| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
25. உபோஸத²பவாரணாவினிச்ச²யகதா²
25. Uposathapavāraṇāvinicchayakathā
168. உபோஸத²பவாரணாதி எத்த² (கங்கா²॰ அட்ட²॰ நிதா³னவண்ணனா) தி³வஸவஸேன தயோ உபோஸதா² சாதுத்³த³ஸிகோ பன்னரஸிகோ ஸாமக்³கீ³உபோஸதோ²தி. தத்த² ஹேமந்தகி³ம்ஹவஸ்ஸானானங் திண்ணங் உதூனங் ததியஸத்தமபக்கே²ஸு த்³வே த்³வே கத்வா ச² சாதுத்³த³ஸிகா, ஸேஸா பன்னரஸிகாதி ஏவங் ஏகஸங்வச்ச²ரே சதுவீஸதி உபோஸதா². இத³ங் தாவ பகதிசாரித்தங். ததா²ரூபபச்சயே ஸதி அஞ்ஞஸ்மிம்பி சாதுத்³த³ஸே உபோஸத²ங் காதுங் வட்டதி. புரிமவஸ்ஸங்வுட்டா²னங் பன புப்³ப³கத்திகபுண்ணமா, தேஸங்யேவ ஸசே ப⁴ண்ட³னகாரகேஹி உபத்³து³தா பவாரணங் பச்சுக்கட்³ட⁴ந்தி, அத² கத்திகமாஸஸ்ஸ காளபக்க²சாதுத்³த³ஸோ வா பச்சி²மகத்திகபுண்ணமா வா பச்சி²மவஸ்ஸங்வுட்டா²னஞ்ச பச்சி²மகத்திகபுண்ணமா ஏவ வாதி இமே தயோ பவாரணாதி³வஸாபி ஹொந்தி. இத³ம்பி பகதிசாரித்தமேவ. ததா²ரூபபச்சயே ஸதி த்³வின்னங் கத்திகபுண்ணமானங் புரிமேஸு சாதுத்³த³ஸேஸுபி பவாரணங் காதுங் வட்டதி. யதா³ பன கோஸம்ப³கக்க²ந்த⁴கே (மஹாவ॰ 451 ஆத³யோ) ஆக³தனயேன பி⁴ன்னே பி⁴க்கு²ஸங்கே⁴ ஓஸாரிதே தஸ்மிங் பி⁴க்கு²ஸ்மிங் ஸங்கோ⁴ தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ங் கரோதி, ததா³ தாவதே³வ உபோஸதோ² காதப்³போ³. ‘‘பாதிமொக்க²ங் உத்³தி³ஸிதப்³ப³’’ந்தி வசனதோ ட²பெத்வா சாதுத்³த³ஸபன்னரஸே அஞ்ஞோபி யோ கோசி தி³வஸோ உபோஸத²தி³வஸோ நாம ஹோதி, வஸ்ஸங்வுட்டா²னங் பன கத்திகமாஸப்³ப⁴ந்தரே அயமேவ ஸாமக்³கீ³பவாரணாதி³வஸோ நாம ஹோதி. இதி இமேஸு தீஸு தி³வஸேஸு உபோஸதோ² காதப்³போ³. கரொந்தேன பன ஸசே சாதுத்³த³ஸிகோ ஹோதி, ‘‘அஜ்ஜுபோஸதோ² சாதுத்³த³ஸோ’’தி வத்தப்³ப³ங். ஸசே ஸாமக்³கீ³உபோஸதோ² ஹோதி, ‘‘அஜ்ஜுபோஸதோ² ஸாமக்³கீ³’’தி வத்தப்³ப³ங். பன்னரஸியங் பன பாளியங் ஆக³தனயேனேவ ‘‘அஜ்ஜுபோஸதோ² பன்னரஸோ’’தி வத்தப்³ப³ங்.
168.Uposathapavāraṇāti ettha (kaṅkhā. aṭṭha. nidānavaṇṇanā) divasavasena tayo uposathā cātuddasiko pannarasiko sāmaggīuposathoti. Tattha hemantagimhavassānānaṃ tiṇṇaṃ utūnaṃ tatiyasattamapakkhesu dve dve katvā cha cātuddasikā, sesā pannarasikāti evaṃ ekasaṃvacchare catuvīsati uposathā. Idaṃ tāva pakaticārittaṃ. Tathārūpapaccaye sati aññasmimpi cātuddase uposathaṃ kātuṃ vaṭṭati. Purimavassaṃvuṭṭhānaṃ pana pubbakattikapuṇṇamā, tesaṃyeva sace bhaṇḍanakārakehi upaddutā pavāraṇaṃ paccukkaḍḍhanti, atha kattikamāsassa kāḷapakkhacātuddaso vā pacchimakattikapuṇṇamā vā pacchimavassaṃvuṭṭhānañca pacchimakattikapuṇṇamā eva vāti ime tayo pavāraṇādivasāpi honti. Idampi pakaticārittameva. Tathārūpapaccaye sati dvinnaṃ kattikapuṇṇamānaṃ purimesu cātuddasesupi pavāraṇaṃ kātuṃ vaṭṭati. Yadā pana kosambakakkhandhake (mahāva. 451 ādayo) āgatanayena bhinne bhikkhusaṅghe osārite tasmiṃ bhikkhusmiṃ saṅgho tassa vatthussa vūpasamāya saṅghasāmaggiṃ karoti, tadā tāvadeva uposatho kātabbo. ‘‘Pātimokkhaṃ uddisitabba’’nti vacanato ṭhapetvā cātuddasapannarase aññopi yo koci divaso uposathadivaso nāma hoti, vassaṃvuṭṭhānaṃ pana kattikamāsabbhantare ayameva sāmaggīpavāraṇādivaso nāma hoti. Iti imesu tīsu divasesu uposatho kātabbo. Karontena pana sace cātuddasiko hoti, ‘‘ajjuposatho cātuddaso’’ti vattabbaṃ. Sace sāmaggīuposatho hoti, ‘‘ajjuposatho sāmaggī’’ti vattabbaṃ. Pannarasiyaṃ pana pāḷiyaṃ āgatanayeneva ‘‘ajjuposatho pannaraso’’ti vattabbaṃ.
169. ஸங்கே⁴ உபோஸதோ² (கங்கா²॰ அட்ட²॰ நிதா³னவண்ணனா), க³ணே உபோஸதோ², புக்³க³லே உபோஸதோ²தி ஏவங் காரகவஸேன அபரேபி தயோ உபோஸதா² வுத்தா, கத்தப்³பா³காரவஸேன பன ஸுத்துத்³தே³ஸோ பாரிஸுத்³தி⁴உபோஸதோ² அதி⁴ட்டா²னுபோஸதோ²தி அபரேபி தயோ உபோஸதா². தத்த² ஸுத்துத்³தே³ஸோ நாம ‘‘ஸுணாது மே, ப⁴ந்தே, ஸங்கோ⁴’’திஆதி³னா நயேன வுத்தோ பாதிமொக்கு²த்³தே³ஸோ. யே பனிதரே த்³வே உபோஸதா², தேஸு பாரிஸுத்³தி⁴உபோஸதோ² தாவ அஞ்ஞேஸஞ்ச ஸந்திகே அஞ்ஞமஞ்ஞஞ்ச ஆரோசனவஸேன து³விதோ⁴. தத்த² ய்வாயங் அஞ்ஞேஸங் ஸந்திகே கரீயதி, ஸோபி பவாரிதானஞ்ச அப்பவாரிதானஞ்ச ஸந்திகே கரணவஸேன து³விதோ⁴. தத்த² மஹாபவாரணாய பவாரிதானங் ஸந்திகே பச்சி²மிகாய உபக³தேன வா அனுபக³தேன வா சி²ன்னவஸ்ஸேன வா சாதுமாஸினியங் பன பவாரிதானங் ஸந்திகே அனுபக³தேன வா சி²ன்னவஸ்ஸேன வா காயஸாமக்³கி³ங் த³த்வா ‘‘பரிஸுத்³தோ⁴ அஹங் ப⁴ந்தே, பரிஸுத்³தோ⁴தி மங் தா⁴ரேதா²’’தி திக்க²த்துங் வத்வா காதப்³போ³. ட²பெத்வா பன பவாரணாதி³வஸங் அஞ்ஞஸ்மிங் காலே ஆவாஸிகேஹி உத்³தி³ட்ட²மத்தே பாதிமொக்கே² அவுட்டி²தாய வா ஏகச்சாய வுட்டி²தாய வா ஸப்³பா³ய வா வுட்டி²தாய பரிஸாய யே அஞ்ஞே ஸமஸமா வா தோ²கதரா வா ஆக³ச்ச²ந்தி, தேஹி தேஸங் ஸந்திகே வுத்தனயேனேவ பாரிஸுத்³தி⁴ ஆரோசேதப்³பா³.
169. Saṅghe uposatho (kaṅkhā. aṭṭha. nidānavaṇṇanā), gaṇe uposatho, puggale uposathoti evaṃ kārakavasena aparepi tayo uposathā vuttā, kattabbākāravasena pana suttuddeso pārisuddhiuposatho adhiṭṭhānuposathoti aparepi tayo uposathā. Tattha suttuddeso nāma ‘‘suṇātu me, bhante, saṅgho’’tiādinā nayena vutto pātimokkhuddeso. Ye panitare dve uposathā, tesu pārisuddhiuposatho tāva aññesañca santike aññamaññañca ārocanavasena duvidho. Tattha yvāyaṃ aññesaṃ santike karīyati, sopi pavāritānañca appavāritānañca santike karaṇavasena duvidho. Tattha mahāpavāraṇāya pavāritānaṃ santike pacchimikāya upagatena vā anupagatena vā chinnavassena vā cātumāsiniyaṃ pana pavāritānaṃ santike anupagatena vā chinnavassena vā kāyasāmaggiṃ datvā ‘‘parisuddho ahaṃ bhante, parisuddhoti maṃ dhārethā’’ti tikkhattuṃ vatvā kātabbo. Ṭhapetvā pana pavāraṇādivasaṃ aññasmiṃ kāle āvāsikehi uddiṭṭhamatte pātimokkhe avuṭṭhitāya vā ekaccāya vuṭṭhitāya vā sabbāya vā vuṭṭhitāya parisāya ye aññe samasamā vā thokatarā vā āgacchanti, tehi tesaṃ santike vuttanayeneva pārisuddhi ārocetabbā.
யோ பனாயங் அஞ்ஞமஞ்ஞங் ஆரோசனவஸேன கரீயதி, ஸோ ஞத்திங் ட²பெத்வா கரணவஸேன ச அட்ட²பெத்வா கரணவஸேன ச து³விதோ⁴. தத்த² யஸ்மிங் ஆவாஸே தயோ பி⁴க்கூ² விஹரந்தி, தேஸு உபோஸத²தி³வஸே ஸன்னிபதிதேஸு ஏகேன பி⁴க்கு²னா ‘‘ஸுணந்து மே ஆயஸ்மந்தா, அஜ்ஜுபோஸதோ² சாதுத்³த³ஸோ’’தி வா ‘‘பன்னரஸோ’’தி வா வத்வா ‘‘யதா³யஸ்மந்தானங் பத்தகல்லங், மயங் அஞ்ஞமஞ்ஞங் பாரிஸுத்³தி⁴உபோஸத²ங் கரெய்யாமா’’தி ஞத்தியா ட²பிதாய தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ‘‘பரிஸுத்³தோ⁴ அஹங், ஆவுஸோ, பரிஸுத்³தோ⁴தி மங் தா⁴ரேதா²’’தி திக்க²த்துங் வத்தப்³ப³ங். இதரேஹி ‘‘ப⁴ந்தே’’தி வத்வா ஏவமேவ வத்தப்³ப³ங். ஏவங் ஞத்திங் ட²பெத்வா காதப்³போ³. யத்ர பன த்³வே பி⁴க்கூ² விஹரந்தி, தத்ர ஞத்திங் அட்ட²பெத்வா வுத்தனயேனேவ பாரிஸுத்³தி⁴ ஆரோசேதப்³பா³தி அயங் பாரிஸுத்³தி⁴உபோஸதோ².
Yo panāyaṃ aññamaññaṃ ārocanavasena karīyati, so ñattiṃ ṭhapetvā karaṇavasena ca aṭṭhapetvā karaṇavasena ca duvidho. Tattha yasmiṃ āvāse tayo bhikkhū viharanti, tesu uposathadivase sannipatitesu ekena bhikkhunā ‘‘suṇantu me āyasmantā, ajjuposatho cātuddaso’’ti vā ‘‘pannaraso’’ti vā vatvā ‘‘yadāyasmantānaṃ pattakallaṃ, mayaṃ aññamaññaṃ pārisuddhiuposathaṃ kareyyāmā’’ti ñattiyā ṭhapitāya therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā ‘‘parisuddho ahaṃ, āvuso, parisuddhoti maṃ dhārethā’’ti tikkhattuṃ vattabbaṃ. Itarehi ‘‘bhante’’ti vatvā evameva vattabbaṃ. Evaṃ ñattiṃ ṭhapetvā kātabbo. Yatra pana dve bhikkhū viharanti, tatra ñattiṃ aṭṭhapetvā vuttanayeneva pārisuddhi ārocetabbāti ayaṃ pārisuddhiuposatho.
ஸசே பன ஏகோவ பி⁴க்கு² ஹோதி, ஸப்³ப³ங் புப்³ப³கரணீயங் கத்வா அஞ்ஞேஸங் அனாக³மனங் ஞத்வா ‘‘அஜ்ஜ மே உபோஸதோ² சாதுத்³த³ஸோ’’தி வா ‘‘பன்னரஸோ’’தி வா வத்வா ‘‘அதி⁴ட்டா²மீ’’தி வத்தப்³ப³ங். அயங் அதி⁴ட்டா²னுபோஸதோ²தி ஏவங் கத்தப்³பா³காரவஸேன தயோ உபோஸதா² வேதி³தப்³பா³. எத்தாவதா நவ உபோஸதா² தீ³பிதா ஹொந்தி. தேஸு தி³வஸவஸேன பன்னரஸிகோ, காரகவஸேன ஸங்கு⁴போஸதோ², கத்தப்³பா³காரவஸேன ஸுத்துத்³தே³ஸோதி ஏவங் திலக்க²ணஸம்பன்னே உபோஸதே² பவத்தமானே உபோஸத²ங் அகத்வா தத³ஹுபோஸதே² அஞ்ஞங் அபி⁴க்கு²கங் நானாஸங்வாஸகேஹி வா ஸபி⁴க்கு²கங் ஆவாஸங் வா அனாவாஸங் வா வாஸத்தா²ய அஞ்ஞத்ர ஸங்கே⁴ன அஞ்ஞத்ர அந்தராயா க³ச்ச²ந்தஸ்ஸ து³க்கடங் ஹோதி.
Sace pana ekova bhikkhu hoti, sabbaṃ pubbakaraṇīyaṃ katvā aññesaṃ anāgamanaṃ ñatvā ‘‘ajja me uposatho cātuddaso’’ti vā ‘‘pannaraso’’ti vā vatvā ‘‘adhiṭṭhāmī’’ti vattabbaṃ. Ayaṃ adhiṭṭhānuposathoti evaṃ kattabbākāravasena tayo uposathā veditabbā. Ettāvatā nava uposathā dīpitā honti. Tesu divasavasena pannarasiko, kārakavasena saṅghuposatho, kattabbākāravasena suttuddesoti evaṃ tilakkhaṇasampanne uposathe pavattamāne uposathaṃ akatvā tadahuposathe aññaṃ abhikkhukaṃ nānāsaṃvāsakehi vā sabhikkhukaṃ āvāsaṃ vā anāvāsaṃ vā vāsatthāya aññatra saṅghena aññatra antarāyā gacchantassa dukkaṭaṃ hoti.
170. உபோஸத²கரணத்த²ங் ஸன்னிபதிதே ஸங்கே⁴ ப³ஹி உபோஸத²ங் கத்வா ஆக³தேன ஸன்னிபாதட்டா²னங் க³ந்த்வா காயஸாமக்³கி³ங் அதெ³ந்தேன ச²ந்தோ³ தா³தப்³போ³. யோபி கி³லானோ வா ஹோதி கிச்சபஸுதோ வா, தேனபி பாரிஸுத்³தி⁴ங் தெ³ந்தேன ச²ந்தோ³பி தா³தப்³போ³. கத²ங்? ஏகஸ்ஸ பி⁴க்கு²னோ ஸந்திகே ‘‘ச²ந்த³ங் த³ம்மி, ச²ந்த³ங் மே ஹர, ச²ந்த³ங் மே ஆரோசேஹீ’’தி அயமத்தோ² காயேன வா வாசாய வா உப⁴யேன வா விஞ்ஞாபேதப்³போ³, ஏவங் தி³ன்னோ ஹோதி ச²ந்தோ³. அகதுபோஸதே²ன கி³லானேன வா கிச்சபஸுதேன வா பாரிஸுத்³தி⁴ தா³தப்³பா³. கத²ங்? ஏகஸ்ஸ பி⁴க்கு²னோ ஸந்திகே ‘‘பாரிஸுத்³தி⁴ங் த³ம்மி, பாரிஸுத்³தி⁴ங் மே ஹர , பாரிஸுத்³தி⁴ங் மே ஆரோசேஹீ’’தி அயமத்தோ² காயேன வா வாசாய வா உப⁴யேன வா விஞ்ஞாபேதப்³போ³, ஏவங் தி³ன்னா ஹோதி பாரிஸுத்³தி⁴. தங் பன தெ³ந்தேன ச²ந்தோ³பி தா³தப்³போ³. வுத்தஞ்ஹேதங் ப⁴க³வதா ‘‘அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ங் தெ³ந்தேன ச²ந்த³ம்பி தா³துங், ஸந்தி ஸங்க⁴ஸ்ஸ கரணீய’’ந்தி (மஹாவ॰ 165). தத்த² பாரிஸுத்³தி⁴தா³னங் ஸங்க⁴ஸ்ஸபி அத்தனோபி உபோஸத²கரணங் ஸம்பாதே³தி, ந அவஸேஸங் ஸங்க⁴கிச்சங், ச²ந்த³தா³னங் ஸங்க⁴ஸ்ஸேவ உபோஸத²கரணஞ்ச ஸேஸகிச்சஞ்ச ஸம்பாதே³தி, அத்தனோ பனஸ்ஸ உபோஸதோ² அகதோயேவ ஹோதி, தஸ்மா பாரிஸுத்³தி⁴ங் தெ³ந்தேன ச²ந்தோ³பி தா³தப்³போ³. புப்³பே³ வுத்தங் பன ஸுத்³தி⁴கச்ச²ந்த³ங் வா பாரிஸுத்³தி⁴ங் வா இமங் வா ச²ந்த³பாரிஸுத்³தி⁴ங் ஏகேன ப³ஹூனம்பி ஆஹரிதுங் வட்டதி. ஸசே பன ஸோ அந்தராமக்³கே³ அஞ்ஞங் பி⁴க்கு²ங் பஸ்ஸித்வா யேஸங் தேன ச²ந்தோ³ வா பாரிஸுத்³தி⁴ வா க³ஹிதா, தேஸஞ்ச அத்தனோ ச ச²ந்த³பாரிஸுத்³தி⁴ங் தே³தி, தஸ்ஸேவ ஆக³ச்ச²தி. இதரா பன பி³ளாலஸங்க²லிகா ச²ந்த³பாரிஸுத்³தி⁴ நாம ஹோதி, ஸா ந ஆக³ச்ச²தி, தஸ்மா ஸயமேவ ஸன்னிபாதட்டா²னங் க³ந்த்வா ஆரோசேதப்³ப³ங். ஸசே பன ஸஞ்சிச்ச நாரோசேதி, து³க்கடங் ஆபஜ்ஜதி, ச²ந்த³பாரிஸுத்³தி⁴ பன தஸ்மிங் ஹத்த²பாஸங் உபக³தமத்தேயேவ ஆக³தா ஹோதி.
170. Uposathakaraṇatthaṃ sannipatite saṅghe bahi uposathaṃ katvā āgatena sannipātaṭṭhānaṃ gantvā kāyasāmaggiṃ adentena chando dātabbo. Yopi gilāno vā hoti kiccapasuto vā, tenapi pārisuddhiṃ dentena chandopi dātabbo. Kathaṃ? Ekassa bhikkhuno santike ‘‘chandaṃ dammi, chandaṃ me hara, chandaṃ me ārocehī’’ti ayamattho kāyena vā vācāya vā ubhayena vā viññāpetabbo, evaṃ dinno hoti chando. Akatuposathena gilānena vā kiccapasutena vā pārisuddhi dātabbā. Kathaṃ? Ekassa bhikkhuno santike ‘‘pārisuddhiṃ dammi, pārisuddhiṃ me hara , pārisuddhiṃ me ārocehī’’ti ayamattho kāyena vā vācāya vā ubhayena vā viññāpetabbo, evaṃ dinnā hoti pārisuddhi. Taṃ pana dentena chandopi dātabbo. Vuttañhetaṃ bhagavatā ‘‘anujānāmi, bhikkhave, tadahuposathe pārisuddhiṃ dentena chandampi dātuṃ, santi saṅghassa karaṇīya’’nti (mahāva. 165). Tattha pārisuddhidānaṃ saṅghassapi attanopi uposathakaraṇaṃ sampādeti, na avasesaṃ saṅghakiccaṃ, chandadānaṃ saṅghasseva uposathakaraṇañca sesakiccañca sampādeti, attano panassa uposatho akatoyeva hoti, tasmā pārisuddhiṃ dentena chandopi dātabbo. Pubbe vuttaṃ pana suddhikacchandaṃ vā pārisuddhiṃ vā imaṃ vā chandapārisuddhiṃ ekena bahūnampi āharituṃ vaṭṭati. Sace pana so antarāmagge aññaṃ bhikkhuṃ passitvā yesaṃ tena chando vā pārisuddhi vā gahitā, tesañca attano ca chandapārisuddhiṃ deti, tasseva āgacchati. Itarā pana biḷālasaṅkhalikā chandapārisuddhi nāma hoti, sā na āgacchati, tasmā sayameva sannipātaṭṭhānaṃ gantvā ārocetabbaṃ. Sace pana sañcicca nāroceti, dukkaṭaṃ āpajjati, chandapārisuddhi pana tasmiṃ hatthapāsaṃ upagatamatteyeva āgatā hoti.
171. பாரிவாஸியேன பன ச²ந்த³தா³னேன யங் கிஞ்சி ஸங்க⁴கம்மங் காதுங் ந வட்டதி. தத்த² (பாசி॰ அட்ட²॰ 1167) சதுப்³பி³த⁴ங் பாரிவாஸியங் பரிஸபாரிவாஸியங் ரத்திபாரிவாஸியங் ச²ந்த³பாரிவாஸியங் அஜ்ஜா²ஸயபாரிவாஸியந்தி. தேஸு பரிஸபாரிவாஸியங் நாம பி⁴க்கூ² கேனசிதே³வ கரணீயேன ஸன்னிபதிதா ஹொந்தி, அத² மேகோ⁴ வா உட்டே²தி, உஸ்ஸாரணா வா கரீயதி, மனுஸ்ஸா வா அஜ்ஜொ²த்த²ரந்தா ஆக³ச்ச²ந்தி, பி⁴க்கூ² ‘‘அனோகாஸா மயங், அஞ்ஞத்த² க³ச்சா²மா’’தி ச²ந்த³ங் அவிஸ்ஸஜ்ஜெத்வாவ உட்ட²ஹந்தி. இத³ங் பரிஸபாரிவாஸியங். கிஞ்சாபி பரிஸபாரிவாஸியங், ச²ந்த³ஸ்ஸ பன அவிஸ்ஸட்ட²த்தா கம்மங் காதுங் வட்டதி.
171. Pārivāsiyena pana chandadānena yaṃ kiñci saṅghakammaṃ kātuṃ na vaṭṭati. Tattha (pāci. aṭṭha. 1167) catubbidhaṃ pārivāsiyaṃ parisapārivāsiyaṃ rattipārivāsiyaṃ chandapārivāsiyaṃ ajjhāsayapārivāsiyanti. Tesu parisapārivāsiyaṃ nāma bhikkhū kenacideva karaṇīyena sannipatitā honti, atha megho vā uṭṭheti, ussāraṇā vā karīyati, manussā vā ajjhottharantā āgacchanti, bhikkhū ‘‘anokāsā mayaṃ, aññattha gacchāmā’’ti chandaṃ avissajjetvāva uṭṭhahanti. Idaṃ parisapārivāsiyaṃ. Kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.
புன பி⁴க்கூ² ‘‘உபோஸதா²தீ³னி கரிஸ்ஸாமா’’தி ரத்திங் ஸன்னிபதித்வா ‘‘யாவ ஸப்³பே³ ஸன்னிபதந்தி, தாவ த⁴ம்மங் ஸுணிஸ்ஸாமா’’தி ஏகங் அஜ்ஜே²ஸந்தி, தஸ்மிங் த⁴ம்மகத²ங் கதெ²ந்தேயேவ அருணோ உக்³க³ச்ச²தி. ஸசே ‘‘சாதுத்³த³ஸிகங் உபோஸத²ங் கரிஸ்ஸாமா’’தி நிஸின்னா, பன்னரஸோதி காதுங் வட்டதி. ஸசே பன்னரஸிகங் காதுங் நிஸின்னா, பாடிபதே³ அனுபோஸதே² உபோஸத²ங் காதுங் ந வட்டதி, அஞ்ஞங் பன ஸங்க⁴கிச்சங் காதுங் வட்டதி. இத³ங் ரத்திபாரிவாஸியங் நாம.
Puna bhikkhū ‘‘uposathādīni karissāmā’’ti rattiṃ sannipatitvā ‘‘yāva sabbe sannipatanti, tāva dhammaṃ suṇissāmā’’ti ekaṃ ajjhesanti, tasmiṃ dhammakathaṃ kathenteyeva aruṇo uggacchati. Sace ‘‘cātuddasikaṃ uposathaṃ karissāmā’’ti nisinnā, pannarasoti kātuṃ vaṭṭati. Sace pannarasikaṃ kātuṃ nisinnā, pāṭipade anuposathe uposathaṃ kātuṃ na vaṭṭati, aññaṃ pana saṅghakiccaṃ kātuṃ vaṭṭati. Idaṃ rattipārivāsiyaṃ nāma.
புன பி⁴க்கூ² ‘‘கிஞ்சிதே³வ அப்³பா⁴னாதி³ஸங்க⁴கம்மங் கரிஸ்ஸாமா’’தி நிஸின்னா ஹொந்தி, தத்ரேகோ நக்க²த்தபாட²கோ பி⁴க்கு² ஏவங் வத³தி ‘‘அஜ்ஜ நக்க²த்தங் தா³ருணங், மா இமங் கரோதா²’’தி. தே தஸ்ஸ வசனேன ச²ந்த³ங் விஸ்ஸஜ்ஜெத்வா தத்தே²வ நிஸின்னா ஹொந்தி. அத²ஞ்ஞோ ஆக³ந்த்வா ‘‘நக்க²த்தங் பதிமானெந்தங், அத்தோ² பா³லங் உபச்சகா³’’தி (ஜா॰ 1.1.49) வத்வா ‘‘கிங் நக்க²த்தேன, கரோதா²’’தி வத³தி. இத³ங் ச²ந்த³பாரிவாஸியஞ்சேவ அஜ்ஜா²ஸயபாரிவாஸியஞ்ச. ஏதஸ்மிங் பாரிவாஸியே புன ச²ந்த³பாரிஸுத்³தி⁴ங் அனானெத்வா கம்மங் காதுங் ந வட்டதி.
Puna bhikkhū ‘‘kiñcideva abbhānādisaṅghakammaṃ karissāmā’’ti nisinnā honti, tatreko nakkhattapāṭhako bhikkhu evaṃ vadati ‘‘ajja nakkhattaṃ dāruṇaṃ, mā imaṃ karothā’’ti. Te tassa vacanena chandaṃ vissajjetvā tattheva nisinnā honti. Athañño āgantvā ‘‘nakkhattaṃ patimānentaṃ, attho bālaṃ upaccagā’’ti (jā. 1.1.49) vatvā ‘‘kiṃ nakkhattena, karothā’’ti vadati. Idaṃ chandapārivāsiyañceva ajjhāsayapārivāsiyañca. Etasmiṃ pārivāsiye puna chandapārisuddhiṃ anānetvā kammaṃ kātuṃ na vaṭṭati.
172. ஸசே கோசி பி⁴க்கு² கி³லானோ ந ஸக்கோதி ச²ந்த³பாரிஸுத்³தி⁴ங் தா³துங், ஸோ மஞ்சேன வா பீடே²ன வா ஸங்க⁴மஜ்ஜ²ங் ஆனேதப்³போ³. ஸசே கி³லானுபட்டா²கானங் பி⁴க்கூ²னங் ஏவங் ஹோதி ‘‘ஸசே கோ² மயங் கி³லானங் டா²னா சாவெஸ்ஸாம, ஆபா³தோ⁴ வா அபி⁴வட்³டி⁴ஸ்ஸதி, காலகிரியா வா ப⁴விஸ்ஸதீ’’தி, ந ஸோ பி⁴க்கு² டா²னா சாவேதப்³போ³, ஸங்கே⁴ன தத்த² க³ந்த்வா உபோஸதோ² காதப்³போ³. ஸசே ப³ஹூ தாதி³ஸா கி³லானா ஹொந்தி, ஸங்கே⁴ன படிபாடியா ட²த்வா ஸப்³பே³ ஹத்த²பாஸே காதப்³பா³. ஸசே தூ³ரே ஹொந்தி, ஸங்கோ⁴ நப்பஹோதி, தங் தி³வஸங் உபோஸதோ² ந காதப்³போ³. ந த்வேவ வக்³கே³ன ஸங்கே⁴ன உபோஸதோ² காதப்³போ³, கரெய்ய சே, து³க்கடங்.
172. Sace koci bhikkhu gilāno na sakkoti chandapārisuddhiṃ dātuṃ, so mañcena vā pīṭhena vā saṅghamajjhaṃ ānetabbo. Sace gilānupaṭṭhākānaṃ bhikkhūnaṃ evaṃ hoti ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālakiriyā vā bhavissatī’’ti, na so bhikkhu ṭhānā cāvetabbo, saṅghena tattha gantvā uposatho kātabbo. Sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre honti, saṅgho nappahoti, taṃ divasaṃ uposatho na kātabbo. Na tveva vaggena saṅghena uposatho kātabbo, kareyya ce, dukkaṭaṃ.
ஸசே (மஹாவ॰ அட்ட²॰ 149) ஏகஸ்மிங் விஹாரே சதூஸு பி⁴க்கூ²ஸு வஸந்தேஸு ஏகஸ்ஸ ச²ந்த³பாரிஸுத்³தி⁴ங் ஆஹரித்வா தயோ பாரிஸுத்³தி⁴உபோஸத²ங் கரொந்தி, தீஸு வா வஸந்தேஸு ஏகஸ்ஸ ச²ந்த³பாரிஸுத்³தி⁴ங் ஆஹரித்வா த்³வே பாதிமொக்க²ங் உத்³தி³ஸந்தி, அத⁴ம்மேன வக்³க³ங் உபோஸத²கம்மங் ஹோதி. ஸசே பன சத்தாரோபி ஸன்னிபதித்வா பாரிஸுத்³தி⁴உபோஸத²ங் கரொந்தி, தயோ வா த்³வே வா பாதிமொக்க²ங் உத்³தி³ஸந்தி, அத⁴ம்மேன ஸமக்³க³ங் நாம ஹோதி. ஸசே சதூஸு ஜனேஸு ஏகஸ்ஸ பாரிஸுத்³தி⁴ங் ஆஹரித்வா தயோ பாதிமொக்க²ங் உத்³தி³ஸந்தி, தீஸு வா ஜனேஸு ஏகஸ்ஸ பாரிஸுத்³தி⁴ங் ஆஹரித்வா த்³வே பாரிஸுத்³தி⁴உபோஸத²ங் கரொந்தி, த⁴ம்மேன வக்³க³ங் நாம ஹோதி. ஸசே பன சத்தாரோ ஏகத்த² வஸந்தா ஸப்³பே³ ஸன்னிபதித்வா பாதிமொக்க²ங் உத்³தி³ஸந்தி, தயோ பாரிஸுத்³தி⁴உபோஸத²ங் கரொந்தி, த்³வே அஞ்ஞமஞ்ஞங் பாரிஸுத்³தி⁴உபோஸத²ங் கரொந்தி, த⁴ம்மேன ஸமக்³க³ங் நாம ஹோதி.
Sace (mahāva. aṭṭha. 149) ekasmiṃ vihāre catūsu bhikkhūsu vasantesu ekassa chandapārisuddhiṃ āharitvā tayo pārisuddhiuposathaṃ karonti, tīsu vā vasantesu ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ hoti. Sace pana cattāropi sannipatitvā pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ nāma hoti. Sace catūsu janesu ekassa pārisuddhiṃ āharitvā tayo pātimokkhaṃ uddisanti, tīsu vā janesu ekassa pārisuddhiṃ āharitvā dve pārisuddhiuposathaṃ karonti, dhammena vaggaṃ nāma hoti. Sace pana cattāro ekattha vasantā sabbe sannipatitvā pātimokkhaṃ uddisanti, tayo pārisuddhiuposathaṃ karonti, dve aññamaññaṃ pārisuddhiuposathaṃ karonti, dhammena samaggaṃ nāma hoti.
173. பவாரணாகம்மேஸு (மஹாவ॰ அட்ட²॰ 212) பன ஸசே ஏகஸ்மிங் விஹாரே பஞ்சஸு பி⁴க்கூ²ஸு வஸந்தேஸு ஏகஸ்ஸ பவாரணங் ஆஹரித்வா சத்தாரோ க³ணஞத்திங் ட²பெத்வா பவாரெந்தி, சதூஸு வா தீஸு வா வஸந்தேஸு ஏகஸ்ஸ பவாரணங் ஆஹரித்வா தயோ வா த்³வே வா ஸங்க⁴ஞத்திங் ட²பெத்வா பவாரெந்தி, ஸப்³ப³மேதங் அத⁴ம்மேன வக்³க³ங் பவாரணாகம்மங். ஸசே பன ஸப்³பே³பி பஞ்ச ஜனா ஏகதோ ஸன்னிபதித்வா க³ணஞத்திங் ட²பெத்வா பவாரெந்தி, சத்தாரோ வா தயோ வா த்³வே வா வஸந்தா ஏகதோ ஸன்னிபதித்வா ஸங்க⁴ஞத்திங் ட²பெத்வா பவாரெந்தி, ஸப்³ப³மேதங் அத⁴ம்மேன ஸமக்³க³ங் பவாரணாகம்மங். ஸசே பஞ்சஸு ஜனேஸு ஏகஸ்ஸ பவாரணங் ஆஹரித்வா சத்தாரோ ஸங்க⁴ஞத்திங் ட²பெத்வா பவாரெந்தி, சதூஸு வா தீஸு வா ஏகஸ்ஸ பவாரணங் ஆஹரித்வா தயோ வா த்³வே வா க³ணஞத்திங் ட²பெத்வா பவாரெந்தி, ஸப்³ப³மேதங் த⁴ம்மேன வக்³க³ங் பவாரணாகம்மங். ஸசே பன ஸப்³பே³பி பஞ்ச ஜனா ஏகதோ ஸன்னிபதித்வா ஸங்க⁴ஞத்திங் ட²பெத்வா பவாரெந்தி, சத்தாரோ வா தயோ வா ஏகதோ ஸன்னிபதித்வா க³ணஞத்திங் ட²பெத்வா பவாரெந்தி, த்³வே அஞ்ஞமஞ்ஞங் பவாரெந்தி, ஏககோ வஸந்தோ அதி⁴ட்டா²னபவாரணங் கரோதி, ஸப்³ப³மேதங் த⁴ம்மேன ஸமக்³க³ங் நாம பவாரணாகம்மந்தி.
173. Pavāraṇākammesu (mahāva. aṭṭha. 212) pana sace ekasmiṃ vihāre pañcasu bhikkhūsu vasantesu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu vā tīsu vā vasantesu ekassa pavāraṇaṃ āharitvā tayo vā dve vā saṅghañattiṃ ṭhapetvā pavārenti, sabbametaṃ adhammena vaggaṃ pavāraṇākammaṃ. Sace pana sabbepi pañca janā ekato sannipatitvā gaṇañattiṃ ṭhapetvā pavārenti, cattāro vā tayo vā dve vā vasantā ekato sannipatitvā saṅghañattiṃ ṭhapetvā pavārenti, sabbametaṃ adhammena samaggaṃ pavāraṇākammaṃ. Sace pañcasu janesu ekassa pavāraṇaṃ āharitvā cattāro saṅghañattiṃ ṭhapetvā pavārenti, catūsu vā tīsu vā ekassa pavāraṇaṃ āharitvā tayo vā dve vā gaṇañattiṃ ṭhapetvā pavārenti, sabbametaṃ dhammena vaggaṃ pavāraṇākammaṃ. Sace pana sabbepi pañca janā ekato sannipatitvā saṅghañattiṃ ṭhapetvā pavārenti, cattāro vā tayo vā ekato sannipatitvā gaṇañattiṃ ṭhapetvā pavārenti, dve aññamaññaṃ pavārenti, ekako vasanto adhiṭṭhānapavāraṇaṃ karoti, sabbametaṃ dhammena samaggaṃ nāma pavāraṇākammanti.
எத்த² ஸசே சாதுத்³த³ஸிகா ஹோதி, ‘‘அஜ்ஜ மே பவாரணா சாதுத்³த³ஸீ’’தி, ஸசே பன்னரஸிகா, ‘‘அஜ்ஜ மே பவாரணா பன்னரஸீ’’தி ஏவங் அதி⁴ட்டா²தப்³ப³ங். பவாரணங் தெ³ந்தேன பன ‘‘பவாரணங் த³ம்மி, பவாரணங் மே ஹர, மமத்தா²ய பவாரேஹீ’’தி காயேன வா வாசாய வா காயவாசாஹி வா அயமத்தோ² விஞ்ஞாபேதப்³போ³. ஏவங் தி³ன்னாய (மஹாவ॰ அட்ட²॰ 213) பவாரணாய பவாரணாஹாரகேன ஸங்க⁴ங் உபஸங்கமித்வா ஏவங் பவாரேதப்³ப³ங் ‘‘திஸ்ஸோ, ப⁴ந்தே, பி⁴க்கு² ஸங்க⁴ங் பவாரேதி தி³ட்டே²ன வா ஸுதேன வா பரிஸங்காய வா, வத³து தங், ப⁴ந்தே, ஸங்கோ⁴ அனுகம்பங் உபாதா³ய, பஸ்ஸந்தோ படிகரிஸ்ஸதி. து³தியம்பி, ப⁴ந்தே…பே॰… ததியம்பி, ப⁴ந்தே, திஸ்ஸோ பி⁴க்கு² ஸங்க⁴ங் பவாரேதி…பே॰… படிகரிஸ்ஸதீ’’தி. ஸசே பன வுட்³ட⁴தரோ ஹோதி, ‘‘ஆயஸ்மா, ப⁴ந்தே, திஸ்ஸோ’’தி வத்தப்³ப³ங். ஏவஞ்ஹி தேன தஸ்ஸத்தா²ய பவாரிதங் ஹோதி. பவாரணங் தெ³ந்தேன பன ச²ந்தோ³பி தா³தப்³போ³, ச²ந்த³தா³னங் ஹெட்டா² வுத்தனயேனேவ வேதி³தப்³ப³ங். இதா⁴பி ச²ந்த³தா³னங் அவஸேஸகம்மத்தா²ய. தஸ்மா ஸசே பவாரணங் தெ³ந்தோ ச²ந்த³ங் தே³தி, வுத்தனயேன ஆஹடாய பவாரணாய தேன ச பி⁴க்கு²னா ஸங்கே⁴ன ச பவாரிதமேவ ஹோதி. அத² பவாரணமேவ தே³தி, ந ச²ந்த³ங், தஸ்ஸ ச பவாரணாய ஆரோசிதாய ஸங்கே⁴ன ச பவாரிதே ஸப்³பே³ஸங் ஸுப்பவாரிதங் ஹோதி, அஞ்ஞங் பன கம்மங் குப்பதி. ஸசே ச²ந்த³மேவ தே³தி, ந பவாரணங், ஸங்க⁴ஸ்ஸ பவாரணா ச ஸேஸகம்மானி ச ந குப்பந்தி, தேன பன பி⁴க்கு²னா அப்பவாரிதங் ஹோதி, பவாரணாதி³வஸே பன ப³ஹிஸீமாய பவாரணங் அதி⁴ட்ட²ஹித்வா ஆக³தேனபி ச²ந்தோ³ தா³தப்³போ³ தேன ஸங்க⁴ஸ்ஸ பவாரணாகம்மங் ந குப்பதி.
Ettha sace cātuddasikā hoti, ‘‘ajja me pavāraṇā cātuddasī’’ti, sace pannarasikā, ‘‘ajja me pavāraṇā pannarasī’’ti evaṃ adhiṭṭhātabbaṃ. Pavāraṇaṃ dentena pana ‘‘pavāraṇaṃ dammi, pavāraṇaṃ me hara, mamatthāya pavārehī’’ti kāyena vā vācāya vā kāyavācāhi vā ayamattho viññāpetabbo. Evaṃ dinnāya (mahāva. aṭṭha. 213) pavāraṇāya pavāraṇāhārakena saṅghaṃ upasaṅkamitvā evaṃ pavāretabbaṃ ‘‘tisso, bhante, bhikkhu saṅghaṃ pavāreti diṭṭhena vā sutena vā parisaṅkāya vā, vadatu taṃ, bhante, saṅgho anukampaṃ upādāya, passanto paṭikarissati. Dutiyampi, bhante…pe… tatiyampi, bhante, tisso bhikkhu saṅghaṃ pavāreti…pe… paṭikarissatī’’ti. Sace pana vuḍḍhataro hoti, ‘‘āyasmā, bhante, tisso’’ti vattabbaṃ. Evañhi tena tassatthāya pavāritaṃ hoti. Pavāraṇaṃ dentena pana chandopi dātabbo, chandadānaṃ heṭṭhā vuttanayeneva veditabbaṃ. Idhāpi chandadānaṃ avasesakammatthāya. Tasmā sace pavāraṇaṃ dento chandaṃ deti, vuttanayena āhaṭāya pavāraṇāya tena ca bhikkhunā saṅghena ca pavāritameva hoti. Atha pavāraṇameva deti, na chandaṃ, tassa ca pavāraṇāya ārocitāya saṅghena ca pavārite sabbesaṃ suppavāritaṃ hoti, aññaṃ pana kammaṃ kuppati. Sace chandameva deti, na pavāraṇaṃ, saṅghassa pavāraṇā ca sesakammāni ca na kuppanti, tena pana bhikkhunā appavāritaṃ hoti, pavāraṇādivase pana bahisīmāya pavāraṇaṃ adhiṭṭhahitvā āgatenapi chando dātabbo tena saṅghassa pavāraṇākammaṃ na kuppati.
ஸசே புரிமிகாய பஞ்ச பி⁴க்கூ² வஸ்ஸங் உபக³தா, பச்சி²மிகாயபி பஞ்ச, புரிமேஹி ஞத்திங் ட²பெத்வா பவாரிதே பச்சி²மேஹி தேஸங் ஸந்திகே பாரிஸுத்³தி⁴உபோஸதோ² காதப்³போ³, ந ஏகஸ்மிங் உபோஸத²க்³கே³ த்³வே ஞத்தியோ ட²பேதப்³பா³. ஸசேபி பச்சி²மிகாய உபக³தா சத்தாரோ தயோ த்³வே ஏகோ வா ஹோதி, ஏஸேவ நயோ. அத² புரிமிகாய சத்தாரோ, பச்சி²மிகாயபி சத்தாரோ தயோ த்³வே ஏகோ வா, ஏஸேவ நயோ. அதா²பி புரிமிகாய தயோ, பச்சி²மிகாயபி தயோ த்³வே ஏகோ வா, ஏஸேவ நயோ. இத³ஞ்ஹெத்த² லக்க²ணங்.
Sace purimikāya pañca bhikkhū vassaṃ upagatā, pacchimikāyapi pañca, purimehi ñattiṃ ṭhapetvā pavārite pacchimehi tesaṃ santike pārisuddhiuposatho kātabbo, na ekasmiṃ uposathagge dve ñattiyo ṭhapetabbā. Sacepi pacchimikāya upagatā cattāro tayo dve eko vā hoti, eseva nayo. Atha purimikāya cattāro, pacchimikāyapi cattāro tayo dve eko vā, eseva nayo. Athāpi purimikāya tayo, pacchimikāyapi tayo dve eko vā, eseva nayo. Idañhettha lakkhaṇaṃ.
ஸசே புரிமிகாய உபக³தேஹி பச்சி²மிகாய உபக³தா தோ²கதரா சேவ ஹொந்தி ஸமஸமா ச, ஸங்க⁴பவாரணாய ச க³ணங் பூரெந்தி, ஸங்க⁴பவாரணாவஸேன ஞத்தி ட²பேதப்³பா³. ஸசே பன பச்சி²மிகாய ஏகோ ஹோதி, தேன ஸத்³தி⁴ங் தே சத்தாரோ ஹொந்தி, சதுன்னங் ஸங்க⁴ஞத்திங் ட²பெத்வா பவாரேதுங் ந வட்டதி. க³ணஞத்தியா பன ஸோ க³ணபூரகோ ஹோதி, தஸ்மா க³ணவஸேன ஞத்திங் ட²பெத்வா புரிமேஹி பவாரேதப்³ப³ங், இதரேன தேஸங் ஸந்திகே பாரிஸுத்³தி⁴உபோஸதோ² காதப்³போ³தி. புரிமிகாய த்³வே, பச்சி²மிகாய த்³வே வா ஏகோ வா ஏஸேவ நயோ. புரிமிகாய ஏகோ பச்சி²மிகாய ஏகோதி ஏகேன ஏகஸ்ஸ ஸந்திகே பவாரேதப்³ப³ங், ஏகேன பாரிஸுத்³தி⁴உபோஸதோ² காதப்³போ³. ஸசே புரிமேஹி வஸ்ஸூபக³தேஹி பச்சா² வஸ்ஸூபக³தா ஏகேனபி அதி⁴கதரா ஹொந்தி, பட²மங் பாதிமொக்க²ங் உத்³தி³ஸித்வா பச்சா² தோ²கதரேஹி தேஸங் ஸந்திகே பவாரேதப்³ப³ங்.
Sace purimikāya upagatehi pacchimikāya upagatā thokatarā ceva honti samasamā ca, saṅghapavāraṇāya ca gaṇaṃ pūrenti, saṅghapavāraṇāvasena ñatti ṭhapetabbā. Sace pana pacchimikāya eko hoti, tena saddhiṃ te cattāro honti, catunnaṃ saṅghañattiṃ ṭhapetvā pavāretuṃ na vaṭṭati. Gaṇañattiyā pana so gaṇapūrako hoti, tasmā gaṇavasena ñattiṃ ṭhapetvā purimehi pavāretabbaṃ, itarena tesaṃ santike pārisuddhiuposatho kātabboti. Purimikāya dve, pacchimikāya dve vā eko vā eseva nayo. Purimikāya eko pacchimikāya ekoti ekena ekassa santike pavāretabbaṃ, ekena pārisuddhiuposatho kātabbo. Sace purimehi vassūpagatehi pacchā vassūpagatā ekenapi adhikatarā honti, paṭhamaṃ pātimokkhaṃ uddisitvā pacchā thokatarehi tesaṃ santike pavāretabbaṃ.
கத்திகாய சாதுமாஸினிபவாரணாய பன ஸசே பட²மவஸ்ஸூபக³தேஹி மஹாபவாரணாய பவாரிதேஹி பச்சா² உபக³தா அதி⁴கதரா வா ஸமஸமா வா ஹொந்தி, பவாரணாஞத்திங் ட²பெத்வா பவாரேதப்³ப³ங். தேஹி பவாரிதே பச்சா² இதரேஹி பாரிஸுத்³தி⁴உபோஸதோ² காதப்³போ³. அத² மஹாபவாரணாயங் பவாரிதா ப³ஹூ ஹொந்தி, பச்சா² வஸ்ஸூபக³தா தோ²கா வா ஏகோ வா, பாதிமொக்கே² உத்³தி³ட்டே² பச்சா² தேஸங் ஸந்திகே தேன பவாரேதப்³ப³ங். கிங் பனேதங் பாதிமொக்க²ங் ஸகலமேவ உத்³தி³ஸிதப்³ப³ங், உதா³ஹு ஏகதே³ஸம்பீதி? ஏகதே³ஸம்பி உத்³தி³ஸிதுங் வட்டதி. வுத்தஞ்ஹேதங் ப⁴க³வதா –
Kattikāya cātumāsinipavāraṇāya pana sace paṭhamavassūpagatehi mahāpavāraṇāya pavāritehi pacchā upagatā adhikatarā vā samasamā vā honti, pavāraṇāñattiṃ ṭhapetvā pavāretabbaṃ. Tehi pavārite pacchā itarehi pārisuddhiuposatho kātabbo. Atha mahāpavāraṇāyaṃ pavāritā bahū honti, pacchā vassūpagatā thokā vā eko vā, pātimokkhe uddiṭṭhe pacchā tesaṃ santike tena pavāretabbaṃ. Kiṃ panetaṃ pātimokkhaṃ sakalameva uddisitabbaṃ, udāhu ekadesampīti? Ekadesampi uddisituṃ vaṭṭati. Vuttañhetaṃ bhagavatā –
‘‘பஞ்சிமே, பி⁴க்க²வே, பாதிமொக்கு²த்³தே³ஸா, நிதா³னங் உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் பட²மோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் து³தியோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா தேரஸ ஸங்கா⁴தி³ஸேஸே உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் ததியோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா தேரஸ ஸங்கா⁴தி³ஸேஸே உத்³தி³ஸித்வா த்³வே அனியதே உத்³தி³ஸித்வா அவஸேஸங் பு⁴தேன ஸாவேதப்³ப³ங், அயங் சதுத்தோ² பாதிமொக்கு²த்³தே³ஸோ. வித்தா²ரேனேவ பஞ்சமோ’’தி (மாஹாவ॰ 150).
‘‘Pañcime, bhikkhave, pātimokkhuddesā, nidānaṃ uddisitvā avasesaṃ sutena sāvetabbaṃ, ayaṃ paṭhamo pātimokkhuddeso. Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ, ayaṃ dutiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ, ayaṃ tatiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ bhutena sāvetabbaṃ, ayaṃ catuttho pātimokkhuddeso. Vitthāreneva pañcamo’’ti (māhāva. 150).
தத்த² (மஹாவ॰ அட்ட²॰ 150) நிதா³னங் உத்³தி³ஸித்வா அவஸேஸங் ஸுதேன ஸாவேதப்³ப³ந்தி ‘‘ஸுணாது மே, ப⁴ந்தே, ஸங்கோ⁴…பே॰… ஆவிகதா ஹிஸ்ஸ பா²ஸு ஹோதீ’’தி இமங் நிதா³னங் உத்³தி³ஸித்வா ‘‘உத்³தி³ட்ட²ங் கோ² ஆயஸ்மந்தோ நிதா³னங், தத்தா²யஸ்மந்தே புச்சா²மி கச்சித்த² பரிஸுத்³தா⁴. து³தியம்பி புச்சா²மி…பே॰… ஏவமேதங் தா⁴ரயாமி. ஸுதா கோ² பனாயஸ்மந்தேஹி சத்தாரோ பாராஜிகா த⁴ம்மா …பே॰… அவிவத³மானேஹி ஸிக்கி²தப்³ப³’’ந்தி ஏவங் அவஸேஸங் ஸுதேன ஸாவேதப்³ப³ங். ஏதேன நயேன ஸேஸாபி சத்தாரோ பாதிமொக்கு²த்³தே³ஸா வேதி³தப்³பா³.
Tattha (mahāva. aṭṭha. 150) nidānaṃ uddisitvā avasesaṃ sutena sāvetabbanti ‘‘suṇātu me, bhante, saṅgho…pe… āvikatā hissa phāsu hotī’’ti imaṃ nidānaṃ uddisitvā ‘‘uddiṭṭhaṃ kho āyasmanto nidānaṃ, tatthāyasmante pucchāmi kaccittha parisuddhā. Dutiyampi pucchāmi…pe… evametaṃ dhārayāmi. Sutā kho panāyasmantehi cattāro pārājikā dhammā …pe… avivadamānehi sikkhitabba’’nti evaṃ avasesaṃ sutena sāvetabbaṃ. Etena nayena sesāpi cattāro pātimokkhuddesā veditabbā.
174. ‘‘அனுஜானாமி, பி⁴க்க²வே, ஸதி அந்தராயே ஸங்கி²த்தேன பாதிமொக்க²ங் உத்³தி³ஸிதுங். ந, பி⁴க்க²வே, அஸதி அந்தராயே ஸங்கி²த்தேன பாதிமொக்க²ங் உத்³தி³ஸிதப்³ப³ங், யோ உத்³தி³ஸெய்ய, ஆபத்தி து³க்கடஸ்ஸா’’தி (மஹாவ॰ 150) வசனதோ பன வினா அந்தராயா ஸங்கி²த்தேன பாதிமொக்க²ங் ந உத்³தி³ஸிதப்³ப³ங். தத்ரிமே அந்தராயா – ராஜந்தராயோ சோரந்தராயோ அக்³யந்தராயோ உத³கந்தராயோ மனுஸ்ஸந்தராயோ அமனுஸ்ஸந்தராயோ வாளந்தராயோ ஸரீஸபந்தராயோ ஜீவிதந்தராயோ ப்³ரஹ்மசரியந்தராயோதி.
174. ‘‘Anujānāmi, bhikkhave, sati antarāye saṃkhittena pātimokkhaṃ uddisituṃ. Na, bhikkhave, asati antarāye saṃkhittena pātimokkhaṃ uddisitabbaṃ, yo uddiseyya, āpatti dukkaṭassā’’ti (mahāva. 150) vacanato pana vinā antarāyā saṃkhittena pātimokkhaṃ na uddisitabbaṃ. Tatrime antarāyā – rājantarāyo corantarāyo agyantarāyo udakantarāyo manussantarāyo amanussantarāyo vāḷantarāyo sarīsapantarāyo jīvitantarāyo brahmacariyantarāyoti.
தத்த² ஸசே பி⁴க்கூ²ஸு உபோஸத²ங் கரிஸ்ஸாமாதி நிஸின்னேஸு ராஜா ஆக³ச்ச²தி, அயங் ராஜந்தராயோ. சோரா ஆக³ச்ச²ந்தி, அயங் சோரந்தராயோ. த³வடா³ஹோ ஆக³ச்ச²தி, ஆவாஸே வா அக்³கி³ உட்டா²தி, அயங் அக்³யந்தராயோ. மேகோ⁴ வா உட்டே²தி, ஓகோ⁴ வா ஆக³ச்ச²தி, அயங் உத³கந்தராயோ. ப³ஹூ மனுஸ்ஸா ஆக³ச்ச²ந்தி, அயங் மனுஸ்ஸந்தராயோ. பி⁴க்கு²ங் யக்கோ² க³ண்ஹாதி, அயங் அமனுஸ்ஸந்தராயோ. ப்³யக்³கா⁴த³யோ சண்ட³மிகா³ ஆக³ச்ச²ந்தி, அயங் வாளந்தராயோ. பி⁴க்கு²ங் ஸப்பாத³யோ ட³ங்ஸந்தி, அயங் ஸரீஸபந்தராயோ. பி⁴க்கு² கி³லானோ வா ஹோதி, காலங் வா கரோதி, வேரினோ வா தங் மாரேதுகாமா க³ண்ஹந்தி, அயங் ஜீவிதந்தராயோ. மனுஸ்ஸா ஏகங் வா ப³ஹூ வா பி⁴க்கூ² ப்³ரஹ்மசரியா சாவேதுகாமா க³ண்ஹந்தி, அயங் ப்³ரஹ்மசரியந்தராயோ. ஏவரூபேஸு அந்தராயேஸு ஸங்கி²த்தேன பாதிமொக்கோ² உத்³தி³ஸிதப்³போ³, பட²மோ வா உத்³தே³ஸோ உத்³தி³ஸிதப்³போ³. ஆதி³ம்ஹி த்³வே தயோ சத்தாரோ வா. எத்த² து³தியாதீ³ஸு உத்³தே³ஸேஸு யஸ்மிங் அபரியோஸிதே அந்தராயோ ஹோதி, ஸோபி ஸுதேனேவ ஸாவேதப்³போ³. நிதா³னுத்³தே³ஸே பன அனிட்டி²தே ஸுதேன ஸாவேதப்³ப³ங் நாம நத்தி².
Tattha sace bhikkhūsu uposathaṃ karissāmāti nisinnesu rājā āgacchati, ayaṃ rājantarāyo. Corā āgacchanti, ayaṃ corantarāyo. Davaḍāho āgacchati, āvāse vā aggi uṭṭhāti, ayaṃ agyantarāyo. Megho vā uṭṭheti, ogho vā āgacchati, ayaṃ udakantarāyo. Bahū manussā āgacchanti, ayaṃ manussantarāyo. Bhikkhuṃ yakkho gaṇhāti, ayaṃ amanussantarāyo. Byagghādayo caṇḍamigā āgacchanti, ayaṃ vāḷantarāyo. Bhikkhuṃ sappādayo ḍaṃsanti, ayaṃ sarīsapantarāyo. Bhikkhu gilāno vā hoti, kālaṃ vā karoti, verino vā taṃ māretukāmā gaṇhanti, ayaṃ jīvitantarāyo. Manussā ekaṃ vā bahū vā bhikkhū brahmacariyā cāvetukāmā gaṇhanti, ayaṃ brahmacariyantarāyo. Evarūpesu antarāyesu saṃkhittena pātimokkho uddisitabbo, paṭhamo vā uddeso uddisitabbo. Ādimhi dve tayo cattāro vā. Ettha dutiyādīsu uddesesu yasmiṃ apariyosite antarāyo hoti, sopi suteneva sāvetabbo. Nidānuddese pana aniṭṭhite sutena sāvetabbaṃ nāma natthi.
பவாரணாகம்மேபி ஸதி அந்தராயே த்³வேவாசிகங் ஏகவாசிகங் ஸமானவஸ்ஸிகங் வா பவாரேதுங் வட்டதி. எத்த² (மஹாவ॰ அட்ட²॰ 234) ஞத்திங் ட²பெந்தேனபி ‘‘யதி³ ஸங்க⁴ஸ்ஸ பத்தகல்லங், ஸங்கோ⁴ த்³வேவாசிகங் பவாரெய்யா’’தி வத்தப்³ப³ங். ஏகவாசிகே ‘‘ஏகவாசிகங் பவாரெய்யா’’தி, ஸமானவஸ்ஸிகேபி ‘‘ஸமானவஸ்ஸிகங் பவாரெய்யா’’தி வத்தப்³ப³ங். எத்த² ச ப³ஹூபி ஸமானவஸ்ஸா ஏகதோ பவாரேதுங் லப⁴ந்தி. ‘‘ஸுணாது மே, ப⁴ந்தே, ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லங், ஸங்கோ⁴ பவாரெய்யா’’தி இமாய பன ஸப்³ப³ஸங்கா³ஹிகாய ஞத்தியா ட²பிதாய தேவாசிகங் த்³வேவாசிகங் ஏகவாசிகஞ்ச பவாரேதுங் வட்டதி, ஸமானவஸ்ஸிகங் ந வட்டதி. ‘‘தேவாசிகங் பவாரெய்யா’’தி வுத்தே பன தேவாசிகமேவ வட்டதி, அஞ்ஞங் ந வட்டதி. ‘‘த்³வேவாசிகங் பவாரெய்யா’’தி வுத்தே த்³வேவாசிகங் தேவாசிகஞ்ச வட்டதி, ஏகவாசிகஞ்ச ஸமானவஸ்ஸிகஞ்ச ந வட்டதி. ‘‘ஏகவாசிகங் பவாரெய்யா’’தி வுத்தே பன ஏகவாசிகத்³வேவாசிகதேவாசிகானி வட்டந்தி, ஸமானவஸ்ஸிகமேவ ந வட்டதி. ‘‘ஸமானவஸ்ஸிக’’ந்தி வுத்தே ஸப்³ப³ங் வட்டதி.
Pavāraṇākammepi sati antarāye dvevācikaṃ ekavācikaṃ samānavassikaṃ vā pavāretuṃ vaṭṭati. Ettha (mahāva. aṭṭha. 234) ñattiṃ ṭhapentenapi ‘‘yadi saṅghassa pattakallaṃ, saṅgho dvevācikaṃ pavāreyyā’’ti vattabbaṃ. Ekavācike ‘‘ekavācikaṃ pavāreyyā’’ti, samānavassikepi ‘‘samānavassikaṃ pavāreyyā’’ti vattabbaṃ. Ettha ca bahūpi samānavassā ekato pavāretuṃ labhanti. ‘‘Suṇātu me, bhante, saṅgho, ajja pavāraṇā pannarasī, yadi saṅghassa pattakallaṃ, saṅgho pavāreyyā’’ti imāya pana sabbasaṅgāhikāya ñattiyā ṭhapitāya tevācikaṃ dvevācikaṃ ekavācikañca pavāretuṃ vaṭṭati, samānavassikaṃ na vaṭṭati. ‘‘Tevācikaṃ pavāreyyā’’ti vutte pana tevācikameva vaṭṭati, aññaṃ na vaṭṭati. ‘‘Dvevācikaṃ pavāreyyā’’ti vutte dvevācikaṃ tevācikañca vaṭṭati, ekavācikañca samānavassikañca na vaṭṭati. ‘‘Ekavācikaṃ pavāreyyā’’ti vutte pana ekavācikadvevācikatevācikāni vaṭṭanti, samānavassikameva na vaṭṭati. ‘‘Samānavassika’’nti vutte sabbaṃ vaṭṭati.
175. கேன பன பாதிமொக்க²ங் உத்³தி³ஸிதப்³ப³ந்தி? ‘‘அனுஜானாமி, பி⁴க்க²வே, தே²ராதி⁴கங் பாதிமொக்க²’’ந்தி (மஹாவ॰ 154) வசனதோ தே²ரேன வா பாதிமொக்க²ங் உத்³தி³ஸிதப்³ப³ங், ‘‘அனுஜானாமி, பி⁴க்க²வே, யோ தத்த² பி⁴க்கு² ப்³யத்தோ படிப³லோ, தஸ்ஸாதெ⁴ய்யங் பாதிமொக்க²’’ந்தி (மஹாவ॰ 155) வசனதோ நவகதரேன வா. எத்த² (மஹாவ॰ அட்ட²॰ 155) ச கிஞ்சாபி நவகதரஸ்ஸபி ப்³யத்தஸ்ஸ பாதிமொக்க²ங் அனுஞ்ஞாதங், அத² கோ² எத்த² அயங் அதி⁴ப்பாயோ – ஸசே தே²ரஸ்ஸ பஞ்ச வா சத்தாரோ வா தயோ வா பாதிமொக்கு²த்³தே³ஸா நாக³ச்ச²ந்தி, த்³வே பன அக²ண்டா³ ஸுவிஸதா³ வாசுக்³க³தா ஹொந்தி, தே²ராயத்தங்வ பாதிமொக்க²ங். ஸசே பன எத்தகம்பி விஸத³ங் காதுங் ந ஸக்கோதி, ப்³யத்தஸ்ஸ பி⁴க்கு²னோ ஆயத்த²ங் ஹோதி, தஸ்மா ஸயங் வா உத்³தி³ஸிதப்³ப³ங், அஞ்ஞோ வா அஜ்ஜே²ஸிதப்³போ³. ‘‘ந, பி⁴க்க²வே, ஸங்க⁴மஜ்ஜே² அனஜ்ஜி²ட்டே²ன பாதிமொக்க²ங் உத்³தி³ஸிதப்³ப³ங், யோ உத்³தி³ஸெய்ய, ஆபத்தி து³க்கடஸ்ஸா’’தி (மஹாவ॰ 154) வசனதோ அனஜ்ஜி²ட்டே²ன பாதிமொக்க²ங் ந உத்³தி³ஸிதப்³ப³ங். ந கேவலங் பாதிமொக்க²ங்யேவ, த⁴ம்மோபி ந பா⁴ஸிதப்³போ³ ‘‘ந, பி⁴க்க²வே, ஸங்க⁴மஜ்ஜே² அனஜ்ஜி²ட்டே²ன த⁴ம்மோ பா⁴ஸிதப்³போ³, யோ பா⁴ஸெய்ய, ஆபத்தி து³க்கடஸ்ஸா’’தி (மஹாவ॰ 150) வசனதோ.
175. Kena pana pātimokkhaṃ uddisitabbanti? ‘‘Anujānāmi, bhikkhave, therādhikaṃ pātimokkha’’nti (mahāva. 154) vacanato therena vā pātimokkhaṃ uddisitabbaṃ, ‘‘anujānāmi, bhikkhave, yo tattha bhikkhu byatto paṭibalo, tassādheyyaṃ pātimokkha’’nti (mahāva. 155) vacanato navakatarena vā. Ettha (mahāva. aṭṭha. 155) ca kiñcāpi navakatarassapi byattassa pātimokkhaṃ anuññātaṃ, atha kho ettha ayaṃ adhippāyo – sace therassa pañca vā cattāro vā tayo vā pātimokkhuddesā nāgacchanti, dve pana akhaṇḍā suvisadā vācuggatā honti, therāyattaṃva pātimokkhaṃ. Sace pana ettakampi visadaṃ kātuṃ na sakkoti, byattassa bhikkhuno āyatthaṃ hoti, tasmā sayaṃ vā uddisitabbaṃ, añño vā ajjhesitabbo. ‘‘Na, bhikkhave, saṅghamajjhe anajjhiṭṭhena pātimokkhaṃ uddisitabbaṃ, yo uddiseyya, āpatti dukkaṭassā’’ti (mahāva. 154) vacanato anajjhiṭṭhena pātimokkhaṃ na uddisitabbaṃ. Na kevalaṃ pātimokkhaṃyeva, dhammopi na bhāsitabbo ‘‘na, bhikkhave, saṅghamajjhe anajjhiṭṭhena dhammo bhāsitabbo, yo bhāseyya, āpatti dukkaṭassā’’ti (mahāva. 150) vacanato.
அஜ்ஜே²ஸனா செத்த² ஸங்கே⁴ன ஸம்மதத⁴ம்மஜ்ஜே²ஸகாயத்தா வா ஸங்க⁴த்தே² ராயத்தா வா, தஸ்மா த⁴ம்மஜ்ஜே²ஸகே அஸதி ஸங்க⁴த்தே²ரங் ஆபுச்சி²த்வா வா தேன யாசிதோ வா பா⁴ஸிதுங் லப⁴தி. ஸங்க⁴த்தே²ரேனபி ஸசே விஹாரே ப³ஹூ த⁴ம்மகதி²கா ஹொந்தி, வாரபடிபாடியா வத்தப்³போ³. ‘‘த்வங் த⁴ம்மங் ப⁴ண, த⁴ம்மதா³னங் தே³ஹீ’’தி வா வுத்தேன தீஹிபி விதீ⁴ஹி த⁴ம்மோ பா⁴ஸிதப்³போ³, ‘‘ஓஸாரேஹீ’’தி வுத்தோ பன ஓஸாரேதுமேவ லப⁴தி, ‘‘கதே²ஹீ’’தி வுத்தோ கதே²துமேவ, ‘‘ஸரப⁴ஞ்ஞங் ப⁴ணாஹீ’’தி வுத்தோ ஸரப⁴ஞ்ஞமேவ. ஸங்க⁴த்தே²ரோபி ச உச்சதரே ஆஸனே நிஸின்னோ யாசிதுங் ந லப⁴தி. ஸசே உபஜ்ஜா²யோ சேவ ஸத்³தி⁴விஹாரிகோ ச ஹோதி, உபஜ்ஜா²யோ ச நங் உச்சாஸனே நிஸின்னோ ‘‘ப⁴ணா’’தி வத³தி, ஸஜ்ஜா²யங் அதி⁴ட்ட²ஹித்வா ப⁴ணிதப்³ப³ங். ஸசே பனெத்த² த³ஹரபி⁴க்கூ² ஹொந்தி, ‘‘தேஸங் ப⁴ணாமீ’’தி ப⁴ணிதப்³ப³ங். ஸசே விஹாரே ஸங்க⁴த்தே²ரோ அத்தனோயேவ நிஸ்ஸிதகே ப⁴ணாபேதி, அஞ்ஞே மது⁴ரபா⁴ணகேபி நாஜ்ஜே²ஸதி, ஸோ அஞ்ஞேஹி வத்தப்³போ³ – ‘‘ப⁴ந்தே, அஸுகங் நாம ப⁴ணாபேமா’’தி. ஸசே ‘‘ப⁴ணாபேதா²’’தி வத³தி, துண்ஹீ வா ஹோதி, ப⁴ணாபேதுங் வட்டதி. ஸசே பன படிபா³ஹதி, ந ப⁴ணாபேதப்³ப³ங். யதி³ பன அனாக³தேயேவ ஸங்க⁴த்தே²ரே த⁴ம்மஸ்ஸவனங் ஆரத்³த⁴ங், புன ஆக³தே ட²பெத்வா ஆபுச்ச²னகிச்சங் நத்தி². ஓஸாரெத்வா பன கதெ²ந்தேன ஆபுச்சி²த்வா அட்ட²பெத்வாயேவ வா கதே²தப்³ப³ங். கதெ²ந்தஸ்ஸ புன ஆக³தேபி ஏஸேவ நயோ.
Ajjhesanā cettha saṅghena sammatadhammajjhesakāyattā vā saṅghatthe rāyattā vā, tasmā dhammajjhesake asati saṅghattheraṃ āpucchitvā vā tena yācito vā bhāsituṃ labhati. Saṅghattherenapi sace vihāre bahū dhammakathikā honti, vārapaṭipāṭiyā vattabbo. ‘‘Tvaṃ dhammaṃ bhaṇa, dhammadānaṃ dehī’’ti vā vuttena tīhipi vidhīhi dhammo bhāsitabbo, ‘‘osārehī’’ti vutto pana osāretumeva labhati, ‘‘kathehī’’ti vutto kathetumeva, ‘‘sarabhaññaṃ bhaṇāhī’’ti vutto sarabhaññameva. Saṅghattheropi ca uccatare āsane nisinno yācituṃ na labhati. Sace upajjhāyo ceva saddhivihāriko ca hoti, upajjhāyo ca naṃ uccāsane nisinno ‘‘bhaṇā’’ti vadati, sajjhāyaṃ adhiṭṭhahitvā bhaṇitabbaṃ. Sace panettha daharabhikkhū honti, ‘‘tesaṃ bhaṇāmī’’ti bhaṇitabbaṃ. Sace vihāre saṅghatthero attanoyeva nissitake bhaṇāpeti, aññe madhurabhāṇakepi nājjhesati, so aññehi vattabbo – ‘‘bhante, asukaṃ nāma bhaṇāpemā’’ti. Sace ‘‘bhaṇāpethā’’ti vadati, tuṇhī vā hoti, bhaṇāpetuṃ vaṭṭati. Sace pana paṭibāhati, na bhaṇāpetabbaṃ. Yadi pana anāgateyeva saṅghatthere dhammassavanaṃ āraddhaṃ, puna āgate ṭhapetvā āpucchanakiccaṃ natthi. Osāretvā pana kathentena āpucchitvā aṭṭhapetvāyeva vā kathetabbaṃ. Kathentassa puna āgatepi eseva nayo.
உபனிஸின்னகதா²யம்பி ஸங்க⁴த்தே²ரோவ ஸாமீ, தஸ்மா தேன ஸயங் வா கதே²தப்³ப³ங், அஞ்ஞோ வா பி⁴க்கு² ‘‘கதே²ஹீ’’தி வத்தப்³போ³, நோ ச கோ² உச்சதரே ஆஸன்னே நிஸின்னேன, மனுஸ்ஸானங் பன ‘‘ப⁴ணாஹீ’’தி வத்துங் வட்டதி. மனுஸ்ஸா அத்தனோ ஜானநகங் பி⁴க்கு²ங் புச்ச²ந்தி, தேன தே²ரங் ஆபுச்சி²த்வாபி கதே²தப்³ப³ங். ஸசே ஸங்க⁴த்தே²ரோ ‘‘ப⁴ந்தே, இமே பஞ்ஹங் புச்ச²ந்தீ’’தி புட்டோ² ‘‘கதே²ஹீ’’தி வா ப⁴ணதி, துண்ஹீ வா ஹோதி, கதே²துங் வட்டதி. அந்தரக⁴ரே அனுமோத³னாதீ³ஸுபி ஏஸேவ நயோ. ஸசே ஸங்க⁴த்தே²ரோ ‘‘விஹாரே வா அந்தரக⁴ரே வா மங் அனாபுச்சி²த்வாபி கதெ²ய்யாஸீ’’தி அனுஜானாதி, லத்³த⁴கப்பியங் ஹோதி, ஸப்³ப³த்த² வத்துங் வட்டதி. ஸஜ்ஜா²யங் கரொந்தேனாபி தே²ரோ ஆபுச்சி²தப்³போ³யேவ. ஏகங் ஆபுச்சி²த்வா ஸஜ்ஜா²யந்தஸ்ஸ அபரோ ஆக³ச்ச²தி, புன ஆபுச்ச²னகிச்சங் நத்தி². ஸசேபி ‘‘விஸ்ஸமிஸ்ஸாமீ’’தி ட²பிதஸ்ஸ ஆக³ச்ச²தி, புன ஆரப⁴ந்தேன ஆபுச்சி²தப்³ப³ங். ஸங்க⁴த்தே²ரே அனாக³தேயேவ ஆரத்³த⁴ங் ஸஜ்ஜா²யந்தஸ்ஸாபி ஏஸேவ நயோ. ஏகேன ஸங்க⁴த்தே²ரேன ‘‘மங் அனாபுச்சா²பி யதா²ஸுக²ங் ஸஜ்ஜா²யாஹீ’’தி அனுஞ்ஞாதே யதா²ஸுக²ங் ஸஜ்ஜா²யிதுங் வட்டதி, அஞ்ஞஸ்மிங் பன ஆக³தே தங் ஆபுச்சி²த்வாவ ஸஜ்ஜா²யிதப்³ப³ங்.
Upanisinnakathāyampi saṅghattherova sāmī, tasmā tena sayaṃ vā kathetabbaṃ, añño vā bhikkhu ‘‘kathehī’’ti vattabbo, no ca kho uccatare āsanne nisinnena, manussānaṃ pana ‘‘bhaṇāhī’’ti vattuṃ vaṭṭati. Manussā attano jānanakaṃ bhikkhuṃ pucchanti, tena theraṃ āpucchitvāpi kathetabbaṃ. Sace saṅghatthero ‘‘bhante, ime pañhaṃ pucchantī’’ti puṭṭho ‘‘kathehī’’ti vā bhaṇati, tuṇhī vā hoti, kathetuṃ vaṭṭati. Antaraghare anumodanādīsupi eseva nayo. Sace saṅghatthero ‘‘vihāre vā antaraghare vā maṃ anāpucchitvāpi katheyyāsī’’ti anujānāti, laddhakappiyaṃ hoti, sabbattha vattuṃ vaṭṭati. Sajjhāyaṃ karontenāpi thero āpucchitabboyeva. Ekaṃ āpucchitvā sajjhāyantassa aparo āgacchati, puna āpucchanakiccaṃ natthi. Sacepi ‘‘vissamissāmī’’ti ṭhapitassa āgacchati, puna ārabhantena āpucchitabbaṃ. Saṅghatthere anāgateyeva āraddhaṃ sajjhāyantassāpi eseva nayo. Ekena saṅghattherena ‘‘maṃ anāpucchāpi yathāsukhaṃ sajjhāyāhī’’ti anuññāte yathāsukhaṃ sajjhāyituṃ vaṭṭati, aññasmiṃ pana āgate taṃ āpucchitvāva sajjhāyitabbaṃ.
யஸ்மிங் பன விஹாரே ஸப்³பே³வ பி⁴க்கூ² பா³லா ஹொந்தி அப்³யத்தா ந ஜானந்தி பாதிமொக்க²ங் உத்³தி³ஸிதுங், தத்த² கிங் காதப்³ப³ந்தி? தேஹி பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகங் பாஹேதப்³போ³ ‘‘க³ச்சா²வுஸோ, ஸங்கி²த்தேன வா வித்தா²ரேன வா பாதிமொக்க²ங் பரியாபுணித்வா ஆக³ச்சா²ஹீ’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², தேஹி பி⁴க்கூ²ஹி ஸப்³பே³ஹேவ யத்த² தாதி³ஸா பி⁴க்கூ² ஹொந்தி, ஸோ ஆவாஸோ உபோஸத²கரணத்தா²ய அன்வட்³ட⁴மாஸங் க³ந்தப்³போ³, அக³ச்ச²ந்தானங் து³க்கடங். இத³ஞ்ச உதுவஸ்ஸேயேவ, வஸ்ஸானே பன புரிமிகாய பாதிமொக்கு²த்³தே³ஸகேன வினா ந வஸ்ஸங் உபக³ச்சி²தப்³ப³ங். ஸசே ஸோ வஸ்ஸூபக³தானங் பக்கமதி வா விப்³ப⁴மதி வா காலங் வா கரோதி, அஞ்ஞஸ்மிங் ஸதியேவ பச்சி²மிகாய வஸிதுங் வட்டதி, அஸதி அஞ்ஞத்த² க³ந்தப்³ப³ங், அக³ச்ச²ந்தானங் து³க்கடங். ஸசே பன பச்சி²மிகாய பக்கமதி வா விப்³ப⁴மதி வா காலங் வா கரோதி, மாஸத்³வயங் வஸிதப்³ப³ங்.
Yasmiṃ pana vihāre sabbeva bhikkhū bālā honti abyattā na jānanti pātimokkhaṃ uddisituṃ, tattha kiṃ kātabbanti? Tehi bhikkhūhi eko bhikkhu sāmantā āvāsā sajjukaṃ pāhetabbo ‘‘gacchāvuso, saṃkhittena vā vitthārena vā pātimokkhaṃ pariyāpuṇitvā āgacchāhī’’ti. Evañcetaṃ labhetha, iccetaṃ kusalaṃ. No ce labhetha, tehi bhikkhūhi sabbeheva yattha tādisā bhikkhū honti, so āvāso uposathakaraṇatthāya anvaḍḍhamāsaṃ gantabbo, agacchantānaṃ dukkaṭaṃ. Idañca utuvasseyeva, vassāne pana purimikāya pātimokkhuddesakena vinā na vassaṃ upagacchitabbaṃ. Sace so vassūpagatānaṃ pakkamati vā vibbhamati vā kālaṃ vā karoti, aññasmiṃ satiyeva pacchimikāya vasituṃ vaṭṭati, asati aññattha gantabbaṃ, agacchantānaṃ dukkaṭaṃ. Sace pana pacchimikāya pakkamati vā vibbhamati vā kālaṃ vā karoti, māsadvayaṃ vasitabbaṃ.
யத்த² பன தே பா³லா பி⁴க்கூ² விஹரந்தி அப்³யத்தா, ஸசே தத்த² கோசி பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ, தேஹி பி⁴க்கூ²ஹி ஸோ பி⁴க்கு² ஸங்க³ஹேதப்³போ³ அனுக்³க³ஹேதப்³போ³ உபலாபேதப்³போ³ , உபட்டா²பேதப்³போ³ சுண்ணேன மத்திகாய த³ந்தகட்டே²ன முகோ²த³கேன. நோ சே ஸங்க³ஹெய்யுங் அனுக்³க³ஹெய்யுங் உபலாபெய்யுங், உபட்டா²பெய்யுங் சுண்ணேன மத்திகாய த³ந்தகட்டே²ன முகோ²த³கேன, ஸப்³பே³ஸங் து³க்கடங். இத⁴ நேவ தே²ரா, ந த³ஹரா முச்சந்தி, ஸப்³பே³ஹி வாரேன உபட்டா²பேதப்³போ³. அத்தனோ வாரே அனுபட்ட²ஹந்தஸ்ஸ ஆபத்தி. தேன பன மஹாதே²ரானங் பரிவேணஸம்மஜ்ஜனத³ந்தகட்ட²தா³னாதீ³னி ந ஸாதி³தப்³பா³னி, ஏவம்பி ஸதி மஹாதே²ரேஹி ஸாயங்பாதங் உபட்டா²னங் ஆக³ந்தப்³ப³ங், தேன பன தேஸங் ஆக³மனங் ஞத்வா பட²மதரங் மஹாதே²ரானங் உபட்டா²னங் க³ந்தப்³ப³ங். ஸசஸ்ஸ ஸத்³தி⁴ஞ்சரா பி⁴க்கூ² உபட்டா²கா அத்தி², ‘‘மய்ஹங் உபட்டா²கா அத்தி², தும்ஹே அப்பொஸ்ஸுக்கா விஹரதா²’’தி வத்தப்³ப³ங். அதா²பிஸ்ஸ ஸத்³தி⁴ஞ்சரா நத்தி², தஸ்மிங்யேவ விஹாரே ஏகோ வா த்³வே வா வத்தஸம்பன்னா வத³ந்தி ‘‘மயங் தே²ரஸ்ஸ கத்தப்³ப³ங் கரிஸ்ஸாம, அவஸேஸா பா²ஸு விஹரந்தூ’’தி, ஸப்³பே³ஸங் அனாபத்தி.
Yattha pana te bālā bhikkhū viharanti abyattā, sace tattha koci bhikkhu āgacchati bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo, tehi bhikkhūhi so bhikkhu saṅgahetabbo anuggahetabbo upalāpetabbo , upaṭṭhāpetabbo cuṇṇena mattikāya dantakaṭṭhena mukhodakena. No ce saṅgaheyyuṃ anuggaheyyuṃ upalāpeyyuṃ, upaṭṭhāpeyyuṃ cuṇṇena mattikāya dantakaṭṭhena mukhodakena, sabbesaṃ dukkaṭaṃ. Idha neva therā, na daharā muccanti, sabbehi vārena upaṭṭhāpetabbo. Attano vāre anupaṭṭhahantassa āpatti. Tena pana mahātherānaṃ pariveṇasammajjanadantakaṭṭhadānādīni na sāditabbāni, evampi sati mahātherehi sāyaṃpātaṃ upaṭṭhānaṃ āgantabbaṃ, tena pana tesaṃ āgamanaṃ ñatvā paṭhamataraṃ mahātherānaṃ upaṭṭhānaṃ gantabbaṃ. Sacassa saddhiñcarā bhikkhū upaṭṭhākā atthi, ‘‘mayhaṃ upaṭṭhākā atthi, tumhe appossukkā viharathā’’ti vattabbaṃ. Athāpissa saddhiñcarā natthi, tasmiṃyeva vihāre eko vā dve vā vattasampannā vadanti ‘‘mayaṃ therassa kattabbaṃ karissāma, avasesā phāsu viharantū’’ti, sabbesaṃ anāpatti.
176. ‘‘யஸ்ஸ ஸியா ஆபத்தி, ஸோ ஆவிகரெய்யா’’தி(மஹாவ॰ 134) ஆதி³வசனதோ ந ஸாபத்திகேன உபோஸதோ² காதப்³போ³, தஸ்மா தத³ஹுபோஸதே² ஆபத்திங் ஸரந்தேன தே³ஸேதப்³பா³. தே³ஸெந்தேன ச ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவங் வத்தப்³போ³ ‘‘அஹங், ஆவுஸோ, இத்த²ன்னாமங் ஆபத்திங் ஆபன்னோ, தங் படிதே³ஸேமீ’’தி. ஸசே நவகதரோ ஹோதி, ‘‘அஹங், ப⁴ந்தே’’தி வத்தப்³ப³ங். ‘‘தங் படிதே³ஸேமீ’’தி இத³ங் பன அத்தனோ அத்தனோ அனுரூபவஸேன ‘‘தங் துய்ஹமூலே, தங் தும்ஹமூலே படிதே³ஸேமீ’’தி வுத்தேபி ஸுவுத்தமேவ ஹோதி. படிக்³கா³ஹகேனபி அத்தனோ அத்தனோ அனுரூபவஸேன ‘‘பஸ்ஸத², ப⁴ந்தே, தங் ஆபத்திங், பஸ்ஸஸி, ஆவுஸோ, தங் ஆபத்தி’’ந்தி வா வத்தப்³ப³ங், புன தே³ஸகேன ‘‘ஆம, ஆவுஸோ, பஸ்ஸாமி, ஆம, ப⁴ந்தே, பஸ்ஸாமீ’’தி வா வத்தப்³ப³ங். புன படிக்³கா³ஹகேன ‘‘ஆயதிங், ப⁴ந்தே, ஸங்வரெய்யாத², ஆயதிங், ஆவுஸோ, ஸங்வரெய்யாஸீ’’தி வா வத்தப்³ப³ங். ஏவங் வுத்தே தே³ஸகேன ‘‘ஸாது⁴ ஸுட்டு² ஆவுஸோ ஸங்வரிஸ்ஸாமி, ஸாது⁴ ஸுட்டு², ப⁴ந்தே, ஸங்வரிஸ்ஸாமீ’’தி வா வத்தப்³ப³ங். ஸசே ஆபத்தியா வேமதிகோ ஹோதி, ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவங் வத்தப்³போ³ ‘‘அஹங், ஆவுஸோ, இத்த²ன்னாமாய ஆபத்தியா வேமதிகோ, யதா³ நிப்³பே³மதிகோ ப⁴விஸ்ஸாமி, ததா³ தங் ஆபத்திங் படிகரிஸ்ஸாமீ’’தி வத்வா உபோஸதோ² காதப்³போ³, பாதிமொக்க²ங் ஸோதப்³ப³ங், ந த்வேவ தப்பச்சயா உபோஸத²ஸ்ஸ அந்தராயோ காதப்³போ³. ‘‘ந, பி⁴க்க²வே, ஸபா⁴கா³ ஆபத்தி தே³ஸேதப்³பா³, யோ தே³ஸெய்ய, ஆபத்தி து³க்கடஸ்ஸ. ந, பி⁴க்க²வே, ஸபா⁴கா³ ஆபத்தி படிக்³க³ஹேதப்³பா³, யோ படிக்³க³ண்ஹெய்ய, ஆபத்தி து³க்கடஸ்ஸா’’தி (மஹாவ॰ 169) வசனதோ யங் த்³வேபி ஜனா விகாலபோ⁴ஜனாதி³னா ஸபா⁴க³வத்து²னா ஆபத்திங் ஆபஜ்ஜந்தி, ஏவரூபா வத்து²ஸபா⁴கா³ ஆபத்தி நேவ தே³ஸேதப்³பா³, ந ச படிக்³க³ஹேதப்³பா³. விகாலபோ⁴ஜனபச்சயா ஆபன்னங் பன ஆபத்திஸபா⁴க³ங் அனதிரித்தபோ⁴ஜனபச்சயா ஆபன்னஸ்ஸ ஸந்திகே தே³ஸேதுங் வட்டதி.
176. ‘‘Yassa siyā āpatti, so āvikareyyā’’ti(mahāva. 134) ādivacanato na sāpattikena uposatho kātabbo, tasmā tadahuposathe āpattiṃ sarantena desetabbā. Desentena ca ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evaṃ vattabbo ‘‘ahaṃ, āvuso, itthannāmaṃ āpattiṃ āpanno, taṃ paṭidesemī’’ti. Sace navakataro hoti, ‘‘ahaṃ, bhante’’ti vattabbaṃ. ‘‘Taṃ paṭidesemī’’ti idaṃ pana attano attano anurūpavasena ‘‘taṃ tuyhamūle, taṃ tumhamūle paṭidesemī’’ti vuttepi suvuttameva hoti. Paṭiggāhakenapi attano attano anurūpavasena ‘‘passatha, bhante, taṃ āpattiṃ, passasi, āvuso, taṃ āpatti’’nti vā vattabbaṃ, puna desakena ‘‘āma, āvuso, passāmi, āma, bhante, passāmī’’ti vā vattabbaṃ. Puna paṭiggāhakena ‘‘āyatiṃ, bhante, saṃvareyyātha, āyatiṃ, āvuso, saṃvareyyāsī’’ti vā vattabbaṃ. Evaṃ vutte desakena ‘‘sādhu suṭṭhu āvuso saṃvarissāmi, sādhu suṭṭhu, bhante, saṃvarissāmī’’ti vā vattabbaṃ. Sace āpattiyā vematiko hoti, ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evaṃ vattabbo ‘‘ahaṃ, āvuso, itthannāmāya āpattiyā vematiko, yadā nibbematiko bhavissāmi, tadā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ, na tveva tappaccayā uposathassa antarāyo kātabbo. ‘‘Na, bhikkhave, sabhāgā āpatti desetabbā, yo deseyya, āpatti dukkaṭassa. Na, bhikkhave, sabhāgā āpatti paṭiggahetabbā, yo paṭiggaṇheyya, āpatti dukkaṭassā’’ti (mahāva. 169) vacanato yaṃ dvepi janā vikālabhojanādinā sabhāgavatthunā āpattiṃ āpajjanti, evarūpā vatthusabhāgā āpatti neva desetabbā, na ca paṭiggahetabbā. Vikālabhojanapaccayā āpannaṃ pana āpattisabhāgaṃ anatirittabhojanapaccayā āpannassa santike desetuṃ vaṭṭati.
ஸசே பன ஸப்³போ³ ஸங்கோ⁴ விகாலபோ⁴ஜனாதி³னா ஸபா⁴க³வத்து²னா லஹுகாபத்திங் ஆபஜ்ஜதி, தத்த² கிங் காதப்³ப³ந்தி? தேஹி பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகங் பாஹேதப்³போ³ ‘‘க³ச்சா²வுஸோ, தங் ஆபத்திங் படிகரித்வா ஆக³ச்ச², மயங் தே ஸந்திகே ஆபத்திங் படிகரிஸ்ஸாமா’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴, அயங் ஸப்³போ³ ஸங்கோ⁴ ஸபா⁴க³ங் ஆபத்திங் ஆபன்னோ, யதா³ அஞ்ஞங் பி⁴க்கு²ங் ஸுத்³த⁴ங் அனாபத்திகங் பஸ்ஸிஸ்ஸதி, ததா³ தஸ்ஸ ஸந்திகே தங் ஆபத்திங் படிகரிஸ்ஸதீ’’தி (மஹாவ॰ 171) வத்வா உபோஸதோ² காதப்³போ³. ஸசே பன வேமதிகோ ஹோதி, ‘‘ஸுணாது மே, ப⁴ந்தே, ஸங்கோ⁴, அயங் ஸப்³போ³ ஸங்கோ⁴ ஸபா⁴கா³ய ஆபத்தியா வேமதிகோ, யதா³ நிப்³பே³மதிகோ ப⁴விஸ்ஸதி, ததா³ தங் ஆபத்திங் படிகரிஸ்ஸதீ’’தி (மஹாவ॰ 171) வத்வா உபோஸதோ² காதப்³போ³. ஸசே பனெத்த² கோசி ‘‘தங் ஸபா⁴க³ங் ஆபத்திங் தே³ஸேதுங் வட்டதீ’’தி மஞ்ஞமானோ ஏகஸ்ஸ ஸந்திகே தே³ஸேதி, தே³ஸிதா ஸுதே³ஸிதாவ. அஞ்ஞங் பன தே³ஸனாபச்சயா தே³ஸகோ படிக்³க³ஹணபச்சயா படிக்³கா³ஹகோ சாதி உபோ⁴பி து³க்கடங் ஆபஜ்ஜந்தி, தங் நானாவத்து²கங் ஹோதி, தஸ்மா அஞ்ஞமஞ்ஞங் தே³ஸேதப்³ப³ங். எத்தாவதா தே நிராபத்திகா ஹொந்தி, தேஸங் ஸந்திகே ஸேஸேஹி ஸபா⁴கா³பத்தியோ தே³ஸேதப்³பா³ வா ஆரோசேதப்³பா³ வா. ஸசே தே ஏவங் அகத்வா உபோஸத²ங் கரொந்தி, ‘‘பாரிஸுத்³தி⁴ங் ஆயஸ்மந்தோ ஆரோசேதா²’’திஆதி³னா நயேன ஸாபத்திகஸ்ஸ உபோஸத²கரணே பஞ்ஞத்தங் து³க்கடங் ஆபஜ்ஜந்தி.
Sace pana sabbo saṅgho vikālabhojanādinā sabhāgavatthunā lahukāpattiṃ āpajjati, tattha kiṃ kātabbanti? Tehi bhikkhūhi eko bhikkhu sāmantā āvāsā sajjukaṃ pāhetabbo ‘‘gacchāvuso, taṃ āpattiṃ paṭikaritvā āgaccha, mayaṃ te santike āpattiṃ paṭikarissāmā’’ti. Evañcetaṃ labhetha, iccetaṃ kusalaṃ. No ce labhetha, byattena bhikkhunā paṭibalena saṅgho ñāpetabbo – ‘‘suṇātu me, bhante, saṅgho, ayaṃ sabbo saṅgho sabhāgaṃ āpattiṃ āpanno, yadā aññaṃ bhikkhuṃ suddhaṃ anāpattikaṃ passissati, tadā tassa santike taṃ āpattiṃ paṭikarissatī’’ti (mahāva. 171) vatvā uposatho kātabbo. Sace pana vematiko hoti, ‘‘suṇātu me, bhante, saṅgho, ayaṃ sabbo saṅgho sabhāgāya āpattiyā vematiko, yadā nibbematiko bhavissati, tadā taṃ āpattiṃ paṭikarissatī’’ti (mahāva. 171) vatvā uposatho kātabbo. Sace panettha koci ‘‘taṃ sabhāgaṃ āpattiṃ desetuṃ vaṭṭatī’’ti maññamāno ekassa santike deseti, desitā sudesitāva. Aññaṃ pana desanāpaccayā desako paṭiggahaṇapaccayā paṭiggāhako cāti ubhopi dukkaṭaṃ āpajjanti, taṃ nānāvatthukaṃ hoti, tasmā aññamaññaṃ desetabbaṃ. Ettāvatā te nirāpattikā honti, tesaṃ santike sesehi sabhāgāpattiyo desetabbā vā ārocetabbā vā. Sace te evaṃ akatvā uposathaṃ karonti, ‘‘pārisuddhiṃ āyasmanto ārocethā’’tiādinā nayena sāpattikassa uposathakaraṇe paññattaṃ dukkaṭaṃ āpajjanti.
ஸசே கோசி பி⁴க்கு² பாதிமொக்கே² உத்³தி³ஸ்ஸமானே ஆபத்திங் ஸரதி, தேன பி⁴க்கு²னா ஸாமந்தோ பி⁴க்கு² ஏவங் வத்தப்³போ³ ‘‘அஹங், ஆவுஸோ, இத்த²ன்னாமங் ஆபத்திங் ஆபன்னோ, இதோ வுட்ட²ஹித்வா தங் ஆபத்திங் படிகரிஸ்ஸாமீ’’தி. ஸாமந்தோ ச பி⁴க்கு² ஸபா⁴கோ³யேவ வத்தப்³போ³. விஸபா⁴க³ஸ்ஸ ஹி வுச்சமானே ப⁴ண்ட³னகலஹஸங்க⁴பே⁴தா³தீ³னிபி ஹொந்தி, தஸ்மா தஸ்ஸ அவத்வா ‘‘இதோ வுட்ட²ஹித்வா படிகரிஸ்ஸாமீ’’தி ஆபோ⁴க³ங் கத்வா உபோஸதோ² காதப்³போ³. ஸசே பன கோசி பாதிமொக்கே² உத்³தி³ஸ்ஸமானே ஆபத்தியா வேமதிகோ ஹோதி, தேனபி ஸபா⁴கோ³யேவ ஸாமந்தோ பி⁴க்கு² ஏவங் வத்தப்³போ³ ‘‘அஹங், ஆவுஸோ, இத்த²ன்னாமாய ஆபத்தியா வேமதிகோ, யதா³ நிப்³பே³மதிகோ ப⁴விஸ்ஸாமி, ததா³ தங் ஆபத்திங் படிகரிஸ்ஸாமீ’’தி. ஏவஞ்ச வத்வா உபோஸதோ² காதப்³போ³, பாதிமொக்க²ங் ஸோதப்³ப³ங், ந த்வேவ தப்பச்சயா உபோஸத²ஸ்ஸ அந்தராயோ காதப்³போ³.
Sace koci bhikkhu pātimokkhe uddissamāne āpattiṃ sarati, tena bhikkhunā sāmanto bhikkhu evaṃ vattabbo ‘‘ahaṃ, āvuso, itthannāmaṃ āpattiṃ āpanno, ito vuṭṭhahitvā taṃ āpattiṃ paṭikarissāmī’’ti. Sāmanto ca bhikkhu sabhāgoyeva vattabbo. Visabhāgassa hi vuccamāne bhaṇḍanakalahasaṅghabhedādīnipi honti, tasmā tassa avatvā ‘‘ito vuṭṭhahitvā paṭikarissāmī’’ti ābhogaṃ katvā uposatho kātabbo. Sace pana koci pātimokkhe uddissamāne āpattiyā vematiko hoti, tenapi sabhāgoyeva sāmanto bhikkhu evaṃ vattabbo ‘‘ahaṃ, āvuso, itthannāmāya āpattiyā vematiko, yadā nibbematiko bhavissāmi, tadā taṃ āpattiṃ paṭikarissāmī’’ti. Evañca vatvā uposatho kātabbo, pātimokkhaṃ sotabbaṃ, na tveva tappaccayā uposathassa antarāyo kātabbo.
177. ‘‘அனுஜானாமி , பி⁴க்க²வே, உபோஸதா²கா³ரங் ஸம்மஜ்ஜிது’’ந்தி(மஹாவ॰ 159) ஆதி³வசனதோ –
177. ‘‘Anujānāmi , bhikkhave, uposathāgāraṃ sammajjitu’’nti(mahāva. 159) ādivacanato –
‘‘ஸம்மஜ்ஜனீ பதீ³போ ச, உத³கங் ஆஸனேன ச;
‘‘Sammajjanī padīpo ca, udakaṃ āsanena ca;
உபோஸத²ஸ்ஸ ஏதானி, புப்³ப³கரணந்தி வுச்சதீ’’தி. (மஹாவ॰ அட்ட²॰ 168) –
Uposathassa etāni, pubbakaraṇanti vuccatī’’ti. (mahāva. aṭṭha. 168) –
ஏவங் வுத்தங் சதுப்³பி³த⁴ங் புப்³ப³கரணங் கத்வாவ உபோஸதோ² காதப்³போ³. கேன பன தங் காதப்³ப³ந்தி? ‘‘அனுஜானாமி, பி⁴க்க²வே, தே²ரேன பி⁴க்கு²னா நவங் பி⁴க்கு²ங் ஆணாபேதுங், ந, பி⁴க்க²வே, தே²ரேன ஆணத்தேன அகி³லானேன ந ஸம்மஜ்ஜிதப்³ப³ங், யோ ந ஸம்மஜ்ஜெய்ய, ஆபத்தி து³க்கடஸ்ஸா’’திஆதி³வசனதோ யோ தே²ரேன ஆணத்தோ, தேன காதப்³ப³ங். ஆணாபெந்தேன ச கிஞ்சி கம்மங் கரொந்தோ வா ஸதா³காலமேவ ஏகோ வா பா⁴ரனித்த²ரணகோ வா ஸரபா⁴ணகத⁴ம்மகதி²காதீ³ஸு அஞ்ஞதரோ வா ந உபோஸதா²கா³ரஸம்மஜ்ஜனத்த²ங் ஆணாபேதப்³போ³, அவஸேஸா பன வாரேன ஆணாபேதப்³பா³. ஸசே ஆணத்தோ ஸம்முஞ்ஜனிங் தாவகாலிகம்பி ந லப⁴தி, ஸாகா²ப⁴ங்க³ங் கப்பியங் காரெத்வா ஸம்மஜ்ஜிதப்³ப³ங், தம்பி அலப⁴ந்தஸ்ஸ லத்³த⁴கப்பியங் ஹோதி.
Evaṃ vuttaṃ catubbidhaṃ pubbakaraṇaṃ katvāva uposatho kātabbo. Kena pana taṃ kātabbanti? ‘‘Anujānāmi, bhikkhave, therena bhikkhunā navaṃ bhikkhuṃ āṇāpetuṃ, na, bhikkhave, therena āṇattena agilānena na sammajjitabbaṃ, yo na sammajjeyya, āpatti dukkaṭassā’’tiādivacanato yo therena āṇatto, tena kātabbaṃ. Āṇāpentena ca kiñci kammaṃ karonto vā sadākālameva eko vā bhāranittharaṇako vā sarabhāṇakadhammakathikādīsu aññataro vā na uposathāgārasammajjanatthaṃ āṇāpetabbo, avasesā pana vārena āṇāpetabbā. Sace āṇatto sammuñjaniṃ tāvakālikampi na labhati, sākhābhaṅgaṃ kappiyaṃ kāretvā sammajjitabbaṃ, tampi alabhantassa laddhakappiyaṃ hoti.
ஆஸனபஞ்ஞாபனத்த²ங் ஆணத்தேன ச ஸசே உபோஸதா²கா³ரே ஆஸனானி நத்தி², ஸங்கி⁴காவாஸதோ ஆஹரித்வா பஞ்ஞபெத்வா புன ஆஹரிதப்³பா³னி, ஆஸனேஸு அஸதி கடஸாரகேபி தட்டிகாயோபி பஞ்ஞாபேதுங் வட்டதி, தட்டிகாஸுபி அஸதி ஸாகா²ப⁴ங்கா³னி கப்பியங் காரெத்வா பஞ்ஞபேதப்³பா³னி, கப்பியகாரகங் அலப⁴ந்தஸ்ஸ லத்³த⁴கப்பியங் ஹோதி.
Āsanapaññāpanatthaṃ āṇattena ca sace uposathāgāre āsanāni natthi, saṅghikāvāsato āharitvā paññapetvā puna āharitabbāni, āsanesu asati kaṭasārakepi taṭṭikāyopi paññāpetuṃ vaṭṭati, taṭṭikāsupi asati sākhābhaṅgāni kappiyaṃ kāretvā paññapetabbāni, kappiyakārakaṃ alabhantassa laddhakappiyaṃ hoti.
பதீ³பகரணத்த²ங் ஆணாபெந்தேன பன ‘‘அஸுகஸ்மிங் நாம ஓகாஸே தேலங் வா வட்டி வா கபல்லிகா வா அத்தி², தங் க³ஹெத்வா கரோஹீ’’தி வத்தப்³போ³. ஸசே தேலாதீ³னி நத்தி², பரியேஸிதப்³பா³னி, பரியேஸித்வா அலப⁴ந்தஸ்ஸ லத்³த⁴கப்பியங் ஹோதி. அபிச கபாலே அக்³கி³பி ஜாலேதப்³போ³.
Padīpakaraṇatthaṃ āṇāpentena pana ‘‘asukasmiṃ nāma okāse telaṃ vā vaṭṭi vā kapallikā vā atthi, taṃ gahetvā karohī’’ti vattabbo. Sace telādīni natthi, pariyesitabbāni, pariyesitvā alabhantassa laddhakappiyaṃ hoti. Apica kapāle aggipi jāletabbo.
‘‘ச²ந்த³பாரிஸுத்³தி⁴உதுக்கா²னங், பி⁴க்கு²க³ணனாச ஓவாதோ³;
‘‘Chandapārisuddhiutukkhānaṃ, bhikkhugaṇanāca ovādo;
உபோஸத²ஸ்ஸ ஏதானி, புப்³ப³கிச்சந்தி வுச்சதீ’’தி. (மஹாவ॰ 168) –
Uposathassa etāni, pubbakiccanti vuccatī’’ti. (mahāva. 168) –
ஏவங் வுத்தங் பன சதுப்³பி³த⁴ம்பி புப்³ப³கிச்சங் புப்³ப³கரணதோ பச்சா² காதப்³ப³ங். தம்பி ஹி அகத்வா உபோஸதோ² ந காதப்³போ³.
Evaṃ vuttaṃ pana catubbidhampi pubbakiccaṃ pubbakaraṇato pacchā kātabbaṃ. Tampi hi akatvā uposatho na kātabbo.
178. யதி³ ஸங்க⁴ஸ்ஸ பத்தகல்லங், ஸங்கோ⁴ உபோஸத²ங் கரெய்யா’’தி (மஹாவ॰ 143) வசனதோ யதா³ ஸங்க⁴ஸ்ஸ உபோஸத²கம்மங் பத்தகல்லங் ஹோதி, ததா³ தங் காதப்³ப³ங், பத்தகல்லஞ்ச நாமேதங் சதூஹி அங்கே³ஹி ஸங்க³ஹிதங். தேனாஹு அட்ட²கதா²சரியா –
178. Yadi saṅghassa pattakallaṃ, saṅgho uposathaṃ kareyyā’’ti (mahāva. 143) vacanato yadā saṅghassa uposathakammaṃ pattakallaṃ hoti, tadā taṃ kātabbaṃ, pattakallañca nāmetaṃ catūhi aṅgehi saṅgahitaṃ. Tenāhu aṭṭhakathācariyā –
‘‘உபோஸதோ² யாவதிகா ச பி⁴க்கூ² கம்மப்பத்தா,
‘‘Uposatho yāvatikā ca bhikkhū kammappattā,
ஸபா⁴கா³பத்தியோ ச ந விஜ்ஜந்தி;
Sabhāgāpattiyo ca na vijjanti;
வஜ்ஜனீயா ச புக்³க³லா தஸ்மிங் ந ஹொந்தி,
Vajjanīyā ca puggalā tasmiṃ na honti,
பத்தகல்லந்தி வுச்சதீ’’தி. (மஹாவ॰ அட்ட²॰ 168);
Pattakallanti vuccatī’’ti. (mahāva. aṭṭha. 168);
தத்த² உபோஸதோ²தி தீஸு உபோஸத²தி³வஸேஸு அஞ்ஞதரதி³வஸோ. தஸ்மிஞ்ஹி ஸதி இத³ங் ஸங்க⁴ஸ்ஸ உபோஸத²கம்மங் பத்தகல்லங் நாம ஹோதி, நாஸதி. யதா²ஹ ‘‘ந ச, பி⁴க்க²வே, அனுபோஸதே² உபோஸதோ² காதப்³போ³’’தி (மஹாவ॰ 183).
Tattha uposathoti tīsu uposathadivasesu aññataradivaso. Tasmiñhi sati idaṃ saṅghassa uposathakammaṃ pattakallaṃ nāma hoti, nāsati. Yathāha ‘‘na ca, bhikkhave, anuposathe uposatho kātabbo’’ti (mahāva. 183).
யாவதிகா ச பி⁴க்கூ² கம்மப்பத்தாதி யத்தகா பி⁴க்கூ² தஸ்ஸ உபோஸத²கம்மஸ்ஸ பத்தா யுத்தா அனுரூபா ஸப்³ப³ந்திமேன பரிச்சே²தே³ன சத்தாரோ பகதத்தா, தே ச கோ² ஹத்த²பாஸங் அவிஜஹித்வா ஏகஸீமாயங் டி²தா. தேஸு ஹி சதூஸு பி⁴க்கூ²ஸு ஏகஸீமாயங் ஹத்த²பாஸங் அவிஜஹித்வா டி²தெஸ்வேவ தங் ஸங்க⁴ஸ்ஸ உபோஸத²கம்மங் பத்தகல்லங் நாம ஹோதி, ந இதரதா². யதா²ஹ ‘‘அனுஜானாமி, பி⁴க்க²வே, சதுன்னங் பாதிமொக்க²ங் உத்³தி³ஸிது’’ந்தி (மஹாவ॰ 168).
Yāvatikā ca bhikkhū kammappattāti yattakā bhikkhū tassa uposathakammassa pattā yuttā anurūpā sabbantimena paricchedena cattāro pakatattā, te ca kho hatthapāsaṃ avijahitvā ekasīmāyaṃ ṭhitā. Tesu hi catūsu bhikkhūsu ekasīmāyaṃ hatthapāsaṃ avijahitvā ṭhitesveva taṃ saṅghassa uposathakammaṃ pattakallaṃ nāma hoti, na itarathā. Yathāha ‘‘anujānāmi, bhikkhave, catunnaṃ pātimokkhaṃ uddisitu’’nti (mahāva. 168).
ஸபா⁴கா³பத்தியோ ச ந விஜ்ஜந்தீதி எத்த² யங் ஸப்³போ³ ஸங்கோ⁴ விகாலபோ⁴ஜனாதி³னா ஸபா⁴க³வத்து²னா லஹுகாபத்திங் ஆபஜ்ஜதி, ஏவரூபா வத்து²ஸபா⁴கா³ ஸபா⁴கா³தி வுச்சதி. ஏதாஸு அவிஜ்ஜமானாஸுபி ஸபா⁴கா³ஸு விஜ்ஜமானாஸுபி பத்தகல்லங் ஹோதியேவ.
Sabhāgāpattiyo ca na vijjantīti ettha yaṃ sabbo saṅgho vikālabhojanādinā sabhāgavatthunā lahukāpattiṃ āpajjati, evarūpā vatthusabhāgā sabhāgāti vuccati. Etāsu avijjamānāsupi sabhāgāsu vijjamānāsupi pattakallaṃ hotiyeva.
வஜ்ஜனீயா ச புக்³க³லா தஸ்மிங் ந ஹொந்தீதி ‘‘ந, பி⁴க்க²வே, ஸக³ஹட்டா²ய பரிஸாய பாதிமொக்க²ங் உத்³தி³ஸிதப்³ப³’’ந்தி (மஹாவ॰ 154) வசனதோ க³ஹட்டோ² ச, ‘‘ந, பி⁴க்க²வே, பி⁴க்கு²னியா நிஸின்னபரிஸாய பாதிமொக்க²ங் உத்³தி³ஸிதப்³ப³’’ந்திஆதி³னா (மஹாவ॰ 183) நயேன வுத்தா பி⁴க்கு²னீ, ஸிக்க²மானா, ஸாமணேரோ, ஸாமணேரீ, ஸிக்கா²பச்சக்கா²தகோ, அந்திமவத்து²அஜ்ஜா²பன்னகோ , ஆபத்தியா அத³ஸ்ஸனே உக்கி²த்தகோ, ஆபத்தியா அப்படிகம்மே உக்கி²த்தகோ, பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ, பண்ட³கோ, தெ²ய்யஸங்வாஸகோ, தித்தி²யபக்கந்தகோ, திரச்சா²னக³தோ, மாதுகா⁴தகோ , பிதுகா⁴தகோ, அரஹந்தகா⁴தகோ, பி⁴க்கு²னீதூ³ஸகோ, ஸங்க⁴பே⁴த³கோ, லோஹிதுப்பாத³கோ, உப⁴தொப்³யஞ்ஜனகோதி இமே வீஸதி சாதி ஏகவீஸதி புக்³க³லா வஜ்ஜனீயா நாம. தே ஹத்த²பாஸதோ ப³ஹிகரணவஸேன வஜ்ஜேதப்³பா³. ஏதேஸு ஹி திவிதே⁴ உக்கி²த்தகே ஸதி உபோஸத²ங் கரொந்தோ ஸங்கோ⁴ பாசித்தியங் ஆபஜ்ஜதி, ஸேஸேஸு து³க்கடங், எத்த² ச திரச்சா²னக³தோதி யஸ்ஸ உபஸம்பதா³ படிக்கி²த்தா. தித்தி²யா க³ஹட்டே²னேவ ஸங்க³ஹிதா. ஏதேபி ஹி வஜ்ஜனீயா. ஏவங் பத்தகல்லங் இமேஹி சதூஹி அங்கே³ஹி ஸங்க³ஹிதந்தி வேதி³தப்³ப³ங். இத³ஞ்ச ஸப்³ப³ங் பவாரணாகம்மேபி யோஜெத்வா த³ஸ்ஸேதப்³ப³ங். ‘‘ந, பி⁴க்க²வே, பாதிமொக்கு²த்³தே³ஸகேன ஸஞ்சிச்ச ந ஸாவேதப்³ப³ங், யோ ந ஸாவெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, பாதிமொக்கு²த்³தே³ஸகேன வாயமிதுங் ‘கத²ங் ஸாவெய்ய’ந்தி, வாயமந்தஸ்ஸ அனாபத்தீ’’தி (மஹாவ॰ 154) வசனதோ பாதிமொக்கு²த்³தே³ஸகேன பரிஸங் ஸாவேதுங் வாயமிதப்³ப³ந்தி.
Vajjanīyā ca puggalā tasmiṃ na hontīti ‘‘na, bhikkhave, sagahaṭṭhāya parisāya pātimokkhaṃ uddisitabba’’nti (mahāva. 154) vacanato gahaṭṭho ca, ‘‘na, bhikkhave, bhikkhuniyā nisinnaparisāya pātimokkhaṃ uddisitabba’’ntiādinā (mahāva. 183) nayena vuttā bhikkhunī, sikkhamānā, sāmaṇero, sāmaṇerī, sikkhāpaccakkhātako, antimavatthuajjhāpannako , āpattiyā adassane ukkhittako, āpattiyā appaṭikamme ukkhittako, pāpikāya diṭṭhiyā appaṭinissagge ukkhittako, paṇḍako, theyyasaṃvāsako, titthiyapakkantako, tiracchānagato, mātughātako , pitughātako, arahantaghātako, bhikkhunīdūsako, saṅghabhedako, lohituppādako, ubhatobyañjanakoti ime vīsati cāti ekavīsati puggalā vajjanīyā nāma. Te hatthapāsato bahikaraṇavasena vajjetabbā. Etesu hi tividhe ukkhittake sati uposathaṃ karonto saṅgho pācittiyaṃ āpajjati, sesesu dukkaṭaṃ, ettha ca tiracchānagatoti yassa upasampadā paṭikkhittā. Titthiyā gahaṭṭheneva saṅgahitā. Etepi hi vajjanīyā. Evaṃ pattakallaṃ imehi catūhi aṅgehi saṅgahitanti veditabbaṃ. Idañca sabbaṃ pavāraṇākammepi yojetvā dassetabbaṃ. ‘‘Na, bhikkhave, pātimokkhuddesakena sañcicca na sāvetabbaṃ, yo na sāveyya, āpatti dukkaṭassa. Anujānāmi, bhikkhave, pātimokkhuddesakena vāyamituṃ ‘kathaṃ sāveyya’nti, vāyamantassa anāpattī’’ti (mahāva. 154) vacanato pātimokkhuddesakena parisaṃ sāvetuṃ vāyamitabbanti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
உபோஸத²பவாரணாவினிச்ச²யகதா² ஸமத்தா.
Uposathapavāraṇāvinicchayakathā samattā.
