| Library / Tipiṭaka / д̇ибидага • Tipiṭaka / уд̣̇аанабаал̣и • Udānapāḷi |
5. убосат̇асуд̇д̇ам̣
5. Uposathasuttaṃ
45. звам̣ мз суд̇ам̣ – згам̣ самаяам̣ бхаг̇аваа саавад̇т̇ияам̣ вихарад̇и буб̣б̣аараамз миг̇аарамаад̇убаасаад̣̇з. д̇зна ко бана самаязна бхаг̇аваа д̇ад̣̇ахубосат̇з бхигкусан̇гхабаривуд̇о нисинно ход̇и.
45. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā tadahuposathe bhikkhusaṅghaparivuto nisinno hoti.
ат̇а ко ааяасмаа аананд̣̇о абхигганд̇ааяа рад̇д̇ияаа, нигканд̇з батамз яаамз, удтааяаасанаа згам̣сам̣ уд̇д̇араасан̇г̇ам̣ 1 гарид̇ваа язна бхаг̇аваа д̇знан̃ж̇алим̣ бан̣аамзд̇ваа бхаг̇аванд̇ам̣ зд̇ад̣̇авожа – ‘‘абхигганд̇аа, бханд̇з, рад̇д̇и; нигканд̇о батамо яаамо; жиранисинно бхигкусан̇гхо; уд̣̇д̣̇исад̇у, бханд̇з, бхаг̇аваа бхигкуунам̣ баад̇имогка’’нд̇и. звам̣ вуд̇д̇з, бхаг̇аваа д̇ун̣хий ахоси.
Atha kho āyasmā ānando abhikkantāya rattiyā, nikkhante paṭhame yāme, uṭṭhāyāsanā ekaṃsaṃ uttarāsaṅgaṃ 2 karitvā yena bhagavā tenañjaliṃ paṇāmetvā bhagavantaṃ etadavoca – ‘‘abhikkantā, bhante, ratti; nikkhanto paṭhamo yāmo; ciranisinno bhikkhusaṅgho; uddisatu, bhante, bhagavā bhikkhūnaṃ pātimokkha’’nti. Evaṃ vutte, bhagavā tuṇhī ahosi.
д̣̇уд̇ияамби ко ааяасмаа аананд̣̇о абхигганд̇ааяа рад̇д̇ияаа, нигканд̇з маж̇жхимз яаамз, удтааяаасанаа згам̣сам̣ уд̇д̇араасан̇г̇ам̣ гарид̇ваа язна бхаг̇аваа д̇знан̃ж̇алим̣ бан̣аамзд̇ваа бхаг̇аванд̇ам̣ зд̇ад̣̇авожа – ‘‘абхигганд̇аа, бханд̇з, рад̇д̇и; нигканд̇о маж̇жхимо яаамо; жиранисинно бхигкусан̇гхо; уд̣̇д̣̇исад̇у, бханд̇з, бхаг̇аваа бхигкуунам̣ баад̇имогка’’нд̇и. д̣̇уд̇ияамби ко бхаг̇аваа д̇ун̣хий ахоси.
Dutiyampi kho āyasmā ānando abhikkantāya rattiyā, nikkhante majjhime yāme, uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘abhikkantā, bhante, ratti; nikkhanto majjhimo yāmo; ciranisinno bhikkhusaṅgho; uddisatu, bhante, bhagavā bhikkhūnaṃ pātimokkha’’nti. Dutiyampi kho bhagavā tuṇhī ahosi.
д̇ад̇ияамби ко ааяасмаа аананд̣̇о абхигганд̇ааяа рад̇д̇ияаа, нигканд̇з бажчимз яаамз, уд̣̇д̇хасд̇з арун̣з, нанд̣̇имукияаа рад̇д̇ияаа удтааяаасанаа згам̣сам̣ уд̇д̇араасан̇г̇ам̣ гарид̇ваа язна бхаг̇аваа д̇знан̃ж̇алим̣ бан̣аамзд̇ваа бхаг̇аванд̇ам̣ зд̇ад̣̇авожа – ‘‘абхигганд̇аа, бханд̇з, рад̇д̇и; нигканд̇о бажчимо яаамо; уд̣̇д̇хасд̇о арун̣о; нанд̣̇имукий рад̇д̇и; жиранисинно бхигкусан̇гхо; уд̣̇д̣̇исад̇у, бханд̇з, бхаг̇аваа бхигкуунам̣ баад̇имогка’’нд̇и. ‘‘абарисуд̣̇д̇хаа, аананд̣̇а, барисаа’’д̇и.
Tatiyampi kho āyasmā ānando abhikkantāya rattiyā, nikkhante pacchime yāme, uddhaste aruṇe, nandimukhiyā rattiyā uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘abhikkantā, bhante, ratti; nikkhanto pacchimo yāmo; uddhasto aruṇo; nandimukhī ratti; ciranisinno bhikkhusaṅgho; uddisatu, bhante, bhagavā bhikkhūnaṃ pātimokkha’’nti. ‘‘Aparisuddhā, ānanda, parisā’’ti.
ат̇а ко ааяасмад̇о махаамог̇г̇аллаанасса зд̇ад̣̇ахоси – ‘‘гам̣ ну ко бхаг̇аваа буг̇г̇алам̣ санд̇хааяа звамааха – ‘абарисуд̣̇д̇хаа, аананд̣̇а, барисаа’д̇и? ат̇а ко ааяасмаа махаамог̇г̇аллаано саб̣б̣ааванд̇ам̣ бхигкусан̇гхам̣ жзд̇асаа жзд̇о барижжа манасаагааси. ад̣̇д̣̇асаа ко ааяасмаа махаамог̇г̇аллаано д̇ам̣ буг̇г̇алам̣ д̣̇уссийлам̣ баабад̇хаммам̣ асужим̣ сан̇гассарасамаажаарам̣ бадижчаннагамманд̇ам̣ асаман̣ам̣ саман̣абадин̃н̃ам̣ аб̣рахмажаарим̣ б̣рахмажаарибадин̃н̃ам̣ анд̇обууд̇им̣ авассуд̇ам̣ гасамб̣уж̇аад̇ам̣ маж̇жхз бхигкусан̇гхасса нисиннам̣. д̣̇исваана удтааяаасанаа язна со буг̇г̇ало д̇знубасан̇гами; убасан̇гамид̇ваа д̇ам̣ буг̇г̇алам̣ зд̇ад̣̇авожа – ‘‘удтзхи, аавусо, д̣̇идтоси бхаг̇авад̇аа; над̇т̇и д̇з бхигкуухи сад̣̇д̇хим̣ сам̣ваасо’’д̇и. звам̣ вуд̇д̇з 3, со буг̇г̇ало д̇ун̣хий ахоси.
Atha kho āyasmato mahāmoggallānassa etadahosi – ‘‘kaṃ nu kho bhagavā puggalaṃ sandhāya evamāha – ‘aparisuddhā, ānanda, parisā’ti? Atha kho āyasmā mahāmoggallāno sabbāvantaṃ bhikkhusaṅghaṃ cetasā ceto paricca manasākāsi. Addasā kho āyasmā mahāmoggallāno taṃ puggalaṃ dussīlaṃ pāpadhammaṃ asuciṃ saṅkassarasamācāraṃ paṭicchannakammantaṃ asamaṇaṃ samaṇapaṭiññaṃ abrahmacāriṃ brahmacāripaṭiññaṃ antopūtiṃ avassutaṃ kasambujātaṃ majjhe bhikkhusaṅghassa nisinnaṃ. Disvāna uṭṭhāyāsanā yena so puggalo tenupasaṅkami; upasaṅkamitvā taṃ puggalaṃ etadavoca – ‘‘uṭṭhehi, āvuso, diṭṭhosi bhagavatā; natthi te bhikkhūhi saddhiṃ saṃvāso’’ti. Evaṃ vutte 4, so puggalo tuṇhī ahosi.
д̣̇уд̇ияамби ко ааяасмаа махаамог̇г̇аллаано д̇ам̣ буг̇г̇алам̣ зд̇ад̣̇авожа – ‘‘удтзхи, аавусо, д̣̇идтоси бхаг̇авад̇аа; над̇т̇и д̇з бхигкуухи сад̣̇д̇хим̣ сам̣ваасо’’д̇и. д̣̇уд̇ияамби ко…бз… д̇ад̇ияамби ко со буг̇г̇ало д̇ун̣хий ахоси.
Dutiyampi kho āyasmā mahāmoggallāno taṃ puggalaṃ etadavoca – ‘‘uṭṭhehi, āvuso, diṭṭhosi bhagavatā; natthi te bhikkhūhi saddhiṃ saṃvāso’’ti. Dutiyampi kho…pe… tatiyampi kho so puggalo tuṇhī ahosi.
ат̇а ко ааяасмаа махаамог̇г̇аллаано д̇ам̣ буг̇г̇алам̣ б̣аахааяам̣ г̇ахзд̇ваа б̣ахид̣̇ваарагодтагаа нигкаамзд̇ваа суужигхадигам̣ д̣̇ад̇ваа язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ зд̇ад̣̇авожа – ‘‘нигкаамид̇о, бханд̇з, со буг̇г̇ало маяаа. барисуд̣̇д̇хаа барисаа. уд̣̇д̣̇исад̇у, бханд̇з, бхаг̇аваа бхигкуунам̣ баад̇имогка’’нд̇и. ‘‘ажчарияам̣, мог̇г̇аллаана, аб̣бхуд̇ам̣, мог̇г̇аллаана! яаава б̣аахааг̇ахан̣ааби наама со могхабурисо ааг̇амзссад̇ий’’д̇и!
Atha kho āyasmā mahāmoggallāno taṃ puggalaṃ bāhāyaṃ gahetvā bahidvārakoṭṭhakā nikkhāmetvā sūcighaṭikaṃ datvā yena bhagavā tenupasaṅkami; upasaṅkamitvā bhagavantaṃ etadavoca – ‘‘nikkhāmito, bhante, so puggalo mayā. Parisuddhā parisā. Uddisatu, bhante, bhagavā bhikkhūnaṃ pātimokkha’’nti. ‘‘Acchariyaṃ, moggallāna, abbhutaṃ, moggallāna! Yāva bāhāgahaṇāpi nāma so moghapuriso āgamessatī’’ti!
ат̇а ко бхаг̇аваа бхигкуу ааманд̇зси – ‘‘на д̣̇аанаахам̣, бхигкавз, ид̇о барам̣ 5 убосат̇ам̣ гариссаами, баад̇имогкам̣ уд̣̇д̣̇исиссаами. д̇умхзва д̣̇аани, бхигкавз, ид̇о барам̣ убосат̇ам̣ гарзяяаат̇а, баад̇имогкам̣ уд̣̇д̣̇исзяяаат̇а. адтаанамзд̇ам̣, бхигкавз, анавагаасо яам̣ д̇ат̇ааг̇ад̇о абарисуд̣̇д̇хааяа барисааяа убосат̇ам̣ гарзяяа, баад̇имогкам̣ уд̣̇д̣̇исзяяа.
Atha kho bhagavā bhikkhū āmantesi – ‘‘na dānāhaṃ, bhikkhave, ito paraṃ 6 uposathaṃ karissāmi, pātimokkhaṃ uddisissāmi. Tumheva dāni, bhikkhave, ito paraṃ uposathaṃ kareyyātha, pātimokkhaṃ uddiseyyātha. Aṭṭhānametaṃ, bhikkhave, anavakāso yaṃ tathāgato aparisuddhāya parisāya uposathaṃ kareyya, pātimokkhaṃ uddiseyya.
‘‘адтимз, бхигкавз, махаасамуд̣̇д̣̇з ажчарияаа аб̣бхуд̇аа д̇хаммаа, яз д̣̇исваа д̣̇исваа асураа махаасамуд̣̇д̣̇з абхираманд̇и. гад̇амз адта?
‘‘Aṭṭhime, bhikkhave, mahāsamudde acchariyā abbhutā dhammā, ye disvā disvā asurā mahāsamudde abhiramanti. Katame aṭṭha?
‘‘махаасамуд̣̇д̣̇о, бхигкавз, анубуб̣б̣анинно анубуб̣б̣абон̣о анубуб̣б̣абаб̣бхааро, на ааяад̇агзнзва бабаад̇о. яамби 7, бхигкавз, махаасамуд̣̇д̣̇о анубуб̣б̣анинно анубуб̣б̣абон̣о анубуб̣б̣абаб̣бхааро на ааяад̇агзнзва бабаад̇о; аяам̣, бхигкавз, махаасамуд̣̇д̣̇з батамо ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Mahāsamuddo, bhikkhave, anupubbaninno anupubbapoṇo anupubbapabbhāro, na āyatakeneva papāto. Yampi 8, bhikkhave, mahāsamuddo anupubbaninno anupubbapoṇo anupubbapabbhāro na āyatakeneva papāto; ayaṃ, bhikkhave, mahāsamudde paṭhamo acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, махаасамуд̣̇д̣̇о тид̇ад̇хаммо взлам̣ наад̇ивад̇д̇ад̇и. яамби, бхигкавз, махаасамуд̣̇д̣̇о тид̇ад̇хаммо взлам̣ наад̇ивад̇д̇ад̇и; аяам̣, бхигкавз 9, махаасамуд̣̇д̣̇з д̣̇уд̇ияо ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, mahāsamuddo ṭhitadhammo velaṃ nātivattati. Yampi, bhikkhave, mahāsamuddo ṭhitadhammo velaṃ nātivattati; ayaṃ, bhikkhave 10, mahāsamudde dutiyo acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, махаасамуд̣̇д̣̇о на мад̇зна гун̣абзна сам̣васад̇и. яам̣ ход̇и махаасамуд̣̇д̣̇з мад̇ам̣ гун̣абам̣ д̇ам̣ киббамзва 11 д̇ийрам̣ ваахзд̇и, т̇алам̣ уссаарзд̇и. яамби, бхигкавз, махаасамуд̣̇д̣̇о на мад̇зна гун̣абзна сам̣васад̇и, яам̣ ход̇и махаасамуд̣̇д̣̇з мад̇ам̣ гун̣абам̣ д̇ам̣ киббамзва д̇ийрам̣ ваахзд̇и т̇алам̣ уссаарзд̇и; аяам̣, бхигкавз, махаасамуд̣̇д̣̇з д̇ад̇ияо ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, mahāsamuddo na matena kuṇapena saṃvasati. Yaṃ hoti mahāsamudde mataṃ kuṇapaṃ taṃ khippameva 12 tīraṃ vāheti, thalaṃ ussāreti. Yampi, bhikkhave, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ taṃ khippameva tīraṃ vāheti thalaṃ ussāreti; ayaṃ, bhikkhave, mahāsamudde tatiyo acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, яаа гаажи махаанад̣̇ияо, сзяяат̇ид̣̇ам̣ – г̇ан̇г̇аа яамунаа ажиравад̇ий сарабхуу махий, д̇аа махаасамуд̣̇д̣̇ам̣ бад̇ваа 13 ж̇аханд̇и буримаани наамаг̇од̇д̇аани; ‘махаасамуд̣̇д̣̇о’д̇взва сан̇кам̣ г̇ажчанд̇и. яамби, бхигкавз, яаа гаажи махаанад̣̇ияо, сзяяат̇ид̣̇ам̣ – г̇ан̇г̇аа яамунаа ажиравад̇ий сарабхуу махий д̇аа махаасамуд̣̇д̣̇ам̣ бад̇ваа ж̇аханд̇и буримаани наамаг̇од̇д̇аани, ‘махаасамуд̣̇д̣̇о’д̇взва сан̇кам̣ г̇ажчанд̇и; аяам̣, бхигкавз, махаасамуд̣̇д̣̇з жад̇уд̇т̇о ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, yā kāci mahānadiyo, seyyathidaṃ – gaṅgā yamunā aciravatī sarabhū mahī, tā mahāsamuddaṃ patvā 14 jahanti purimāni nāmagottāni; ‘mahāsamuddo’tveva saṅkhaṃ gacchanti. Yampi, bhikkhave, yā kāci mahānadiyo, seyyathidaṃ – gaṅgā yamunā aciravatī sarabhū mahī tā mahāsamuddaṃ patvā jahanti purimāni nāmagottāni, ‘mahāsamuddo’tveva saṅkhaṃ gacchanti; ayaṃ, bhikkhave, mahāsamudde catuttho acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, яаа жа логз саванд̇ияо махаасамуд̣̇д̣̇ам̣ аббзнд̇и, яаа жа анд̇алигкаа д̇хаараа бабад̇анд̇и, на д̇зна махаасамуд̣̇д̣̇асса уунад̇д̇ам̣ ваа буурад̇д̇ам̣ ваа бан̃н̃ааяад̇и. яамби, бхигкавз , яаа жа логз саванд̇ияо махаасамуд̣̇д̣̇ам̣ аббзнд̇и, яаа жа анд̇алигкаа д̇хаараа бабад̇анд̇и, на д̇зна махаасаммуд̣̇д̣̇асса уунад̇д̇ам̣ ваа буурад̇д̇ам̣ ваа бан̃н̃ааяад̇и; аяам̣, бхигкавз, махаасамуд̣̇д̣̇з бан̃жамо ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, yā ca loke savantiyo mahāsamuddaṃ appenti, yā ca antalikkhā dhārā papatanti, na tena mahāsamuddassa ūnattaṃ vā pūrattaṃ vā paññāyati. Yampi, bhikkhave , yā ca loke savantiyo mahāsamuddaṃ appenti, yā ca antalikkhā dhārā papatanti, na tena mahāsammuddassa ūnattaṃ vā pūrattaṃ vā paññāyati; ayaṃ, bhikkhave, mahāsamudde pañcamo acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, махаасамуд̣̇д̣̇о згарасо лон̣арасо. яамби, бхигкавз, махаасамуд̣̇д̣̇о згарасо лон̣арасо; аяам̣, бхигкавз, махаасамуд̣̇д̣̇з чадто ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, mahāsamuddo ekaraso loṇaraso. Yampi, bhikkhave, mahāsamuddo ekaraso loṇaraso; ayaṃ, bhikkhave, mahāsamudde chaṭṭho acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, махаасамуд̣̇д̣̇о б̣ахурад̇ано анзгарад̇ано. д̇ад̇римаани рад̇анаани, сзяяат̇ид̣̇ам̣ – муд̇д̇аа ман̣и взл̣урияо сан̇ко силаа баваал̣ам̣ раж̇ад̇ам̣ ж̇аад̇аруубам̣ лохид̇ан̇г̇о масаараг̇аллам̣. яамби, бхигкавз, махаасамуд̣̇д̣̇о б̣ахурад̇ано анзгарад̇ано, д̇ад̇римаани рад̇анаани, сзяяат̇ид̣̇ам̣ – муд̇д̇аа ман̣и взл̣урияо сан̇ко силаа баваал̣ам̣ раж̇ад̇ам̣ ж̇аад̇аруубам̣ лохид̇ан̇г̇о 15 масаараг̇аллам̣; аяам̣, бхигкавз, махаасамуд̣̇д̣̇з сад̇д̇амо ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, mahāsamuddo bahuratano anekaratano. Tatrimāni ratanāni, seyyathidaṃ – muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅgo masāragallaṃ. Yampi, bhikkhave, mahāsamuddo bahuratano anekaratano, tatrimāni ratanāni, seyyathidaṃ – muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅgo 16 masāragallaṃ; ayaṃ, bhikkhave, mahāsamudde sattamo acchariyo abbhuto dhammo, yaṃ disvā disvā asurā mahāsamudde abhiramanti.
‘‘буна жабарам̣, бхигкавз, махаасамуд̣̇д̣̇о махад̇ам̣ бхууд̇аанам̣ ааваасо. д̇ад̇римз бхууд̇аа – д̇ими д̇имин̇г̇ало д̇имид̇имин̇г̇ало 17 асураа нааг̇аа г̇анд̇хаб̣б̣аа. санд̇и махаасамуд̣̇д̣̇з яож̇анасад̇игааби ад̇д̇абхааваа, д̣̇вияож̇анасад̇игааби ад̇д̇абхааваа, д̇ияож̇анасад̇игааби ад̇д̇абхааваа, жад̇уяож̇анасад̇игааби ад̇д̇абхааваа, бан̃жаяож̇анасад̇игааби ад̇д̇абхааваа. яамби, бхигкавз, махаасамуд̣̇д̣̇о махад̇ам̣ бхууд̇аанам̣ ааваасо, д̇ад̇римз бхууд̇аа – д̇ими д̇имин̇г̇ало д̇имид̇имин̇г̇ало асураа нааг̇аа г̇анд̇хаб̣б̣аа, санд̇и махаасамуд̣̇д̣̇з яож̇анасад̇игааби ад̇д̇абхааваа д̣̇вияож̇анасад̇игааби ад̇д̇абхааваа…бз… бан̃жаяож̇анасад̇игааби ад̇д̇абхааваа; аяам̣, бхигкавз, махаасамуд̣̇д̣̇з адтамо ажчарияо аб̣бхуд̇о д̇хаммо, яам̣ д̣̇исваа д̣̇исваа асураа махаасамуд̣̇д̣̇з абхираманд̇и. имз ко, бхигкавз, адта махаасамуд̣̇д̣̇з ажчарияаа аб̣бхуд̇аа д̇хаммаа яз д̣̇исваа д̣̇исваа асураа махаасамуд̣̇д̣̇з абхираманд̇и.
‘‘Puna caparaṃ, bhikkhave, mahāsamuddo mahataṃ bhūtānaṃ āvāso. Tatrime bhūtā – timi timiṅgalo timitimiṅgalo 18 asurā nāgā gandhabbā. Santi mahāsamudde yojanasatikāpi attabhāvā, dviyojanasatikāpi attabhāvā, tiyojanasatikāpi attabhāvā, catuyojanasatikāpi attabhāvā, pañcayojanasatikāpi attabhāvā. Yampi, bhikkhave, mahāsamuddo mahataṃ bhūtānaṃ āvāso, tatrime bhūtā – timi timiṅgalo timitimiṅgalo asurā nāgā gandhabbā, santi mahāsamudde yojanasatikāpi attabhāvā dviyojanasatikāpi attabhāvā…pe… pañcayojanasatikāpi attabhāvā; ayaṃ, bhikkhave, mahāsamudde aṭṭhamo acchariyo abbhuto dhammo, yaṃ disvā disvā asurā mahāsamudde abhiramanti. Ime kho, bhikkhave, aṭṭha mahāsamudde acchariyā abbhutā dhammā ye disvā disvā asurā mahāsamudde abhiramanti.
‘‘звамзва ко, бхигкавз, имасмим̣ д̇хаммавинаяз адта ажчарияаа аб̣бхуд̇аа д̇хаммаа, яз д̣̇исваа д̣̇исваа бхигкуу имасмим̣ д̇хаммавинаяз абхираманд̇и. гад̇амз адта?
‘‘Evameva kho, bhikkhave, imasmiṃ dhammavinaye aṭṭha acchariyā abbhutā dhammā, ye disvā disvā bhikkhū imasmiṃ dhammavinaye abhiramanti. Katame aṭṭha?
‘‘сзяяат̇ааби, бхигкавз, махаасамуд̣̇д̣̇о анубуб̣б̣анинно анубуб̣б̣абон̣о анубуб̣б̣абаб̣бхааро, на ааяад̇агзнзва бабаад̇о; звамзва ко, бхигкавз, имасмим̣ д̇хаммавинаяз анубуб̣б̣асигкаа анубуб̣б̣агирияаа анубуб̣б̣абадибад̣̇аа, на ааяад̇агзнзва ан̃н̃аабадивзд̇хо. яамби, бхигкавз, имасмим̣ д̇хаммавинаяз анубуб̣б̣асигкаа анубуб̣б̣агирияаа анубуб̣б̣абадибад̣̇аа, на ааяад̇агзнзва ан̃н̃аабадивзд̇хо; аяам̣, бхигкавз, имасмим̣ д̇хаммавинаяз батамо ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto; evameva kho, bhikkhave, imasmiṃ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho. Yampi, bhikkhave, imasmiṃ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho; ayaṃ, bhikkhave, imasmiṃ dhammavinaye paṭhamo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби , бхигкавз, махаасамуд̣̇д̣̇о тид̇ад̇хаммо взлам̣ наад̇ивад̇д̇ад̇и; звамзва ко, бхигкавз, яам̣ маяаа саавагаанам̣ сигкаабад̣̇ам̣ бан̃н̃ад̇д̇ам̣ д̇ам̣ мама саавагаа ж̇ийвид̇ахзд̇уби наад̇иггаманд̇и. яамби, бхигкавз, маяаа саавагаанам̣ сигкаабад̣̇ам̣ бан̃н̃ад̇д̇ам̣ д̇ам̣ мама саавагаа ж̇ийвид̇ахзд̇уби наад̇иггаманд̇и; аяам̣, бхигкавз, имасмим̣ д̇хаммавинаяз д̣̇уд̇ияо ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi , bhikkhave, mahāsamuddo ṭhitadhammo velaṃ nātivattati; evameva kho, bhikkhave, yaṃ mayā sāvakānaṃ sikkhāpadaṃ paññattaṃ taṃ mama sāvakā jīvitahetupi nātikkamanti. Yampi, bhikkhave, mayā sāvakānaṃ sikkhāpadaṃ paññattaṃ taṃ mama sāvakā jīvitahetupi nātikkamanti; ayaṃ, bhikkhave, imasmiṃ dhammavinaye dutiyo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби, бхигкавз, махаасамуд̣̇д̣̇о на мад̇зна гун̣абзна сам̣васад̇и; яам̣ ход̇и махаасамуд̣̇д̣̇з мад̇ам̣ гун̣абам̣ д̇ам̣ киббамзва д̇ийрам̣ ваахзд̇и, т̇алам̣ уссаарзд̇и; звамзва ко, бхигкавз, яо со буг̇г̇ало д̣̇уссийло баабад̇хаммо асужи сан̇гассарасамаажааро бадижчаннагамманд̇о ассаман̣о саман̣абадин̃н̃о аб̣рахмажаарий б̣рахмажаарибадин̃н̃о анд̇обууд̇и авассуд̇о гасамб̣уж̇аад̇о, на д̇зна сан̇гхо сам̣васад̇и; ат̇а ко нам̣ киббамзва саннибад̇ид̇ваа угкибад̇и. гин̃жааби со ход̇и маж̇жхз бхигкусан̇гхасса нисинно, ат̇а ко со аарагаава сан̇гхамхаа, сан̇гхо жа д̇зна. яамби, бхигкавз, яо со буг̇г̇ало д̣̇уссийло баабад̇хаммо асужи сан̇гассарасамаажааро бадижчаннагамманд̇о ассаман̣о саман̣абадин̃н̃о аб̣рахмажаарий б̣рахмажаарибадин̃н̃о анд̇обууд̇и авассуд̇о гасамб̣уж̇аад̇о, на д̇зна сан̇гхо сам̣васад̇и; киббамзва нам̣ саннибад̇ид̇ваа угкибад̇и. гин̃жааби со ход̇и маж̇жхз бхигкусан̇гхасса нисинно, ат̇а ко со аарагаава сан̇гхамхаа, сан̇гхо жа д̇зна; аяам̣, бхигкавз, имасмим̣ д̇хаммавинаяз д̇ад̇ияо ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi, bhikkhave, mahāsamuddo na matena kuṇapena saṃvasati; yaṃ hoti mahāsamudde mataṃ kuṇapaṃ taṃ khippameva tīraṃ vāheti, thalaṃ ussāreti; evameva kho, bhikkhave, yo so puggalo dussīlo pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto, na tena saṅgho saṃvasati; atha kho naṃ khippameva sannipatitvā ukkhipati. Kiñcāpi so hoti majjhe bhikkhusaṅghassa nisinno, atha kho so ārakāva saṅghamhā, saṅgho ca tena. Yampi, bhikkhave, yo so puggalo dussīlo pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto, na tena saṅgho saṃvasati; khippameva naṃ sannipatitvā ukkhipati. Kiñcāpi so hoti majjhe bhikkhusaṅghassa nisinno, atha kho so ārakāva saṅghamhā, saṅgho ca tena; ayaṃ, bhikkhave, imasmiṃ dhammavinaye tatiyo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби, бхигкавз, яаа гаажи махаанад̣̇ияо, сзяяат̇ид̣̇ам̣ – г̇ан̇г̇аа яамунаа ажиравад̇ий сарабхуу махий д̇аа махаасамуд̣̇д̣̇ам̣ бад̇ваа ж̇аханд̇и буримаани наамаг̇од̇д̇аани, ‘махаасамуд̣̇д̣̇о’д̇взва сан̇кам̣ г̇ажчанд̇и; звамзва ко, бхигкавз, жад̇д̇ааро ван̣н̣аа – кад̇д̇ияаа, б̣раахман̣аа, взссаа, суд̣̇д̣̇аа д̇з д̇ат̇ааг̇ад̇аббавзд̣̇ид̇з д̇хаммавинаяз аг̇аарасмаа анаг̇аарияам̣ баб̣б̣аж̇ид̇ваа 19 ж̇аханд̇и буримаани наамаг̇од̇д̇аани, ‘саман̣аа сагяабуд̇д̇ияаа’д̇взва сан̇кам̣ г̇ажчанд̇и. яамби, бхигкавз, жад̇д̇ааро ван̣н̣аа – кад̇д̇ияаа, б̣раахман̣аа, взссаа, суд̣̇д̣̇аа д̇з д̇ат̇ааг̇ад̇аббавзд̣̇ид̇з д̇хаммавинаяз аг̇аарасмаа анаг̇аарияам̣ баб̣б̣аж̇ид̇ваа ж̇аханд̇и буримаани наамаг̇од̇д̇аани , ‘саман̣аа сагяабуд̇д̇ияаа’д̇взва сан̇кам̣ г̇ажчанд̇и; аяам̣, бхигкавз, имасмим̣ д̇хаммавинаяз жад̇уд̇т̇о ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi, bhikkhave, yā kāci mahānadiyo, seyyathidaṃ – gaṅgā yamunā aciravatī sarabhū mahī tā mahāsamuddaṃ patvā jahanti purimāni nāmagottāni, ‘mahāsamuddo’tveva saṅkhaṃ gacchanti; evameva kho, bhikkhave, cattāro vaṇṇā – khattiyā, brāhmaṇā, vessā, suddā te tathāgatappavedite dhammavinaye agārasmā anagāriyaṃ pabbajitvā 20 jahanti purimāni nāmagottāni, ‘samaṇā sakyaputtiyā’tveva saṅkhaṃ gacchanti. Yampi, bhikkhave, cattāro vaṇṇā – khattiyā, brāhmaṇā, vessā, suddā te tathāgatappavedite dhammavinaye agārasmā anagāriyaṃ pabbajitvā jahanti purimāni nāmagottāni , ‘samaṇā sakyaputtiyā’tveva saṅkhaṃ gacchanti; ayaṃ, bhikkhave, imasmiṃ dhammavinaye catuttho acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби, бхигкавз, яаа жа логз саванд̇ияо махаасамуд̣̇д̣̇ам̣ аббзнд̇и, яаа жа анд̇алигкаа д̇хаараа бабад̇анд̇и, на д̇зна махаасамуд̣̇д̣̇асса уунад̇д̇ам̣ ваа буурад̇д̇ам̣ ваа бан̃н̃ааяад̇и; звамзва ко, бхигкавз, б̣ахуу жзби бхигкуу анубаад̣̇исзсааяа ниб̣б̣аанад̇хаад̇уяаа бариниб̣б̣ааяанд̇и, на д̇зна ниб̣б̣аанад̇хаад̇уяаа уунад̇д̇ам̣ ваа буурад̇д̇ам̣ ваа бан̃н̃ааяад̇и. яамби, бхигкавз, б̣ахуу жзби бхигкуу анубаад̣̇исзсааяа ниб̣б̣аанад̇хаад̇уяаа бариниб̣б̣ааяанд̇и, на д̇зна ниб̣б̣аанад̇хаад̇уяаа уунад̇д̇ам̣ ваа буурад̇д̇ам̣ ваа бан̃н̃ааяад̇и; аяам̣, бхигкавз, имасмим̣ д̇хаммавинаяз бан̃жамо ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi, bhikkhave, yā ca loke savantiyo mahāsamuddaṃ appenti, yā ca antalikkhā dhārā papatanti, na tena mahāsamuddassa ūnattaṃ vā pūrattaṃ vā paññāyati; evameva kho, bhikkhave, bahū cepi bhikkhū anupādisesāya nibbānadhātuyā parinibbāyanti, na tena nibbānadhātuyā ūnattaṃ vā pūrattaṃ vā paññāyati. Yampi, bhikkhave, bahū cepi bhikkhū anupādisesāya nibbānadhātuyā parinibbāyanti, na tena nibbānadhātuyā ūnattaṃ vā pūrattaṃ vā paññāyati; ayaṃ, bhikkhave, imasmiṃ dhammavinaye pañcamo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби , бхигкавз, махаасамуд̣̇д̣̇о згарасо лон̣арасо; звамзва ко, бхигкавз, аяам̣ д̇хаммавинаяо згарасо вимуд̇д̇ирасо. яамби, бхигкавз, аяам̣ д̇хаммавинаяо згарасо вимуд̇д̇ирасо; аяам̣ , бхигкавз, имасмим̣ д̇хаммавинаяз чадто ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi , bhikkhave, mahāsamuddo ekaraso loṇaraso; evameva kho, bhikkhave, ayaṃ dhammavinayo ekaraso vimuttiraso. Yampi, bhikkhave, ayaṃ dhammavinayo ekaraso vimuttiraso; ayaṃ , bhikkhave, imasmiṃ dhammavinaye chaṭṭho acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби, бхигкавз, махаасамуд̣̇д̣̇о б̣ахурад̇ано анзгарад̇ано, д̇ад̇римаани рад̇анаани, сзяяат̇ид̣̇ам̣ – муд̇д̇аа ман̣и взл̣урияо сан̇ко силаа баваал̣ам̣ раж̇ад̇ам̣ ж̇аад̇аруубам̣ лохид̇ан̇г̇о масаараг̇аллам̣; звамзва ко, бхигкавз, аяам̣ д̇хаммавинаяо б̣ахурад̇ано анзгарад̇ано; д̇ад̇римаани рад̇анаани, сзяяат̇ид̣̇ам̣ – жад̇д̇ааро сад̇ибадтаанаа, жад̇д̇ааро саммаббад̇хаанаа, жад̇д̇ааро ид̣̇д̇хибаад̣̇аа, бан̃жинд̣̇рияаани, бан̃жа б̣алаани, сад̇д̇а б̣ож̇жхан̇г̇аа, арияо адтан̇г̇иго маг̇г̇о. яамби, бхигкавз, аяам̣ д̇хаммавинаяо б̣ахурад̇ано анзгарад̇ано, д̇ад̇римаани рад̇анаани, сзяяат̇ид̣̇ам̣ – жад̇д̇ааро сад̇ибадтаанаа, жад̇д̇ааро саммаббад̇хаанаа, жад̇д̇ааро ид̣̇д̇хибаад̣̇аа, бан̃жинд̣̇рияаани, бан̃жа б̣алаани, сад̇д̇а б̣ож̇жхан̇г̇аа, арияо адтан̇г̇иго маг̇г̇о; аяам̣, бхигкавз, имасмим̣ д̇хаммавинаяз сад̇д̇амо ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и.
‘‘Seyyathāpi, bhikkhave, mahāsamuddo bahuratano anekaratano, tatrimāni ratanāni, seyyathidaṃ – muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅgo masāragallaṃ; evameva kho, bhikkhave, ayaṃ dhammavinayo bahuratano anekaratano; tatrimāni ratanāni, seyyathidaṃ – cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo. Yampi, bhikkhave, ayaṃ dhammavinayo bahuratano anekaratano, tatrimāni ratanāni, seyyathidaṃ – cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo; ayaṃ, bhikkhave, imasmiṃ dhammavinaye sattamo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti.
‘‘сзяяат̇ааби , бхигкавз, махаасамуд̣̇д̣̇о махад̇ам̣ бхууд̇аанам̣ ааваасо, д̇ад̇римз бхууд̇аа – д̇ими д̇имин̇г̇ало д̇имид̇имин̇г̇ало асураа нааг̇аа г̇анд̇хаб̣б̣аа, санд̇и махаасамуд̣̇д̣̇з яож̇анасад̇игааби ад̇д̇абхааваа д̣̇вияож̇анасад̇игааби ад̇д̇абхааваа д̇ияож̇анасад̇игааби ад̇д̇абхааваа жад̇уяож̇анасад̇игааби ад̇д̇абхааваа бан̃жаяож̇анасад̇игааби ад̇д̇абхааваа; звамзва ко, бхигкавз, аяам̣ д̇хаммавинаяо махад̇ам̣ бхууд̇аанам̣ ааваасо; д̇ад̇римз бхууд̇аа – сод̇аабанно, сод̇аабад̇д̇ипаласажчигирияааяа бадибанно, сагад̣̇ааг̇аами, сагад̣̇ааг̇аамипаласажчигирияааяа бадибанно, анааг̇аамий, анааг̇аамийпаласажчигирияааяа бадибанно, арахаа, арахад̇д̇ааяа бадибанно 21. яамби, бхигкавз, аяам̣ д̇хаммавинаяо махад̇ам̣ бхууд̇аанам̣ ааваасо, д̇ад̇римз бхууд̇аа – сод̇аабанно, сод̇аабад̇д̇ипаласажчигирияааяа бадибанно, сагад̣̇ааг̇аамий, сагад̣̇ааг̇аамипаласажчигирияааяа бадибанно, анааг̇аамий, анааг̇аамипаласажчигирияааяа бадибанно, арахаа, арахад̇д̇ааяа бадибанно; аяам̣, бхигкавз, имасмим̣ д̇хаммавинаяз адтамо ажчарияо аб̣бхуд̇о д̇хаммо, яам̣ д̣̇исваа д̣̇исваа бхигкуу имасмим̣ д̇хаммавинаяз абхираманд̇и. имз ко, бхигкавз, имасмим̣ д̇хаммавинаяз адта ажчарияаа аб̣бхуд̇аа д̇хаммаа, яз д̣̇исваа д̣̇исваа бхигкуу имасмим̣ д̇хаммавинаяз абхираманд̇ий’’д̇и.
‘‘Seyyathāpi , bhikkhave, mahāsamuddo mahataṃ bhūtānaṃ āvāso, tatrime bhūtā – timi timiṅgalo timitimiṅgalo asurā nāgā gandhabbā, santi mahāsamudde yojanasatikāpi attabhāvā dviyojanasatikāpi attabhāvā tiyojanasatikāpi attabhāvā catuyojanasatikāpi attabhāvā pañcayojanasatikāpi attabhāvā; evameva kho, bhikkhave, ayaṃ dhammavinayo mahataṃ bhūtānaṃ āvāso; tatrime bhūtā – sotāpanno, sotāpattiphalasacchikiriyāya paṭipanno, sakadāgāmi, sakadāgāmiphalasacchikiriyāya paṭipanno, anāgāmī, anāgāmīphalasacchikiriyāya paṭipanno, arahā, arahattāya paṭipanno 22. Yampi, bhikkhave, ayaṃ dhammavinayo mahataṃ bhūtānaṃ āvāso, tatrime bhūtā – sotāpanno, sotāpattiphalasacchikiriyāya paṭipanno, sakadāgāmī, sakadāgāmiphalasacchikiriyāya paṭipanno, anāgāmī, anāgāmiphalasacchikiriyāya paṭipanno, arahā, arahattāya paṭipanno; ayaṃ, bhikkhave, imasmiṃ dhammavinaye aṭṭhamo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti. Ime kho, bhikkhave, imasmiṃ dhammavinaye aṭṭha acchariyā abbhutā dhammā, ye disvā disvā bhikkhū imasmiṃ dhammavinaye abhiramantī’’ti.
ат̇а ко бхаг̇аваа зд̇амад̇т̇ам̣ вид̣̇ид̇ваа д̇ааяам̣ взлааяам̣ имам̣ уд̣̇аанам̣ уд̣̇аанзси –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘чаннамад̇ивассад̇и, вивадам̣ наад̇ивассад̇и;
‘‘Channamativassati, vivaṭaṃ nātivassati;
д̇асмаа чаннам̣ виварзт̇а, звам̣ д̇ам̣ наад̇ивассад̇ий’’д̇и. бан̃жамам̣;
Tasmā channaṃ vivaretha, evaṃ taṃ nātivassatī’’ti. pañcamaṃ;
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / уд̣̇аана-адтагат̇аа • Udāna-aṭṭhakathā / 5. убосат̇асуд̇д̇аван̣н̣анаа • 5. Uposathasuttavaṇṇanā
