| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. உபோஸத²ஸுத்தவண்ணனா
10. Uposathasuttavaṇṇanā
20. த³ஸமே தத³ஹுபோஸதே²தி (உதா³॰ அட்ட²॰ 45; ஸாரத்த²॰ டீ॰ சூளவக்³க³ 3.383) தஸ்மிங் உபோஸத²தி³வஸபூ⁴தே அஹனி. உபோஸத²கரணத்தா²யாதி ஓவாத³பாதிமொக்க²ங் உத்³தி³ஸிதுங். உத்³த⁴ஸ்தங் அருணந்தி அருணுக்³க³மனங். உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²ந்தி தே²ரோ ப⁴க³வந்தங் பாதிமொக்கு²த்³தே³ஸங் யாசி. தஸ்மிங் காலே ‘‘ந, பி⁴க்க²வே, அனுபோஸதே² உபோஸதோ² காதப்³போ³’’தி (மஹாவ॰ 136) ஸிக்கா²பத³ஸ்ஸ அபஞ்ஞத்தத்தா. கஸ்மா பன ப⁴க³வா தியாமரத்திங் வீதினாமேஸி ? ததோ பட்டா²ய ஓவாத³பாதிமொக்க²ங் அனுத்³தி³ஸிதுகாமோ தஸ்ஸ வத்து²ங் பாகடங் காதுங். அத்³த³ஸாதி கத²ங் அத்³த³ஸ? அத்தனோ சேதோபரியஞாணேன தஸ்ஸங் பரிஸதி பி⁴க்கூ²னங் சித்தானி பரிஜானந்தோ தஸ்ஸ து³ஸ்ஸீலஸ்ஸ சித்தங் பஸ்ஸி. யஸ்மா பன சித்தே தி³ட்டே² தங்ஸமங்கீ³புக்³க³லோ தி³ட்டோ² நாம ஹோதி, தஸ்மா ‘‘அத்³த³ஸா கோ² ஆயஸ்மா மஹாமொக்³க³ல்லானோ தங் புக்³க³லங் து³ஸ்ஸீல’’ந்திஆதி³ வுத்தங். யதே²வ ஹி அனாக³தே ஸத்தஸு தி³வஸேஸு பவத்தங் பரேஸங் சித்தங் சேதோபரியஞாணலாபீ⁴ ஜானாதி, ஏவங் அதீதேபீதி. மஜ்ஜே² பி⁴க்கு²ஸங்க⁴ஸ்ஸ நிஸின்னந்தி ஸங்க⁴பரியாபன்னோ விய பி⁴க்கு²ஸங்க⁴ஸ்ஸ அந்தோ நிஸின்னங். தி³ட்டோ²ஸீதி அயங் ந பகதத்தோதி ப⁴க³வதா தி³ட்டோ² அஸி. யஸ்மா ச ஏவங் தி³ட்டோ², தஸ்மா நத்தி² தே தவ பி⁴க்கூ²ஹி ஸத்³தி⁴ங் ஏககம்மாதி³ஸங்வாஸோ. யஸ்மா பன ஸோ ஸங்வாஸோ தவ நத்தி², தஸ்மா உட்டே²ஹி, ஆவுஸோதி ஏவமெத்த² பத³யோஜனா வேதி³தப்³பா³.
20. Dasame tadahuposatheti (udā. aṭṭha. 45; sārattha. ṭī. cūḷavagga 3.383) tasmiṃ uposathadivasabhūte ahani. Uposathakaraṇatthāyāti ovādapātimokkhaṃ uddisituṃ. Uddhastaṃ aruṇanti aruṇuggamanaṃ. Uddisatu, bhante, bhagavā bhikkhūnaṃ pātimokkhanti thero bhagavantaṃ pātimokkhuddesaṃ yāci. Tasmiṃ kāle ‘‘na, bhikkhave, anuposathe uposatho kātabbo’’ti (mahāva. 136) sikkhāpadassa apaññattattā. Kasmā pana bhagavā tiyāmarattiṃ vītināmesi ? Tato paṭṭhāya ovādapātimokkhaṃ anuddisitukāmo tassa vatthuṃ pākaṭaṃ kātuṃ. Addasāti kathaṃ addasa? Attano cetopariyañāṇena tassaṃ parisati bhikkhūnaṃ cittāni parijānanto tassa dussīlassa cittaṃ passi. Yasmā pana citte diṭṭhe taṃsamaṅgīpuggalo diṭṭho nāma hoti, tasmā ‘‘addasā kho āyasmā mahāmoggallānotaṃ puggalaṃ dussīla’’ntiādi vuttaṃ. Yatheva hi anāgate sattasu divasesu pavattaṃ paresaṃ cittaṃ cetopariyañāṇalābhī jānāti, evaṃ atītepīti. Majjhe bhikkhusaṅghassa nisinnanti saṅghapariyāpanno viya bhikkhusaṅghassa anto nisinnaṃ. Diṭṭhosīti ayaṃ na pakatattoti bhagavatā diṭṭho asi. Yasmā ca evaṃ diṭṭho, tasmā natthi te tava bhikkhūhi saddhiṃ ekakammādisaṃvāso. Yasmā pana so saṃvāso tava natthi, tasmā uṭṭhehi, āvusoti evamettha padayojanā veditabbā.
ததியம்பி கோ² ஸோ புக்³க³லோ துண்ஹீ அஹோஸீதி அனேகவாரங் வத்வாபி ‘‘தே²ரோ ஸயமேவ நிப்³பி³ன்னோ ஓரமிஸ்ஸதீ’’தி வா, ‘‘இதா³னி இமேஸங் படிபத்திங் ஜானிஸ்ஸாமீ’’தி வா அதி⁴ப்பாயேன துண்ஹீ அஹோஸி. பா³ஹாயங் க³ஹெத்வாதி ‘‘ப⁴க³வதா மயா ச யாதா²வதோ தி³ட்டோ², யாவததியங் ‘உட்டே²ஹி, ஆவுஸோ’தி ச வுத்தோ ந வுட்டா²தி, இதா³னிஸ்ஸ நிக்கட்³ட⁴னகாலோ, மா ஸங்க⁴ஸ்ஸ உபோஸத²ந்தராயோ அஹோஸீ’’தி தங் பா³ஹாயங் அக்³க³ஹேஸி, ததா² க³ஹெத்வா. ப³ஹி த்³வாரகொட்ட²கா நிக்கா²மெத்வாதி த்³வாரகொட்ட²கா த்³வாரஸாலாதோ நிக்கா²மெத்வா. ப³ஹீதி பன நிக்கா²மிதட்டா²னத³ஸ்ஸனங். அத² வா ப³ஹித்³வாரகொட்ட²காதி ப³ஹித்³வாரகொட்ட²கதோபி நிக்கா²மெத்வா, ந அந்தொத்³வாரகொட்ட²கதோ ஏவ. உப⁴யத்தா²பி விஹாரதோ ப³ஹிகத்வாதி அத்தோ². ஸூசிக⁴டிகங் த³த்வாதி அக்³க³ளஸூசிஞ்ச உபரிக⁴டிகஞ்ச ஆத³ஹித்வா, ஸுட்டு²தரங் கவாடங் த²கெத்வாதி அத்தோ². யாவ பா³ஹாக³ஹணாபி நாமாதி இமினா ‘‘அபரிஸுத்³தா⁴, ஆனந்த³, பரிஸா’’தி வசனங் ஸுத்வா ஏவ ஹி தேன பக்கமிதப்³ப³ங் ஸியா, ஏவங் அபக்கமித்வா யாவ பா³ஹாக³ஹணாபி நாம ஸோ மோக⁴புரிஸோ ஆக³மெஸ்ஸதி, அச்ச²ரியமித³ந்தி த³ஸ்ஸேதி. இத³ஞ்ச க³ரஹனச்ச²ரியமேவாதி வேதி³தப்³ப³ங்.
Tatiyampi kho so puggalo tuṇhī ahosīti anekavāraṃ vatvāpi ‘‘thero sayameva nibbinno oramissatī’’ti vā, ‘‘idāni imesaṃ paṭipattiṃ jānissāmī’’ti vā adhippāyena tuṇhī ahosi. Bāhāyaṃ gahetvāti ‘‘bhagavatā mayā ca yāthāvato diṭṭho, yāvatatiyaṃ ‘uṭṭhehi, āvuso’ti ca vutto na vuṭṭhāti, idānissa nikkaḍḍhanakālo, mā saṅghassa uposathantarāyo ahosī’’ti taṃ bāhāyaṃ aggahesi, tathā gahetvā. Bahi dvārakoṭṭhakā nikkhāmetvāti dvārakoṭṭhakā dvārasālāto nikkhāmetvā. Bahīti pana nikkhāmitaṭṭhānadassanaṃ. Atha vā bahidvārakoṭṭhakāti bahidvārakoṭṭhakatopi nikkhāmetvā, na antodvārakoṭṭhakato eva. Ubhayatthāpi vihārato bahikatvāti attho. Sūcighaṭikaṃ datvāti aggaḷasūciñca uparighaṭikañca ādahitvā, suṭṭhutaraṃ kavāṭaṃ thaketvāti attho. Yāva bāhāgahaṇāpi nāmāti iminā ‘‘aparisuddhā, ānanda, parisā’’ti vacanaṃ sutvā eva hi tena pakkamitabbaṃ siyā, evaṃ apakkamitvā yāva bāhāgahaṇāpi nāma so moghapuriso āgamessati, acchariyamidanti dasseti. Idañca garahanacchariyamevāti veditabbaṃ.
அத² ப⁴க³வா சிந்தேஸி – ‘‘இதா³னி பி⁴க்கு²ஸங்கே⁴ அப்³பு³தோ³ ஜாதோ, அபரிஸுத்³தா⁴ புக்³க³லா உபோஸத²ங் ஆக³ச்ச²ந்தி, ந ச ததா²க³தா அபரிஸுத்³தா⁴ய பரிஸாய உபோஸத²ங் கரொந்தி, பாதிமொக்க²ங் உத்³தி³ஸந்தி. அனுத்³தி³ஸந்தே ச பி⁴க்கு²ஸங்க⁴ஸ்ஸ உபோஸதோ² பச்சி²ஜ்ஜதி. யங்னூனாஹங் இதோ பட்டா²ய பி⁴க்கூ²னங்யேவ பாதிமொக்கு²த்³தே³ஸங் அனுஜானெய்ய’’ந்தி. ஏவங் பன சிந்தெத்வா பி⁴க்கூ²னங்யேவ பாதிமொக்கு²த்³தே³ஸங் அனுஜானி. தேன வுத்தங் ‘‘அத² கோ² ப⁴க³வா…பே॰… பாதிமொக்க²ங் உத்³தி³ஸெய்யாதா²’’தி. தத்த² ந தா³னாஹந்தி இதா³னி அஹங் உபோஸத²ங் ந கரிஸ்ஸாமி, பாதிமொக்க²ங் ந உத்³தி³ஸிஸ்ஸாமீதி பச்சேகங் ந-காரேன ஸம்ப³ந்தோ⁴. து³வித⁴ஞ்ஹி பாதிமொக்க²ங் – ஆணாபாதிமொக்க²ங், ஓவாத³பாதிமொக்க²ந்தி . தேஸு ‘‘ஸுணாது மே, ப⁴ந்தே’’திஆதி³கங் (மஹாவ॰ 134) ஆணாபாதிமொக்க²ங். தங் ஸாவகாவ உத்³தி³ஸந்தி, ந பு³த்³தா⁴, யங் அன்வத்³த⁴மாஸங் உத்³தி³ஸீயதி. ‘‘க²ந்தீ பரமங்…பே॰… ஸப்³ப³பாபஸ்ஸ அகரணங்…பே॰… அனுபவாதோ³ அனுபகா⁴தோ…பே॰… ஏதங் பு³த்³தா⁴ன ஸாஸன’’ந்தி (தீ³॰ நி॰ 2.90; த⁴॰ ப॰ 183-185; உதா³॰ 36; நெத்தி॰ 30) இமா பன திஸ்ஸோ கா³தா² ஓவாத³பாதிமொக்க²ங் நாம. தங் பு³த்³தா⁴வ உத்³தி³ஸந்தி, ந ஸாவகா, ச²ன்னம்பி வஸ்ஸானங் அச்சயேன உத்³தி³ஸந்தி. தீ³கா⁴யுகபு³த்³தா⁴னஞ்ஹி த⁴ரமானகாலே அயமேவ பாதிமொக்கு²த்³தே³ஸோ, அப்பாயுகபு³த்³தா⁴னங் பன பட²மபோ³தி⁴யங்யேவ. ததோ பரங் இதரோ. தஞ்ச கோ² பி⁴க்கூ²யேவ உத்³தி³ஸந்தி, ந பு³த்³தா⁴, தஸ்மா அம்ஹாகம்பி ப⁴க³வா வீஸதிவஸ்ஸமத்தங் இமங் ஓவாத³பாதிமொக்க²ங் உத்³தி³ஸித்வா இமங் அந்தராயங் தி³ஸ்வா ததோ பரங் ந உத்³தி³ஸி. அட்டா²னந்தி அகாரணங். அனவகாஸோதி தஸ்ஸேவ வேவசனங். காரணஞ்ஹி யதா² திட்ட²தி எத்த² ப²லங் ததா³யத்தவுத்திதாயாதி ‘‘டா²ன’’ந்தி வுச்சதி, ஏவங் ‘‘அவகாஸோ’’திபி வுச்சதி. யந்தி கிரியாபராமஸனங்.
Atha bhagavā cintesi – ‘‘idāni bhikkhusaṅghe abbudo jāto, aparisuddhā puggalā uposathaṃ āgacchanti, na ca tathāgatā aparisuddhāya parisāya uposathaṃ karonti, pātimokkhaṃ uddisanti. Anuddisante ca bhikkhusaṅghassa uposatho pacchijjati. Yaṃnūnāhaṃ ito paṭṭhāya bhikkhūnaṃyeva pātimokkhuddesaṃ anujāneyya’’nti. Evaṃ pana cintetvā bhikkhūnaṃyeva pātimokkhuddesaṃ anujāni. Tena vuttaṃ ‘‘atha kho bhagavā…pe… pātimokkhaṃ uddiseyyāthā’’ti. Tattha na dānāhanti idāni ahaṃ uposathaṃ na karissāmi, pātimokkhaṃ na uddisissāmīti paccekaṃ na-kārena sambandho. Duvidhañhi pātimokkhaṃ – āṇāpātimokkhaṃ, ovādapātimokkhanti . Tesu ‘‘suṇātu me, bhante’’tiādikaṃ (mahāva. 134) āṇāpātimokkhaṃ. Taṃ sāvakāva uddisanti, na buddhā, yaṃ anvaddhamāsaṃ uddisīyati. ‘‘Khantī paramaṃ…pe… sabbapāpassa akaraṇaṃ…pe… anupavādo anupaghāto…pe… etaṃ buddhāna sāsana’’nti (dī. ni. 2.90; dha. pa. 183-185; udā. 36; netti. 30) imā pana tisso gāthā ovādapātimokkhaṃ nāma. Taṃ buddhāva uddisanti, na sāvakā, channampi vassānaṃ accayena uddisanti. Dīghāyukabuddhānañhi dharamānakāle ayameva pātimokkhuddeso, appāyukabuddhānaṃ pana paṭhamabodhiyaṃyeva. Tato paraṃ itaro. Tañca kho bhikkhūyeva uddisanti, na buddhā, tasmā amhākampi bhagavā vīsativassamattaṃ imaṃ ovādapātimokkhaṃ uddisitvā imaṃ antarāyaṃ disvā tato paraṃ na uddisi. Aṭṭhānanti akāraṇaṃ. Anavakāsoti tasseva vevacanaṃ. Kāraṇañhi yathā tiṭṭhati ettha phalaṃ tadāyattavuttitāyāti ‘‘ṭhāna’’nti vuccati, evaṃ ‘‘avakāso’’tipi vuccati. Yanti kiriyāparāmasanaṃ.
அட்டி²மே, பி⁴க்க²வே, மஹாஸமுத்³தே³தி கோ அனுஸந்தி⁴? ய்வாயங் அபரிஸுத்³தா⁴ய பரிஸாய பாதிமொக்க²ஸ்ஸ அனுத்³தே³ஸோ வுத்தோ, ஸோ இமஸ்மிங் த⁴ம்மவினயே அச்ச²ரியோ அப்³பு⁴தோ த⁴ம்மோதி தங் அபரேஹிபி ஸத்தஹி அச்ச²ரியப்³பு⁴தத⁴ம்மேஹி ஸத்³தி⁴ங் விப⁴ஜித்வா த³ஸ்ஸேதுகாமோ பட²மங் தாவ தேஸங் உபமாபா⁴வேன மஹாஸமுத்³தே³ அட்ட² அச்ச²ரியப்³பு⁴தத⁴ம்மே த³ஸ்ஸெந்தோ ஸத்தா² ‘‘அட்டி²மே, பி⁴க்க²வே, மஹாஸமுத்³தே³’’திஆதி³மாஹ.
Aṭṭhime, bhikkhave, mahāsamuddeti ko anusandhi? Yvāyaṃ aparisuddhāya parisāya pātimokkhassa anuddeso vutto, so imasmiṃ dhammavinaye acchariyo abbhuto dhammoti taṃ aparehipi sattahi acchariyabbhutadhammehi saddhiṃ vibhajitvā dassetukāmo paṭhamaṃ tāva tesaṃ upamābhāvena mahāsamudde aṭṭha acchariyabbhutadhamme dassento satthā ‘‘aṭṭhime, bhikkhave, mahāsamudde’’tiādimāha.
உபோஸத²ஸுத்தவண்ணனா நிட்டி²தா.
Uposathasuttavaṇṇanā niṭṭhitā.
மஹாவக்³க³வண்ணனா நிட்டி²தா.
Mahāvaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. உபோஸத²ஸுத்தங் • 10. Uposathasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. உபோஸத²ஸுத்தவண்ணனா • 10. Uposathasuttavaṇṇanā
