| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೩. ಉಪೋಸಥಸುತ್ತಂ
3. Uposathasuttaṃ
೩೪೪. ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ಅಥ ಖೋ ಅಞ್ಞತರೋ ಭಿಕ್ಖು ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಸೋ ಭಿಕ್ಖು ಭಗವನ್ತಂ ಏತದವೋಚ – ‘‘ಕೋ ನು ಖೋ, ಭನ್ತೇ, ಹೇತು, ಕೋ ಪಚ್ಚಯೋ, ಯೇನ ಮಿಧೇಕಚ್ಚೇ ಅಣ್ಡಜಾ ನಾಗಾ ಉಪೋಸಥಂ ಉಪವಸನ್ತಿ ವೋಸ್ಸಟ್ಠಕಾಯಾ ಚ ಭವನ್ತೀ’’ತಿ?
344. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ko nu kho, bhante, hetu, ko paccayo, yena midhekacce aṇḍajā nāgā uposathaṃ upavasanti vossaṭṭhakāyā ca bhavantī’’ti?
‘‘ಇಧ , ಭಿಕ್ಖು, ಏಕಚ್ಚಾನಂ ಅಣ್ಡಜಾನಂ ನಾಗಾನಂ ಏವಂ ಹೋತಿ – ‘ಮಯಂ ಖೋ ಪುಬ್ಬೇ ಕಾಯೇನ ದ್ವಯಕಾರಿನೋ ಅಹುಮ್ಹ, ವಾಚಾಯ ದ್ವಯಕಾರಿನೋ, ಮನಸಾ ದ್ವಯಕಾರಿನೋ। ತೇ ಮಯಂ ಕಾಯೇನ ದ್ವಯಕಾರಿನೋ, ವಾಚಾಯ ದ್ವಯಕಾರಿನೋ, ಮನಸಾ ದ್ವಯಕಾರಿನೋ, ಕಾಯಸ್ಸ ಭೇದಾ ಪರಂ ಮರಣಾ ಅಣ್ಡಜಾನಂ ನಾಗಾನಂ ಸಹಬ್ಯತಂ ಉಪಪನ್ನಾ। ಸಚಜ್ಜ ಮಯಂ ಕಾಯೇನ ಸುಚರಿತಂ ಚರೇಯ್ಯಾಮ, ವಾಚಾಯ ಸುಚರಿತಂ ಚರೇಯ್ಯಾಮ, ಮನಸಾ ಸುಚರಿತಂ ಚರೇಯ್ಯಾಮ, ಏವಂ ಮಯಂ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯಾಮ। ಹನ್ದ, ಮಯಂ ಏತರಹಿ ಕಾಯೇನ ಸುಚರಿತಂ ಚರಾಮ, ವಾಚಾಯ ಸುಚರಿತಂ ಚರಾಮ, ಮನಸಾ ಸುಚರಿತಂ ಚರಾಮಾ’ತಿ। ಅಯಂ ಖೋ, ಭಿಕ್ಖು, ಹೇತು, ಅಯಂ ಪಚ್ಚಯೋ, ಯೇನ ಮಿಧೇಕಚ್ಚೇ ಅಣ್ಡಜಾ ನಾಗಾ ಉಪೋಸಥಂ ಉಪವಸನ್ತಿ ವೋಸ್ಸಟ್ಠಕಾಯಾ ಚ ಭವನ್ತೀ’’ತಿ। ತತಿಯಂ।
‘‘Idha , bhikkhu, ekaccānaṃ aṇḍajānaṃ nāgānaṃ evaṃ hoti – ‘mayaṃ kho pubbe kāyena dvayakārino ahumha, vācāya dvayakārino, manasā dvayakārino. Te mayaṃ kāyena dvayakārino, vācāya dvayakārino, manasā dvayakārino, kāyassa bhedā paraṃ maraṇā aṇḍajānaṃ nāgānaṃ sahabyataṃ upapannā. Sacajja mayaṃ kāyena sucaritaṃ careyyāma, vācāya sucaritaṃ careyyāma, manasā sucaritaṃ careyyāma, evaṃ mayaṃ kāyassa bhedā paraṃ maraṇā sugatiṃ saggaṃ lokaṃ upapajjeyyāma. Handa, mayaṃ etarahi kāyena sucaritaṃ carāma, vācāya sucaritaṃ carāma, manasā sucaritaṃ carāmā’ti. Ayaṃ kho, bhikkhu, hetu, ayaṃ paccayo, yena midhekacce aṇḍajā nāgā uposathaṃ upavasanti vossaṭṭhakāyā ca bhavantī’’ti. Tatiyaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨-೫೦. ಪಣೀತತರಸುತ್ತಾದಿವಣ್ಣನಾ • 2-50. Paṇītatarasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨-೫೦. ಪಣೀತತರಸುತ್ತಾದಿವಣ್ಣನಾ • 2-50. Paṇītatarasuttādivaṇṇanā
