| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. உபோஸத²ஸுத்தவண்ணனா
10. Uposathasuttavaṇṇanā
71. த³ஸமே தத³ஹுபோஸதே²தி தஸ்மிங் அஹு உபோஸதே² தங் தி³வஸங் உபோஸதே², பன்னரஸிகஉபோஸத²தி³வஸேதி வுத்தங் ஹோதி. உபஸங்கமீதி உபோஸத²ங்கா³னி அதி⁴ட்டா²ய க³ந்த⁴மாலாதி³ஹத்தா² உபஸங்கமி. ஹந்தா³தி வவஸ்ஸக்³க³த்தே² நிபாதோ. தி³வா தி³வஸ்ஸாதி தி³வஸஸ்ஸ தி³வா நாம மஜ்ஜ²ன்ஹோ, இமஸ்மிங் டி²தே மஜ்ஜ²ன்ஹிகே காலேதி அத்தோ². குதோ நு த்வங் ஆக³ச்ச²ஸீதி கிங் கரொந்தீ விசரஸீதி புச்ச²தி. கோ³பாலகுபோஸதோ²தி கோ³பாலகேஹி ஸத்³தி⁴ங் உபவஸனஉபோஸதோ². நிக³ண்டு²போஸதோ²தி நிக³ண்டா²னங் உபவஸனஉபோஸதோ². அரியுபோஸதோ²தி அரியானங் உபவஸனஉபோஸதோ². ஸெய்யதா²பி விஸாகே²தி யதா² நாம, விஸாகே². ஸாயன்ஹஸமயே ஸாமிகானங் கா³வோ நிய்யாதெத்வாதி கோ³பாலகா ஹி தே³வஸிகவேதனேன வா பஞ்சாஹத³ஸாஹஅத்³த⁴மாஸமாஸச²மாஸஸங்வச்ச²ரபரிச்சே²தே³ன வா கா³வோ க³ஹெத்வா ரக்க²ந்தி. இத⁴ பன தே³வஸிகவேதனேன ரக்க²ந்தங் ஸந்தா⁴யேதங் வுத்தங் – நிய்யாதெத்வாதி படிச்சா²பெத்வா ‘‘ஏதா வோ கா³வோ’’தி த³த்வா. இதி படிஸஞ்சிக்க²தீதி அத்தனோ கே³ஹங் க³ந்த்வா பு⁴ஞ்ஜித்வா மஞ்சே நிபன்னோ ஏவங் பச்சவெக்க²தி. அபி⁴ஜ்ஜா²ஸஹக³தேனாதி தண்ஹாய ஸம்பயுத்தேன. ஏவங் கோ², விஸாகே², கோ³பாலகுபோஸதோ² ஹோதீதி அரியுபோஸதோ²வ அயங், அபரிஸுத்³த⁴விதக்கதாய பன கோ³பாலகஉபோஸத²ட்டா²னே டி²தோ. ந மஹப்ப²லோதி விபாகப²லேன ந மஹப்ப²லோ. ந மஹானிஸங்ஸோதி விபாகானிஸங்ஸேன ந மஹானிஸங்ஸோ. ந மஹாஜுதிகோதி விபாகோபா⁴ஸேன ந மஹாஓபா⁴ஸோ. ந மஹாவிப்பா²ரோதி விபாகவிப்பா²ரஸ்ஸ அமஹந்ததாய ந மஹாவிப்பா²ரோ.
71. Dasame tadahuposatheti tasmiṃ ahu uposathe taṃ divasaṃ uposathe, pannarasikauposathadivaseti vuttaṃ hoti. Upasaṅkamīti uposathaṅgāni adhiṭṭhāya gandhamālādihatthā upasaṅkami. Handāti vavassaggatthe nipāto. Divā divassāti divasassa divā nāma majjhanho, imasmiṃ ṭhite majjhanhike kāleti attho. Kuto nu tvaṃ āgacchasīti kiṃ karontī vicarasīti pucchati. Gopālakuposathoti gopālakehi saddhiṃ upavasanauposatho. Nigaṇṭhuposathoti nigaṇṭhānaṃ upavasanauposatho. Ariyuposathoti ariyānaṃ upavasanauposatho. Seyyathāpi visākheti yathā nāma, visākhe. Sāyanhasamayesāmikānaṃ gāvo niyyātetvāti gopālakā hi devasikavetanena vā pañcāhadasāhaaddhamāsamāsachamāsasaṃvaccharaparicchedena vā gāvo gahetvā rakkhanti. Idha pana devasikavetanena rakkhantaṃ sandhāyetaṃ vuttaṃ – niyyātetvāti paṭicchāpetvā ‘‘etā vo gāvo’’ti datvā. Itipaṭisañcikkhatīti attano gehaṃ gantvā bhuñjitvā mañce nipanno evaṃ paccavekkhati. Abhijjhāsahagatenāti taṇhāya sampayuttena. Evaṃ kho, visākhe, gopālakuposatho hotīti ariyuposathova ayaṃ, aparisuddhavitakkatāya pana gopālakauposathaṭṭhāne ṭhito. Na mahapphaloti vipākaphalena na mahapphalo. Na mahānisaṃsoti vipākānisaṃsena na mahānisaṃso. Na mahājutikoti vipākobhāsena na mahāobhāso. Na mahāvipphāroti vipākavipphārassa amahantatāya na mahāvipphāro.
ஸமணஜாதிகாதி ஸமணாயேவ. பரங் யோஜனஸதந்தி யோஜனஸதங் அதிக்கமித்வா ததோ பரங். தேஸு த³ண்ட³ங் நிக்கி²பாஹீதி தேஸு யோஜனஸததோ பரபா⁴கே³ஸு டி²தேஸு ஸத்தேஸு த³ண்ட³ங் நிக்கி²ப, நிக்கி²த்தத³ண்டோ³ ஹோஹி. நாஹங் க்வசனி கஸ்ஸசி கிஞ்சனதஸ்மிந்தி அஹங் கத்த²சி கஸ்ஸசி பரஸ்ஸ கிஞ்சனதஸ்மிங் ந ஹோமி. கிஞ்சனங் வுச்சதி பலிபோ³தோ⁴, பலிபோ³தோ⁴ ந ஹோமீதி வுத்தங் ஹோதி. ந ச மம க்வசனி கத்த²சி கிஞ்சனதத்தீ²தி மமாபி க்வசனி அந்தோ வா ப³ஹித்³தா⁴ வா கத்த²சி ஏகபரிக்கா²ரேபி கிஞ்சனதா நத்தி², பலிபோ³தோ⁴ நத்தி², சி²ன்னபலிபோ³தோ⁴ஹமஸ்மீதி வுத்தங் ஹோதி. போ⁴கே³தி மஞ்சபீட²யாகு³ப⁴த்தாத³யோ. அதி³ன்னங்யேவ பரிபு⁴ஞ்ஜதீதி புனதி³வஸே மஞ்சே நிபஜ்ஜந்தோபி பீடே² நிஸீத³ந்தோபி யாகு³ங் பிவந்தோபி ப⁴த்தங் பு⁴ஞ்ஜந்தோபி தே போ⁴கே³ அதி³ன்னேயேவ பரிபு⁴ஞ்ஜதி. ந மஹப்ப²லோதி நிப்ப²லோ. ப்³யஞ்ஜனமேவ ஹி எத்த² ஸாவஸேஸங், அத்தோ² பன நிரவஸேஸோ. ஏவங் உபவுத்த²ஸ்ஸ ஹி உபோஸத²ஸ்ஸ அப்பமத்தகம்பி விபாகப²லங் இட்ட²ங் கந்தங் மனாபங் நாம நத்தி². தஸ்மா நிப்ப²லொத்வேவ வேதி³தப்³போ³. ஸேஸபதே³ஸுபி ஏஸேவ நயோ.
Samaṇajātikāti samaṇāyeva. Paraṃ yojanasatanti yojanasataṃ atikkamitvā tato paraṃ. Tesu daṇḍaṃ nikkhipāhīti tesu yojanasatato parabhāgesu ṭhitesu sattesu daṇḍaṃ nikkhipa, nikkhittadaṇḍo hohi. Nāhaṃ kvacani kassaci kiñcanatasminti ahaṃ katthaci kassaci parassa kiñcanatasmiṃ na homi. Kiñcanaṃ vuccati palibodho, palibodho na homīti vuttaṃ hoti. Na ca mama kvacani katthaci kiñcanatatthīti mamāpi kvacani anto vā bahiddhā vā katthaci ekaparikkhārepi kiñcanatā natthi, palibodho natthi, chinnapalibodhohamasmīti vuttaṃ hoti. Bhogeti mañcapīṭhayāgubhattādayo. Adinnaṃyeva paribhuñjatīti punadivase mañce nipajjantopi pīṭhe nisīdantopi yāguṃ pivantopi bhattaṃ bhuñjantopi te bhoge adinneyeva paribhuñjati. Na mahapphaloti nipphalo. Byañjanameva hi ettha sāvasesaṃ, attho pana niravaseso. Evaṃ upavutthassa hi uposathassa appamattakampi vipākaphalaṃ iṭṭhaṃ kantaṃ manāpaṃ nāma natthi. Tasmā nipphalotveva veditabbo. Sesapadesupi eseva nayo.
உபக்கிலிட்ட²ஸ்ஸ சித்தஸ்ஸாதி இத³ங் கஸ்மா ஆஹ? ஸங்கிலிட்டே²ன ஹி சித்தேன உபவுத்தோ² உபோஸதோ² ந மஹப்ப²லோ ஹோதீதி த³ஸ்ஸிதத்தா விஸுத்³தே⁴ன சித்தேன உபவுத்த²ஸ்ஸ மஹப்ப²லதா அனுஞ்ஞாதா ஹோதி. தஸ்மா யேன கம்மட்டா²னேன சித்தங் விஸுஜ்ஜ²தி, தங் சித்தவிஸோத⁴னகம்மட்டா²னங் த³ஸ்ஸேதுங் இத³மாஹ . தத்த² உபக்கமேனாதி பச்சத்தபுரிஸகாரேன, உபாயேன வா. ததா²க³தங் அனுஸ்ஸரதீதி அட்ட²ஹி காரணேஹி ததா²க³தகு³ணே அனுஸ்ஸரதி. எத்த² ஹி இதிபி ஸோ ப⁴க³வாதி ஸோ ப⁴க³வா இதிபி ஸீலேன, இதிபி ஸமாதி⁴னாதி ஸப்³பே³ லோகியலோகுத்தரா பு³த்³த⁴கு³ணா ஸங்க³ஹிதா. அரஹந்திஆதீ³ஹி பாடியேக்ககு³ணாவ நித்³தி³ட்டா². ததா²க³தங் அனுஸ்ஸரதோ சித்தங் பஸீத³தீதி லோகியலோகுத்தரே ததா²க³தகு³ணே அனுஸ்ஸரந்தஸ்ஸ சித்துப்பாதோ³ பஸன்னோ ஹோதி.
Upakkiliṭṭhassa cittassāti idaṃ kasmā āha? Saṃkiliṭṭhena hi cittena upavuttho uposatho na mahapphalo hotīti dassitattā visuddhena cittena upavutthassa mahapphalatā anuññātā hoti. Tasmā yena kammaṭṭhānena cittaṃ visujjhati, taṃ cittavisodhanakammaṭṭhānaṃ dassetuṃ idamāha . Tattha upakkamenāti paccattapurisakārena, upāyena vā. Tathāgataṃ anussaratīti aṭṭhahi kāraṇehi tathāgataguṇe anussarati. Ettha hi itipi so bhagavāti so bhagavā itipi sīlena, itipi samādhināti sabbe lokiyalokuttarā buddhaguṇā saṅgahitā. Arahantiādīhi pāṭiyekkaguṇāva niddiṭṭhā. Tathāgataṃ anussarato cittaṃ pasīdatīti lokiyalokuttare tathāgataguṇe anussarantassa cittuppādo pasanno hoti.
சித்தஸ்ஸ உபக்கிலேஸாதி பஞ்ச நீவரணா. கக்கந்தி ஆமலககக்கங். தஜ்ஜங் வாயாமந்தி தஜ்ஜாதிகங் தத³னுச்ச²விகங் கக்கேன மக்க²னக⁴ங்ஸனதோ⁴வனவாயாமங். பரியோத³பனா ஹோதீதி ஸுத்³த⁴பா⁴வகரணங் ஹோதி. கிலிட்ட²ஸ்மிங் ஹி ஸீஸே பஸாத⁴னங் பஸாதெ⁴த்வா நக்க²த்தங் கீளமானோ ந ஸோப⁴தி, பரிஸுத்³தே⁴ பன தஸ்மிங் பஸாத⁴னங் பஸாதெ⁴த்வா நக்க²த்தங் கீளமானோ ஸோப⁴தி, ஏவமேவ கிலிட்ட²சித்தேன உபோஸத²ங்கா³னி அதி⁴ட்டா²ய உபோஸதோ² உபவுத்தோ² ந மஹப்ப²லோ ஹோதி, பரிஸுத்³தே⁴ன பன சித்தேன உபோஸத²ங்கா³னி அதி⁴ட்டா²ய உபவுத்தோ² உபோஸதோ² மஹப்ப²லோ ஹோதீதி அதி⁴ப்பாயேன ஏவமாஹ. ப்³ரஹ்முபோஸத²ங் உபவஸதீதி ப்³ரஹ்மா வுச்சதி ஸம்மாஸம்பு³த்³தோ⁴, தஸ்ஸ கு³ணானுஸ்ஸரணவஸேன அயங் உபோஸதோ² ப்³ரஹ்முபோஸதோ² நாம, தங் உபவஸதி. ப்³ரஹ்முனா ஸத்³தி⁴ங் ஸங்வஸதீதி ஸம்மாஸம்பு³த்³தே⁴ன ஸத்³தி⁴ங் ஸங்வஸதி. ப்³ரஹ்மஞ்சஸ்ஸ ஆரப்³பா⁴தி ஸம்மாஸம்பு³த்³த⁴ங் ஆரப்³ப⁴.
Cittassa upakkilesāti pañca nīvaraṇā. Kakkanti āmalakakakkaṃ. Tajjaṃ vāyāmanti tajjātikaṃ tadanucchavikaṃ kakkena makkhanaghaṃsanadhovanavāyāmaṃ. Pariyodapanā hotīti suddhabhāvakaraṇaṃ hoti. Kiliṭṭhasmiṃ hi sīse pasādhanaṃ pasādhetvā nakkhattaṃ kīḷamāno na sobhati, parisuddhe pana tasmiṃ pasādhanaṃ pasādhetvā nakkhattaṃ kīḷamāno sobhati, evameva kiliṭṭhacittena uposathaṅgāni adhiṭṭhāya uposatho upavuttho na mahapphalo hoti, parisuddhena pana cittena uposathaṅgāni adhiṭṭhāya upavuttho uposatho mahapphalo hotīti adhippāyena evamāha. Brahmuposathaṃ upavasatīti brahmā vuccati sammāsambuddho, tassa guṇānussaraṇavasena ayaṃ uposatho brahmuposatho nāma, taṃ upavasati. Brahmunā saddhiṃ saṃvasatīti sammāsambuddhena saddhiṃ saṃvasati. Brahmañcassaārabbhāti sammāsambuddhaṃ ārabbha.
த⁴ம்மங் அனுஸ்ஸரதீதி ஸஹதந்திகங் லோகுத்தரத⁴ம்மங் அனுஸ்ஸரதி. ஸொத்திந்தி குருவிந்த³கஸொத்திங். குருவிந்த³கபாஸாணசுண்ணேன ஹி ஸத்³தி⁴ங் லாக²ங் யோஜெத்வா மணிகே கத்வா விஜ்ஜி²த்வா ஸுத்தேன ஆவுணித்வா தங் மணி கலாபபந்திங் உப⁴தோ க³ஹெத்வா பிட்டி²ங் க⁴ங்ஸெந்தி, தங் ஸந்தா⁴ய வுத்தங் – ‘‘ஸொத்திஞ்ச படிச்சா’’தி. சுண்ணந்தி ந்ஹானீயசுண்ணங். தஜ்ஜங் வாயாமந்தி உப்³ப³ட்டனக⁴ங்ஸனதோ⁴வனாதி³கங் தத³னுரூபவாயாமங். த⁴ம்முபோஸத²ந்தி ஸஹதந்திகங் நவலோகுத்தரத⁴ம்மங் ஆரப்³ப⁴ உபவுத்த²த்தா அயங் உபோஸதோ² ‘‘த⁴ம்முபோஸதோ²’’தி வுத்தோ. இதா⁴பி பரியோத³பனாதி பதே³ ட²த்வா புரிமனயேனேவ யோஜனா காதப்³பா³.
Dhammaṃ anussaratīti sahatantikaṃ lokuttaradhammaṃ anussarati. Sottinti kuruvindakasottiṃ. Kuruvindakapāsāṇacuṇṇena hi saddhiṃ lākhaṃ yojetvā maṇike katvā vijjhitvā suttena āvuṇitvā taṃ maṇi kalāpapantiṃ ubhato gahetvā piṭṭhiṃ ghaṃsenti, taṃ sandhāya vuttaṃ – ‘‘sottiñca paṭiccā’’ti. Cuṇṇanti nhānīyacuṇṇaṃ. Tajjaṃ vāyāmanti ubbaṭṭanaghaṃsanadhovanādikaṃ tadanurūpavāyāmaṃ. Dhammuposathanti sahatantikaṃ navalokuttaradhammaṃ ārabbha upavutthattā ayaṃ uposatho ‘‘dhammuposatho’’ti vutto. Idhāpi pariyodapanāti pade ṭhatvā purimanayeneva yojanā kātabbā.
ஸங்க⁴ங் அனுஸ்ஸரதீதி அட்ட²ன்னங் அரியபுக்³க³லானங் கு³ணே அனுஸ்ஸரதி. உஸ்மஞ்ச படிச்சாதி த்³வே தயோ வாரே கா³ஹாபிதங் உஸுமங் படிச்ச. உஸஞ்சாதிபி பாடோ², அயமேவத்தோ² . கா²ரந்தி சா²ரிகங். கோ³மயந்தி கோ³முத்தங் வா அஜலண்டி³கா வா. பரியோத³பனாதி இதா⁴பி புரிமனயேனேவ யோஜனா காதப்³பா³. ஸங்கு⁴போஸத²ந்தி அட்ட²ன்னங் அரியபுக்³க³லானங் கு³ணே ஆரப்³ப⁴ உபவுத்த²த்தா அயங் உபோஸதோ² ‘‘ஸங்கு⁴போஸதோ²’’தி வுத்தோ.
Saṅghaṃ anussaratīti aṭṭhannaṃ ariyapuggalānaṃ guṇe anussarati. Usmañca paṭiccāti dve tayo vāre gāhāpitaṃ usumaṃ paṭicca. Usañcātipi pāṭho, ayamevattho . Khāranti chārikaṃ. Gomayanti gomuttaṃ vā ajalaṇḍikā vā. Pariyodapanāti idhāpi purimanayeneva yojanā kātabbā. Saṅghuposathanti aṭṭhannaṃ ariyapuggalānaṃ guṇe ārabbha upavutthattā ayaṃ uposatho ‘‘saṅghuposatho’’ti vutto.
ஸீலானீதி க³ஹட்டோ² க³ஹட்ட²ஸீலானி, பப்³ப³ஜிதோ பப்³ப³ஜிதஸீலானி. அக²ண்டா³னீதிஆதீ³னங் அத்தோ² விஸுத்³தி⁴மக்³கே³ (விஸுத்³தி⁴॰ 1.21) வித்தா²ரிதோவ. வாலண்டு³பகந்தி அஸ்ஸவாலேஹி வா மகசிவாலாதீ³ஹி வா கதங் அண்டு³பகங். தஜ்ஜங் வாயாமந்தி தேலேன தேமெத்வா மலஸ்ஸ திந்தபா⁴வங் ஞத்வா சா²ரிகங் பக்கி²பித்வா வாலண்டு³பகேன க⁴ங்ஸனவாயாமோ. இத⁴ பரியோத³பனாதி பதே³ ட²த்வா ஏவங் யோஜனா காதப்³பா³ கிலிட்ட²ஸ்மிஞ்ஹி ஆதா³ஸே மண்டி³தபஸாதி⁴தோபி அத்தபா⁴வோ ஓலோகியமானோ ந ஸோப⁴தி, பரிஸுத்³தே⁴ ஸோப⁴தி. ஏவமேவ கிலிட்டே²ன சித்தேன உபவுத்தோ² உபோஸதோ² ந மஹப்ப²லோ ஹோதி, பரிஸுத்³தே⁴ன பன மஹப்ப²லோ ஹோதீதி. ஸீலுபோஸத²ந்தி அத்தனோ ஸீலானுஸ்ஸரணவஸேன உபவுத்தோ² உபோஸதோ² ஸீலுபோஸதோ² நாம. ஸீலேன ஸத்³தி⁴ந்தி அத்தனோ பஞ்சஸீலத³ஸஸீலேன ஸத்³தி⁴ங். ஸீலஞ்சஸ்ஸ ஆரப்³பா⁴தி பஞ்சஸீலங் த³ஸஸீலஞ்ச ஆரப்³ப⁴.
Sīlānīti gahaṭṭho gahaṭṭhasīlāni, pabbajito pabbajitasīlāni. Akhaṇḍānītiādīnaṃ attho visuddhimagge (visuddhi. 1.21) vitthāritova. Vālaṇḍupakanti assavālehi vā makacivālādīhi vā kataṃ aṇḍupakaṃ. Tajjaṃvāyāmanti telena temetvā malassa tintabhāvaṃ ñatvā chārikaṃ pakkhipitvā vālaṇḍupakena ghaṃsanavāyāmo. Idha pariyodapanāti pade ṭhatvā evaṃ yojanā kātabbā kiliṭṭhasmiñhi ādāse maṇḍitapasādhitopi attabhāvo olokiyamāno na sobhati, parisuddhe sobhati. Evameva kiliṭṭhena cittena upavuttho uposatho na mahapphalo hoti, parisuddhena pana mahapphalo hotīti. Sīluposathanti attano sīlānussaraṇavasena upavuttho uposatho sīluposatho nāma. Sīlena saddhinti attano pañcasīladasasīlena saddhiṃ. Sīlañcassa ārabbhāti pañcasīlaṃ dasasīlañca ārabbha.
தே³வதா அனுஸ்ஸரதீதி தே³வதா ஸக்கி²ட்டா²னே ட²பெத்வா அத்தனோ ஸத்³தா⁴தி³கு³ணே அனுஸ்ஸரதி. உக்கந்தி உத்³த⁴னங். லோணந்தி லோணமத்திகா. கே³ருகந்தி கே³ருகசுண்ணங். நாளிகஸண்டா³ஸந்தி த⁴மனநாளிகஞ்சேவ பரிவத்தனஸண்டா³ஸஞ்ச. தஜ்ஜங் வாயாமந்தி உத்³த⁴னே பக்கி²பனத⁴மனபரிவத்தனாதி³கங் அனுரூபங் வாயாமங். இத⁴ பரியோத³பனாதி பதே³ ட²த்வா ஏவங் யோஜனா வேதி³தப்³பா³ – ஸங்கிலிட்ட²ஸுவண்ணமயேன ஹி பஸாத⁴னப⁴ண்டே³ன பஸாதி⁴தா நக்க²த்தங் கீளமானா ந ஸோப⁴ந்தி, பரிஸுத்³த⁴ஸுவண்ணமயேன ஸோப⁴ந்தி. ஏவமேவ ஸங்கிலிட்ட²சித்தஸ்ஸ உபோஸதோ² ந மஹப்ப²லோ ஹோதி, பரிஸுத்³த⁴சித்தஸ்ஸ மஹப்ப²லோ. தே³வதுபோஸத²ந்தி தே³வதா ஸக்கி²ட்டா²னே ட²பெத்வா அத்தனோ கு³ணே அனுஸ்ஸரந்தேன உபவுத்த²உபோஸதோ² தே³வதுபோஸதோ² நாம. ஸேஸங் இமேஸு பு³த்³தா⁴னுஸ்ஸதிஆதீ³ஸு கம்மட்டா²னேஸு யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ (விஸுத்³தி⁴॰ 1.123 ஆத³யோ) வுத்தமேவ.
Devatā anussaratīti devatā sakkhiṭṭhāne ṭhapetvā attano saddhādiguṇe anussarati. Ukkanti uddhanaṃ. Loṇanti loṇamattikā. Gerukanti gerukacuṇṇaṃ. Nāḷikasaṇḍāsanti dhamananāḷikañceva parivattanasaṇḍāsañca. Tajjaṃ vāyāmanti uddhane pakkhipanadhamanaparivattanādikaṃ anurūpaṃ vāyāmaṃ. Idha pariyodapanāti pade ṭhatvā evaṃ yojanā veditabbā – saṃkiliṭṭhasuvaṇṇamayena hi pasādhanabhaṇḍena pasādhitā nakkhattaṃ kīḷamānā na sobhanti, parisuddhasuvaṇṇamayena sobhanti. Evameva saṃkiliṭṭhacittassa uposatho na mahapphalo hoti, parisuddhacittassa mahapphalo. Devatuposathanti devatā sakkhiṭṭhāne ṭhapetvā attano guṇe anussarantena upavutthauposatho devatuposatho nāma. Sesaṃ imesu buddhānussatiādīsu kammaṭṭhānesu yaṃ vattabbaṃ siyā, taṃ sabbaṃ visuddhimagge (visuddhi. 1.123 ādayo) vuttameva.
பாணாதிபாதந்தி பாணவத⁴ங். பஹாயாதி தங் பாணாதிபாதசேதனாஸங்கா²தங் து³ஸ்ஸீல்யங் பஜஹித்வா. படிவிரதாதி பஹீனகாலதோ பட்டா²ய ததோ து³ஸ்ஸீல்யதோ ஓரதா விரதாவ. நிஹிதத³ண்டா³ நிஹிதஸத்தா²தி பரூபகா⁴தத்தா²ய த³ண்ட³ங் வா ஸத்த²ங் வா ஆதா³ய அவத்தனதோ நிக்கி²த்தத³ண்டா³ சேவ நிக்கி²த்தஸத்தா² சாதி அத்தோ². எத்த² ச ட²பெத்வா த³ண்ட³ங் ஸப்³ப³ம்பி அவஸேஸங் உபகரணங் ஸத்தானங் விஹிங்ஸனபா⁴வதோ ஸத்த²ந்தி வேதி³தப்³ப³ங். யங் பன பி⁴க்கூ² கத்தரத³ண்ட³ங் வா த³ந்தகட்ட²வாஸிங் வா பிப்ப²லகங் வா க³ஹெத்வா விசரந்தி, ந தங் பரூபகா⁴தத்தா²ய. தஸ்மா நிஹிதத³ண்டா³ நிஹிதஸத்தா²த்வேவ ஸங்க²ங் க³ச்ச²ந்தி. லஜ்ஜீதி பாபஜிகு³ச்ச²னலக்க²ணாய லஜ்ஜாய ஸமன்னாக³தா. த³யாபன்னாதி த³யங் மெத்தசித்ததங் ஆபன்னா. ஸப்³ப³பாணபூ⁴தஹிதானுகம்பீதி ஸப்³பே³ பாணபூ⁴தே ஹிதேன அனுகம்பகா, தாய ஏவ த³யாபன்னதாய ஸப்³பே³ஸங் பாணபூ⁴தானங் ஹிதசித்தகாதி அத்தோ². அஹம்பஜ்ஜாதி அஹம்பி அஜ்ஜ. இமினாபி அங்கே³னாதி இமினாபி கு³ணங்கே³ன. அரஹதங் அனுகரோமீதி யதா² புரதோ க³ச்ச²ந்தங் பச்ச²தோ க³ச்ச²ந்தோ அனுக³ச்ச²தி நாம, ஏவங் அஹம்பி அரஹந்தேஹி பட²மங் கதங் இமங் கு³ணங் பச்சா² கரொந்தோ தேஸங் அரஹந்தானங் அனுகரோமி. உபோஸதோ² ச மே உபவுத்தோ² ப⁴விஸ்ஸதீதி ஏவங் கரொந்தேன மயா அரஹதஞ்ச அனுகதங் ப⁴விஸ்ஸதி, உபோஸதோ² ச உபவுத்தோ² ப⁴விஸ்ஸதி.
Pāṇātipātanti pāṇavadhaṃ. Pahāyāti taṃ pāṇātipātacetanāsaṅkhātaṃ dussīlyaṃ pajahitvā. Paṭiviratāti pahīnakālato paṭṭhāya tato dussīlyato oratā viratāva. Nihitadaṇḍā nihitasatthāti parūpaghātatthāya daṇḍaṃ vā satthaṃ vā ādāya avattanato nikkhittadaṇḍā ceva nikkhittasatthā cāti attho. Ettha ca ṭhapetvā daṇḍaṃ sabbampi avasesaṃ upakaraṇaṃ sattānaṃ vihiṃsanabhāvato satthanti veditabbaṃ. Yaṃ pana bhikkhū kattaradaṇḍaṃ vā dantakaṭṭhavāsiṃ vā pipphalakaṃ vā gahetvā vicaranti, na taṃ parūpaghātatthāya. Tasmā nihitadaṇḍā nihitasatthātveva saṅkhaṃ gacchanti. Lajjīti pāpajigucchanalakkhaṇāya lajjāya samannāgatā. Dayāpannāti dayaṃ mettacittataṃ āpannā. Sabbapāṇabhūtahitānukampīti sabbe pāṇabhūte hitena anukampakā, tāya eva dayāpannatāya sabbesaṃ pāṇabhūtānaṃ hitacittakāti attho. Ahampajjāti ahampi ajja. Imināpi aṅgenāti imināpi guṇaṅgena. Arahataṃ anukaromīti yathā purato gacchantaṃ pacchato gacchanto anugacchati nāma, evaṃ ahampi arahantehi paṭhamaṃ kataṃ imaṃ guṇaṃ pacchā karonto tesaṃ arahantānaṃ anukaromi. Uposatho ca me upavuttho bhavissatīti evaṃ karontena mayā arahatañca anukataṃ bhavissati, uposatho ca upavuttho bhavissati.
அதி³ன்னாதா³னந்தி அதி³ன்னஸ்ஸ பரபரிக்³க³ஹிதஸ்ஸ ஆதா³னங், தெ²ய்யங் சோரிகந்தி அத்தோ². தி³ன்னமேவ ஆதி³யந்தீதி தி³ன்னாதா³யீ. சித்தேனபி தி³ன்னமேவ படிகங்க²ந்தீதி தி³ன்னபாடிகங்கீ². தே²னேதீதி தே²னோ, ந தே²னேன அதே²னேன. அதே²னத்தாயேவ ஸுசிபூ⁴தேன. அத்தனாதி அத்தபா⁴வேன, அதே²னங் ஸுசிபூ⁴தங் அத்தபா⁴வங் கத்வா விஹரந்தீதி வுத்தங் ஹோதி.
Adinnādānanti adinnassa parapariggahitassa ādānaṃ, theyyaṃ corikanti attho. Dinnameva ādiyantīti dinnādāyī. Cittenapi dinnameva paṭikaṅkhantīti dinnapāṭikaṅkhī. Thenetīti theno, na thenena athenena. Athenattāyeva sucibhūtena. Attanāti attabhāvena, athenaṃ sucibhūtaṃ attabhāvaṃ katvā viharantīti vuttaṃ hoti.
அப்³ரஹ்மசரியந்தி அஸெட்ட²சரியங். ப்³ரஹ்மங் ஸெட்ட²ங் ஆசாரங் சரந்தீதி ப்³ரஹ்மசாரீ. ஆராசாரீதி அப்³ரஹ்மசரியதோ தூ³ராசாரீ. மேது²னாதி ராக³பரியுட்டா²னவஸேன ஸதி³ஸத்தா மேது²னகாதி லத்³த⁴வோஹாரேஹி படிஸேவிதப்³ப³தோ மேது²னோதி ஸங்க²ங் க³தா அஸத்³த⁴ம்மா. கா³மத⁴ம்மாதி கா³மவாஸீனங் த⁴ம்மா.
Abrahmacariyanti aseṭṭhacariyaṃ. Brahmaṃ seṭṭhaṃ ācāraṃ carantīti brahmacārī. Ārācārīti abrahmacariyato dūrācārī. Methunāti rāgapariyuṭṭhānavasena sadisattā methunakāti laddhavohārehi paṭisevitabbato methunoti saṅkhaṃ gatā asaddhammā. Gāmadhammāti gāmavāsīnaṃ dhammā.
முஸாவாதா³தி அலிகவசனா துச்ச²வசனா. ஸச்சங் வத³ந்தீதி ஸச்சவாதீ³. ஸச்சேன ஸச்சங் ஸங்த³ஹந்தி க⁴ட்டெந்தீதி ஸச்சஸந்தா⁴, ந அந்தரந்தரா முஸா வத³ந்தீதி அத்தோ² . யோ ஹி புரிஸோ கதா³சி முஸாவாத³ங் வத³தி, கதா³சி ஸச்சங். தஸ்ஸ முஸாவாதே³ன அந்தரிதத்தா ஸச்சங் ஸச்சேன ந க⁴டீயதி. தஸ்மா ந ஸோ ஸச்சஸந்தோ⁴. இமே பன ந தாதி³ஸா, ஜீவிதஹேதுபி முஸா அவத்வா ஸச்சேன ஸச்சங் ஸங்த³ஹந்தியேவாதி ஸச்சஸந்தா⁴. தே²தாதி தி²ரா, டி²தகதா²தி அத்தோ². ஏகோ புக்³க³லோ ஹலித்³தி³ராகோ³ விய து²ஸராஸிம்ஹி நிகா²தகா²ணு விய அஸ்ஸபிட்டே² ட²பிதகும்ப⁴ண்ட³மிவ ச ந டி²தகதோ² ஹோதி. ஏகோ பாஸாணலேகா² விய இந்த³கீ²லோ விய ச டி²தகதோ² ஹோதி, அஸினா ஸீஸங் சி²ந்த³ந்தேபி த்³வே கதா² ந கதே²தி. அயங் வுச்சதி தே²தோ. பச்சயிகாதி பத்தியாயிதப்³ப³கா, ஸத்³தா⁴யிகாதி அத்தோ². ஏகச்சோ ஹி புக்³க³லோ ந பச்சயிகோ ஹோதி, ‘‘இத³ங் கேன வுத்தங், அஸுகேன நாமா’’தி வுத்தே ‘‘மா தஸ்ஸ வசனங் ஸத்³த³ஹதா²’’தி வத்தப்³ப³தங் ஆபஜ்ஜதி. ஏகோ பச்சயிகோ ஹோதி, ‘‘இத³ங் கேன வுத்தங், அஸுகேனா’’தி வுத்தே ‘‘யதி³ தேன வுத்தங், இத³மேவ பமாணங், இதா³னி படிக்கி²பிதப்³ப³ங் நத்தி², ஏவமேவங் இத³’’ந்தி வத்தப்³ப³தங் ஆபஜ்ஜதி. அயங் வுச்சதி பச்சயிகோ. அவிஸங்வாத³கா லோகஸ்ஸாதி தாய ஸச்சவாதி³தாய லோகங் ந விஸங்வாதெ³ந்தீதி அத்தோ².
Musāvādāti alikavacanā tucchavacanā. Saccaṃ vadantīti saccavādī. Saccena saccaṃ saṃdahanti ghaṭṭentīti saccasandhā, na antarantarā musā vadantīti attho . Yo hi puriso kadāci musāvādaṃ vadati, kadāci saccaṃ. Tassa musāvādena antaritattā saccaṃ saccena na ghaṭīyati. Tasmā na so saccasandho. Ime pana na tādisā, jīvitahetupi musā avatvā saccena saccaṃ saṃdahantiyevāti saccasandhā. Thetāti thirā, ṭhitakathāti attho. Eko puggalo haliddirāgo viya thusarāsimhi nikhātakhāṇu viya assapiṭṭhe ṭhapitakumbhaṇḍamiva ca na ṭhitakatho hoti. Eko pāsāṇalekhā viya indakhīlo viya ca ṭhitakatho hoti, asinā sīsaṃ chindantepi dve kathā na katheti. Ayaṃ vuccati theto. Paccayikāti pattiyāyitabbakā, saddhāyikāti attho. Ekacco hi puggalo na paccayiko hoti, ‘‘idaṃ kena vuttaṃ, asukena nāmā’’ti vutte ‘‘mā tassa vacanaṃ saddahathā’’ti vattabbataṃ āpajjati. Eko paccayiko hoti, ‘‘idaṃ kena vuttaṃ, asukenā’’ti vutte ‘‘yadi tena vuttaṃ, idameva pamāṇaṃ, idāni paṭikkhipitabbaṃ natthi, evamevaṃ ida’’nti vattabbataṃ āpajjati. Ayaṃ vuccati paccayiko. Avisaṃvādakālokassāti tāya saccavāditāya lokaṃ na visaṃvādentīti attho.
ஸுராமேரயமஜ்ஜபமாத³ட்டா²னந்தி ஸுராமேரயமஜ்ஜானங் பானசேதனாஸங்கா²தங் பமாத³காரணங். ஏகப⁴த்திகாதி பாதராஸப⁴த்தங் ஸாயமாஸப⁴த்தந்தி த்³வே ப⁴த்தானி. தேஸு பாதராஸப⁴த்தங் அந்தோமஜ்ஜ²ன்ஹிகேன பரிச்சி²ன்னங், இதரங் மஜ்ஜ²ன்ஹிகதோ உத்³த⁴ங் அந்தோஅருணேன. தஸ்மா அந்தோமஜ்ஜ²ன்ஹிகே த³ஸக்க²த்துங் பு⁴ஞ்ஜமானாபி ஏகப⁴த்திகாவ ஹொந்தி. தங் ஸந்தா⁴ய வுத்தங் – ‘‘ஏகப⁴த்திகா’’தி. ரத்திபோ⁴ஜனங் ரத்தி, ததோ உபரதாதி ரத்தூபரதா. அதிக்கந்தே மஜ்ஜ²ன்ஹிகே யாவ ஸூரியத்த²ங்க³மனா போ⁴ஜனங் விகாலபோ⁴ஜனங் நாம, ததோ விரதத்தா விரதா விகாலபோ⁴ஜனா.
Surāmerayamajjapamādaṭṭhānanti surāmerayamajjānaṃ pānacetanāsaṅkhātaṃ pamādakāraṇaṃ. Ekabhattikāti pātarāsabhattaṃ sāyamāsabhattanti dve bhattāni. Tesu pātarāsabhattaṃ antomajjhanhikena paricchinnaṃ, itaraṃ majjhanhikato uddhaṃ antoaruṇena. Tasmā antomajjhanhike dasakkhattuṃ bhuñjamānāpi ekabhattikāva honti. Taṃ sandhāya vuttaṃ – ‘‘ekabhattikā’’ti. Rattibhojanaṃ ratti, tato uparatāti rattūparatā. Atikkante majjhanhike yāva sūriyatthaṅgamanā bhojanaṃ vikālabhojanaṃ nāma, tato viratattā viratā vikālabhojanā.
ஸாஸனஸ்ஸ அனநுலோமத்தா விஸூகங் படாணிபூ⁴தங் த³ஸ்ஸனந்தி விஸூகத³ஸ்ஸனங், அத்தனா நச்சனநச்சாபனாதி³வஸேன நச்சஞ்ச கீ³தஞ்ச வாதி³தஞ்ச, அந்தமஸோ மயூரனச்சனாதி³வஸேனாபி பவத்தானங் நச்சாதீ³னங் விஸூகபூ⁴தங் த³ஸ்ஸனஞ்சாதி நச்சகீ³தவாதி³தவிஸூகத³ஸ்ஸனங். நச்சாதீ³னி ஹி அத்தனா பயோஜேதுங் வா பரேஹி பயோஜாபேதுங் வா பயுத்தானி பஸ்ஸிதுங் வா நேவ பி⁴க்கூ²னங், ந பி⁴க்கு²னீனங் வட்டந்தி.
Sāsanassa ananulomattā visūkaṃ paṭāṇibhūtaṃ dassananti visūkadassanaṃ, attanā naccananaccāpanādivasena naccañca gītañca vāditañca, antamaso mayūranaccanādivasenāpi pavattānaṃ naccādīnaṃ visūkabhūtaṃ dassanañcāti naccagītavāditavisūkadassanaṃ. Naccādīni hi attanā payojetuṃ vā parehi payojāpetuṃ vā payuttāni passituṃ vā neva bhikkhūnaṃ, na bhikkhunīnaṃ vaṭṭanti.
மாலாதீ³ஸு மாலாதி யங்கிஞ்சி புப்ப²ங். க³ந்த⁴ந்தி யங்கிஞ்சி க³ந்த⁴ஜாதங். விலேபனந்தி ச²விராக³கரணங். தத்த² பிளந்த⁴ந்தோ தா⁴ரேதி நாம, ஊனட்டா²னங் பூரெந்தோ மண்டே³தி நாம, க³ந்த⁴வஸேன ச²விராக³வஸேன ச ஸாதி³யந்தோ விபூ⁴ஸேதி நாம. டா²னங் வுச்சதி காரணங், தஸ்மா யாய து³ஸ்ஸீல்யசேதனாய தானி மாலாதா⁴ரணாதீ³னி மஹாஜனோ கரோதி, ததோ படிவிரதாதி அத்தோ². உச்சாஸயனங் வுச்சதி பமாணாதிக்கந்தங், மஹாஸயனங் அகப்பியத்த²ரணங், ததோ படிவிரதாதி அத்தோ².
Mālādīsu mālāti yaṃkiñci pupphaṃ. Gandhanti yaṃkiñci gandhajātaṃ. Vilepananti chavirāgakaraṇaṃ. Tattha piḷandhanto dhāreti nāma, ūnaṭṭhānaṃ pūrento maṇḍeti nāma, gandhavasena chavirāgavasena ca sādiyanto vibhūseti nāma. Ṭhānaṃ vuccati kāraṇaṃ, tasmā yāya dussīlyacetanāya tāni mālādhāraṇādīni mahājano karoti, tato paṭiviratāti attho. Uccāsayanaṃ vuccati pamāṇātikkantaṃ, mahāsayanaṃ akappiyattharaṇaṃ, tato paṭiviratāti attho.
கீவமஹப்ப²லோதி கித்தகங் மஹப்ப²லோ. ஸேஸபதே³ஸுபி ஏஸேவ நயோ. பஹூதரத்தரதனானந்தி பஹூதேன ரத்தஸங்கா²தேன ரதனேன ஸமன்னாக³தானங், ஸகலஜம்பு³தீ³பதலங் பே⁴ரிதலஸதி³ஸங் கத்வா கடிப்பமாணேஹி ஸத்தஹி ரதனேஹி பூரிதானந்தி அத்தோ². இஸ்ஸரியாதி⁴பச்சந்தி இஸ்ஸரபா⁴வேன வா இஸ்ஸரியமேவ வா ஆதி⁴பச்சங், ந எத்த² ஸாஹஸிககம்மந்திபி இஸ்ஸரியாதி⁴பச்சங். ரஜ்ஜங் காரெய்யாதி ஏவரூபங் சக்கவத்திரஜ்ஜங் காரெய்ய. அங்கா³னந்திஆதீ³னி தேஸங் ஜனபதா³னங் நாமானி. கலங் நாக்³க⁴தி ஸோளஸிந்தி ஏகங் அஹோரத்தங் உபவுத்த²உபோஸதே² புஞ்ஞங் ஸோளஸபா⁴கே³ கத்வா ததோ ஏகங் பா⁴க³ஞ்ச ந அக்³க⁴தி. ஏகரத்துபோஸத²ஸ்ஸ ஸோளஸியா கலாய யங் விபாகப²லங், தங்யேவ ததோ ப³ஹுதரங் ஹோதீதி அத்தோ². கபணந்தி பரித்தகங்.
Kīvamahapphaloti kittakaṃ mahapphalo. Sesapadesupi eseva nayo. Pahūtarattaratanānanti pahūtena rattasaṅkhātena ratanena samannāgatānaṃ, sakalajambudīpatalaṃ bheritalasadisaṃ katvā kaṭippamāṇehi sattahi ratanehi pūritānanti attho. Issariyādhipaccanti issarabhāvena vā issariyameva vā ādhipaccaṃ, na ettha sāhasikakammantipi issariyādhipaccaṃ. Rajjaṃ kāreyyāti evarūpaṃ cakkavattirajjaṃ kāreyya. Aṅgānantiādīni tesaṃ janapadānaṃ nāmāni. Kalaṃ nāgghati soḷasinti ekaṃ ahorattaṃ upavutthauposathe puññaṃ soḷasabhāge katvā tato ekaṃ bhāgañca na agghati. Ekarattuposathassa soḷasiyā kalāya yaṃ vipākaphalaṃ, taṃyeva tato bahutaraṃ hotīti attho. Kapaṇanti parittakaṃ.
அப்³ரஹ்மசரியாதி அஸெட்ட²சரியதோ. ரத்திங் ந பு⁴ஞ்ஜெய்ய விகாலபோ⁴ஜனந்தி உபோஸத²ங் உபவஸந்தோ ரத்திபோ⁴ஜனஞ்ச தி³வாவிகாலபோ⁴ஜனஞ்ச ந பு⁴ஞ்ஜெய்ய. மஞ்சே ச²மாயங்வ ஸயேத² ஸந்த²தேதி முட்டி²ஹத்த²பாத³கே கப்பியமஞ்சே வா ஸுதா⁴தி³பரிகம்மகதாய பூ⁴மியங் வா திணபண்ணபலாலாதீ³னி ஸந்த²ரித்வா கதே ஸந்த²தே வா ஸயேதா²தி அத்தோ². ஏதங் ஹி அட்ட²ங்கி³கமாஹுபோஸத²ந்தி ஏவங் பாணாதிபாதாதீ³னி அஸமாசரந்தேன உபவுத்த²ங் உபோஸத²ங் அட்ட²ஹி அங்கே³ஹி ஸமன்னாக³தத்தா அட்ட²ங்கி³கந்தி வத³ந்தி. தங் பன உபவஸந்தேன ‘‘ஸ்வே உபோஸதி²கோ ப⁴விஸ்ஸாமீ’’தி அஜ்ஜேவ ‘‘இத³ஞ்ச இத³ஞ்ச கரெய்யாதா²’’தி ஆஹாராதி³விதா⁴னங் விசாரேதப்³ப³ங். உபோஸத²தி³வஸே பாதோவ பி⁴க்கு²ஸ்ஸ வா பி⁴க்கு²னியா வா த³ஸஸீலலக்க²ணஞ்ஞுனோ உபாஸகஸ்ஸ வா உபாஸிகாய வா ஸந்திகே வாசங் பி⁴ந்தி³த்வா உபோஸத²ங்கா³னி ஸமாதா³தப்³பா³னி. பாளிங் அஜானந்தேன பன ‘‘பு³த்³த⁴பஞ்ஞத்தங் உபோஸத²ங் அதி⁴ட்டா²மீ’’தி அதி⁴ட்டா²தப்³ப³ங். அஞ்ஞங் அலப⁴ந்தேன அத்தனாபி அதி⁴ட்டா²தப்³ப³ங், வசீபே⁴தோ³ பன காதப்³போ³யேவ . உபோஸத²ங் உபவஸந்தேன பரூபரோத⁴படிஸங்யுத்தா கம்மந்தா ந விசாரேதப்³பா³, ஆயவயக³ணனங் கரொந்தேன ந வீதினாமேதப்³ப³ங், கே³ஹே பன ஆஹாரங் லபி⁴த்வா நிச்சப⁴த்திகபி⁴க்கு²னா விய பரிபு⁴ஞ்ஜித்வா விஹாரங் க³ந்த்வா த⁴ம்மோ வா ஸோதப்³போ³, அட்ட²திங்ஸாய ஆரம்மணேஸு அஞ்ஞதரங் வா மனஸிகாதப்³ப³ங்.
Abrahmacariyāti aseṭṭhacariyato. Rattiṃ na bhuñjeyya vikālabhojananti uposathaṃ upavasanto rattibhojanañca divāvikālabhojanañca na bhuñjeyya. Mañce chamāyaṃva sayetha santhateti muṭṭhihatthapādake kappiyamañce vā sudhādiparikammakatāya bhūmiyaṃ vā tiṇapaṇṇapalālādīni santharitvā kate santhate vā sayethāti attho. Etaṃ hi aṭṭhaṅgikamāhuposathanti evaṃ pāṇātipātādīni asamācarantena upavutthaṃ uposathaṃ aṭṭhahi aṅgehi samannāgatattā aṭṭhaṅgikanti vadanti. Taṃ pana upavasantena ‘‘sve uposathiko bhavissāmī’’ti ajjeva ‘‘idañca idañca kareyyāthā’’ti āhārādividhānaṃ vicāretabbaṃ. Uposathadivase pātova bhikkhussa vā bhikkhuniyā vā dasasīlalakkhaṇaññuno upāsakassa vā upāsikāya vā santike vācaṃ bhinditvā uposathaṅgāni samādātabbāni. Pāḷiṃ ajānantena pana ‘‘buddhapaññattaṃ uposathaṃ adhiṭṭhāmī’’ti adhiṭṭhātabbaṃ. Aññaṃ alabhantena attanāpi adhiṭṭhātabbaṃ, vacībhedo pana kātabboyeva . Uposathaṃ upavasantena parūparodhapaṭisaṃyuttā kammantā na vicāretabbā, āyavayagaṇanaṃ karontena na vītināmetabbaṃ, gehe pana āhāraṃ labhitvā niccabhattikabhikkhunā viya paribhuñjitvā vihāraṃ gantvā dhammo vā sotabbo, aṭṭhatiṃsāya ārammaṇesu aññataraṃ vā manasikātabbaṃ.
ஸுத³ஸ்ஸனாதி ஸுந்த³ரத³ஸ்ஸனா. ஓபா⁴ஸயந்தி ஓபா⁴ஸயமானா. அனுபரியந்தீதி விசரந்தி. யாவதாதி யத்தகங் டா²னங். அந்தலிக்க²கா³தி ஆகாஸங்க³மா. பபா⁴ஸந்தீதி ஜோதந்தி பபா⁴ முஞ்சந்தி. தி³ஸாவிரோசனாதி ஸப்³ப³தி³ஸாஸு விரோசமானா. அத² வா பபா⁴ஸந்தீதி தி³ஸாஹி தி³ஸா ஓபா⁴ஸந்தி. விரோசனாதி விரோசமானா. வேளுரியந்தி மணீதி வத்வாபி இமினா ஜாதிமணிபா⁴வங் த³ஸ்ஸேதி. ஏகவஸ்ஸிகவேளுவண்ணஞ்ஹி வேளுரியங் ஜாதிமணி நாம. தங் ஸந்தா⁴யேவமாஹ. ப⁴த்³த³கந்தி லத்³த⁴கங். ஸிங்கீ³ஸுவண்ணந்தி கோ³ஸிங்க³ஸதி³ஸங் ஹுத்வா உப்பன்னத்தா ஏவங் நாமகங் ஸுவண்ணங். கஞ்சனந்தி பப்³ப³தெய்யங் பப்³ப³தே ஜாதஸுவண்ணங். ஜாதரூபந்தி ஸத்து²வண்ணஸுவண்ணங். ஹடகந்தி கிபில்லிகாஹி நீஹடஸுவண்ணங். நானுப⁴வந்தீதி ந பாபுணந்தி. சந்த³ப்பபா⁴தி ஸாமிஅத்தே² பச்சத்தங், சந்த³ப்பபா⁴யாதி அத்தோ². உபவஸ்ஸுபோஸத²ந்தி உபவஸித்வா உபோஸத²ங். ஸுகு²த்³ரயானீதி ஸுக²ப²லானி ஸுக²வேத³னீயானி. ஸக்³க³முபெந்தி டா²னந்தி ஸக்³க³ஸங்கா²தங் டா²னங் உபக³ச்ச²ந்தி, கேனசி அனிந்தி³தா ஹுத்வா தே³வலோகே உப்பஜ்ஜந்தீதி அத்தோ². ஸேஸமெத்த² யங் அந்தரந்தரா ந வுத்தங், தங் வுத்தானுஸாரேனேவ வேதி³தப்³ப³ந்தி.
Sudassanāti sundaradassanā. Obhāsayanti obhāsayamānā. Anupariyantīti vicaranti. Yāvatāti yattakaṃ ṭhānaṃ. Antalikkhagāti ākāsaṅgamā. Pabhāsantīti jotanti pabhā muñcanti. Disāvirocanāti sabbadisāsu virocamānā. Atha vā pabhāsantīti disāhi disā obhāsanti. Virocanāti virocamānā. Veḷuriyanti maṇīti vatvāpi iminā jātimaṇibhāvaṃ dasseti. Ekavassikaveḷuvaṇṇañhi veḷuriyaṃ jātimaṇi nāma. Taṃ sandhāyevamāha. Bhaddakanti laddhakaṃ. Siṅgīsuvaṇṇanti gosiṅgasadisaṃ hutvā uppannattā evaṃ nāmakaṃ suvaṇṇaṃ. Kañcananti pabbateyyaṃ pabbate jātasuvaṇṇaṃ. Jātarūpanti satthuvaṇṇasuvaṇṇaṃ. Haṭakanti kipillikāhi nīhaṭasuvaṇṇaṃ. Nānubhavantīti na pāpuṇanti. Candappabhāti sāmiatthe paccattaṃ, candappabhāyāti attho. Upavassuposathanti upavasitvā uposathaṃ. Sukhudrayānīti sukhaphalāni sukhavedanīyāni. Saggamupenti ṭhānanti saggasaṅkhātaṃ ṭhānaṃ upagacchanti, kenaci aninditā hutvā devaloke uppajjantīti attho. Sesamettha yaṃ antarantarā na vuttaṃ, taṃ vuttānusāreneva veditabbanti.
மஹாவக்³கோ³ து³தியோ.
Mahāvaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. உபோஸத²ஸுத்தங் • 10. Uposathasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. உபோஸத²ஸுத்தவண்ணனா • 10. Uposathasuttavaṇṇanā
