase uposathaṃ kātuṃ vaṭṭatīti attho. Tattha sakinti ekavāraṃ. Āvāsikānaṃ anuvattitabbanti āvāsikehi ‘‘ajjuposatho cātuddaso’’ti pubbakicce kariyamāne anuvattitabbaṃ, na paṭikkositabbaṃ. Ādi-saddena ‘‘āvāsikehi āgantukānaṃ anuvattitabba’’nti vacanaṃ, ‘‘anujānāmi, bhikkhave, tehi bhikkhūhi dve tayo uposathe cātuddasike kātuṃ, kathaṃ mayaṃ tehi bhikkhūhi paṭhamataraṃ pavāreyyāmā’’ti (mahāva. 240) vacanañca saṅgaṇhāti. Ettha ca paṭhamasuttassa ekekassa utuno tatiyasattamapakkhassa cātuddase vā avasesassa pannarase vā sakiṃ pātimokkhaṃ uddisitabbanti. Pakaticārittavasenapi atthasambhavato ‘‘āgantukehī’’tiādīni suttāni dassitānīti veditabbaṃ. Tathārūpapaccaye satīti aññasmimpi cātuddase uposathaṃ kātuṃ anurūpe āvāsikā bahutarā hontīti evamādike paccaye sati. Aññasmimpi cātuddaseti tiṇṇaṃ utūnaṃ tatiyasattamapakkhacātuddasato aññasmiṃ cātuddase.
தத்ராயங் பாளி (மஹாவ॰ 178) –
Tatrāyaṃ pāḷi (mahāva. 178) –
‘‘இத⁴ பன, பி⁴க்க²வே, ஆவாஸிகானங் பி⁴க்கூ²னங் சாதுத்³த³ஸோ ஹோதி, ஆக³ந்துகானங் பன்னரஸோ. ஸசே ஆவாஸிகா ப³ஹுதரா ஹொந்தி, ஆக³ந்துகேஹி ஆவாஸிகானங் அனுவத்திதப்³ப³ங். ஸசே ஸமஸமா ஹொந்தி, ஆக³ந்துகேஹி ஆவாஸிகானங் அனுவத்திதப்³ப³ங். ஸசே ஆக³ந்துகா ப³ஹுதரா ஹொந்தி, ஆவாஸிகேஹி ஆக³ந்துகானங் அனுவத்திதப்³ப³ங்.
‘‘Idha pana, bhikkhave, āvāsikānaṃ bhikkhūnaṃ cātuddaso hoti, āgantukānaṃ pannaraso. Sace āvāsikā bahutarā honti, āgantukehi āvāsikānaṃ anuvattitabbaṃ. Sace samasamā honti, āgantukehi āvāsikānaṃ anuvattitabbaṃ. Sace āgantukā bahutarā honti, āvāsikehi āgantukānaṃ anuvattitabbaṃ.
‘‘இத⁴ பன, பி⁴க்க²வே, ஆவாஸிகானங் பி⁴க்கூ²னங் பன்னரஸோ ஹோதி, ஆக³ந்துகானங் சாதுத்³த³ஸோ. ஸசே ஆவாஸிகா ப³ஹுதரா ஹொந்தி, ஆக³ந்துகேஹி ஆவாஸிகானங் அனுவத்திதப்³ப³ங். ஸசே ஸமஸமா ஹொந்தி, ஆக³ந்துகேஹி ஆவாஸிகானங் அனுவத்திதப்³ப³ங். ஸசே ஆக³ந்துகா ப³ஹுதரா ஹொந்தி, ஆவாஸிகேஹி ஆக³ந்துகானங் அனுவத்திதப்³ப³ங்.
‘‘Idha pana, bhikkhave, āvāsikānaṃ bhikkhūnaṃ pannaraso hoti, āgantukānaṃ cātuddaso. Sace āvāsikā bahutarā honti, āgantukehi āvāsikānaṃ anuvattitabbaṃ. Sace samasamā honti, āgantukehi āvāsikānaṃ anuvattitabbaṃ. Sace āgantukā bahutarā honti, āvāsikehi āgantukānaṃ anuvattitabbaṃ.
‘‘இத⁴ பன, பி⁴க்க²வே, ஆவாஸிகானங் பி⁴க்கூ²னங் பாடிபதோ³ ஹோதி, ஆக³ந்துகானங் பன்னரஸோ. ஸசே ஆவாஸிகா ப³ஹுதரா ஹொந்தி, ஆவாஸிகேஹி ஆக³ந்துகானங் நாகாமா தா³தப்³பா³ ஸாமக்³கீ³, ஆக³ந்துகேஹி நிஸ்ஸீமங் க³ந்த்வா உபோஸதோ² காதப்³போ³. ஸசே ஸமஸமா ஹொந்தி, ஆவாஸிகேஹி ஆக³ந்துகானங் நாகாமா தா³தப்³பா³ ஸாமக்³கீ³, ஆக³ந்துகேஹி நிஸ்ஸீமங் க³ந்த்வா உபோஸதோ² காதப்³போ³. ஸசே ஆக³ந்துகா ப³ஹுதரா ஹொந்தி, ஆவாஸிகேஹி ஆக³ந்துகானங் ஸாமக்³கீ³ வா தா³தப்³பா³, நிஸ்ஸீமங் வா க³ந்தப்³ப³ங்.
‘‘Idha pana, bhikkhave, āvāsikānaṃ bhikkhūnaṃ pāṭipado hoti, āgantukānaṃ pannaraso. Sace āvāsikā bahutarā honti, āvāsikehi āgantukānaṃ nākāmā dātabbā sāmaggī, āgantukehi nissīmaṃ gantvā uposatho kātabbo. Sace samasamā honti, āvāsikehi āgantukānaṃ nākāmā dātabbā sāmaggī, āgantukehi nissīmaṃ gantvā uposatho kātabbo. Sace āgantukā bahutarā honti, āvāsikehi āgantukānaṃ sāmaggī vā dātabbā, nissīmaṃ vā gantabbaṃ.
‘‘இத⁴ பன, பி⁴க்க²வே, ஆவாஸிகானங் பி⁴க்கூ²னங் பன்னரஸோ ஹோதி, ஆக³ந்துகானங் பாடிபதோ³. ஸசே ஆவாஸிகா ப³ஹுதரா ஹொந்தி, ஆக³ந்துகேஹி ஆவாஸிகானங் ஸாமக்³கீ³ வா தா³தப்³பா³, நிஸ்ஸீமங் வா க³ந்தப்³ப³ங். ஸசே ஸமஸமா ஹொந்தி, ஆக³ந்துகேஹி ஆவாஸிகானங் ஸாமக்³கீ³ வா தா³தப்³பா³, நிஸ்ஸீமங் வா க³ந்தப்³ப³ங். ஸசே ஆக³ந்துகா ப³ஹுதரா ஹொந்தி, ஆக³ந்துகேஹி ஆவாஸிகானங் நாகாமா தா³தப்³பா³ ஸாமக்³கீ³, ஆவாஸிகேஹி நிஸ்ஸீமங் க³ந்த்வா உபோஸதோ² காதப்³போ³’’தி.
‘‘Idha pana, bhikkhave, āvāsikānaṃ bhikkhūnaṃ pannaraso hoti, āgantukānaṃ pāṭipado. Sace āvāsikā bahutarā honti, āgantukehi āvāsikānaṃ sāmaggī vā dātabbā, nissīmaṃ vā gantabbaṃ. Sace samasamā honti, āgantukehi āvāsikānaṃ sāmaggī vā dātabbā, nissīmaṃ vā gantabbaṃ. Sace āgantukā bahutarā honti, āgantukehi āvāsikānaṃ nākāmā dātabbā sāmaggī, āvāsikehi nissīmaṃ gantvā uposatho kātabbo’’ti.
தத்ராயங் அட்ட²கதா² (மஹாவ॰ அட்ட²॰ 178) –
Tatrāyaṃ aṭṭhakathā (mahāva. aṭṭha. 178) –
ஆவாஸிகானங் பி⁴க்கூ²னங் சாதுத்³த³ஸோ ஹோதி, ஆக³ந்துகானங் பன்னரஸோதி எத்த² யேஸங் பன்னரஸோ, தே திரோரட்ட²தோ வா ஆக³தா, அதீதங் வா உபோஸத²ங் சாதுத்³த³ஸிகங் அகங்ஸூதி வேதி³தப்³பா³. ஆவாஸிகானங் அனுவத்திதப்³ப³ந்தி ஆவாஸிகேஹி ‘‘அஜ்ஜுபோஸதோ² சாதுத்³த³ஸோ’’தி புப்³ப³கிச்சே கரியமானே அனுவத்திதப்³ப³ங், ந படிக்கோஸிதப்³ப³ங். நாகாமா தா³தப்³பா³தி ந அனிச்சா²ய தா³தப்³பா³தி.
Āvāsikānaṃbhikkhūnaṃ cātuddaso hoti, āgantukānaṃ pannarasoti ettha yesaṃ pannaraso, te tiroraṭṭhato vā āgatā, atītaṃ vā uposathaṃ cātuddasikaṃ akaṃsūti veditabbā. Āvāsikānaṃ anuvattitabbanti āvāsikehi ‘‘ajjuposatho cātuddaso’’ti pubbakicce kariyamāne anuvattitabbaṃ, na paṭikkositabbaṃ. Nākāmā dātabbāti na anicchāya dātabbāti.
‘‘அனுஜானாமி பி⁴க்க²வே’’திஆதி³ம்ஹி அயங் பவாரணக்க²ந்த⁴காக³தா பாளி (மஹாவ॰ 240) – இத⁴ பன, பி⁴க்க²வே, ஸம்ப³ஹுலா ஸந்தி³ட்டா² ஸம்ப⁴த்தா பி⁴க்கூ² அஞ்ஞதரஸ்மிங் ஆவாஸே வஸ்ஸங் உபக³ச்ச²ந்தி, தேஸங் ஸாமந்தா அஞ்ஞே பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா வஸ்ஸங் உபக³ச்ச²ந்தி ‘‘மயங் தேஸங் பி⁴க்கூ²னங் வஸ்ஸங்வுத்தா²னங் பவாரணாய பவாரணங் ட²பெஸ்ஸாமா’’தி. அனுஜானாமி, பி⁴க்க²வே, தேஹி பி⁴க்கூ²ஹி த்³வே தயோ உபோஸதே² சாதுத்³த³ஸிகே காதுங், கத²ங் மயங் தேஹி பி⁴க்கூ²ஹி பட²மதரங் பவாரெய்யாமாதி.
‘‘Anujānāmi bhikkhave’’tiādimhi ayaṃ pavāraṇakkhandhakāgatā pāḷi (mahāva. 240) – idha pana, bhikkhave, sambahulā sandiṭṭhā sambhattā bhikkhū aññatarasmiṃ āvāse vassaṃ upagacchanti, tesaṃ sāmantā aññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā vassaṃ upagacchanti ‘‘mayaṃ tesaṃ bhikkhūnaṃ vassaṃvutthānaṃ pavāraṇāya pavāraṇaṃ ṭhapessāmā’’ti. Anujānāmi, bhikkhave, tehi bhikkhūhi dve tayo uposathe cātuddasike kātuṃ, kathaṃ mayaṃ tehi bhikkhūhi paṭhamataraṃ pavāreyyāmāti.
தத்ராயங் அட்ட²கதா² (மஹாவ॰ அட்ட²॰ 240) – த்³வே தயோ உபோஸதே² சாதுத்³த³ஸிகே காதுந்தி எத்த² சதுத்த²பஞ்சமா த்³வே, ததியோ பன பகதியாபி சாதுத்³த³ஸிகோயேவாதி, தஸ்மா ததியசதுத்தா² வா ததியசதுத்த²பஞ்சமா வா த்³வே தயோ சாதுத்³த³ஸிகா காதப்³பா³. அத² சதுத்தே² கதே ஸுணந்தி, பஞ்சமோ சாதுத்³த³ஸிகோ காதப்³போ³, ஏவம்பி த்³வே சாதுத்³த³ஸிகா ஹொந்தி. ஏவங் கரொந்தா ப⁴ண்ட³னகாரகானங் தேரஸே வா சாதுத்³த³ஸே வா இமே பன்னரஸீபவாரணங் பவாரெஸ்ஸந்தீதி.
Tatrāyaṃ aṭṭhakathā (mahāva. aṭṭha. 240) – dve tayo uposathe cātuddasike kātunti ettha catutthapañcamā dve, tatiyo pana pakatiyāpi cātuddasikoyevāti, tasmā tatiyacatutthā vā tatiyacatutthapañcamā vā dve tayo cātuddasikā kātabbā. Atha catutthe kate suṇanti, pañcamo cātuddasiko kātabbo, evampi dve cātuddasikā honti. Evaṃ karontā bhaṇḍanakārakānaṃ terase vā cātuddase vā ime pannarasīpavāraṇaṃ pavāressantīti.
தத்த² அயங் ஸாரத்த²தீ³பனீபாடோ² (ஸாரத்த²॰ டீ॰ மஹாவக்³க³ 3.240) – சதுத்தே² கதே ஸுணந்தீதி சதுத்தே² பன்னரஸிகுபோஸதே² கதே அம்ஹாகங் பவாரணங் ட²பெஸ்ஸந்தீதி ஸுணந்தி. ஏவம்பி த்³வே சாதுத்³த³ஸிகா ஹொந்தீதி ததியேன ஸத்³தி⁴ங் த்³வே சாதுத்³த³ஸிகா ஹொந்தீதி.
Tattha ayaṃ sāratthadīpanīpāṭho (sārattha. ṭī. mahāvagga 3.240) – catutthe kate suṇantīti catutthe pannarasikuposathe kate amhākaṃ pavāraṇaṃ ṭhapessantīti suṇanti. Evampi dve cātuddasikā hontīti tatiyena saddhiṃ dve cātuddasikā hontīti.
தத்ராயங் விமதிவினோத³னீபாடோ² (வி॰ வி॰ டீ॰ மஹாவக்³க³ 2.240) – த்³வே சாதுத்³த³ஸிகா ஹொந்தீதி ததியபக்கே² சாதுத்³த³ஸியா ஸத்³தி⁴ங் த்³வே சாதுத்³த³ஸிகா ஹொந்தி. ப⁴ண்ட³னகாரகானங் தேரஸே வா சாதுத்³த³ஸே வா இமே பன்னரஸீபவாரணங் பவாரெஸ்ஸந்தீதி இமினா யதா²ஸகங் உபோஸத²கரணதி³வஸதோ பட்டா²ய பி⁴க்கூ²னங் சாதுத்³த³ஸீபன்னரஸீவோஹாரோ, ந சந்த³க³திஸித்³தி⁴யா திதி²யா வஸேனாதி த³ஸ்ஸேதி. கிஞ்சாபி ஏவங் ‘‘அனுஜானாமி, பி⁴க்க²வே, ராஜூனங் அனுவத்திது’’ந்தி (மஹாவ॰ 186) வசனதோ பனெத்த² லோகியானங் திதி²ங் அனுவத்தந்தேஹிபி அத்தனோ உபோஸத²க்கமேன சாதுத்³த³ஸிங் பன்னரஸிங் வா பன்னரஸிங் சாதுத்³த³ஸிங் வா கரொந்தேஹேவ அனுவத்திதப்³ப³ங், ந பன ஸோளஸமதி³வஸங் வா தேரஸமதி³வஸங் வா உபோஸத²தி³வஸங் கரொந்தேஹி. தேனேவ பாளியம்பி (மஹாவ॰ 240) ‘‘த்³வே தயோ உபோஸதே² சாதுத்³த³ஸிகே காது’’ந்தி வுத்தங். அஞ்ஞதா² ‘‘த்³வாத³ஸியங், தேரஸியங் வா உபோஸதோ² காதப்³போ³’’தி வத்தப்³ப³தோ. ‘‘ஸகிங் பக்க²ஸ்ஸ சாதுத்³த³ஸே வா பன்னரஸே வா’’திஆதி³வசனம்பி (மஹாவ॰ 136) உபவுத்தக்கமேனேவ வுத்தங், ந திதி²க்கமேனாதி க³ஹேதப்³ப³ந்தி.
Tatrāyaṃ vimativinodanīpāṭho (vi. vi. ṭī. mahāvagga 2.240) – dve cātuddasikā hontīti tatiyapakkhe cātuddasiyā saddhiṃ dve cātuddasikā honti. Bhaṇḍanakārakānaṃ terase vā cātuddase vā ime pannarasīpavāraṇaṃ pavāressantīti iminā yathāsakaṃ uposathakaraṇadivasato paṭṭhāya bhikkhūnaṃ cātuddasīpannarasīvohāro, na candagatisiddhiyā tithiyā vasenāti dasseti. Kiñcāpi evaṃ ‘‘anujānāmi, bhikkhave, rājūnaṃ anuvattitu’’nti (mahāva. 186) vacanato panettha lokiyānaṃ tithiṃ anuvattantehipi attano uposathakkamena cātuddasiṃ pannarasiṃ vā pannarasiṃ cātuddasiṃ vā karonteheva anuvattitabbaṃ, na pana soḷasamadivasaṃ vā terasamadivasaṃ vā uposathadivasaṃ karontehi. Teneva pāḷiyampi (mahāva. 240) ‘‘dve tayo uposathe cātuddasike kātu’’nti vuttaṃ. Aññathā ‘‘dvādasiyaṃ, terasiyaṃ vā uposatho kātabbo’’ti vattabbato. ‘‘Sakiṃ pakkhassa cātuddase vā pannarase vā’’tiādivacanampi (mahāva. 136) upavuttakkameneva vuttaṃ, na tithikkamenāti gahetabbanti.
ந கேவலங் உபோஸத²தி³வஸாயேவ தயோ ஹொந்தி, அத² கோ² பவாரணாதி³வஸாபீதி ஆஹ ‘‘புரிமவஸ்ஸங்வுத்தா²னங் பனா’’திஆதி³. மாஇதி சந்தோ³ வுச்சதி தஸ்ஸ க³தியா தி³வஸஸ்ஸ மினிதப்³ப³தோ, ஸோ எத்த² ஸப்³ப³கலாபபாரிபூரியா புண்ணோதி புண்ணமா. புப்³ப³கத்திகாய புண்ணமா புப்³ப³கத்திகபுண்ணமா, அஸ்ஸயுஜபுண்ணமா. ஸா ஹி பச்சி²மகத்திகங் நிவத்தேதுங் ஏவங் வுத்தா. தேஸங்யேவாதி புரிமவஸ்ஸங்வுத்தா²னங்யேவ. ப⁴ண்ட³னகாரகேஹீதி கலஹகாரகேஹி. பச்சுக்கட்³ட⁴ந்தீதி உக்கட்³ட⁴ந்தி, ப⁴ண்ட³னகாரகே அனுவாத³வஸேன அஸ்ஸயுஜபுண்ணமாதி³ங் பரிச்சஜந்தா பவாரணங் காளபக்க²ங் ஜுண்ஹபக்க²ந்தி உத்³த⁴ங் கட்³ட⁴ந்தீதி அத்தோ², ‘‘ஸுணந்து மே, ஆயஸ்மந்தோ ஆவாஸிகா, யதா³யஸ்மந்தானங் பத்தகல்லங், இதா³னி உபோஸத²ங் கரெய்யாம, பாதிமொக்க²ங் உத்³தி³ஸெய்யாம, ஆக³மே காளே பவாரெய்யாமா’’தி, ‘‘ஸுணந்து மே, ஆயஸ்மந்தோ ஆவாஸிகா, யதா³யஸ்மந்தானங் பத்தகல்லங், இதா³னி உபோஸத²ங் கரெய்யாம, பாதிமொக்க²ங் உத்³தி³ஸெய்யாம, ஆக³மே ஜுண்ஹே பவாரெய்யாமா’’தி (மஹாவ॰ 240) ச ஏவங் ஞத்தியா பவாரணங் உத்³த⁴ங் கட்³ட⁴ந்தீதி வுத்தங் ஹோதி.
Na kevalaṃ uposathadivasāyeva tayo honti, atha kho pavāraṇādivasāpīti āha ‘‘purimavassaṃvutthānaṃ panā’’tiādi. Māiti cando vuccati tassa gatiyā divasassa minitabbato, so ettha sabbakalāpapāripūriyā puṇṇoti puṇṇamā. Pubbakattikāya puṇṇamā pubbakattikapuṇṇamā, assayujapuṇṇamā. Sā hi pacchimakattikaṃ nivattetuṃ evaṃ vuttā. Tesaṃyevāti purimavassaṃvutthānaṃyeva. Bhaṇḍanakārakehīti kalahakārakehi. Paccukkaḍḍhantīti ukkaḍḍhanti, bhaṇḍanakārake anuvādavasena assayujapuṇṇamādiṃ pariccajantā pavāraṇaṃ kāḷapakkhaṃ juṇhapakkhanti uddhaṃ kaḍḍhantīti attho, ‘‘suṇantu me, āyasmanto āvāsikā, yadāyasmantānaṃ pattakallaṃ, idāni uposathaṃ kareyyāma, pātimokkhaṃ uddiseyyāma, āgame kāḷe pavāreyyāmā’’ti, ‘‘suṇantu me, āyasmanto āvāsikā, yadāyasmantānaṃ pattakallaṃ, idāni uposathaṃ kareyyāma, pātimokkhaṃ uddiseyyāma, āgame juṇhe pavāreyyāmā’’ti (mahāva. 240) ca evaṃ ñattiyā pavāraṇaṃ uddhaṃ kaḍḍhantīti vuttaṃ hoti.
அதா²தி அனந்தரத்தே² நிபாதோ. சதுத்³த³ஸன்னங் பூரணோ சாதுத்³த³ஸோ, தி³வஸோ. யங் ஸந்தா⁴ய ‘‘ஆக³மே காளே பவாரெய்யாமா’’தி ஞத்திங் ட²பயிங்ஸு. பச்சி²மகத்திகபுண்ணமா வாதி கோமுதி³சாதுமாஸினிபுண்ணமதி³வஸோ வா. யங் ஸந்தா⁴ய ‘‘ஆக³மே ஜுண்ஹே பவாரெய்யாமா’’தி ஞத்திங் ட²பயிங்ஸு. தஸ்மிங் பன ஆக³மே ஜுண்ஹே கோமுதி³யா சாதுமாஸினியா அவஸ்ஸங் பவாரேதப்³ப³ங். ந ஹி தங் அதிக்கமித்வா பவாரேதுங் லப்³ப⁴தி. வுத்தஞ்ஹேதங் ‘‘தே சே, பி⁴க்க²வே, பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தம்பி ஜுண்ஹங் அனுவஸெய்யுங். தேஹி, பி⁴க்க²வே, பி⁴க்கூ²ஹி ஸப்³பே³ஹேவ ஆக³மே ஜுண்ஹே கோமுதி³யா சாதுமாஸினியா அகாமா பவாரேதப்³ப³’’ந்தி (மஹாவ॰ 240). தேனேவாஹ ‘‘பச்சி²மவஸ்ஸங்வுத்தா²னஞ்ச பச்சி²மகத்திகபுண்ணமா ஏவ வா’’தி. யதி³ ஹி தங் அதிக்கமித்வா பவாரெய்ய, து³க்கடாபத்திங் ஆபஜ்ஜெய்யுங். வுத்தஞ்ஹேதங் ‘‘ந ச, பி⁴க்க²வே, அபவாரணாய பவாரேதப்³ப³ங் அஞ்ஞத்ர ஸங்க⁴ஸாமக்³கி³யா’’தி (மஹாவ॰ 233). விஸுத்³தி⁴பவாரணாயோக³தோ பவாரணாதி³வஸா. பி-ஸத்³தே³ன ந கேவலங் பவாரணாதி³வஸாவ , அத² கோ² தத³ஞ்ஞே உபோஸத²தி³வஸாபி ஹொந்தீதி த³ஸ்ஸேதி. இத³ம்பீதி பவாரணத்தயம்பி. ததா²ரூபபச்சயேதி ப³ஹுதராவாஸிகாதி³பச்சயே. த்³வின்னங் கத்திகபுண்ணமானந்தி புப்³ப³கத்திகபச்சி²மகத்திகஸங்கா²தானங் த்³வின்னங் அஸ்ஸயுஜகோமுதி³புண்ணமானங்.
Athāti anantaratthe nipāto. Catuddasannaṃ pūraṇo cātuddaso, divaso. Yaṃ sandhāya ‘‘āgame kāḷe pavāreyyāmā’’ti ñattiṃ ṭhapayiṃsu. Pacchimakattikapuṇṇamā vāti komudicātumāsinipuṇṇamadivaso vā. Yaṃ sandhāya ‘‘āgame juṇhe pavāreyyāmā’’ti ñattiṃ ṭhapayiṃsu. Tasmiṃ pana āgame juṇhe komudiyā cātumāsiniyā avassaṃ pavāretabbaṃ. Na hi taṃ atikkamitvā pavāretuṃ labbhati. Vuttañhetaṃ ‘‘te ce, bhikkhave, bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā tampi juṇhaṃ anuvaseyyuṃ. Tehi, bhikkhave, bhikkhūhi sabbeheva āgame juṇhe komudiyā cātumāsiniyā akāmā pavāretabba’’nti (mahāva. 240). Tenevāha ‘‘pacchimavassaṃvutthānañca pacchimakattikapuṇṇamā eva vā’’ti. Yadi hi taṃ atikkamitvā pavāreyya, dukkaṭāpattiṃ āpajjeyyuṃ. Vuttañhetaṃ ‘‘na ca, bhikkhave, apavāraṇāya pavāretabbaṃ aññatra saṅghasāmaggiyā’’ti (mahāva. 233). Visuddhipavāraṇāyogato pavāraṇādivasā. Pi-saddena na kevalaṃ pavāraṇādivasāva , atha kho tadaññe uposathadivasāpi hontīti dasseti. Idampīti pavāraṇattayampi. Tathārūpapaccayeti bahutarāvāsikādipaccaye. Dvinnaṃ kattikapuṇṇamānanti pubbakattikapacchimakattikasaṅkhātānaṃ dvinnaṃ assayujakomudipuṇṇamānaṃ.
இதா³னி யோ ஸோ ஸாமக்³கி³உபோஸத²தி³வஸோ வுத்தோ, தஞ்ச தப்பஸங்கே³ன ஸாமக்³கி³பவாரணாதி³வஸஞ்ச த³ஸ்ஸெந்தோ ‘‘யதா³ பனா’’திஆதி³மாஹ. தத்த² ஓஸாரிதே தஸ்மிங் பி⁴க்கு²ஸ்மிந்தி உக்கி²த்தகே பி⁴க்கு²ஸ்மிங் ஓஸாரிதே, தங் க³ஹெத்வா ஸீமங் க³ந்த்வா ஆபத்திங் தே³ஸாபெத்வா கம்மவாசாய கம்மபடிப்பஸ்ஸத்³தி⁴வஸேன பவேஸிதேதி வுத்தங் ஹோதி. தஸ்ஸ வத்து²ஸ்ஸாதி தஸ்ஸ அதி⁴கரணஸ்ஸ. ததா³ ட²பெத்வா சுத்³த³ஸபன்னரஸே அஞ்ஞோ யோ கோசி தி³வஸோ உபோஸத²தி³வஸோ நாம ஹோதீதி ஸம்ப³ந்தோ⁴. கஸ்மாதி ஆஹ ‘‘தாவதே³வ உபோஸதோ² காதப்³போ³. ‘பாதிமொக்க²ங் உத்³தி³ஸிதப்³ப³’ந்தி வசனதோ’’தி. தத்த² தாவதே³வாதி தங் தி³வஸமேவ. வசனதோதி கோஸம்ப³கக்க²ந்த⁴கே (மஹாவ॰ 475) வுத்தத்தா. யத்ர பன பத்தசீவராதீ³னங் அத்தா²ய அப்பமத்தகேன காரணேன விவத³ந்தா உபோஸத²ங் வா பவாரணங் வா ட²பெந்தி, தத்த² தஸ்மிங் அதி⁴கரணே வினிச்சி²தே ‘‘ஸமக்³கா³ ஜாதம்ஹா’’தி அந்தரா ஸாமக்³கி³உபோஸத²ங் காதுங் ந லப⁴ந்தி, கரொந்தேஹி அனுபோஸதே² உபோஸதோ² கதோ நாம ஹோதி.
Idāni yo so sāmaggiuposathadivaso vutto, tañca tappasaṅgena sāmaggipavāraṇādivasañca dassento ‘‘yadā panā’’tiādimāha. Tattha osārite tasmiṃ bhikkhusminti ukkhittake bhikkhusmiṃ osārite, taṃ gahetvā sīmaṃ gantvā āpattiṃ desāpetvā kammavācāya kammapaṭippassaddhivasena pavesiteti vuttaṃ hoti. Tassa vatthussāti tassa adhikaraṇassa. Tadā ṭhapetvā cuddasapannarase añño yo koci divaso uposathadivaso nāma hotīti sambandho. Kasmāti āha ‘‘tāvadeva uposatho kātabbo. ‘Pātimokkhaṃ uddisitabba’nti vacanato’’ti. Tattha tāvadevāti taṃ divasameva. Vacanatoti kosambakakkhandhake (mahāva. 475) vuttattā. Yatra pana pattacīvarādīnaṃ atthāya appamattakena kāraṇena vivadantā uposathaṃ vā pavāraṇaṃ vā ṭhapenti, tattha tasmiṃ adhikaraṇe vinicchite ‘‘samaggā jātamhā’’ti antarā sāmaggiuposathaṃ kātuṃ na labhanti, karontehi anuposathe uposatho kato nāma hoti.
கத்திகமாஸப்³ப⁴ந்தரேதி எத்த² கத்திகமாஸோ நாம புப்³ப³கத்திகமாஸஸ்ஸ காளபக்க²பாடிபத³தோ பட்டா²ய யாவ அபரகத்திகபுண்ணமா, தாவ ஏகூனதிங்ஸரத்திதி³வா, தஸ்ஸ அப்³ப⁴ந்தரே. ததோ புரே வா பன பச்சா² வா வட்டதி. அயமேவாதி யோ கோசி தி³வஸோயேவ. இதா⁴பி கோஸம்ப³கக்க²ந்த⁴கே ஸாமக்³கி³யா ஸதி³ஸாவ ஸாமக்³கீ³ வேதி³தப்³பா³. யே பன கிஸ்மிஞ்சிதே³வ அப்பமத்தகே பவாரணங் ட²பெத்வா ஸமக்³கா³ ஹொந்தி, தேஹி பவாரணாயமேவ பவாரணா காதப்³பா³, தாவதே³வ ந காதப்³பா³, கரொந்தேஹி அபவாரணாய பவாரணா கதா நாம ஹோதி, ‘‘ந காதப்³பா³யேவா’’தி நியமேன யதி³ கரோதி, து³க்கடந்தி த³ஸ்ஸேதி. தத்த² ஹி உபோஸத²கரணே து³க்கடங். வுத்தஞ்ஹேதங் ‘‘ந, பி⁴க்க²வே, அனுபோஸதே² உபோஸதோ² காதப்³போ³ அஞ்ஞத்ர ஸங்க⁴ஸாமக்³கி³யா’’தி (மஹாவ॰ 183).
Kattikamāsabbhantareti ettha kattikamāso nāma pubbakattikamāsassa kāḷapakkhapāṭipadato paṭṭhāya yāva aparakattikapuṇṇamā, tāva ekūnatiṃsarattidivā, tassa abbhantare. Tato pure vā pana pacchā vā vaṭṭati. Ayamevāti yo koci divasoyeva. Idhāpi kosambakakkhandhake sāmaggiyā sadisāva sāmaggī veditabbā. Ye pana kismiñcideva appamattake pavāraṇaṃ ṭhapetvā samaggā honti, tehi pavāraṇāyameva pavāraṇā kātabbā, tāvadeva na kātabbā, karontehi apavāraṇāya pavāraṇā katā nāma hoti, ‘‘na kātabbāyevā’’ti niyamena yadi karoti, dukkaṭanti dasseti. Tattha hi uposathakaraṇe dukkaṭaṃ. Vuttañhetaṃ ‘‘na, bhikkhave, anuposathe uposatho kātabbo aññatra saṅghasāmaggiyā’’ti (mahāva. 183).
169. ஸங்கே⁴ உபோஸதோ² நாம ஏகஸீமாயங் ஸன்னிபதிதேன சதுவக்³கா³தி³ஸங்கே⁴ன கத்தப்³போ³ உபோஸதோ², ஸோ ச பாதிமொக்கு²த்³தே³ஸோயேவ. க³ணே உபோஸதோ² நாம ஏகஸீமாயங் ஸன்னிபதிதேஹி த்³வீஹி, தீஹி வா பி⁴க்கூ²ஹி கத்தப்³போ³ உபோஸதோ², ஸோ ச பாரிஸுத்³தி⁴உபோஸதோ²யேவ. புக்³க³லே உபோஸதோ² நாம ஏகஸீமாயங் நிஸின்னேன ஏகேன பி⁴க்கு²னா கத்தப்³போ³ உபோஸதோ², ஸோ ச அதி⁴ட்டா²னுபோஸதோ²யேவ. தேனாஹ ‘‘காரகவஸேன அபரேபி தயோ உபோஸதா²’’தி. கத்தப்³பா³காரவஸேன வுத்தேஸு தீஸு உபோஸதே²ஸு ஸுத்துத்³தே³ஸோ நாம பாதிமொக்கு²த்³தே³ஸோ. ஸோ து³விதோ⁴ ஓவாத³பாதிமொக்கு²த்³தே³ஸோ ச ஆணாபாதிமொக்கு²த்³தே³ஸோ ச. தத்ர ஓவாதோ³வ பாதிமொக்க²ங், தஸ்ஸ உத்³தே³ஸோ ஸரூபேன கத²னங் ஓவாத³பாதிமொக்கு²த்³தே³ஸோ. ‘‘இமஸ்மிங் வீதிக்கமே அயங் நாம ஆபத்தீ’’தி ஏவங் ஆபத்திவஸேன ஆணாபனங் பஞ்ஞாபனங் ஆணா. ஸேஸங் அனந்தரஸதி³ஸமேவ.
169.Saṅghe uposatho nāma ekasīmāyaṃ sannipatitena catuvaggādisaṅghena kattabbo uposatho, so ca pātimokkhuddesoyeva. Gaṇe uposatho nāma ekasīmāyaṃ sannipatitehi dvīhi, tīhi vā bhikkhūhi kattabbo uposatho, so ca pārisuddhiuposathoyeva. Puggale uposatho nāma ekasīmāyaṃ nisinnena ekena bhikkhunā kattabbo uposatho, so ca adhiṭṭhānuposathoyeva. Tenāha ‘‘kārakavasena aparepi tayo uposathā’’ti. Kattabbākāravasena vuttesu tīsu uposathesu suttuddeso nāma pātimokkhuddeso. So duvidho ovādapātimokkhuddeso ca āṇāpātimokkhuddeso ca. Tatra ovādova pātimokkhaṃ, tassa uddeso sarūpena kathanaṃ ovādapātimokkhuddeso. ‘‘Imasmiṃ vītikkame ayaṃ nāma āpattī’’ti evaṃ āpattivasena āṇāpanaṃ paññāpanaṃ āṇā. Sesaṃ anantarasadisameva.
தத்த² ஓவாத³பாதிமொக்கு²த்³தே³ஸோ நாம –
Tattha ovādapātimokkhuddeso nāma –
‘‘க²ந்தி பரமங் தபோ திதிக்கா²;
‘‘Khanti paramaṃ tapo titikkhā;
நிப்³பா³னங் பரமங் வத³ந்தி பு³த்³தா⁴;
Nibbānaṃ paramaṃ vadanti buddhā;
ந ஹி பப்³ப³ஜிதோ பரூபகா⁴தீ;
Na hi pabbajito parūpaghātī;
ந ஸமணோ ஹோதி பரங் விஹேட²யந்தோ.
Na samaṇo hoti paraṃ viheṭhayanto.
‘‘ஸப்³ப³பாபஸ்ஸ அகரணங், குஸலஸ்ஸ உபஸம்பதா³;
‘‘Sabbapāpassa akaraṇaṃ, kusalassa upasampadā;
ஸசித்தபரியோத³பனங், ஏதங் பு³த்³தா⁴ன ஸாஸனங்.
Sacittapariyodapanaṃ, etaṃ buddhāna sāsanaṃ.
‘‘அனுபவாதோ³ அனுபகா⁴தோ, பாதிமொக்கே² ச ஸங்வரோ;
‘‘Anupavādo anupaghāto, pātimokkhe ca saṃvaro;
மத்தஞ்ஞுதா ச ப⁴த்தஸ்மிங், பந்தஞ்ச ஸயனாஸனங்;
Mattaññutā ca bhattasmiṃ, pantañca sayanāsanaṃ;
அதி⁴சித்தே ச ஆயோகோ³, ஏதங் பு³த்³தா⁴ன ஸாஸன’’ந்தி. (தீ³॰ நி॰ 2.90; த⁴॰ ப॰ 183-185) –
Adhicitte ca āyogo, etaṃ buddhāna sāsana’’nti. (dī. ni. 2.90; dha. pa. 183-185) –
இமா திஸ்ஸோ கா³தா².
Imā tisso gāthā.
தத்த² க²ந்தி பரமங் தபோதி அதி⁴வாஸனக²ந்தி நாம பரமங் தபோ. திதிக்கா²தி க²ந்தியா ஏவ வேவசனங், திதிக்கா²ஸங்கா²தா அதி⁴வாஸனக²ந்தி உத்தமங் தபோதி அத்தோ². நிப்³பா³னங் பரமங் வத³ந்தீதி ஸப்³பா³காரேன பன நிப்³பா³னங் பரமந்தி வத³ந்தி பு³த்³தா⁴. ந ஹி பப்³ப³ஜிதோ பரூபகா⁴தீதி யோ அதி⁴வாஸனக²ந்திவிரஹிதத்தா பரங் உபகா⁴தேதி பா³த⁴தி விஹிங்ஸதி, ஸோ பப்³ப³ஜிதோ நாம ந ஹோதி . சதுத்த²பாதோ³ பன தஸ்ஸேவ வேவசனங். ‘‘ந ஹி பப்³ப³ஜிதோ’’தி ஏதஸ்ஸ ஹி ந ஸமணோ ஹோதீதி வேவசனங். ‘‘பரூபகா⁴தீ’’தி ஏதஸ்ஸ பரங் விஹேட²யந்தோதி வேவசனங். அத² வா பரூபகா⁴தீதி ஸீலூபகா⁴தீ. ஸீலஞ்ஹி உத்தமட்டே²ன பரந்தி வுச்சதி. யோ ச ஸமணோ பரங் யங் கஞ்சி ஸத்தங் விஹேட²யந்தோ பரூபகா⁴தீ ஹோதி அத்தனோ ஸீலவினாஸகோ, ஸோ பப்³ப³ஜிதோ நாம ந ஹோதீதி அத்தோ². அத² வா யோ அதி⁴வாஸனக²ந்தியா அபா⁴வா பரூபகா⁴தீ ஹோதி, பரங் அந்தமஸோ ட³ங்ஸமகஸம்பி ஸஞ்சிச்ச ஜீவிதா வோரோபேதி, ஸோ ந ஹி பப்³ப³ஜிதோ. கிங் காரணா? மலஸ்ஸ அபப்³ப³ஜிதத்தா. ‘‘பப்³பா³ஜயமத்தனோ மலங், தஸ்மா ‘பப்³ப³ஜிதோ’தி வுச்சதீ’’தி (த⁴॰ ப॰ 388) இத³ஞ்ஹி பப்³ப³ஜிதலக்க²ணங். யோபி ந ஹேவ கோ² உபகா⁴தேதி ந மாரேதி, அபிச த³ண்டா³தீ³ஹி விஹேடே²தி, ஸோபி பரங் விஹேட²யந்தோ ந ஸமணோ ஹோதி. கிங்காரணா? விஹேஸாய அஸமிதத்தா. ‘‘ஸமிதத்தா ஹி பாபானங், ஸமணோதி பவுச்சதீ’’தி (த⁴॰ ப॰ 265) இத³ஞ்ஹி ஸமணலக்க²ணங்.
Tattha khanti paramaṃ tapoti adhivāsanakhanti nāma paramaṃ tapo. Titikkhāti khantiyā eva vevacanaṃ, titikkhāsaṅkhātā adhivāsanakhanti uttamaṃ tapoti attho. Nibbānaṃ paramaṃ vadantīti sabbākārena pana nibbānaṃ paramanti vadanti buddhā. Na hi pabbajito parūpaghātīti yo adhivāsanakhantivirahitattā paraṃ upaghāteti bādhati vihiṃsati, so pabbajito nāma na hoti . Catutthapādo pana tasseva vevacanaṃ. ‘‘Na hi pabbajito’’ti etassa hi na samaṇo hotīti vevacanaṃ. ‘‘Parūpaghātī’’ti etassa paraṃ viheṭhayantoti vevacanaṃ. Atha vā parūpaghātīti sīlūpaghātī. Sīlañhi uttamaṭṭhena paranti vuccati. Yo ca samaṇo paraṃ yaṃ kañci sattaṃ viheṭhayanto parūpaghātī hoti attano sīlavināsako, so pabbajito nāma na hotīti attho. Atha vā yo adhivāsanakhantiyā abhāvā parūpaghātī hoti, paraṃ antamaso ḍaṃsamakasampi sañcicca jīvitā voropeti, so na hi pabbajito. Kiṃ kāraṇā? Malassa apabbajitattā. ‘‘Pabbājayamattano malaṃ, tasmā ‘pabbajito’ti vuccatī’’ti (dha. pa. 388) idañhi pabbajitalakkhaṇaṃ. Yopi na heva kho upaghāteti na māreti, apica daṇḍādīhi viheṭheti, sopi paraṃ viheṭhayanto na samaṇo hoti. Kiṃkāraṇā? Vihesāya asamitattā. ‘‘Samitattā hi pāpānaṃ, samaṇoti pavuccatī’’ti (dha. pa. 265) idañhi samaṇalakkhaṇaṃ.
து³தியகா³தா²ய ஸப்³ப³பாபஸ்ஸாதி ஸப்³பா³குஸலஸ்ஸ. அகரணந்தி அனுப்பாத³னங். குஸலஸ்ஸாதி சதுபூ⁴மககுஸலஸ்ஸ. உபஸம்பதா³தி உபஸம்பாத³னங் படிலாபோ⁴. ஸசித்தபரியோத³பனந்தி அத்தனோ சித்தஸ்ஸ வோதா³பனங் பப⁴ஸ்ஸரபா⁴வகரணங் ஸப்³ப³ஸோ பரிஸோத⁴னங், தங் பன அரஹத்தேன ஹோதி, இதி ஸீலஸங்வரேன ஸப்³ப³பாபங் பஹாய லோகியலோகுத்தராஹி ஸமத²விபஸ்ஸனாஹி குஸலங் ஸம்பாதெ³த்வா அரஹத்தப²லேன சித்தங் பரியோத³பேதப்³ப³ந்தி ஏதங் பு³த்³தா⁴ன ஸாஸனங் ஓவாதோ³ அனுஸிட்டி².
Dutiyagāthāya sabbapāpassāti sabbākusalassa. Akaraṇanti anuppādanaṃ. Kusalassāti catubhūmakakusalassa. Upasampadāti upasampādanaṃ paṭilābho. Sacittapariyodapananti attano cittassa vodāpanaṃ pabhassarabhāvakaraṇaṃ sabbaso parisodhanaṃ, taṃ pana arahattena hoti, iti sīlasaṃvarena sabbapāpaṃ pahāya lokiyalokuttarāhi samathavipassanāhi kusalaṃ sampādetvā arahattaphalena cittaṃ pariyodapetabbanti etaṃ buddhāna sāsanaṃ ovādo anusiṭṭhi.
ததியகா³தா²ய அனுபவாதோ³தி வாசாய கஸ்ஸசி அனுபவத³னங். அனுபகா⁴தோதி காயேன கஸ்ஸசி உபகா⁴தாகரணங். பாதிமொக்கே²தி யங் தங் பாதிமொக்க²ங் பஅதிமொக்க²ங் அதிபமொக்க²ங் உத்தமஸீலங். பாதி வா அக³திவிஸேஸேஹி மொக்கே²தி து³க்³க³திப⁴யேஹி, யோ வா நங் பாதி, தங் மொக்கே²தீதி பாதிமொக்க²ந்தி வுச்சதி, தஸ்மிங் பாதிமொக்கே² ச. ஸங்வரோதி ஸத்தன்னங் ஆபத்திக்க²ந்தா⁴னங் அவீதிக்கமலக்க²ணோ ஸங்வரோ. மத்தஞ்ஞுதாதி படிக்³க³ஹணபரிபோ⁴க³வஸேன பமாணஞ்ஞுதா. பந்தஞ்ச ஸயனாஸனந்தி ஜனஸங்க⁴ட்டனவிரஹிதங் நிஜ்ஜனஸம்பா³த⁴ங் விவித்தங் ஸேனாஸனஞ்ச. எத்த² ச த்³வீஹியேவ பச்சயேஹி சதுபச்சயஸந்தோஸோ தீ³பிதோதி வேதி³தப்³போ³ பச்சயஸந்தோஸஸாமஞ்ஞேன இதரத்³வயஸ்ஸபி லக்க²ணஹாரனயேன ஜோதிதத்தா. அதி⁴சித்தே ச ஆயோகோ³தி விபஸ்ஸனாபாத³கங் அட்ட²ஸமாபத்திசித்தங் அதி⁴சித்தங், ததோபி மக்³க³ப²லசித்தமேவ அதி⁴சித்தங், தஸ்மிங் யதா²வுத்தே அதி⁴சித்தே ஆயோகோ³ ச அனுயோகோ³ சாதி அத்தோ². ஏதங் பு³த்³தா⁴ன ஸாஸனந்தி ஏதங் பரஸ்ஸ அனுபவத³னங், அனுபகா⁴தனங் , பாதிமொக்க²ஸங்வரோ, படிக்³க³ஹணபரிபோ⁴கே³ஸு மத்தஞ்ஞுதா , அட்ட²ஸமாபத்திவஸிபா⁴வாய விவித்தஸேனாஸனஸேவனஞ்ச பு³த்³தா⁴னங் ஸாஸனங் ஓவாதோ³ அனுஸிட்டீ²தி. இமா பன திஸ்ஸோ கா³தா²யோ ஸப்³ப³பு³த்³தா⁴னங் பாதிமொக்கு²த்³தே³ஸகா³தா² ஹொந்தீதி வேதி³தப்³பா³, தங் பு³த்³தா⁴ ஏவ உத்³தி³ஸந்தி, ந ஸாவகா. ‘‘ஸுணாது மே ப⁴ந்தே ஸங்கோ⁴’’திஆதி³னா (மஹாவ॰ 134) நயேன வுத்தங் ஆணாபாதிமொக்க²ங் நாம, தங் ஸாவகா ஏவ உத்³தி³ஸந்தி, ந பு³த்³தா⁴. இத³மேவ ச இமஸ்மிங் அத்தே² பாதிமொக்க²ந்தி அதி⁴ப்பேதங்.
Tatiyagāthāya anupavādoti vācāya kassaci anupavadanaṃ. Anupaghātoti kāyena kassaci upaghātākaraṇaṃ. Pātimokkheti yaṃ taṃ pātimokkhaṃ paatimokkhaṃ atipamokkhaṃ uttamasīlaṃ. Pāti vā agativisesehi mokkheti duggatibhayehi, yo vā naṃ pāti, taṃ mokkhetīti pātimokkhanti vuccati, tasmiṃ pātimokkhe ca. Saṃvaroti sattannaṃ āpattikkhandhānaṃ avītikkamalakkhaṇo saṃvaro. Mattaññutāti paṭiggahaṇaparibhogavasena pamāṇaññutā. Pantañca sayanāsananti janasaṅghaṭṭanavirahitaṃ nijjanasambādhaṃ vivittaṃ senāsanañca. Ettha ca dvīhiyeva paccayehi catupaccayasantoso dīpitoti veditabbo paccayasantosasāmaññena itaradvayassapi lakkhaṇahāranayena jotitattā. Adhicitte ca āyogoti vipassanāpādakaṃ aṭṭhasamāpatticittaṃ adhicittaṃ, tatopi maggaphalacittameva adhicittaṃ, tasmiṃ yathāvutte adhicitte āyogo ca anuyogo cāti attho. Etaṃ buddhāna sāsananti etaṃ parassa anupavadanaṃ, anupaghātanaṃ , pātimokkhasaṃvaro, paṭiggahaṇaparibhogesu mattaññutā , aṭṭhasamāpattivasibhāvāya vivittasenāsanasevanañca buddhānaṃ sāsanaṃ ovādo anusiṭṭhīti. Imā pana tisso gāthāyo sabbabuddhānaṃ pātimokkhuddesagāthā hontīti veditabbā, taṃ buddhā eva uddisanti, na sāvakā. ‘‘Suṇātu me bhante saṅgho’’tiādinā (mahāva. 134) nayena vuttaṃ āṇāpātimokkhaṃ nāma, taṃ sāvakā eva uddisanti, na buddhā. Idameva ca imasmiṃ atthe pātimokkhanti adhippetaṃ.
அனுபக³தோ நாம தத்தே²வ உபஸம்பன்னோ, அஸதியா புரிமிகாய அனுபக³தோ வா. சாதுமாஸினியந்தி சதுமாஸியங். ஸா ஹி சதுன்னங் மாஸானங் பாரிபூரிபூ⁴தாதி சாதுமாஸீ, ஸா ஏவ ‘‘சாதுமாஸினீ’’தி வுச்சதி, தஸ்ஸங் சாதுமாஸினியங், பச்சி²மகத்திகபுண்ணமாஸியந்தி அத்தோ². காயஸாமக்³கி³ந்தி காயேன ஸமக்³க³பா⁴வங், ஹத்த²பாஸூபக³மனந்தி வுத்தங் ஹோதி.
Anupagato nāma tattheva upasampanno, asatiyā purimikāya anupagato vā. Cātumāsiniyanti catumāsiyaṃ. Sā hi catunnaṃ māsānaṃ pāripūribhūtāti cātumāsī, sā eva ‘‘cātumāsinī’’ti vuccati, tassaṃ cātumāsiniyaṃ, pacchimakattikapuṇṇamāsiyanti attho. Kāyasāmagginti kāyena samaggabhāvaṃ, hatthapāsūpagamananti vuttaṃ hoti.
அயங் பனெத்த² வினிச்ச²யோ – ஸசே புரிமிகாய பஞ்ச பி⁴க்கூ² வஸ்ஸங் உபக³தா பச்சி²மிகாயபி பஞ்ச, புரிமேஹி ஞத்திங் ட²பெத்வா பவாரிதே பச்சி²மேஹி தேஸங் ஸந்திகே பாரிஸுத்³தி⁴உபோஸதோ² காதப்³போ³, ந ஏகஸ்மிங் உபோஸத²க்³கே³ த்³வே ஞத்தியோ ட²பேதப்³பா³. ஸசே பச்சி²மிகாய உபக³தா சத்தாரோ தயோ த்³வே ஏகோ வா ஹோதி, ஏஸேவ நயோ. அத² புரிமிகாய சத்தாரோ, பச்சி²மிகாயபி சத்தாரோ தயோ த்³வே ஏகோ வா, ஏஸேவ நயோ. அத² புரிமிகாய தயோ, பச்சி²மிகாய தயோ த்³வே ஏகோ வா, ஏஸேவ நயோ. இத³ஞ்ஹெத்த² லக்க²ணங் – ஸசே புரிமிகாய உபக³தேஹி பச்சி²மிகாய உபக³தா தோ²கதரா சேவ ஹொந்தி ஸமஸமா ச, ஸங்க⁴பவாரணாய ச க³ணங் பூரெந்தி, ஸங்க⁴பவாரணாவஸேன ஞத்தி ட²பேதப்³பா³. ஸசே பன பச்சி²மிகாய ஏகோ ஹோதி, தேன ஸத்³தி⁴ங் தே சத்தாரோ ஹொந்தி, சதுன்னங் ஸங்க⁴ஞத்திங் ட²பெத்வா பவாரேதுங் ந வட்டதி. க³ணஞத்தியா பன ஸோ க³ணபூரகோ ஹோதி, தஸ்மா க³ணவஸேன ஞத்திங் ட²பெத்வா புரிமேஹி பவாரேதப்³ப³ங். இதரேன தேஸங் ஸந்திகே பாரிஸுத்³தி⁴உபோஸதோ² காதப்³போ³. ஸசே புரிமிகாய த்³வே, பச்சி²மிகாய த்³வே வா ஏகோ வா, எத்தா²பி ஏஸேவ நயோ. ஸசே புரிமிகாயபி ஏகோ, பச்சி²மிகாயபி ஏகோ, ஏகேன ஏகஸ்ஸ ஸந்திகே பவாரேதப்³ப³ங், ஏகேன பாரிஸுத்³தி⁴உபோஸதோ² காதப்³போ³. ஸசே புரிமேஹி வஸ்ஸூபக³தேஹி பச்சா² வஸ்ஸூபக³தா ஏகேனபி அதி⁴கதரா ஹொந்தி, பட²மங் பாதிமொக்க²ங் உத்³தி³ஸித்வா பச்சா² தோ²கதரேஹி தேஸங் ஸந்திகே பவாரேதப்³ப³ங். கத்திகசாதுமாஸினிபவாரணாய பன ஸசே பட²மவஸ்ஸூபக³தேஹி மஹாபவாரணாய பவாரிதேஹி பச்சா² உபக³தா அதி⁴கதரா வா ஸமஸமா வா ஹொந்தி, பவாரணாஞத்திங் ட²பெத்வா பவாரேதப்³ப³ங், தேஹி பவாரிதே பச்சா² இதரேஹி பாரிஸுத்³தி⁴உபோஸதோ² காதப்³போ³. அத² மஹாபவாரணாய பவாரிதா ப³ஹூ ஹொந்தி, பச்சா² வஸ்ஸூபக³தா தோ²கா வா ஏகோ வா, பாதிமொக்கே² உத்³தி³ட்டே² பச்சா² தேஸங் ஸந்திகே தேன பவாரேதப்³ப³ந்தி.
Ayaṃ panettha vinicchayo – sace purimikāya pañca bhikkhū vassaṃ upagatā pacchimikāyapi pañca, purimehi ñattiṃ ṭhapetvā pavārite pacchimehi tesaṃ santike pārisuddhiuposatho kātabbo, na ekasmiṃ uposathagge dve ñattiyo ṭhapetabbā. Sace pacchimikāya upagatā cattāro tayo dve eko vā hoti, eseva nayo. Atha purimikāya cattāro, pacchimikāyapi cattāro tayo dve eko vā, eseva nayo. Atha purimikāya tayo, pacchimikāya tayo dve eko vā, eseva nayo. Idañhettha lakkhaṇaṃ – sace purimikāya upagatehi pacchimikāya upagatā thokatarā ceva honti samasamā ca, saṅghapavāraṇāya ca gaṇaṃ pūrenti, saṅghapavāraṇāvasena ñatti ṭhapetabbā. Sace pana pacchimikāya eko hoti, tena saddhiṃ te cattāro honti, catunnaṃ saṅghañattiṃ ṭhapetvā pavāretuṃ na vaṭṭati. Gaṇañattiyā pana so gaṇapūrako hoti, tasmā gaṇavasena ñattiṃ ṭhapetvā purimehi pavāretabbaṃ. Itarena tesaṃ santike pārisuddhiuposatho kātabbo. Sace purimikāya dve, pacchimikāya dve vā eko vā, etthāpi eseva nayo. Sace purimikāyapi eko, pacchimikāyapi eko, ekena ekassa santike pavāretabbaṃ, ekena pārisuddhiuposatho kātabbo. Sace purimehi vassūpagatehi pacchā vassūpagatā ekenapi adhikatarā honti, paṭhamaṃ pātimokkhaṃ uddisitvā pacchā thokatarehi tesaṃ santike pavāretabbaṃ. Kattikacātumāsinipavāraṇāya pana sace paṭhamavassūpagatehi mahāpavāraṇāya pavāritehi pacchā upagatā adhikatarā vā samasamā vā honti, pavāraṇāñattiṃ ṭhapetvā pavāretabbaṃ, tehi pavārite pacchā itarehi pārisuddhiuposatho kātabbo. Atha mahāpavāraṇāya pavāritā bahū honti, pacchā vassūpagatā thokā vā eko vā, pātimokkhe uddiṭṭhe pacchā tesaṃ santike tena pavāretabbanti.
ட²பெத்வா பன பவாரணாதி³வஸங் அஞ்ஞஸ்மிங் காலேதி அஞ்ஞஸ்மிங் உபோஸத²தி³வஸே. உத்³தி³ட்ட²மத்தே பாதிமொக்கே²தி ‘‘பரியோஸிதமத்தே உத்³தி³ஸ்ஸமானே’’தி அபரியோஸிதே ஆக³தே ஸதி அவஸேஸஸ்ஸ பாதிமொக்க²ஸ்ஸ ஸோதப்³ப³த்தா பாரிஸுத்³தி⁴உபோஸத²ங் காதுங் ந வட்டதி. அவுட்டி²தாயாதிஆதீ³னிபி பாதிமொக்க²ஸ்ஸ நிட்டி²தகாலமேவ பரிஸாய விஸேஸெத்வா வத³தி. ஸமஸமா வாதி புரிமேஹி ஸமபரிமாணா. தோ²கதரா வாதி புரிமேஹி தோ²கதரபரிமாணா. ஏதேன ப³ஹுதரேஸு ஆக³தேஸு புன பாதிமொக்க²ங் உத்³தி³ஸிதப்³ப³ங், ந பாரிஸுத்³தி⁴உபோஸதோ² காதப்³போ³தி த³ஸ்ஸேதி.
Ṭhapetvā pana pavāraṇādivasaṃ aññasmiṃ kāleti aññasmiṃ uposathadivase. Uddiṭṭhamatte pātimokkheti ‘‘pariyositamatte uddissamāne’’ti apariyosite āgate sati avasesassa pātimokkhassa sotabbattā pārisuddhiuposathaṃ kātuṃ na vaṭṭati. Avuṭṭhitāyātiādīnipi pātimokkhassa niṭṭhitakālameva parisāya visesetvā vadati. Samasamā vāti purimehi samaparimāṇā. Thokatarā vāti purimehi thokataraparimāṇā. Etena bahutaresu āgatesu puna pātimokkhaṃ uddisitabbaṃ, na pārisuddhiuposatho kātabboti dasseti.
ஏகங்ஸங் உத்தராஸங்க³ங் கரித்வாதி ஏகஸ்மிங் அங்ஸே ஸாது⁴கங் உத்தராஸங்க³ங் கரித்வாதி அத்தோ². ஸுத்தனிபாதட்ட²கதா²யங் (ஸு॰ நி॰ அட்ட²॰ 2.345) பன ‘‘ஏகங்ஸங் சீவரங் கத்வாதி எத்த² பன புன ஸண்டா²பனேன ஏவங் வுத்தங். ஏகங்ஸந்தி ச வாமங்ஸங் பாருபித்வா டி²தஸ்ஸேதங் அதி⁴வசனங். யதோ யதா² வாமங்ஸங் பாருபித்வா டி²தங் ஹோதி, ததா² சீவரங் கத்வாதி ஏவமஸ்ஸ அத்தோ² வேதி³தப்³போ³’’தி வுத்தங். அஞ்ஜலிங் பக்³க³ஹெத்வாதி த³ஸனக²ஸமோதா⁴னஸமுஜ்ஜலங் அஞ்ஜலிங் உக்கி²பித்வா. ஸசே பன தத்த² பாரிவாஸிகோபி அத்தி², ஸங்க⁴னவகட்டா²னே நிஸீதி³த்வா தத்தே²வ நிஸின்னேன அத்தனோ பாளியா பாரிஸுத்³தி⁴உபோஸதோ² காதப்³போ³. பாதிமொக்கே² பன உத்³தி³ஸியமானே பாளியா அனிஸீதி³த்வா பாளிங் விஹாய ஹத்த²பாஸங் அமுஞ்சந்தேன நிஸீதி³தப்³ப³ங். பவாரணாயபி ஏஸேவ நயோ.
Ekaṃsaṃuttarāsaṅgaṃ karitvāti ekasmiṃ aṃse sādhukaṃ uttarāsaṅgaṃ karitvāti attho. Suttanipātaṭṭhakathāyaṃ (su. ni. aṭṭha. 2.345) pana ‘‘ekaṃsaṃ cīvaraṃ katvāti ettha pana puna saṇṭhāpanena evaṃ vuttaṃ. Ekaṃsanti ca vāmaṃsaṃ pārupitvā ṭhitassetaṃ adhivacanaṃ. Yato yathā vāmaṃsaṃ pārupitvā ṭhitaṃ hoti, tathā cīvaraṃ katvāti evamassa attho veditabbo’’ti vuttaṃ. Añjaliṃ paggahetvāti dasanakhasamodhānasamujjalaṃ añjaliṃ ukkhipitvā. Sace pana tattha pārivāsikopi atthi, saṅghanavakaṭṭhāne nisīditvā tattheva nisinnena attano pāḷiyā pārisuddhiuposatho kātabbo. Pātimokkhe pana uddisiyamāne pāḷiyā anisīditvā pāḷiṃ vihāya hatthapāsaṃ amuñcantena nisīditabbaṃ. Pavāraṇāyapi eseva nayo.
ஸப்³ப³ங் புப்³ப³கரணீயந்தி ஸம்மஜ்ஜனாதி³னவவித⁴ங் புப்³ப³கிச்சங். இமினா ப³ஹூனங் வஸனட்டா²னேயேவ உபோஸத²தி³வஸே புப்³ப³கிச்சங் காதப்³ப³ங் ந ஹோதி, அத² கோ² ஏகஸ்ஸ வஸனட்டா²னேபி காதப்³ப³ங்யேவாதி த³ஸ்ஸேதி. யதா² ச ஸப்³போ³ ஸங்கோ⁴ ஸபா⁴கா³பத்திங் ஆபஜ்ஜித்வா ‘‘ஸுணாது மே, ப⁴ந்தே ஸங்கோ⁴…பே॰… படிகரிஸ்ஸதீ’’தி (மஹாவ॰ 171) ஞத்திங் ட²பெத்வா உபோஸத²ங் காதுங் லப⁴தி, ஏவமெத்தா²பி தீஹி ‘‘ஸுணந்து மே, ஆயஸ்மந்தா, இமே பி⁴க்கூ² ஸபா⁴க³ங் ஆபத்திங் ஆபன்னா, யதா³ அஞ்ஞங் பி⁴க்கு²ங் ஸுத்³த⁴ங் அனாபத்திகங் பஸ்ஸிஸ்ஸந்தி, ததா³ தஸ்ஸ ஸந்திகே தங் ஆபத்திங் படிகரிஸ்ஸந்தீ’’தி க³ணஞத்திங் ட²பெத்வா, த்³வீஹிபி ‘‘அஞ்ஞங் ஸுத்³த⁴ங் பஸ்ஸித்வா படிகரிஸ்ஸாமா’’தி வத்வா உபோஸத²ங் காதுங் வட்டதி. ஏகேனபி ‘‘பரிஸுத்³த⁴ங் லபி⁴த்வா படிகரிஸ்ஸாமீ’’தி ஆபோ⁴க³ங் கத்வா காதுங் வட்டதி.
Sabbaṃ pubbakaraṇīyanti sammajjanādinavavidhaṃ pubbakiccaṃ. Iminā bahūnaṃ vasanaṭṭhāneyeva uposathadivase pubbakiccaṃ kātabbaṃ na hoti, atha kho ekassa vasanaṭṭhānepi kātabbaṃyevāti dasseti. Yathā ca sabbo saṅgho sabhāgāpattiṃ āpajjitvā ‘‘suṇātu me, bhante saṅgho…pe… paṭikarissatī’’ti (mahāva. 171) ñattiṃ ṭhapetvā uposathaṃ kātuṃ labhati, evametthāpi tīhi ‘‘suṇantu me, āyasmantā, ime bhikkhū sabhāgaṃ āpattiṃ āpannā, yadā aññaṃ bhikkhuṃ suddhaṃ anāpattikaṃ passissanti, tadā tassa santike taṃ āpattiṃ paṭikarissantī’’ti gaṇañattiṃ ṭhapetvā, dvīhipi ‘‘aññaṃ suddhaṃ passitvā paṭikarissāmā’’ti vatvā uposathaṃ kātuṃ vaṭṭati. Ekenapi ‘‘parisuddhaṃ labhitvā paṭikarissāmī’’ti ābhogaṃ katvā kātuṃ vaṭṭati.
தத³ஹூதி தஸ்மிங் அஹு, தஸ்மிங் தி³வஸேதி அத்தோ². நானாஸங்வாஸகேஹீதி லத்³தி⁴னானாஸங்வாஸகேஹி. அனாவாஸோ நாம நவகம்மஸாலாதி³கோ யோ கோசி பதே³ஸோ . அஞ்ஞத்ர ஸங்கே⁴னாதி ஸங்க⁴ப்பஹோனகேஹி பி⁴க்கூ²ஹி வினா. அஞ்ஞத்ர அந்தராயாதி புப்³பே³ வுத்தங் த³ஸவித⁴மந்தராயங் வினா. ஸப்³ப³ந்திமேன பன பரிச்சே²தே³ன அத்தசதுத்தே² வா அந்தராயே வா ஸதி க³ந்துங் வட்டதி. யதா² ச ஆவாஸாத³யோ ந க³ந்தப்³பா³, ஏவங் ஸசே விஹாரே உபோஸத²ங் கரொந்தி, உபோஸதா²தி⁴ட்டா²னத்த²ங் ஸீமாபி நதீ³பி ந க³ந்தப்³பா³. ஸசே பனெத்த² கோசி பி⁴க்கு² ஹோதி, தஸ்ஸ ஸந்திகங் க³ந்துங் வட்டதி, விஸ்ஸட்ட²உபோஸதா²பி ஆவாஸா க³ந்துங் வட்டதி. ஏவங் க³தோ அதி⁴ட்டா²தும்பி லப⁴தி. ஆரஞ்ஞகேனபி பி⁴க்கு²னா உபோஸத²தி³வஸே கா³மே பிண்டா³ய சரித்வா அத்தனோ விஹாரமேவ ஆக³ந்தப்³ப³ங். ஸசே அஞ்ஞங் விஹாரங் ஓக்கமதி, தத்த² உபோஸத²ங் கத்வாவ ஆக³ந்தப்³ப³ங், அகத்வா ஆக³ந்துங் ந வட்டதி, யங் ஜஞ்ஞா ‘‘அஜ்ஜேவ தத்த² க³ந்துங் ஸக்கோமீ’’தி ஏவரூபோ பன ஆவாஸோ க³ந்தப்³போ³. தத்த² பி⁴க்கூ²ஹி ஸத்³தி⁴ங் உபோஸத²ங் கரொந்தேனபி ஹி இமினா நேவ உபோஸத²ந்தராயோ கதோ ப⁴விஸ்ஸதீதி.
Tadahūti tasmiṃ ahu, tasmiṃ divaseti attho. Nānāsaṃvāsakehīti laddhinānāsaṃvāsakehi. Anāvāso nāma navakammasālādiko yo koci padeso . Aññatra saṅghenāti saṅghappahonakehi bhikkhūhi vinā. Aññatra antarāyāti pubbe vuttaṃ dasavidhamantarāyaṃ vinā. Sabbantimena pana paricchedena attacatutthe vā antarāye vā sati gantuṃ vaṭṭati. Yathā ca āvāsādayo na gantabbā, evaṃ sace vihāre uposathaṃ karonti, uposathādhiṭṭhānatthaṃ sīmāpi nadīpi na gantabbā. Sace panettha koci bhikkhu hoti, tassa santikaṃ gantuṃ vaṭṭati, vissaṭṭhauposathāpi āvāsā gantuṃ vaṭṭati. Evaṃ gato adhiṭṭhātumpi labhati. Āraññakenapi bhikkhunā uposathadivase gāme piṇḍāya caritvā attano vihārameva āgantabbaṃ. Sace aññaṃ vihāraṃ okkamati, tattha uposathaṃ katvāva āgantabbaṃ, akatvā āgantuṃ na vaṭṭati, yaṃ jaññā ‘‘ajjeva tattha gantuṃ sakkomī’’ti evarūpo pana āvāso gantabbo. Tattha bhikkhūhi saddhiṃ uposathaṃ karontenapi hi iminā neva uposathantarāyo kato bhavissatīti.
170. ப³ஹி உபோஸத²ங் கத்வா ஆக³தேனாதி நதி³யா வா ஸீமாய வா யத்த² கத்த²சி உபோஸத²ங் கத்வா ஆக³தேன ச²ந்தோ³ தா³தப்³போ³, ‘‘கதோ மயா உபோஸதோ²’’தி அச்சி²துங் ந லப⁴தீதி அதி⁴ப்பாயோ. கிச்சபஸுதோ வாதி கி³லானுபட்டா²னாதி³கிச்சபஸுதோ வா. ஸங்கோ⁴ நப்பஹோதீதி த்³வின்னங் த்³வின்னங் அந்தரா ஹத்த²பாஸங் அவிஜஹித்வா படிபாடியா டா²துங் நப்பஹோதி.
170.Bahi uposathaṃ katvā āgatenāti nadiyā vā sīmāya vā yattha katthaci uposathaṃ katvā āgatena chando dātabbo, ‘‘kato mayā uposatho’’ti acchituṃ na labhatīti adhippāyo. Kiccapasuto vāti gilānupaṭṭhānādikiccapasuto vā. Saṅgho nappahotīti dvinnaṃ dvinnaṃ antarā hatthapāsaṃ avijahitvā paṭipāṭiyā ṭhātuṃ nappahoti.
‘‘அத⁴ம்மேன வக்³க³’’ந்தி எத்த² ஏகஸீமாய சதூஸு பி⁴க்கூ²ஸு விஜ்ஜமானேஸு பாதிமொக்கு²த்³தே³ஸோவ அனுஞ்ஞாதோ, தீஸு த்³வீஸு ச பாரிஸுத்³தி⁴உபோஸதோ²வ, இத⁴ பன ததா² அகதத்தா ‘‘அத⁴ம்மேனா’’தி வுத்தங். யஸ்மா பன ச²ந்த³பாரிஸுத்³தி⁴ ஸங்கே⁴ ஏவ ஆக³ச்ச²தி, ந க³ணே ந புக்³க³லே, தஸ்மா ‘‘வக்³க³’’ந்தி வுத்தங். ஸசே பன த்³வே ஸங்கா⁴ ஏகஸீமாயங் அஞ்ஞமஞ்ஞங் ச²ந்த³ங் ஆஹரித்வா ஏகஸ்மிங் க²ணே விஸுங் ஸங்க⁴கம்மங் கரொந்தி, எத்த² கத²ந்தி? கேசி பன ‘‘தங் வட்டதீ’’தி வத³ந்தி, தங் ந க³ஹேதப்³ப³ங் வக்³க³கம்மத்தா. வக்³க³கம்மங் கரொந்தானஞ்ஹி ச²ந்த³பாரிஸுத்³தி⁴ அஞ்ஞத்த² ந க³ச்ச²தி ததா² வசனாபா⁴வா, விஸுங் விஸுங் கம்மகரணத்த²மேவ ஸீமாய அனுஞ்ஞாதத்தா சாதி க³ஹேதப்³ப³ங். விஹாரஸீமாய பன ஸங்கே⁴ விஜ்ஜமானேபி கேனசி பச்சயேன க²ண்ட³ஸீமாய தீஸு, த்³வீஸு வா பாரிஸுத்³தி⁴உபோஸத²ங் கரொந்தேஸு கம்மங் த⁴ம்மேன ஸமக்³க³மேவ பி⁴ன்னஸீமட்ட²த்தாதி த³ட்ட²ப்³ப³ங்.
‘‘Adhammena vagga’’nti ettha ekasīmāya catūsu bhikkhūsu vijjamānesu pātimokkhuddesova anuññāto, tīsu dvīsu ca pārisuddhiuposathova, idha pana tathā akatattā ‘‘adhammenā’’ti vuttaṃ. Yasmā pana chandapārisuddhi saṅghe eva āgacchati, na gaṇe na puggale, tasmā ‘‘vagga’’nti vuttaṃ. Sace pana dve saṅghā ekasīmāyaṃ aññamaññaṃ chandaṃ āharitvā ekasmiṃ khaṇe visuṃ saṅghakammaṃ karonti, ettha kathanti? Keci pana ‘‘taṃ vaṭṭatī’’ti vadanti, taṃ na gahetabbaṃ vaggakammattā. Vaggakammaṃ karontānañhi chandapārisuddhi aññattha na gacchati tathā vacanābhāvā, visuṃ visuṃ kammakaraṇatthameva sīmāya anuññātattā cāti gahetabbaṃ. Vihārasīmāya pana saṅghe vijjamānepi kenaci paccayena khaṇḍasīmāya tīsu, dvīsu vā pārisuddhiuposathaṃ karontesu kammaṃ dhammena samaggameva bhinnasīmaṭṭhattāti daṭṭhabbaṃ.
‘‘அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ங் தெ³ந்தேன ச²ந்த³ம்பி தா³துங், ஸந்தி ஸங்க⁴ஸ்ஸ கரணீய’’ந்தி (மஹாவ॰ 165) வுத்தத்தா ப⁴க³வதோ ஆணங் கரொந்தேன ‘‘ச²ந்த³ங் த³ம்மீ’’தி வுத்தங். ‘‘ச²ந்த³ஹாரகோ சே, பி⁴க்க²வே, தி³ன்னே ச²ந்தே³ தத்தே²வ பக்கமதி, அஞ்ஞஸ்ஸ தா³தப்³போ³ ச²ந்தோ³’’திஆதி³வசனதோ (மஹாவ॰ 165) புன அத்தனோ ச²ந்த³தா³னபரிஸ்ஸமவினோத³னத்த²ங் ‘‘ச²ந்த³ங் மே ஹரா’’தி வுத்தங். ‘‘ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ ஸஞ்சிச்ச நாரோசேதி, ஆஹடோ ஹோதி ச²ந்தோ³, ச²ந்த³ஹாரகஸ்ஸ ஆபத்தி து³க்கடஸ்ஸா’’தி வுத்தத்தா து³க்கடதோ தங் மோசேதுங் ‘‘ச²ந்த³ங் மே ஆரோசேஹீ’’தி வுத்தங். காயேன வா வாசாய வா உப⁴யேன வா விஞ்ஞாபேதப்³போ³தி மனஸாவ அசிந்தெத்வா காயப்பயோக³ங் கரொந்தேன யேன கேனசி அங்க³பச்சங்கே³ன வா, வாசங் பன நிச்சா²ரேதுங் ஸக்கொந்தேன ததே²வ வாசாய வா, உப⁴யதா²பி ஸக்கொந்தேன காயவாசாஹி வா விஞ்ஞாபேதப்³போ³, ஜானாபேதப்³போ³தி அத்தோ². ‘‘அயமத்தோ²’’திவசனதோ பன யாய காயசிபி பா⁴ஸாய விஞ்ஞாபேதுங் வட்டதி.
‘‘Anujānāmi, bhikkhave, tadahuposathe pārisuddhiṃ dentena chandampi dātuṃ, santi saṅghassa karaṇīya’’nti (mahāva. 165) vuttattā bhagavato āṇaṃ karontena ‘‘chandaṃ dammī’’ti vuttaṃ. ‘‘Chandahārako ce, bhikkhave, dinne chande tattheva pakkamati, aññassa dātabbo chando’’tiādivacanato (mahāva. 165) puna attano chandadānaparissamavinodanatthaṃ ‘‘chandaṃ me harā’’ti vuttaṃ. ‘‘Chandahārako ce, bhikkhave, dinne chande saṅghappatto sañcicca nāroceti, āhaṭo hoti chando, chandahārakassa āpatti dukkaṭassā’’ti vuttattā dukkaṭato taṃ mocetuṃ ‘‘chandaṃ me ārocehī’’ti vuttaṃ. Kāyena vā vācāya vā ubhayena vā viññāpetabboti manasāva acintetvā kāyappayogaṃ karontena yena kenaci aṅgapaccaṅgena vā, vācaṃ pana nicchāretuṃ sakkontena tatheva vācāya vā, ubhayathāpi sakkontena kāyavācāhi vā viññāpetabbo, jānāpetabboti attho. ‘‘Ayamattho’’tivacanato pana yāya kāyacipi bhāsāya viññāpetuṃ vaṭṭati.
பாரிஸுத்³தி⁴தா³னேபி ச²ந்த³தா³னே வுத்தஸதி³ஸோவ வினிச்ச²யோ, தங் பன தெ³ந்தேன பட²மங் ஸந்தீ ஆபத்தி தே³ஸேதப்³பா³. ந ஹி ஸாபத்திகோ ஸமானோ ‘‘பாரிஸுத்³தி⁴ங் த³ம்மி, பாரிஸுத்³தி⁴ங் மே ஹர, பாரிஸுத்³தி⁴ங் மே ஆரோசேஹீ’’தி வத்துமரஹதி. ‘‘ஸந்தி ஸங்க⁴ஸ்ஸ கரணீயானீ’’தி வத்தப்³பே³ வசனவிபல்லாஸேன ‘‘ஸந்தி ஸங்க⁴ஸ்ஸ கரணீய’’ந்தி வுத்தங். தேஸஞ்ச அத்தனோ ச ச²ந்த³பாரிஸுத்³தி⁴ங் தே³தீதி எத்த² ச²ந்தோ³ ச பாரிஸுத்³தி⁴ ச ச²ந்த³பாரிஸுத்³தி⁴ ச ச²ந்த³பாரிஸுத்³தி⁴, தங் தே³தீதி ஸரூபேகஸேஸேன அத்தோ² த³ட்ட²ப்³போ³. இதராதி அஞ்ஞேஸங் ச²ந்த³பாரிஸுத்³தி⁴. பி³ளாலஸங்க²லிகா ச²ந்த³பாரிஸுத்³தீ⁴தி எத்த² பி³ளாலஸங்க²லிகா நாம பி³ளாலப³ந்த⁴னங். தத்த² ஹி ஸங்க²லிகாய பட²மவலயங் து³தியவலயங்யேவ பாபுணாதி, ந ததியங், ஏவமயம்பி ச²ந்த³பாரிஸுத்³தி⁴ தா³யகேன யஸ்ஸ தி³ன்னா, ததோ அஞ்ஞத்த² ந க³ச்ச²தி, தஸ்மா ஸா பி³ளாலஸங்க²லிகஸதி³ஸத்தா ‘‘பி³ளாலஸங்க²லிகா’’தி வுத்தா. பி³ளாலஸங்க²லிகாக்³க³ஹணஞ்செத்த² யாஸங் காஸஞ்சி ஸங்க²லிகானங் உபலக்க²ணமத்தந்தி த³ட்ட²ப்³ப³ங்.
Pārisuddhidānepi chandadāne vuttasadisova vinicchayo, taṃ pana dentena paṭhamaṃ santī āpatti desetabbā. Na hi sāpattiko samāno ‘‘pārisuddhiṃ dammi, pārisuddhiṃ me hara, pārisuddhiṃ me ārocehī’’ti vattumarahati. ‘‘Santi saṅghassa karaṇīyānī’’ti vattabbe vacanavipallāsena ‘‘santi saṅghassa karaṇīya’’nti vuttaṃ. Tesañca attano ca chandapārisuddhiṃ detīti ettha chando ca pārisuddhi ca chandapārisuddhi ca chandapārisuddhi, taṃ detīti sarūpekasesena attho daṭṭhabbo. Itarāti aññesaṃ chandapārisuddhi. Biḷālasaṅkhalikā chandapārisuddhīti ettha biḷālasaṅkhalikā nāma biḷālabandhanaṃ. Tattha hi saṅkhalikāya paṭhamavalayaṃ dutiyavalayaṃyeva pāpuṇāti, na tatiyaṃ, evamayampi chandapārisuddhi dāyakena yassa dinnā, tato aññattha na gacchati, tasmā sā biḷālasaṅkhalikasadisattā ‘‘biḷālasaṅkhalikā’’ti vuttā. Biḷālasaṅkhalikāggahaṇañcettha yāsaṃ kāsañci saṅkhalikānaṃ upalakkhaṇamattanti daṭṭhabbaṃ.
173. பவாரணாதா³னேபி ஏஸேவ நயோ. அயங் பன விஸேஸோ – தத்த² ‘‘ச²ந்த³ங் மே ஆரோசேஹீ’’தி, இத⁴ பன ‘‘மமத்தா²ய பவாரேஹீ’’தி. தத்த² ச²ந்த³ஹாரகே ஸங்க⁴ஸ்ஸ ஹத்த²ங் உபக³தமத்தேயேவ ஆக³தா ஹோதி. இத⁴ பன ஏவங் தி³ன்னாய பவாரணாய பவாரணாஹாரகேன ஸங்க⁴ங் உபஸங்கமித்வா ஏவங் பவாரேதப்³ப³ங் ‘‘திஸ்ஸோ, ப⁴ந்தே, பி⁴க்கு²…பே॰… படிகரிஸ்ஸாமீ’’தி. விமதிவினோத³னியங் ‘‘ஏவமேதங் தா⁴ரயாமி, ஸுதா கோ² பனாயஸ்மந்தேஹீதி எத்த² ‘ஏவமேதங் தா⁴ரயாமீ’தி வத்வா உத்³தி³ட்ட²ங் கோ² ஆயஸ்மந்தோ நிதா³னங், ஸுதா கோ² பனாயஸ்மந்தேஹி சத்தாரோ பாராஜிகா த⁴ம்மா’’திஆதி³னா வத்தப்³ப³ங். மாதிகாட்ட²கதா²யஞ்ஹி ஏவமேவ வுத்தங். ஸுதேனாதி ஸுதபதே³ன.
173. Pavāraṇādānepi eseva nayo. Ayaṃ pana viseso – tattha ‘‘chandaṃ me ārocehī’’ti, idha pana ‘‘mamatthāya pavārehī’’ti. Tattha chandahārake saṅghassa hatthaṃ upagatamatteyeva āgatā hoti. Idha pana evaṃ dinnāya pavāraṇāya pavāraṇāhārakena saṅghaṃ upasaṅkamitvā evaṃ pavāretabbaṃ ‘‘tisso, bhante, bhikkhu…pe… paṭikarissāmī’’ti. Vimativinodaniyaṃ ‘‘evametaṃ dhārayāmi, sutā kho panāyasmantehīti ettha ‘evametaṃ dhārayāmī’ti vatvā uddiṭṭhaṃ kho āyasmanto nidānaṃ, sutā kho panāyasmantehi cattāro pārājikā dhammā’’tiādinā vattabbaṃ. Mātikāṭṭhakathāyañhi evameva vuttaṃ. Sutenāti sutapadena.
174. நிதா³னுத்³தே³ஸே அனிட்டி²தே பாதிமொக்க²ங் நித்³தி³ட்ட²ங் நாம ந ஹோதீதி ஆஹ ‘‘து³தியாதீ³ஸு உத்³தே³ஸேஸூ’’திஆதி³.
174. Nidānuddese aniṭṭhite pātimokkhaṃ niddiṭṭhaṃ nāma na hotīti āha ‘‘dutiyādīsu uddesesū’’tiādi.
175. தீஹிபி விதீ⁴ஹீதி ஓஸாரணகத²னஸரப⁴ஞ்ஞேஹி. எத்த² ச அத்த²ங் ப⁴ணிதுகாமதாய வா ப⁴ணாபேதுகாமதாய வா ஸுத்தஸ்ஸ ஓதாரணங் ஓஸாரணங் நாம. தஸ்ஸேவ அத்த²ப்பகாஸனா கத²னங் நாம. கேவலங் பாட²ஸ்ஸேவ ஸரேன ப⁴ணனங் ஸரப⁴ஞ்ஞங் நாம. ஸஜ்ஜா²யங் அதி⁴ட்ட²ஹித்வாதி ‘‘ஸஜ்ஜா²யங் கரோமீ’’தி சித்தங் உப்பாதெ³த்வா. ஓஸாரெத்வா பன கதெ²ந்தேனாதி ஸயமேவ பாட²ங் வத்வா பச்சா² அத்த²ங் கதெ²ந்தேன. நவவித⁴ந்தி ஸங்க⁴க³ணபுக்³க³லேஸு தயோ, ஸுத்துத்³தே³ஸபாரிஸுத்³தி⁴அதி⁴ட்டா²னவஸேன தயோ, சாதுத்³த³ஸீபன்னரஸீஸாமக்³கி³வஸேன தயோதி நவவித⁴ங். சதுப்³பி³த⁴ந்தி அத⁴ம்மேனவக்³கா³தி³ சதுப்³பி³த⁴ங். து³வித⁴ந்தி பி⁴க்கு²பி⁴க்கு²னீனங் பாதிமொக்க²வஸேன து³வித⁴ங் பாதிமொக்க²ங். நவவித⁴ந்தி பி⁴க்கூ²னங் பஞ்ச, பி⁴க்கு²னீனங் சத்தாரோதி நவவித⁴ங் பாதிமொக்கு²த்³தே³ஸங். கதிமீதி கதிஸத்³தா³பெக்க²ங் இத்தி²லிங்க³ங் த³ட்ட²ப்³ப³ங்.
175.Tīhipi vidhīhīti osāraṇakathanasarabhaññehi. Ettha ca atthaṃ bhaṇitukāmatāya vā bhaṇāpetukāmatāya vā suttassa otāraṇaṃ osāraṇaṃ nāma. Tasseva atthappakāsanā kathanaṃ nāma. Kevalaṃ pāṭhasseva sarena bhaṇanaṃ sarabhaññaṃ nāma. Sajjhāyaṃ adhiṭṭhahitvāti ‘‘sajjhāyaṃ karomī’’ti cittaṃ uppādetvā. Osāretvā pana kathentenāti sayameva pāṭhaṃ vatvā pacchā atthaṃ kathentena. Navavidhanti saṅghagaṇapuggalesu tayo, suttuddesapārisuddhiadhiṭṭhānavasena tayo, cātuddasīpannarasīsāmaggivasena tayoti navavidhaṃ. Catubbidhanti adhammenavaggādi catubbidhaṃ. Duvidhanti bhikkhubhikkhunīnaṃ pātimokkhavasena duvidhaṃ pātimokkhaṃ. Navavidhanti bhikkhūnaṃ pañca, bhikkhunīnaṃ cattāroti navavidhaṃ pātimokkhuddesaṃ. Katimīti katisaddāpekkhaṃ itthiliṅgaṃ daṭṭhabbaṃ.
உதுவஸ்ஸேயேவாதி ஹேமந்தகி³ம்ஹேஸுயேவ. விஞ்ஞாபேதீதி எத்த² மனஸா சிந்தெத்வா காயவிகாரகரணமேவ விஞ்ஞாபனந்தி த³ட்ட²ப்³ப³ங். பாளியங் அஞ்ஞஸ்ஸ தா³தப்³பா³ பாரிஸுத்³தீ⁴தி பாரிஸுத்³தி⁴தா³யகேன புன அஞ்ஞஸ்ஸ பி⁴க்கு²னோ ஸந்திகே தா³தப்³பா³. ‘‘பூ⁴தங் ஏவ ஸாமணேரபா⁴வங் ஆரோசேதீ’’தி வுத்தத்தா ஊனவீஸதிவஸ்ஸகாலே உபஸம்பன்னஸ்ஸ, அந்திமவத்து²அஜ்ஜா²பன்னஸிக்கா²பச்சக்கா²தகாதீ³னங் வா யாவ பி⁴க்கு²படிஞ்ஞா வட்டதி, தாவ தேஹி ஆஹடாபி ச²ந்த³பாரிஸுத்³தி⁴ ஆக³ச்ச²தி. யதா³ பன தே அத்தனோ ஸாமணேராதி³பா⁴வங் படிஜானந்தி, ததோ பட்டா²ய நாக³ச்ச²தீதி த³ஸ்ஸிதந்தி த³ட்ட²ப்³ப³ங். பாளியம்பி (மஹாவ॰ 164) ஹி ‘‘தி³ன்னாய பாரிஸுத்³தி⁴யா ஸங்க⁴ப்பத்தோ விப்³ப⁴மதி…பே॰… பண்ட³கோ படிஜானாதி, திரச்சா²னக³தோ படிஜானாதி, உப⁴தொப்³யஞ்ஜனகோ படிஜானாதி, ஆஹடா ஹோதி பாரிஸுத்³தீ⁴’’தி வுத்தத்தா பண்ட³காதீ³னங் பி⁴க்கு²படிஞ்ஞாய வத்தமானகாலேஸு பன ச²ந்த³பாரிஸுத்³தி⁴யாவ ஆக³மனங் ஸித்³த⁴மேவ. தேனாஹ ‘‘ஏஸ நயோ ஸப்³ப³த்தா²’’தி. உம்மத்தககி²த்தசித்தவேத³னாட்டானங் பன பகதத்தா அந்தராமக்³கே³ உம்மத்தகாதி³பா⁴வே படிஞ்ஞாதேபி தேஸங் ஸங்க⁴ப்பத்தமத்தேனேவ ச²ந்தா³தி³ ஆக³ச்ச²தீதி த³ஸ்ஸேதி.
Utuvasseyevāti hemantagimhesuyeva. Viññāpetīti ettha manasā cintetvā kāyavikārakaraṇameva viññāpananti daṭṭhabbaṃ. Pāḷiyaṃ aññassa dātabbā pārisuddhīti pārisuddhidāyakena puna aññassa bhikkhuno santike dātabbā. ‘‘Bhūtaṃ eva sāmaṇerabhāvaṃ ārocetī’’ti vuttattā ūnavīsativassakāle upasampannassa, antimavatthuajjhāpannasikkhāpaccakkhātakādīnaṃ vā yāva bhikkhupaṭiññā vaṭṭati, tāva tehi āhaṭāpi chandapārisuddhi āgacchati. Yadā pana te attano sāmaṇerādibhāvaṃ paṭijānanti, tato paṭṭhāya nāgacchatīti dassitanti daṭṭhabbaṃ. Pāḷiyampi (mahāva. 164) hi ‘‘dinnāya pārisuddhiyā saṅghappatto vibbhamati…pe… paṇḍako paṭijānāti, tiracchānagato paṭijānāti, ubhatobyañjanako paṭijānāti, āhaṭā hoti pārisuddhī’’ti vuttattā paṇḍakādīnaṃ bhikkhupaṭiññāya vattamānakālesu pana chandapārisuddhiyāva āgamanaṃ siddhameva. Tenāha ‘‘esa nayo sabbatthā’’ti. Ummattakakhittacittavedanāṭṭānaṃ pana pakatattā antarāmagge ummattakādibhāve paṭiññātepi tesaṃ saṅghappattamatteneva chandādi āgacchatīti dasseti.
பி⁴க்கூ²னங் ஹத்த²பாஸந்தி இமினா க³ணபுக்³க³லேஸு ச²ந்த³பாரிஸுத்³தி⁴யா அனாக³மனங் த³ஸ்ஸேதி. ‘‘ஸங்க⁴ப்பத்தோ’’தி ஹி பாளியங் (மஹாவ॰ 165) வுத்தங். ஸங்க⁴ஸன்னிபாததோ பட²மங் காதப்³ப³ங் புப்³ப³கரணங் ஸங்க⁴ஸன்னிபாதே காதப்³ப³ங் புப்³ப³கிச்சந்தி த³ட்ட²ப்³ப³ங். பாளியங் ‘‘நோ சே அதி⁴ட்ட²ஹெய்ய, ஆபத்தி து³க்கடஸ்ஸா’’தி எத்த² அஸஞ்சிச்ச அஸ்ஸதியா அனாபத்தி. யதா² செத்த², ஏவங் உபரிபி, யத்த² பன அசித்தகாபத்தி அத்தி², தத்த² வக்கா²ம. பஞ்ஞத்தங் ஹோதீதி இமினா ந ஸாபத்திகேன உபோஸதோ² காதப்³போ³தி விஸுங் படிக்கே²பாபா⁴வேபி யதா²வுத்தஸுத்தஸாமத்தி²யதோ பஞ்ஞத்தமேவாதி த³ஸ்ஸேதி. இமினா ஏவ நயேன ‘‘அட்டா²னமேதங், பி⁴க்க²வே, அனவகாஸோ, யங் ததா²க³தோ அபரிஸுத்³தா⁴ய பரிஸாய உபோஸத²ங் கரெய்ய, பாதிமொக்க²ங் உத்³தி³ஸெய்யா’’திஆதி³ஸுத்தனயதோவ (அ॰ நி॰ 8.20; உதா³॰ 45; சூளவ॰ 386) அலஜ்ஜீஹி ஸத்³தி⁴ங் உபோஸத²கரணம்பி படிக்கி²த்தமேவ அலஜ்ஜீனிக்³க³ஹத்த²த்தா ஸப்³ப³ஸிக்கா²பதா³னந்தி த³ட்ட²ப்³ப³ங். பாரிஸுத்³தி⁴தா³னபஞ்ஞாபனேனாதி இமினா ஸாபத்திகேன பாரிஸுத்³தி⁴பி ந தா³தப்³பா³தி தீ³பிதங் ஹோதி.
Bhikkhūnaṃhatthapāsanti iminā gaṇapuggalesu chandapārisuddhiyā anāgamanaṃ dasseti. ‘‘Saṅghappatto’’ti hi pāḷiyaṃ (mahāva. 165) vuttaṃ. Saṅghasannipātato paṭhamaṃ kātabbaṃ pubbakaraṇaṃ saṅghasannipāte kātabbaṃ pubbakiccanti daṭṭhabbaṃ. Pāḷiyaṃ ‘‘no ce adhiṭṭhaheyya, āpatti dukkaṭassā’’ti ettha asañcicca assatiyā anāpatti. Yathā cettha, evaṃ uparipi, yattha pana acittakāpatti atthi, tattha vakkhāma. Paññattaṃ hotīti iminā na sāpattikena uposatho kātabboti visuṃ paṭikkhepābhāvepi yathāvuttasuttasāmatthiyato paññattamevāti dasseti. Iminā eva nayena ‘‘aṭṭhānametaṃ, bhikkhave, anavakāso, yaṃ tathāgato aparisuddhāya parisāya uposathaṃ kareyya, pātimokkhaṃ uddiseyyā’’tiādisuttanayatova (a. ni. 8.20; udā. 45; cūḷava. 386) alajjīhi saddhiṃ uposathakaraṇampi paṭikkhittameva alajjīniggahatthattā sabbasikkhāpadānanti daṭṭhabbaṃ. Pārisuddhidānapaññāpanenāti iminā sāpattikena pārisuddhipi na dātabbāti dīpitaṃ hoti.
176. உபோ⁴பி து³க்கடந்தி எத்த² ஸபா⁴கா³பத்திபா⁴வங் அஜானித்வா கேவலங் ஆபத்தினாமேனேவ தே³ஸெந்தஸ்ஸ படிக்³க³ண்ஹந்தஸ்ஸ ச அசித்தகமேவ து³க்கடங் ஹோதீதி வத³ந்தி. யதா² ஸங்கோ⁴ ஸபா⁴கா³பத்திங் ஆபன்னோதி ஞத்திங் ட²பெத்வா உபோஸத²ங் காதுங் லப⁴தி, ஏவங் தயோபி ‘‘ஸுணந்து மே, ஆயஸ்மந்தா, இமே பி⁴க்கூ² ஸபா⁴க³ங் ஆபத்திங் ஆபன்னா’’திஆதி³னா வுத்தனயானுஸாரேனேவ க³ணஞத்திங் ட²பெத்வா த்³வீஹி அஞ்ஞமஞ்ஞங் ஆரோசெத்வா உபோஸத²ங் காதுங் வட்டதி. ஏகேன பன ஸாபத்திகேன தூ³ரங் க³ந்த்வாபி படிகாதுமேவ வட்டதி, அஸம்பாபுணந்தேன ‘‘பி⁴க்கூ² லபி⁴த்வா படிகரிஸ்ஸாமீ’’தி உபோஸதோ² காதப்³போ³, படிகரித்வா ச புன உபோஸதோ² காதப்³போ³ . கேனசி கரணீயேன க³ந்த்வாதி ஸீமாபரிச்சே²த³தோ ப³ஹிபூ⁴தங் கா³மங் வா அரஞ்ஞங் வா க³ந்த்வாதி அத்தோ². ஏதேனேவ உபோஸத²ஞத்தியா ட²பனகாலே ஸமக்³கா³ ஏவ தே ஞத்திங் ட²பேஸுந்தி ஸித்³த⁴ங். தேனேவ பாளியங் (மஹாவ॰ 172) ‘‘உத்³தி³ட்ட²ங் ஸுஉத்³தி³ட்ட²’’ந்தி ஸப்³ப³பன்னரஸகேஸுபி வுத்தங்.
176.Ubhopi dukkaṭanti ettha sabhāgāpattibhāvaṃ ajānitvā kevalaṃ āpattināmeneva desentassa paṭiggaṇhantassa ca acittakameva dukkaṭaṃ hotīti vadanti. Yathā saṅgho sabhāgāpattiṃ āpannoti ñattiṃ ṭhapetvā uposathaṃ kātuṃ labhati, evaṃ tayopi ‘‘suṇantu me, āyasmantā, ime bhikkhū sabhāgaṃ āpattiṃ āpannā’’tiādinā vuttanayānusāreneva gaṇañattiṃ ṭhapetvā dvīhi aññamaññaṃ ārocetvā uposathaṃ kātuṃ vaṭṭati. Ekena pana sāpattikena dūraṃ gantvāpi paṭikātumeva vaṭṭati, asampāpuṇantena ‘‘bhikkhū labhitvā paṭikarissāmī’’ti uposatho kātabbo, paṭikaritvā ca puna uposatho kātabbo . Kenaci karaṇīyena gantvāti sīmāparicchedato bahibhūtaṃ gāmaṃ vā araññaṃ vā gantvāti attho. Eteneva uposathañattiyā ṭhapanakāle samaggā eva te ñattiṃ ṭhapesunti siddhaṃ. Teneva pāḷiyaṃ (mahāva. 172) ‘‘uddiṭṭhaṃ suuddiṭṭha’’nti sabbapannarasakesupi vuttaṃ.
ஸசே பன வுட்³ட⁴தரோ ஹோதீதி பவாரணதா³யகோ பி⁴க்கு² வுட்³ட⁴தரோ ஹோதி. ஏவஞ்ஹி தேன தஸ்ஸத்தா²ய பவாரிதங் ஹோதீதி எத்த² ஏவங் தேன அப்பவாரிதேபி தஸ்ஸ ஸங்க⁴ப்பத்தமத்தேன ஸங்க⁴ஸ்ஸ பவாரணாகம்மங் ஸமக்³க³கம்மமேவ ஹோதீதி த³ட்ட²ப்³ப³ங். தேன ச பி⁴க்கு²னாதி பவாரணதா³யகேன பி⁴க்கு²னா. ப³ஹூபி ஸமானவஸ்ஸிகா ஏகதோ பவாரேதுங் லப⁴ந்தீதி ஏகஸ்மிங் ஸங்வச்ச²ரே லத்³து⁴பஸம்பத³தாய ஸமானுபஸம்பத³வஸ்ஸா ஸப்³பே³ ஏகதோ பவாரேதுங் லப⁴ந்தீதி அத்தோ².
Sace pana vuḍḍhataro hotīti pavāraṇadāyako bhikkhu vuḍḍhataro hoti. Evañhi tena tassatthāya pavāritaṃ hotīti ettha evaṃ tena appavāritepi tassa saṅghappattamattena saṅghassa pavāraṇākammaṃ samaggakammameva hotīti daṭṭhabbaṃ. Tena ca bhikkhunāti pavāraṇadāyakena bhikkhunā. Bahūpi samānavassikā ekato pavāretuṃ labhantīti ekasmiṃ saṃvacchare laddhupasampadatāya samānupasampadavassā sabbe ekato pavāretuṃ labhantīti attho.
எத்த² பன பண்டி³தேஹி சிந்தேதப்³ப³ங் விசாரேதப்³ப³ங் காரணங் அத்தி², கிங் பன தந்தி? இதா³னி பாதிமொக்கு²த்³தே³ஸகாலே –
Ettha pana paṇḍitehi cintetabbaṃ vicāretabbaṃ kāraṇaṃ atthi, kiṃ pana tanti? Idāni pātimokkhuddesakāle –
‘‘ஸம்மஜ்ஜனீ பதீ³போ ச, உத³கங் ஆஸனேன ச;
‘‘Sammajjanī padīpo ca, udakaṃ āsanena ca;
உபோஸத²ஸ்ஸ ஏதானி, புப்³ப³கரணந்தி வுச்சதி.
Uposathassa etāni, pubbakaraṇanti vuccati.
‘‘ச²ந்த³பாரிஸுத்³தி⁴உதுக்கா²னங், பி⁴க்கு²க³ணனா ச ஓவாதோ³;
‘‘Chandapārisuddhiutukkhānaṃ, bhikkhugaṇanā ca ovādo;
உபோஸத²ஸ்ஸ ஏதானி, புப்³ப³கிச்சந்தி வுச்சதி.
Uposathassa etāni, pubbakiccanti vuccati.
‘‘உபோஸதோ² யாவதிகா ச பி⁴க்கூ² கம்மப்பத்தா;
‘‘Uposatho yāvatikā ca bhikkhū kammappattā;
ஸபா⁴கா³பத்தியோ ச ந விஜ்ஜந்தி;
Sabhāgāpattiyo ca na vijjanti;
வஜ்ஜனீயா ச புக்³க³லா தஸ்மிங் ந ஹொந்தி;
Vajjanīyā ca puggalā tasmiṃ na honti;
பத்தகல்லந்தி வுச்சதீ’’தி. (மஹாவ॰ அட்ட²॰ 168) –
Pattakallanti vuccatī’’ti. (mahāva. aṭṭha. 168) –
இமா கா³தா²யோ த⁴ம்மஜ்ஜே²ஸகேன பாட²ங்யேவ ப⁴ணாபெத்வா பாதிமொக்கு²த்³தே³ஸகோ அத்த²ங் கதே²தி. ததோ புப்³ப³கரணபுப்³ப³கிச்சானி ஸம்மா நிட்டா²பெத்வா ‘‘தே³ஸிதாபத்திகஸ்ஸ ஸமக்³க³ஸ்ஸ பி⁴க்கு²ஸங்க⁴ஸ்ஸ அனுமதியா பாதிமொக்க²ங் உத்³தி³ஸிதுங் ஆராத⁴னங் கரோமா’’தி இமங் வாக்யங் பாட²மேவ அஜ்ஜே²ஸகேன ப⁴ணாபெத்வா அத்த²ங் அவத்வாவ ‘‘ஸாதூ⁴’’தி வத்வா பாதிமொக்க²ங் உத்³தி³ஸதி. பவாரணாயபி ஏஸேவ நயோ. ‘‘பவாரணாய ஏதானீ’’தி ச ‘‘பவாரணங் காது’’ந்தி ச இமானி பதா³னியேவ விஸிட்டா²னி.
Imā gāthāyo dhammajjhesakena pāṭhaṃyeva bhaṇāpetvā pātimokkhuddesako atthaṃ katheti. Tato pubbakaraṇapubbakiccāni sammā niṭṭhāpetvā ‘‘desitāpattikassa samaggassa bhikkhusaṅghassa anumatiyā pātimokkhaṃ uddisituṃ ārādhanaṃ karomā’’ti imaṃ vākyaṃ pāṭhameva ajjhesakena bhaṇāpetvā atthaṃ avatvāva ‘‘sādhū’’ti vatvā pātimokkhaṃ uddisati. Pavāraṇāyapi eseva nayo. ‘‘Pavāraṇāya etānī’’ti ca ‘‘pavāraṇaṃ kātu’’nti ca imāni padāniyeva visiṭṭhāni.
கிங் இமானி த⁴ம்மஜ்ஜே²ஸகஸ்ஸ வசனானி, உதா³ஹு பாதிமொக்கு²த்³தே³ஸகஸ்ஸாதி? கிஞ்செத்த² – யதி³ த⁴ம்மஜ்ஜே²ஸகஸ்ஸ வசனானி, ஏவங் ஸதி கா³தா²த்தயங் வத்வா தாஸங் அத்த²ம்பி ஸோ ஏவ கதெ²த்வா ஏதானி புப்³ப³கரணானி ச ஏதானி புப்³ப³கிச்சானி ச ஸங்கே⁴ன கதானி, இத³ஞ்ச ஸங்க⁴ஸ்ஸ பத்தகல்லங் ஸமானீதங், தஸ்மா ‘‘உத்³தி³ஸது, ப⁴ந்தே, பாதிமொக்க²’’ந்தி தேனேவ வத்தப்³ப³ங் ஸியா. அத² பாதிமொக்கு²த்³தே³ஸகஸ்ஸ வசனானி, ஏவஞ்ச ஸதி ‘‘ஸங்கோ⁴, ப⁴ந்தே, தே²ரங் பாதிமொக்கு²த்³தே³ஸங் அஜ்ஜே²ஸதி, உத்³தி³ஸது, ப⁴ந்தே, தே²ரோ பாதிமொக்க²’’ந்தி த⁴ம்மஜ்ஜே²ஸகேன யாவததியங் அஜ்ஜோ²ஸாபெத்வா ‘‘ஸம்மஜ்ஜனீ…பே॰… வுச்சதீ’’தி கா³த²ங் வத்வா இதி ‘‘அட்ட²கதா²சரியேஹி வுத்தானி ஏதானி புப்³ப³கரணானி கதானீ’’தி புச்சி²த்வா த⁴ம்மஜ்ஜே²ஸகேன ‘‘ஆம, ப⁴ந்தே’’தி வுத்தே ‘‘ச²ந்த³பாரிஸுத்³தி⁴ …பே॰… வுச்சதீ’’தி கா³த²ங் வத்வா இதி ‘‘அட்ட²கதா²சரியேஹி வுத்தானி ஏதானி புப்³ப³கிச்சானி கதானீ’’தி புச்சி²த்வா ‘‘ஆம, ப⁴ந்தே’’தி வுத்தே ‘‘உபோஸதோ²…பே॰… வுச்சதீ’’தி கா³த²ங் வத்வா இதி ‘‘அட்ட²கதா²சரியேஹி வுத்தங் இத³ங் பத்தகல்லங் ஸமானீத’’ந்தி புச்சி²த்வா ‘‘ஆம ப⁴ந்தே’’தி வுத்தே ‘‘புப்³ப³கரணபுப்³ப³கிச்சானி ஸம்மா நிட்டா²பெத்வா பத்தகல்லே ஸமானீதே ஸமக்³க³ஸ்ஸ பி⁴க்கு²ஸங்க⁴ஸ்ஸ அனுமதியா பாதிமொக்க²ங் உத்³தி³ஸிதுங் ஆராத⁴னங் மயங் கரோமா’’தி பாதிமொக்கு²த்³தே³ஸகேன வத்தப்³ப³ங் ஸியா, ஏவங் ஸதி அஜ்ஜே²ஸகஅஜ்ஜே²ஸிதப்³பா³னங் வசனங் அஸங்கரதோ ஜானிதப்³ப³ங் ப⁴வெய்யாதி.
Kiṃ imāni dhammajjhesakassa vacanāni, udāhu pātimokkhuddesakassāti? Kiñcettha – yadi dhammajjhesakassa vacanāni, evaṃ sati gāthāttayaṃ vatvā tāsaṃ atthampi so eva kathetvā etāni pubbakaraṇāni ca etāni pubbakiccāni ca saṅghena katāni, idañca saṅghassa pattakallaṃ samānītaṃ, tasmā ‘‘uddisatu, bhante, pātimokkha’’nti teneva vattabbaṃ siyā. Atha pātimokkhuddesakassa vacanāni, evañca sati ‘‘saṅgho, bhante, theraṃ pātimokkhuddesaṃ ajjhesati, uddisatu, bhante, thero pātimokkha’’nti dhammajjhesakena yāvatatiyaṃ ajjhosāpetvā ‘‘sammajjanī…pe… vuccatī’’ti gāthaṃ vatvā iti ‘‘aṭṭhakathācariyehi vuttāni etāni pubbakaraṇāni katānī’’ti pucchitvā dhammajjhesakena ‘‘āma, bhante’’ti vutte ‘‘chandapārisuddhi …pe… vuccatī’’ti gāthaṃ vatvā iti ‘‘aṭṭhakathācariyehi vuttāni etāni pubbakiccāni katānī’’ti pucchitvā ‘‘āma, bhante’’ti vutte ‘‘uposatho…pe… vuccatī’’ti gāthaṃ vatvā iti ‘‘aṭṭhakathācariyehi vuttaṃ idaṃ pattakallaṃ samānīta’’nti pucchitvā ‘‘āma bhante’’ti vutte ‘‘pubbakaraṇapubbakiccāni sammā niṭṭhāpetvā pattakalle samānīte samaggassa bhikkhusaṅghassa anumatiyā pātimokkhaṃ uddisituṃ ārādhanaṃ mayaṃ karomā’’ti pātimokkhuddesakena vattabbaṃ siyā, evaṃ sati ajjhesakaajjhesitabbānaṃ vacanaṃ asaṅkarato jānitabbaṃ bhaveyyāti.
எத்த² ச கா³தா²த்தயஸ்ஸ அட்ட²கதா²சரியேஹி வுத்தபா⁴வோ அட்ட²கதா²யமேவ ஆக³தோ. பச்சி²மவாக்யங் பன நேவ பாளியங், ந அட்ட²கதா²யங், ந டீகாதீ³ஸு தி³ஸ்ஸதி. கு²த்³த³ஸிக்கா²பகரணேபி –
Ettha ca gāthāttayassa aṭṭhakathācariyehi vuttabhāvo aṭṭhakathāyameva āgato. Pacchimavākyaṃ pana neva pāḷiyaṃ, na aṭṭhakathāyaṃ, na ṭīkādīsu dissati. Khuddasikkhāpakaraṇepi –
‘‘புப்³ப³கிச்சே ச கரணே;
‘‘Pubbakicce ca karaṇe;
பத்தகல்லே ஸமானிதே;
Pattakalle samānite;
ஸுத்தங் உத்³தி³ஸதி ஸங்கோ⁴;
Suttaṃ uddisati saṅgho;
பஞ்சதா⁴ ஸோ விபா⁴விதோ’’தி ச.
Pañcadhā so vibhāvito’’ti ca.
‘‘புப்³ப³கிச்சே ச கரணே;
‘‘Pubbakicce ca karaṇe;
பத்தகல்லே ஸமானிதே;
Pattakalle samānite;
ஞத்திங் வத்வான ஸங்கே⁴ன;
Ñattiṃ vatvāna saṅghena;
கத்தப்³பே³வங் பவாரணா’’தி ச. –
Kattabbevaṃ pavāraṇā’’ti ca. –
வுத்தங், ந வுத்தங் ததா². மூலஸிக்கா²பகரணேயேவ ததா² வுத்தங், தஸ்மா ஆசரியானங் அத்தனோமதி ப⁴வெய்ய.
Vuttaṃ, na vuttaṃ tathā. Mūlasikkhāpakaraṇeyeva tathā vuttaṃ, tasmā ācariyānaṃ attanomati bhaveyya.
தத்த² ‘‘புப்³ப³கரணபுப்³ப³கிச்சானி ஸம்மா நிட்டா²பெத்வா’’தி இமினா புரிமகா³தா²த்³வயஸ்ஸ அத்த²மேவ கதெ²த்வா ததியகா³தா²ய அத்தோ² ந கதி²தோ. ‘‘தே³ஸிதாபத்திகஸ்ஸா’’தி இமினா ச ஆபத்தியா தே³ஸிதபா⁴வோயேவ கதி²தோ, ந ஸப்³ப³ங் பத்தகல்லங். ஆபத்தியா தே³ஸிதபா⁴வே ச ஸபா⁴கா³பத்தியா தே³ஸிதபா⁴வோயேவ பத்தகல்லஸ்மிங் அந்தோக³தோ⁴, ந இதரோ. வுத்தஞ்ஹி கங்கா²விதரணியங் (கங்கா²॰ அட்ட²॰ நிதா³னவண்ணனா) ‘‘ஏதாஸு ஹி ஸபா⁴கா³பத்தீஸு அவிஜ்ஜமானாஸு, விஸபா⁴கா³பத்தீஸு விஜ்ஜமானாஸுபி பத்தகல்லங் ஹோதியேவா’’தி. ‘‘புப்³ப³கரணபுப்³ப³கிச்சானி ஸம்மா நிட்டா²பெத்வா தே³ஸிதாபத்திகஸ்ஸ ஸமக்³க³ஸ்ஸ பி⁴க்கு²ஸங்க⁴ஸ்ஸ அனுமதியா பாதிமொக்க²ங் உத்³தி³ஸிதுங் ஆராத⁴னங் கரோமா’’தி எத்தகேயேவ வுத்தே அவஸேஸானி தீணி பத்தகல்லங்கா³னி. ஸெய்யதி²த³ங் – உபோஸதோ², யாவதிகா ச பி⁴க்கூ² கம்மப்பத்தா, வஜ்ஜனீயா ச புக்³க³லா தஸ்மிங் ந ஹொந்தீதி (மஹாவ॰ அட்ட²॰ 168). தேஸு அஸந்தேஸுபி உபோஸதோ² காதப்³போ³தி ஆபஜ்ஜதி, ந பன காதப்³போ³. தேன வுத்தங் ‘‘ந, பி⁴க்க²வே, அனுபோஸதே² உபோஸதோ² காதப்³போ³, யோ கரெய்ய, ஆபத்தி து³க்கடஸ்ஸா’’தி (மஹாவ॰ 183) ச, ‘‘அனுஜானாமி, பி⁴க்க²வே, சதுன்னங் பாதிமொக்க²ங் உத்³தி³ஸிது’’ந்தி (மஹாவ॰ 168) ச, ‘‘ந, பி⁴க்க²வே, ஸக³ஹட்டா²ய பரிஸாய பாதிமொக்க²ங் உத்³தி³ஸிதப்³ப³’’ந்திஆதி³ (மஹாவ॰ 154) ச, தஸ்மா உபோஸத²தி³வஸேஸு ஸங்கே⁴ ஸன்னிபதிதே ஸசே புப்³பே³வ ஸம்மதோ த⁴ம்மஜ்ஜே²ஸகோ அத்தி², இச்சேதங் குஸலங். நோ சே, ஏகங் ப்³யத்தங் படிப³லங் பி⁴க்கு²ங் ஸங்கே⁴ன ஸம்மன்னாபெத்வா தேன த⁴ம்மஜ்ஜே²ஸகேன பாதிமொக்கு²த்³தே³ஸகங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ஸங்கோ⁴, ப⁴ந்தே, தே²ரங் பாதிமொக்கு²த்³தே³ஸங் அஜ்ஜே²ஸதி, உத்³தி³ஸது தே²ரோ பாதிமொக்க²ங். து³தியம்பி, ப⁴ந்தே, ஸங்கோ⁴…பே॰… ததியம்பி, ப⁴ந்தே, ஸங்கோ⁴…பே॰… உத்³தி³ஸது தே²ரோ பாதிமொக்க²ந்தி திக்க²த்துங் யாசாபெத்வா ததோ பாதிமொக்கு²த்³தே³ஸகேன –
Tattha ‘‘pubbakaraṇapubbakiccāni sammā niṭṭhāpetvā’’ti iminā purimagāthādvayassa atthameva kathetvā tatiyagāthāya attho na kathito. ‘‘Desitāpattikassā’’ti iminā ca āpattiyā desitabhāvoyeva kathito, na sabbaṃ pattakallaṃ. Āpattiyā desitabhāve ca sabhāgāpattiyā desitabhāvoyeva pattakallasmiṃ antogadho, na itaro. Vuttañhi kaṅkhāvitaraṇiyaṃ (kaṅkhā. aṭṭha. nidānavaṇṇanā) ‘‘etāsu hi sabhāgāpattīsu avijjamānāsu, visabhāgāpattīsu vijjamānāsupi pattakallaṃ hotiyevā’’ti. ‘‘Pubbakaraṇapubbakiccāni sammā niṭṭhāpetvā desitāpattikassa samaggassa bhikkhusaṅghassa anumatiyā pātimokkhaṃ uddisituṃ ārādhanaṃ karomā’’ti ettakeyeva vutte avasesāni tīṇi pattakallaṅgāni. Seyyathidaṃ – uposatho, yāvatikā ca bhikkhū kammappattā, vajjanīyā ca puggalā tasmiṃ na hontīti (mahāva. aṭṭha. 168). Tesu asantesupi uposatho kātabboti āpajjati, na pana kātabbo. Tena vuttaṃ ‘‘na, bhikkhave, anuposathe uposatho kātabbo, yo kareyya, āpatti dukkaṭassā’’ti (mahāva. 183) ca, ‘‘anujānāmi, bhikkhave, catunnaṃ pātimokkhaṃ uddisitu’’nti (mahāva. 168) ca, ‘‘na, bhikkhave, sagahaṭṭhāya parisāya pātimokkhaṃ uddisitabba’’ntiādi (mahāva. 154) ca, tasmā uposathadivasesu saṅghe sannipatite sace pubbeva sammato dhammajjhesako atthi, iccetaṃ kusalaṃ. No ce, ekaṃ byattaṃ paṭibalaṃ bhikkhuṃ saṅghena sammannāpetvā tena dhammajjhesakena pātimokkhuddesakaṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – saṅgho, bhante, theraṃ pātimokkhuddesaṃ ajjhesati, uddisatu thero pātimokkhaṃ. Dutiyampi, bhante, saṅgho…pe… tatiyampi, bhante, saṅgho…pe… uddisatu thero pātimokkhanti tikkhattuṃ yācāpetvā tato pātimokkhuddesakena –
‘‘ஸம்மஜ்ஜனீ பதீ³போ ச, உத³கங் ஆஸனேன ச;
‘‘Sammajjanī padīpo ca, udakaṃ āsanena ca;
உபோஸத²ஸ்ஸ ஏதானி, புப்³ப³கரணந்தி வுச்சதீதி. (மஹாவ॰ அட்ட²॰ 168; கங்கா²॰ அட்ட²॰ நிதா³னவண்ணனா) –
Uposathassa etāni, pubbakaraṇanti vuccatīti. (mahāva. aṭṭha. 168; kaṅkhā. aṭṭha. nidānavaṇṇanā) –
அட்ட²கதா²சரியேஹி வுத்தானி சத்தாரி புப்³ப³கரணானி, கிங் தானி கதானீ’’தி புச்சி²தே த⁴ம்மஜ்ஜே²ஸகேன ‘‘ஆம, ப⁴ந்தே’’தி வுத்தே புன பாதிமொக்கு²த்³தே³ஸகேன –
Aṭṭhakathācariyehi vuttāni cattāri pubbakaraṇāni, kiṃ tāni katānī’’ti pucchite dhammajjhesakena ‘‘āma, bhante’’ti vutte puna pātimokkhuddesakena –
‘‘ச²ந்த³பாரிஸுத்³தி⁴உதுக்கா²னங், பி⁴க்கு²க³ணனா ச ஓவாதோ³;
‘‘Chandapārisuddhiutukkhānaṃ, bhikkhugaṇanā ca ovādo;
உபோஸத²ஸ்ஸ ஏதானி, புப்³ப³கிச்சந்தி வுச்சதீதி. (மஹாவ॰ அட்ட²॰ 168; கங்கா²॰ அட்ட²॰ நிதா³னவண்ணனா) –
Uposathassa etāni, pubbakiccanti vuccatīti. (mahāva. aṭṭha. 168; kaṅkhā. aṭṭha. nidānavaṇṇanā) –
அட்ட²கதா²சரியேஹி வுத்தானி பஞ்ச புப்³ப³கிச்சானி, கிங் தானி கதானீ’’தி புச்சி²தே த⁴ம்மஜ்ஜே²ஸகேன ‘‘ஆம ப⁴ந்தே’’தி வுத்தே புன பாதிமொக்கு²த்³தே³ஸகேன –
Aṭṭhakathācariyehi vuttāni pañca pubbakiccāni, kiṃ tāni katānī’’ti pucchite dhammajjhesakena ‘‘āma bhante’’ti vutte puna pātimokkhuddesakena –
‘‘உபோஸதோ² யாவதிகா ச பி⁴க்கூ² கம்மப்பத்தா;
‘‘Uposatho yāvatikā ca bhikkhū kammappattā;
ஸபா⁴கா³பத்தியோ ச ந விஜ்ஜந்தி;
Sabhāgāpattiyo ca na vijjanti;
வஜ்ஜனீயா ச புக்³க³லா தஸ்மிங் ந ஹொந்தி;
Vajjanīyā ca puggalā tasmiṃ na honti;
பத்தகல்லந்தி வுச்சதீதி. (மஹாவ॰ அட்ட²॰ 168; கங்கா² அட்ட²॰ நிதா³னவண்ணனா) –
Pattakallanti vuccatīti. (mahāva. aṭṭha. 168; kaṅkhā aṭṭha. nidānavaṇṇanā) –
அட்ட²கதா²சரியேஹி வுத்தானி சத்தாரி பத்தகல்லங்கா³னி, கிங் தானி ஸமானீதானீ’’தி புச்சி²தே த⁴ம்மஜ்ஜே²ஸகேன ‘‘ஆம, ப⁴ந்தே’’தி வுத்தே புன பாதிமொக்கு²த்³தே³ஸகோ ‘‘புப்³ப³கரணபுப்³ப³கிச்சானி ஸம்மா நிட்டா²பெத்வா பத்தகல்லங்கே³ ஸமானீதே ஸங்க⁴ஸ்ஸ அனுமதியா பாதிமொக்க²ங் உத்³தி³ஸிஸ்ஸாமா’’தி வத்வா ‘‘ஸாது⁴ ஸாதூ⁴’’தி பி⁴க்கு²ஸங்கே⁴ன ஸம்படிச்சி²தே ‘‘ஸுணாது மே, ப⁴ந்தே, ஸங்கோ⁴’’திஆதி³னா பாதிமொக்கு²த்³தே³ஸகோ பாதிமொக்க²ங் உத்³தி³ஸதீதி அயமம்ஹாகங் க²ந்தி.
Aṭṭhakathācariyehi vuttāni cattāri pattakallaṅgāni, kiṃ tāni samānītānī’’ti pucchite dhammajjhesakena ‘‘āma, bhante’’ti vutte puna pātimokkhuddesako ‘‘pubbakaraṇapubbakiccāni sammā niṭṭhāpetvā pattakallaṅge samānīte saṅghassa anumatiyā pātimokkhaṃ uddisissāmā’’ti vatvā ‘‘sādhu sādhū’’ti bhikkhusaṅghena sampaṭicchite ‘‘suṇātu me, bhante, saṅgho’’tiādinā pātimokkhuddesako pātimokkhaṃ uddisatīti ayamamhākaṃ khanti.
எத்த² ச ‘‘த⁴ம்மஜ்ஜே²ஸகேன…பே॰… ஏவமஸ்ஸ வசனீயோ’’தி வுத்தங், ஸோ த⁴ம்மஜ்ஜே²ஸகேன வசனீயபா⁴வோ கத²ங் வேதி³தப்³போ³தி? ‘‘ந, பி⁴க்க²வே, ஸங்க⁴மஜ்ஜே² அனஜ்ஜி²ட்டே²ன பாதிமொக்க²ங் உத்³தி³ஸிதப்³ப³ங், யோ உத்³தி³ஸெய்ய, ஆபத்தி து³க்கடஸ்ஸா’’தி (மஹாவ॰ 154) வசனதோதி. ‘‘ஸங்கே⁴ன ஸம்மன்னாபெத்வா’’தி வுத்தங், தங் கத²ந்தி? ‘‘அஜ்ஜே²ஸனா செத்த² ஸங்கே⁴ன ஸம்மதத⁴ம்மஜ்ஜே²ஸகாயத்தா வா ஸங்க⁴த்தே²ராயத்தா வா’’தி அட்ட²கதா²யங் வுத்தத்தா. ‘‘ஸங்கோ⁴, ப⁴ந்தே, தே²ரங் பாதிமொக்கு²த்³தே³ஸங் அஜ்ஜே²ஸதி, உத்³தி³ஸது, ப⁴ந்தே, தே²ரோ பாதிமொக்க²’’ந்தி அயங் அஜ்ஜே²ஸனாகாரோ குதோ லப்³ப⁴தீதி? பாளிதோ. பாளியஞ்ஹி (மஹாவ॰ 155) ‘‘தே தே²ரங் அஜ்ஜே²ஸந்தி, உத்³தி³ஸது, ப⁴ந்தே, தே²ரோ பாதிமொக்க²’’ந்தி ஆக³தோ.
Ettha ca ‘‘dhammajjhesakena…pe… evamassa vacanīyo’’ti vuttaṃ, so dhammajjhesakena vacanīyabhāvo kathaṃ veditabboti? ‘‘Na, bhikkhave, saṅghamajjhe anajjhiṭṭhena pātimokkhaṃ uddisitabbaṃ, yo uddiseyya, āpatti dukkaṭassā’’ti (mahāva. 154) vacanatoti. ‘‘Saṅghena sammannāpetvā’’ti vuttaṃ, taṃ kathanti? ‘‘Ajjhesanā cettha saṅghena sammatadhammajjhesakāyattā vā saṅghattherāyattā vā’’ti aṭṭhakathāyaṃ vuttattā. ‘‘Saṅgho, bhante, theraṃ pātimokkhuddesaṃ ajjhesati, uddisatu, bhante, thero pātimokkha’’nti ayaṃ ajjhesanākāro kuto labbhatīti? Pāḷito. Pāḷiyañhi (mahāva. 155) ‘‘te theraṃ ajjhesanti, uddisatu, bhante, thero pātimokkha’’nti āgato.
ஸசே பன த⁴ம்மஜ்ஜே²ஸகோ வுட்³ட⁴தரோ, பாதிமொக்கு²த்³தே³ஸகோ நவகோ, ‘‘ஸங்கோ⁴, ஆவுஸோ, ஆயஸ்மந்தங் பாதிமொக்கு²த்³தே³ஸங் அஜ்ஜே²ஸதி, உத்³தி³ஸது ஆயஸ்மா பாதிமொக்க²’’ந்தி வத்தப்³ப³ங். தங் குதோ லப்³ப⁴தி? பாளிதோயேவ. பாளியஞ்ஹி (மஹாவ॰ 155) ‘‘ஏதேனேவ உபாயேன யாவ ஸங்க⁴னவகங் அஜ்ஜே²ஸந்தி உத்³தி³ஸது ஆயஸ்மா பாதிமொக்க²’’ந்தி ஆக³தோ. ததோ ‘‘பாதிமொக்கு²த்³தே³ஸகேன ஸம்மஜ்ஜனீ…பே॰… புச்சி²தே த⁴ம்மஜ்ஜே²ஸகேன ‘ஆம, ப⁴ந்தே’தி வுத்தே’’தி இத³ங் குதோ லப்³ப⁴தீதி? பாளிதோ அட்ட²கதா²தோ ச. நிதா³னபாளியம்பி ஹி ‘‘கிங் ஸங்க⁴ஸ்ஸ புப்³ப³கிச்ச’’ந்தி ஆக³தங், அட்ட²கதா²யம்பி (கங்கா²॰ அட்ட²॰ நிதா³னவண்ணனா) ‘‘கிங் ஸங்க⁴ஸ்ஸ புப்³ப³கிச்சந்தி ஸங்கோ⁴ உபோஸத²ங் கரெய்யாதி…பே॰… ஏவங் த்³வீஹி நாமேஹி நவவித⁴ங் புப்³ப³கிச்சங் த³ஸ்ஸிதங், கிங் தங் கதந்தி புச்ச²தீ’’தி ஆக³தந்தி.
Sace pana dhammajjhesako vuḍḍhataro, pātimokkhuddesako navako, ‘‘saṅgho, āvuso, āyasmantaṃ pātimokkhuddesaṃ ajjhesati, uddisatu āyasmā pātimokkha’’nti vattabbaṃ. Taṃ kuto labbhati? Pāḷitoyeva. Pāḷiyañhi (mahāva. 155) ‘‘eteneva upāyena yāva saṅghanavakaṃ ajjhesanti uddisatu āyasmā pātimokkha’’nti āgato. Tato ‘‘pātimokkhuddesakena sammajjanī…pe… pucchite dhammajjhesakena ‘āma, bhante’ti vutte’’ti idaṃ kuto labbhatīti? Pāḷito aṭṭhakathāto ca. Nidānapāḷiyampi hi ‘‘kiṃ saṅghassa pubbakicca’’nti āgataṃ, aṭṭhakathāyampi (kaṅkhā. aṭṭha. nidānavaṇṇanā) ‘‘kiṃ saṅghassa pubbakiccanti saṅgho uposathaṃ kareyyāti…pe… evaṃ dvīhi nāmehi navavidhaṃ pubbakiccaṃ dassitaṃ, kiṃ taṃ katanti pucchatī’’ti āgatanti.
நனு சேதங் அந்தோனிதா³னேயேவ ஆக³தங், அத² கஸ்மா பாதிமொக்கு²த்³தே³ஸகேன புப்³ப³பா⁴கே³ வத்தப்³ப³ந்தி? ஸச்சங், ததா²பி தத³னுலோமதோ ஜானிதப்³ப³தோ வத்தப்³ப³ங். அட்ட²கதா²யஞ்ஹி இமா கா³தா²யோ ஸம்மஜ்ஜனாதீ³னங் புப்³ப³கரணாதி³பா⁴வஞாபகபா⁴வேனேவ வுத்தா, ந பாதிமொக்கா²ரம்ப⁴காலே ப⁴ணிதப்³ப³பா⁴வேன. அத² ச பன இதா³னி ப⁴ணந்தி, ஏவங் ஸந்தே கிமத்த²ங் ப⁴ணந்தீதி சிந்தாயங் அந்தோனிதா³னே ‘‘கிங் ஸங்க⁴ஸ்ஸ புப்³ப³கிச்ச’’ந்தி வுத்தபுச்சா²னுலோமேன புப்³ப³கரணாதீ³னங் நிட்ட²பா⁴வபுச்ச²னத்த²ங் ப⁴ணந்தீதி ஜானிதப்³ப³ங். வுத்தஞ்ஹி ‘‘ஏவங் வுத்தங் சதுப்³பி³த⁴ங் புப்³ப³கரணங் கத்வாவ உபோஸதோ² காதப்³போ³’’தி (வி॰ ஸங்க³॰ அட்ட²॰ 177), தஸ்மா பாளிஅட்ட²கதா²னுலோமதோ இமினா அனுக்கமேன கதே ஸதி த⁴ம்மஜ்ஜே²ஸகோ பஞ்ஞாயதி, தஸ்ஸ அஜ்ஜே²ஸனாகாரோ பஞ்ஞாயதி, பாதிமொக்கு²த்³தே³ஸகோ பஞ்ஞாயதி, தஸ்ஸ புப்³ப³கரணாதீ³னங் நிட்ட²பா⁴வபுச்ச²னங் பஞ்ஞாயதி, த⁴ம்மஜ்ஜே²ஸகஸ்ஸ விஸ்ஸஜ்ஜனங் பஞ்ஞாயதி, தானி நிட்டா²பெத்வா பாதிமொக்கு²த்³தே³ஸகஸ்ஸ பாதிமொக்க²ங் உத்³தி³ஸிதுங் படிஞ்ஞா பஞ்ஞாயதி, ஏவங் இமேஸங் கா³தா²வாக்யானங் வசனே பயோஜனங் பஞ்ஞாயதீதி கத்வா பண்டி³தேஹி வினயஞ்ஞூஹி சிரபடிச்ச²ன்னோ அயங் கதா²மக்³கோ³ படிபஜ்ஜிதப்³போ³தி. பவாரணாயபி ஏஸேவ நயோ.
Nanu cetaṃ antonidāneyeva āgataṃ, atha kasmā pātimokkhuddesakena pubbabhāge vattabbanti? Saccaṃ, tathāpi tadanulomato jānitabbato vattabbaṃ. Aṭṭhakathāyañhi imā gāthāyo sammajjanādīnaṃ pubbakaraṇādibhāvañāpakabhāveneva vuttā, na pātimokkhārambhakāle bhaṇitabbabhāvena. Atha ca pana idāni bhaṇanti, evaṃ sante kimatthaṃ bhaṇantīti cintāyaṃ antonidāne ‘‘kiṃ saṅghassa pubbakicca’’nti vuttapucchānulomena pubbakaraṇādīnaṃ niṭṭhabhāvapucchanatthaṃ bhaṇantīti jānitabbaṃ. Vuttañhi ‘‘evaṃ vuttaṃ catubbidhaṃ pubbakaraṇaṃ katvāva uposatho kātabbo’’ti (vi. saṅga. aṭṭha. 177), tasmā pāḷiaṭṭhakathānulomato iminā anukkamena kate sati dhammajjhesako paññāyati, tassa ajjhesanākāro paññāyati, pātimokkhuddesako paññāyati, tassa pubbakaraṇādīnaṃ niṭṭhabhāvapucchanaṃ paññāyati, dhammajjhesakassa vissajjanaṃ paññāyati, tāni niṭṭhāpetvā pātimokkhuddesakassa pātimokkhaṃ uddisituṃ paṭiññā paññāyati, evaṃ imesaṃ gāthāvākyānaṃ vacane payojanaṃ paññāyatīti katvā paṇḍitehi vinayaññūhi cirapaṭicchanno ayaṃ kathāmaggo paṭipajjitabboti. Pavāraṇāyapi eseva nayo.
பாளியட்ட²கதா²தீ³னஞ்ஹி , அனுரூபங் இமங் நயங்;
Pāḷiyaṭṭhakathādīnañhi , anurūpaṃ imaṃ nayaṃ;
புனப்புனங் சிந்தயந்து, பண்டி³தா வினயஞ்ஞுனோ.
Punappunaṃ cintayantu, paṇḍitā vinayaññuno.
புனப்புனங் சிந்தயித்வா, யுத்தங் சே தா⁴ரயந்து தங்;
Punappunaṃ cintayitvā, yuttaṃ ce dhārayantu taṃ;
நோ சே யுத்தங் ச²ட்³ட³யந்து, ஸம்மாஸம்பு³த்³த⁴ஸாவகாதி.
No ce yuttaṃ chaḍḍayantu, sammāsambuddhasāvakāti.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
உபோஸத²பவாரணாவினிச்ச²யகதா²லங்காரோ நாம
Uposathapavāraṇāvinicchayakathālaṅkāro nāma
பஞ்சவீஸதிமோ பரிச்சே²தோ³.
Pañcavīsatimo paricchedo.
