| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৭৩. উপোসথপ্পমুখানুজাননা
73. Uposathappamukhānujānanā
১৪২. তেন খো পন সমযেন অঞ্ঞতরস্মিং আৰাসে অতিখুদ্দকং উপোসথাগারং সম্মতং হোতি, তদহুপোসথে মহাভিক্খুসঙ্ঘো সন্নিপতিতো হোতি। ভিক্খূ অসম্মতায ভূমিযা নিসিন্না পাতিমোক্খং অস্সোসুং। অথ খো তেসং ভিক্খূনং এতদহোসি ‘‘ভগৰতা পঞ্ঞত্তং ‘উপোসথাগারং সম্মন্নিত্ৰা উপোসথো কাতব্বো’তি, মযঞ্চম্হা অসম্মতায ভূমিযা নিসিন্নো পাতিমোক্খং অস্সুম্হা, কতো নু খো অম্হাকং উপোসথো, অকতো নু খো’’তি। ভগৰতো এতমত্থং আরোচেসুং। সম্মতায ৰা, ভিক্খৰে, ভূমিযা নিসিন্না অসম্মতায ৰা যতো পাতিমোক্খং সুণাতি, কতোৰস্স উপোসথো। তেন হি, ভিক্খৰে, সঙ্ঘো যাৰ মহন্তং উপোসথপ্পমুখং 1 আকঙ্খতি, তাৰ মহন্তং উপোসথপ্পমুখং সম্মন্নতু। এৰঞ্চ পন, ভিক্খৰে, সম্মন্নিতব্বং। পঠমং নিমিত্তা কিত্তেতব্বা। নিমিত্তে কিত্তেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –
142. Tena kho pana samayena aññatarasmiṃ āvāse atikhuddakaṃ uposathāgāraṃ sammataṃ hoti, tadahuposathe mahābhikkhusaṅgho sannipatito hoti. Bhikkhū asammatāya bhūmiyā nisinnā pātimokkhaṃ assosuṃ. Atha kho tesaṃ bhikkhūnaṃ etadahosi ‘‘bhagavatā paññattaṃ ‘uposathāgāraṃ sammannitvā uposatho kātabbo’ti, mayañcamhā asammatāya bhūmiyā nisinno pātimokkhaṃ assumhā, kato nu kho amhākaṃ uposatho, akato nu kho’’ti. Bhagavato etamatthaṃ ārocesuṃ. Sammatāya vā, bhikkhave, bhūmiyā nisinnā asammatāya vā yato pātimokkhaṃ suṇāti, katovassa uposatho. Tena hi, bhikkhave, saṅgho yāva mahantaṃ uposathappamukhaṃ 2 ākaṅkhati, tāva mahantaṃ uposathappamukhaṃ sammannatu. Evañca pana, bhikkhave, sammannitabbaṃ. Paṭhamaṃ nimittā kittetabbā. Nimitte kittetvā byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। যাৰতা সমন্তা নিমিত্তা কিত্তিতা। যদি সঙ্ঘস্স পত্তকল্লং, সঙ্ঘো এতেহি নিমিত্তেহি উপোসথপ্পমুখং সম্মন্নেয্য। এসা ঞত্তি।
‘‘Suṇātu me, bhante, saṅgho. Yāvatā samantā nimittā kittitā. Yadi saṅghassa pattakallaṃ, saṅgho etehi nimittehi uposathappamukhaṃ sammanneyya. Esā ñatti.
‘‘সুণাতু মে, ভন্তে, সঙ্ঘো। যাৰতা সমন্তা নিমিত্তা কিত্তিতা। সঙ্ঘো এতেহি নিমিত্তেহি উপোসথপ্পমুখং সম্মন্নতি। যস্সাযস্মতো খমতি এতেহি নিমিত্তেহি উপোসথপ্পমুখস্স সম্মুতি, সো তুণ্হস্স; যস্স নক্খমতি, সো ভাসেয্য। সম্মতং সঙ্ঘেন এতেহি নিমিত্তেহি উপোসথপ্পমুখং। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Suṇātu me, bhante, saṅgho. Yāvatā samantā nimittā kittitā. Saṅgho etehi nimittehi uposathappamukhaṃ sammannati. Yassāyasmato khamati etehi nimittehi uposathappamukhassa sammuti, so tuṇhassa; yassa nakkhamati, so bhāseyya. Sammataṃ saṅghena etehi nimittehi uposathappamukhaṃ. Khamati saṅghassa, tasmā tuṇhī, evametaṃ dhārayāmī’’ti.
তেন খো পন সমযেন অঞ্ঞতরস্মিং আৰাসে তদহুপোসথে নৰকা ভিক্খূ পঠমতরং সন্নিপতিত্ৰা – ‘‘ন তাৰ থেরা আগচ্ছন্তী’’তি – পক্কমিংসু। উপোসথো ৰিকালে অহোসি। ভগৰতো এতমত্থং আরোচেসুং। অনুজানামি, ভিক্খৰে, তদহুপোসথে থেরেহি ভিক্খূহি পঠমতরং সন্নিপতিতুন্তি।
Tena kho pana samayena aññatarasmiṃ āvāse tadahuposathe navakā bhikkhū paṭhamataraṃ sannipatitvā – ‘‘na tāva therā āgacchantī’’ti – pakkamiṃsu. Uposatho vikāle ahosi. Bhagavato etamatthaṃ ārocesuṃ. Anujānāmi, bhikkhave, tadahuposathe therehi bhikkhūhi paṭhamataraṃ sannipatitunti.
তেন খো পন সমযেন রাজগহে সম্বহুলা আৰাসা সমানসীমা হোন্তি। তত্থ ভিক্খূ ৰিৰদন্তি – ‘‘অম্হাকং আৰাসে উপোসথো করীযতু, অম্হাকং আৰাসে উপোসথো করীযতূ’’তি। ভগৰতো এতমত্থং আরোচেসুং। ইধ পন, ভিক্খৰে, সম্বহুলা আৰাসা সমানসীমা হোন্তি। তত্থ ভিক্খূ ৰিৰদন্তি – ‘‘অম্হাকং আৰাসে উপোসথো করীযতু, অম্হাকং আৰাসে উপোসথো করীযতূ’’তি। তেহি, ভিক্খৰে, ভিক্খূহি সব্বেহেৰ একজ্ঝং সন্নিপতিত্ৰা উপোসথো কাতব্বো। যত্থ ৰা পন থেরো ভিক্খু ৰিহরতি, তত্থ সন্নিপতিত্ৰা উপোসথো কাতব্বো, ন ত্ৰেৰ ৰগ্গেন সঙ্ঘেন উপোসথো কাতব্বো। যো করেয্য, আপত্তি দুক্কটস্সাতি।
Tena kho pana samayena rājagahe sambahulā āvāsā samānasīmā honti. Tattha bhikkhū vivadanti – ‘‘amhākaṃ āvāse uposatho karīyatu, amhākaṃ āvāse uposatho karīyatū’’ti. Bhagavato etamatthaṃ ārocesuṃ. Idha pana, bhikkhave, sambahulā āvāsā samānasīmā honti. Tattha bhikkhū vivadanti – ‘‘amhākaṃ āvāse uposatho karīyatu, amhākaṃ āvāse uposatho karīyatū’’ti. Tehi, bhikkhave, bhikkhūhi sabbeheva ekajjhaṃ sannipatitvā uposatho kātabbo. Yattha vā pana thero bhikkhu viharati, tattha sannipatitvā uposatho kātabbo, na tveva vaggena saṅghena uposatho kātabbo. Yo kareyya, āpatti dukkaṭassāti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / উপোসথাগারাদিকথা • Uposathāgārādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপোসথাগারাদিকথাৰণ্ণনা • Uposathāgārādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপোসথাগারাদিকথাৰণ্ণনা • Uposathāgārādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপোসথাগারাদিকথাৰণ্ণনা • Uposathāgārādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭২. উপোসথাগারাদিকথা • 72. Uposathāgārādikathā
