| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. உபோஸத²ஸுத்தவண்ணனா
10. Uposathasuttavaṇṇanā
190. த³ஸமே துண்ஹீபூ⁴தங் துண்ஹீபூ⁴தந்தி யதோ யதோ அனுவிலோகேதி, ததோ ததோ துண்ஹீபூ⁴தமேவ. பி⁴க்கூ² ஆமந்தேஸீதி படிபத்திஸம்பன்னே பி⁴க்கூ² பஸன்னேஹி சக்கூ²ஹி அனுவிலோகெத்வா உப்பன்னத⁴ம்மபாமோஜ்ஜோ தோ²மேதுகாமதாய ஆமந்தேஸி. அபலாபாதி பலாபரஹிதா. இதரங் தஸ்ஸேவ வேவசனங். ஸுத்³தா⁴தி நிம்மலா. ஸாரே பதிட்டி²தாதி ஸீலாதி³ஸாரே பதிட்டி²தா. அலந்தி யுத்தங். யோஜனக³ணனானீதி ஏகங் யோஜனங் யோஜனமேவ, த³ஸபி யோஜனானி யோஜனானேவ. ததோ உத்³த⁴ங் ‘‘யோஜனக³ணனானீ’’தி வுச்சதி. இத⁴ பன யோஜனஸதம்பி யோஜனஸஹஸ்ஸம்பி அதி⁴ப்பேதங். புடோஸேனாபீதி புடோஸங் வுச்சதி பாதெ²ய்யங், பாதெ²ய்யங் க³ஹெத்வாபி உபஸங்கமிதுங் யுத்தமேவாதி அத்தோ². புடங்ஸேனாதிபி பாடோ². தஸ்ஸத்தோ² – புடோ அங்ஸே அஸ்ஸாதி புடங்ஸோ, தேன புடங்ஸேன, அங்ஸேன பாதெ²ய்யபுடங் வஹந்தேனாபீதி வுத்தங் ஹோதி.
190. Dasame tuṇhībhūtaṃ tuṇhībhūtanti yato yato anuviloketi, tato tato tuṇhībhūtameva. Bhikkhū āmantesīti paṭipattisampanne bhikkhū pasannehi cakkhūhi anuviloketvā uppannadhammapāmojjo thometukāmatāya āmantesi. Apalāpāti palāparahitā. Itaraṃ tasseva vevacanaṃ. Suddhāti nimmalā. Sāre patiṭṭhitāti sīlādisāre patiṭṭhitā. Alanti yuttaṃ. Yojanagaṇanānīti ekaṃ yojanaṃ yojanameva, dasapi yojanāni yojanāneva. Tato uddhaṃ ‘‘yojanagaṇanānī’’ti vuccati. Idha pana yojanasatampi yojanasahassampi adhippetaṃ. Puṭosenāpīti puṭosaṃ vuccati pātheyyaṃ, pātheyyaṃ gahetvāpi upasaṅkamituṃ yuttamevāti attho. Puṭaṃsenātipi pāṭho. Tassattho – puṭo aṃse assāti puṭaṃso, tena puṭaṃsena, aṃsena pātheyyapuṭaṃ vahantenāpīti vuttaṃ hoti.
இதா³னி ஏவரூபேஹி ஏவரூபேஹி ச கு³ணேஹி ஸமன்னாக³தா எத்த² பி⁴க்கூ² அத்தீ²தி த³ஸ்ஸேதுங் ஸந்தி பி⁴க்க²வேதிஆதி³மாஹ. தத்த² தே³வப்பத்தாதி உபபத்திதே³வனிப்³ப³த்தகங் தி³ப்³ப³விஹாரங் தி³ப்³ப³விஹாரேன ச அரஹத்தங் பத்தா. ப்³ரஹ்மப்பத்தாதி நித்³தோ³ஸட்டே²ன ப்³ரஹ்மபா⁴வஸாத⁴கங் ப்³ரஹ்மவிஹாரங் ப்³ரஹ்மவிஹாரேன ச அரஹத்தங் பத்தா. ஆனேஞ்ஜப்பத்தாதி அனிஞ்ஜனபா⁴வஸாத⁴கங் ஆனேஞ்ஜங் ஆனேஞ்ஜேன ச அரஹத்தங் பத்தா. அரியப்பத்தாதி புது²ஜ்ஜனபா⁴வங் அதிக்கம்ம அரியபா⁴வங் பத்தா. ஏவங் கோ², பி⁴க்க²வே, பி⁴க்கு² தே³வப்பத்தோ ஹோதீதிஆதீ³ஸு ஏவங் ரூபாவசரசதுத்த²ஜ்ஜா²னே ட²த்வா சித்தங் விவட்டெத்வா அரஹத்தங் பத்தோ தே³வப்பத்தோ நாம ஹோதி , சதூஸு ப்³ரஹ்மவிஹாரேஸு ட²த்வா சித்தங் விவட்டெத்வா அரஹத்தங் பத்தோ ப்³ரஹ்மப்பத்தோ நாம, சதூஸு அரூபஜ்ஜா²னேஸு ட²த்வா சித்தங் விவட்டெத்வா அரஹத்தங் பத்தோ ஆனேஞ்ஜப்பத்தோ நாம. இத³ங் து³க்க²ந்திஆதீ³ஹி சதூஹி ஸச்சேஹி சத்தாரோ மக்³கா³ தீணி ச ப²லானி கதி²தானி. தஸ்மா இமங் அரியத⁴ம்மங் பத்தோ பி⁴க்கு² அரியப்பத்தோ நாம ஹோதீதி.
Idāni evarūpehi evarūpehi ca guṇehi samannāgatā ettha bhikkhū atthīti dassetuṃ santi bhikkhavetiādimāha. Tattha devappattāti upapattidevanibbattakaṃ dibbavihāraṃ dibbavihārena ca arahattaṃ pattā. Brahmappattāti niddosaṭṭhena brahmabhāvasādhakaṃ brahmavihāraṃ brahmavihārena ca arahattaṃ pattā. Āneñjappattāti aniñjanabhāvasādhakaṃ āneñjaṃ āneñjena ca arahattaṃ pattā. Ariyappattāti puthujjanabhāvaṃ atikkamma ariyabhāvaṃ pattā. Evaṃ kho, bhikkhave, bhikkhu devappatto hotītiādīsu evaṃ rūpāvacaracatutthajjhāne ṭhatvā cittaṃ vivaṭṭetvā arahattaṃ patto devappatto nāma hoti , catūsu brahmavihāresu ṭhatvā cittaṃ vivaṭṭetvā arahattaṃ patto brahmappatto nāma, catūsu arūpajjhānesu ṭhatvā cittaṃ vivaṭṭetvā arahattaṃ patto āneñjappatto nāma. Idaṃ dukkhantiādīhi catūhi saccehi cattāro maggā tīṇi ca phalāni kathitāni. Tasmā imaṃ ariyadhammaṃ patto bhikkhu ariyappatto nāma hotīti.
ப்³ராஹ்மணவக்³கோ³ சதுத்தோ².
Brāhmaṇavaggo catuttho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. உபோஸத²ஸுத்தங் • 10. Uposathasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. உபோஸத²ஸுத்தவண்ணனா • 10. Uposathasuttavaṇṇanā
