| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. উপোসথসুত্তং
3. Uposathasuttaṃ
৩৪৪. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চে অণ্ডজা নাগা উপোসথং উপৰসন্তি ৰোস্সট্ঠকাযা চ ভৰন্তী’’তি?
344. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ko nu kho, bhante, hetu, ko paccayo, yena midhekacce aṇḍajā nāgā uposathaṃ upavasanti vossaṭṭhakāyā ca bhavantī’’ti?
‘‘ইধ , ভিক্খু, একচ্চানং অণ্ডজানং নাগানং এৰং হোতি – ‘মযং খো পুব্বে কাযেন দ্ৰযকারিনো অহুম্হ, ৰাচায দ্ৰযকারিনো, মনসা দ্ৰযকারিনো। তে মযং কাযেন দ্ৰযকারিনো, ৰাচায দ্ৰযকারিনো, মনসা দ্ৰযকারিনো, কাযস্স ভেদা পরং মরণা অণ্ডজানং নাগানং সহব্যতং উপপন্না। সচজ্জ মযং কাযেন সুচরিতং চরেয্যাম, ৰাচায সুচরিতং চরেয্যাম, মনসা সুচরিতং চরেয্যাম, এৰং মযং কাযস্স ভেদা পরং মরণা সুগতিং সগ্গং লোকং উপপজ্জেয্যাম। হন্দ, মযং এতরহি কাযেন সুচরিতং চরাম, ৰাচায সুচরিতং চরাম, মনসা সুচরিতং চরামা’তি। অযং খো, ভিক্খু, হেতু, অযং পচ্চযো, যেন মিধেকচ্চে অণ্ডজা নাগা উপোসথং উপৰসন্তি ৰোস্সট্ঠকাযা চ ভৰন্তী’’তি। ততিযং।
‘‘Idha , bhikkhu, ekaccānaṃ aṇḍajānaṃ nāgānaṃ evaṃ hoti – ‘mayaṃ kho pubbe kāyena dvayakārino ahumha, vācāya dvayakārino, manasā dvayakārino. Te mayaṃ kāyena dvayakārino, vācāya dvayakārino, manasā dvayakārino, kāyassa bhedā paraṃ maraṇā aṇḍajānaṃ nāgānaṃ sahabyataṃ upapannā. Sacajja mayaṃ kāyena sucaritaṃ careyyāma, vācāya sucaritaṃ careyyāma, manasā sucaritaṃ careyyāma, evaṃ mayaṃ kāyassa bhedā paraṃ maraṇā sugatiṃ saggaṃ lokaṃ upapajjeyyāma. Handa, mayaṃ etarahi kāyena sucaritaṃ carāma, vācāya sucaritaṃ carāma, manasā sucaritaṃ carāmā’ti. Ayaṃ kho, bhikkhu, hetu, ayaṃ paccayo, yena midhekacce aṇḍajā nāgā uposathaṃ upavasanti vossaṭṭhakāyā ca bhavantī’’ti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-৫০. পণীততরসুত্তাদিৰণ্ণনা • 2-50. Paṇītatarasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-৫০. পণীততরসুত্তাদিৰণ্ণনা • 2-50. Paṇītatarasuttādivaṇṇanā
