| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
10. убосат̇асуд̇д̇аван̣н̣анаа
10. Uposathasuttavaṇṇanā
71. д̣̇асамз д̇ад̣̇ахубосат̇зд̇и д̇асмим̣ аху убосат̇з д̇ам̣ д̣̇ивасам̣ убосат̇з, баннарасигаубосат̇ад̣̇ивасзд̇и вуд̇д̇ам̣ ход̇и. убасан̇гамийд̇и убосат̇ан̇г̇аани ад̇хидтааяа г̇анд̇хамаалаад̣̇ихад̇т̇аа убасан̇гами. ханд̣̇аад̇и вавассаг̇г̇ад̇т̇з нибаад̇о. д̣̇иваа д̣̇ивассаад̇и д̣̇ивасасса д̣̇иваа наама маж̇жханхо, имасмим̣ тид̇з маж̇жханхигз гаалзд̇и ад̇т̇о. гуд̇о ну д̇вам̣ ааг̇ажчасийд̇и гим̣ гаронд̇ий вижарасийд̇и бужчад̇и. г̇обаалагубосат̇од̇и г̇обаалагзхи сад̣̇д̇хим̣ убавасанаубосат̇о. ниг̇ан̣тубосат̇од̇и ниг̇ан̣таанам̣ убавасанаубосат̇о. арияубосат̇од̇и арияаанам̣ убавасанаубосат̇о. сзяяат̇ааби висаакзд̇и яат̇аа наама, висаакз. сааяанхасамаяз саамигаанам̣ г̇ааво нияяаад̇зд̇ваад̇и г̇обаалагаа хи д̣̇звасигавзд̇анзна ваа бан̃жаахад̣̇асаахаад̣̇д̇хамаасамаасачамаасасам̣важчарабарижчзд̣̇зна ваа г̇ааво г̇ахзд̇ваа рагканд̇и. ид̇ха бана д̣̇звасигавзд̇анзна рагканд̇ам̣ санд̇хааязд̇ам̣ вуд̇д̇ам̣ – нияяаад̇зд̇ваад̇и бадижчаабзд̇ваа ‘‘зд̇аа во г̇ааво’’д̇и д̣̇ад̇ваа. ид̇и бадисан̃жигкад̇ийд̇и ад̇д̇ано г̇зхам̣ г̇анд̇ваа бхун̃ж̇ид̇ваа ман̃жз нибанно звам̣ бажжавзгкад̇и. абхиж̇жхаасахаг̇ад̇знаад̇и д̇ан̣хааяа самбаяуд̇д̇зна. звам̣ ко, висаакз, г̇обаалагубосат̇о ход̇ийд̇и арияубосат̇ова аяам̣, абарисуд̣̇д̇хавид̇аггад̇ааяа бана г̇обаалагаубосат̇адтаанз тид̇о. на махабпалод̇и вибаагапалзна на махабпало. на махаанисам̣сод̇и вибаагаанисам̣сзна на махаанисам̣со. на махааж̇уд̇игод̇и вибаагобхаасзна на махааобхаасо. на махаавибпаарод̇и вибаагавибпаарасса амаханд̇ад̇ааяа на махаавибпааро.
71. Dasame tadahuposatheti tasmiṃ ahu uposathe taṃ divasaṃ uposathe, pannarasikauposathadivaseti vuttaṃ hoti. Upasaṅkamīti uposathaṅgāni adhiṭṭhāya gandhamālādihatthā upasaṅkami. Handāti vavassaggatthe nipāto. Divā divassāti divasassa divā nāma majjhanho, imasmiṃ ṭhite majjhanhike kāleti attho. Kuto nu tvaṃ āgacchasīti kiṃ karontī vicarasīti pucchati. Gopālakuposathoti gopālakehi saddhiṃ upavasanauposatho. Nigaṇṭhuposathoti nigaṇṭhānaṃ upavasanauposatho. Ariyuposathoti ariyānaṃ upavasanauposatho. Seyyathāpi visākheti yathā nāma, visākhe. Sāyanhasamayesāmikānaṃ gāvo niyyātetvāti gopālakā hi devasikavetanena vā pañcāhadasāhaaddhamāsamāsachamāsasaṃvaccharaparicchedena vā gāvo gahetvā rakkhanti. Idha pana devasikavetanena rakkhantaṃ sandhāyetaṃ vuttaṃ – niyyātetvāti paṭicchāpetvā ‘‘etā vo gāvo’’ti datvā. Itipaṭisañcikkhatīti attano gehaṃ gantvā bhuñjitvā mañce nipanno evaṃ paccavekkhati. Abhijjhāsahagatenāti taṇhāya sampayuttena. Evaṃ kho, visākhe, gopālakuposatho hotīti ariyuposathova ayaṃ, aparisuddhavitakkatāya pana gopālakauposathaṭṭhāne ṭhito. Na mahapphaloti vipākaphalena na mahapphalo. Na mahānisaṃsoti vipākānisaṃsena na mahānisaṃso. Na mahājutikoti vipākobhāsena na mahāobhāso. Na mahāvipphāroti vipākavipphārassa amahantatāya na mahāvipphāro.
саман̣аж̇аад̇игаад̇и саман̣ааязва. барам̣ яож̇анасад̇анд̇и яож̇анасад̇ам̣ ад̇иггамид̇ваа д̇ад̇о барам̣. д̇зсу д̣̇ан̣д̣ам̣ нигкибаахийд̇и д̇зсу яож̇анасад̇ад̇о барабхааг̇зсу тид̇зсу сад̇д̇зсу д̣̇ан̣д̣ам̣ нигкиба, нигкид̇д̇ад̣̇ан̣д̣о хохи. наахам̣ гважани гассажи гин̃жанад̇асминд̇и ахам̣ гад̇т̇ажи гассажи барасса гин̃жанад̇асмим̣ на хоми. гин̃жанам̣ вужжад̇и балиб̣од̇хо, балиб̣од̇хо на хомийд̇и вуд̇д̇ам̣ ход̇и. на жа мама гважани гад̇т̇ажи гин̃жанад̇ад̇т̇ийд̇и мамааби гважани анд̇о ваа б̣ахид̣̇д̇хаа ваа гад̇т̇ажи згабаригкаарзби гин̃жанад̇аа над̇т̇и, балиб̣од̇хо над̇т̇и, чиннабалиб̣од̇хохамасмийд̇и вуд̇д̇ам̣ ход̇и. бхог̇зд̇и ман̃жабийтаяааг̇убхад̇д̇аад̣̇аяо. ад̣̇иннам̣язва барибхун̃ж̇ад̇ийд̇и бунад̣̇ивасз ман̃жз нибаж̇ж̇анд̇оби бийтз нисийд̣̇анд̇оби яааг̇ум̣ биванд̇оби бхад̇д̇ам̣ бхун̃ж̇анд̇оби д̇з бхог̇з ад̣̇иннзязва барибхун̃ж̇ад̇и. на махабпалод̇и нибпало. б̣яан̃ж̇анамзва хи зд̇т̇а саавасзсам̣, ад̇т̇о бана ниравасзсо. звам̣ убавуд̇т̇асса хи убосат̇асса аббамад̇д̇агамби вибаагапалам̣ идтам̣ ганд̇ам̣ манаабам̣ наама над̇т̇и. д̇асмаа нибпалод̇взва взд̣̇ид̇аб̣б̣о. сзсабад̣̇зсуби зсзва наяо.
Samaṇajātikāti samaṇāyeva. Paraṃ yojanasatanti yojanasataṃ atikkamitvā tato paraṃ. Tesu daṇḍaṃ nikkhipāhīti tesu yojanasatato parabhāgesu ṭhitesu sattesu daṇḍaṃ nikkhipa, nikkhittadaṇḍo hohi. Nāhaṃ kvacani kassaci kiñcanatasminti ahaṃ katthaci kassaci parassa kiñcanatasmiṃ na homi. Kiñcanaṃ vuccati palibodho, palibodho na homīti vuttaṃ hoti. Na ca mama kvacani katthaci kiñcanatatthīti mamāpi kvacani anto vā bahiddhā vā katthaci ekaparikkhārepi kiñcanatā natthi, palibodho natthi, chinnapalibodhohamasmīti vuttaṃ hoti. Bhogeti mañcapīṭhayāgubhattādayo. Adinnaṃyeva paribhuñjatīti punadivase mañce nipajjantopi pīṭhe nisīdantopi yāguṃ pivantopi bhattaṃ bhuñjantopi te bhoge adinneyeva paribhuñjati. Na mahapphaloti nipphalo. Byañjanameva hi ettha sāvasesaṃ, attho pana niravaseso. Evaṃ upavutthassa hi uposathassa appamattakampi vipākaphalaṃ iṭṭhaṃ kantaṃ manāpaṃ nāma natthi. Tasmā nipphalotveva veditabbo. Sesapadesupi eseva nayo.
убаггилидтасса жид̇д̇ассаад̇и ид̣̇ам̣ гасмаа ааха? сам̣гилидтзна хи жид̇д̇зна убавуд̇т̇о убосат̇о на махабпало ход̇ийд̇и д̣̇ассид̇ад̇д̇аа висуд̣̇д̇хзна жид̇д̇зна убавуд̇т̇асса махабпалад̇аа анун̃н̃аад̇аа ход̇и. д̇асмаа язна гаммадтаанзна жид̇д̇ам̣ висуж̇жхад̇и, д̇ам̣ жид̇д̇ависод̇ханагаммадтаанам̣ д̣̇ассзд̇ум̣ ид̣̇амааха . д̇ад̇т̇а убаггамзнаад̇и бажжад̇д̇абурисагаарзна, убааязна ваа. д̇ат̇ааг̇ад̇ам̣ ануссарад̇ийд̇и адтахи гааран̣зхи д̇ат̇ааг̇ад̇аг̇ун̣з ануссарад̇и. зд̇т̇а хи ид̇иби со бхаг̇аваад̇и со бхаг̇аваа ид̇иби сийлзна, ид̇иби самаад̇хинаад̇и саб̣б̣з логияалогуд̇д̇араа б̣уд̣̇д̇хаг̇ун̣аа сан̇г̇ахид̇аа. араханд̇иаад̣̇ийхи баадиязггаг̇ун̣аава нид̣̇д̣̇идтаа. д̇ат̇ааг̇ад̇ам̣ ануссарад̇о жид̇д̇ам̣ басийд̣̇ад̇ийд̇и логияалогуд̇д̇арз д̇ат̇ааг̇ад̇аг̇ун̣з ануссаранд̇асса жид̇д̇уббаад̣̇о басанно ход̇и.
Upakkiliṭṭhassa cittassāti idaṃ kasmā āha? Saṃkiliṭṭhena hi cittena upavuttho uposatho na mahapphalo hotīti dassitattā visuddhena cittena upavutthassa mahapphalatā anuññātā hoti. Tasmā yena kammaṭṭhānena cittaṃ visujjhati, taṃ cittavisodhanakammaṭṭhānaṃ dassetuṃ idamāha . Tattha upakkamenāti paccattapurisakārena, upāyena vā. Tathāgataṃ anussaratīti aṭṭhahi kāraṇehi tathāgataguṇe anussarati. Ettha hi itipi so bhagavāti so bhagavā itipi sīlena, itipi samādhināti sabbe lokiyalokuttarā buddhaguṇā saṅgahitā. Arahantiādīhi pāṭiyekkaguṇāva niddiṭṭhā. Tathāgataṃ anussarato cittaṃ pasīdatīti lokiyalokuttare tathāgataguṇe anussarantassa cittuppādo pasanno hoti.
жид̇д̇асса убаггилзсаад̇и бан̃жа нийваран̣аа. гагганд̇и аамалагагаггам̣. д̇аж̇ж̇ам̣ вааяааманд̇и д̇аж̇ж̇аад̇игам̣ д̇ад̣̇анужчавигам̣ гаггзна магканагхам̣санад̇хованавааяаамам̣. барияод̣̇абанаа ход̇ийд̇и суд̣̇д̇хабхаавагаран̣ам̣ ход̇и. гилидтасмим̣ хи сийсз басаад̇ханам̣ басаад̇хзд̇ваа нагкад̇д̇ам̣ гийл̣амаано на собхад̇и, барисуд̣̇д̇хз бана д̇асмим̣ басаад̇ханам̣ басаад̇хзд̇ваа нагкад̇д̇ам̣ гийл̣амаано собхад̇и, звамзва гилидтажид̇д̇зна убосат̇ан̇г̇аани ад̇хидтааяа убосат̇о убавуд̇т̇о на махабпало ход̇и, барисуд̣̇д̇хзна бана жид̇д̇зна убосат̇ан̇г̇аани ад̇хидтааяа убавуд̇т̇о убосат̇о махабпало ход̇ийд̇и ад̇хиббааязна звамааха. б̣рахмубосат̇ам̣ убавасад̇ийд̇и б̣рахмаа вужжад̇и саммаасамб̣уд̣̇д̇хо, д̇асса г̇ун̣аануссаран̣авасзна аяам̣ убосат̇о б̣рахмубосат̇о наама, д̇ам̣ убавасад̇и. б̣рахмунаа сад̣̇д̇хим̣ сам̣васад̇ийд̇и саммаасамб̣уд̣̇д̇хзна сад̣̇д̇хим̣ сам̣васад̇и. б̣рахман̃жасса аараб̣бхаад̇и саммаасамб̣уд̣̇д̇хам̣ аараб̣бха.
Cittassa upakkilesāti pañca nīvaraṇā. Kakkanti āmalakakakkaṃ. Tajjaṃ vāyāmanti tajjātikaṃ tadanucchavikaṃ kakkena makkhanaghaṃsanadhovanavāyāmaṃ. Pariyodapanā hotīti suddhabhāvakaraṇaṃ hoti. Kiliṭṭhasmiṃ hi sīse pasādhanaṃ pasādhetvā nakkhattaṃ kīḷamāno na sobhati, parisuddhe pana tasmiṃ pasādhanaṃ pasādhetvā nakkhattaṃ kīḷamāno sobhati, evameva kiliṭṭhacittena uposathaṅgāni adhiṭṭhāya uposatho upavuttho na mahapphalo hoti, parisuddhena pana cittena uposathaṅgāni adhiṭṭhāya upavuttho uposatho mahapphalo hotīti adhippāyena evamāha. Brahmuposathaṃ upavasatīti brahmā vuccati sammāsambuddho, tassa guṇānussaraṇavasena ayaṃ uposatho brahmuposatho nāma, taṃ upavasati. Brahmunā saddhiṃ saṃvasatīti sammāsambuddhena saddhiṃ saṃvasati. Brahmañcassaārabbhāti sammāsambuddhaṃ ārabbha.
д̇хаммам̣ ануссарад̇ийд̇и сахад̇анд̇игам̣ логуд̇д̇арад̇хаммам̣ ануссарад̇и. сод̇д̇инд̇и гурувинд̣̇агасод̇д̇им̣. гурувинд̣̇агабаасаан̣ажун̣н̣зна хи сад̣̇д̇хим̣ лаакам̣ яож̇зд̇ваа ман̣игз гад̇ваа виж̇жхид̇ваа суд̇д̇зна аавун̣ид̇ваа д̇ам̣ ман̣и галаабабанд̇им̣ убхад̇о г̇ахзд̇ваа бидтим̣ гхам̣сзнд̇и, д̇ам̣ санд̇хааяа вуд̇д̇ам̣ – ‘‘сод̇д̇ин̃жа бадижжаа’’д̇и. жун̣н̣анд̇и нхаанийяажун̣н̣ам̣. д̇аж̇ж̇ам̣ вааяааманд̇и уб̣б̣адданагхам̣санад̇хованаад̣̇игам̣ д̇ад̣̇ануруубавааяаамам̣. д̇хаммубосат̇анд̇и сахад̇анд̇игам̣ навалогуд̇д̇арад̇хаммам̣ аараб̣бха убавуд̇т̇ад̇д̇аа аяам̣ убосат̇о ‘‘д̇хаммубосат̇о’’д̇и вуд̇д̇о. ид̇хааби барияод̣̇абанаад̇и бад̣̇з тад̇ваа буриманаязнзва яож̇анаа гаад̇аб̣б̣аа.
Dhammaṃ anussaratīti sahatantikaṃ lokuttaradhammaṃ anussarati. Sottinti kuruvindakasottiṃ. Kuruvindakapāsāṇacuṇṇena hi saddhiṃ lākhaṃ yojetvā maṇike katvā vijjhitvā suttena āvuṇitvā taṃ maṇi kalāpapantiṃ ubhato gahetvā piṭṭhiṃ ghaṃsenti, taṃ sandhāya vuttaṃ – ‘‘sottiñca paṭiccā’’ti. Cuṇṇanti nhānīyacuṇṇaṃ. Tajjaṃ vāyāmanti ubbaṭṭanaghaṃsanadhovanādikaṃ tadanurūpavāyāmaṃ. Dhammuposathanti sahatantikaṃ navalokuttaradhammaṃ ārabbha upavutthattā ayaṃ uposatho ‘‘dhammuposatho’’ti vutto. Idhāpi pariyodapanāti pade ṭhatvā purimanayeneva yojanā kātabbā.
сан̇гхам̣ ануссарад̇ийд̇и адтаннам̣ арияабуг̇г̇алаанам̣ г̇ун̣з ануссарад̇и. усман̃жа бадижжаад̇и д̣̇вз д̇аяо ваарз г̇аахаабид̇ам̣ усумам̣ бадижжа. усан̃жаад̇иби баато, аяамзвад̇т̇о . кааранд̇и чааригам̣. г̇омаяанд̇и г̇омуд̇д̇ам̣ ваа аж̇алан̣д̣игаа ваа. барияод̣̇абанаад̇и ид̇хааби буриманаязнзва яож̇анаа гаад̇аб̣б̣аа. сан̇гхубосат̇анд̇и адтаннам̣ арияабуг̇г̇алаанам̣ г̇ун̣з аараб̣бха убавуд̇т̇ад̇д̇аа аяам̣ убосат̇о ‘‘сан̇гхубосат̇о’’д̇и вуд̇д̇о.
Saṅghaṃ anussaratīti aṭṭhannaṃ ariyapuggalānaṃ guṇe anussarati. Usmañca paṭiccāti dve tayo vāre gāhāpitaṃ usumaṃ paṭicca. Usañcātipi pāṭho, ayamevattho . Khāranti chārikaṃ. Gomayanti gomuttaṃ vā ajalaṇḍikā vā. Pariyodapanāti idhāpi purimanayeneva yojanā kātabbā. Saṅghuposathanti aṭṭhannaṃ ariyapuggalānaṃ guṇe ārabbha upavutthattā ayaṃ uposatho ‘‘saṅghuposatho’’ti vutto.
сийлаанийд̇и г̇ахадто г̇ахадтасийлаани, баб̣б̣аж̇ид̇о баб̣б̣аж̇ид̇асийлаани. акан̣д̣аанийд̇иаад̣̇ийнам̣ ад̇т̇о висуд̣̇д̇химаг̇г̇з (висуд̣̇д̇хи. 1.21) вид̇т̇аарид̇ова. ваалан̣д̣убаганд̇и ассаваалзхи ваа магаживаалаад̣̇ийхи ваа гад̇ам̣ ан̣д̣убагам̣. д̇аж̇ж̇ам̣ вааяааманд̇и д̇злзна д̇змзд̇ваа маласса д̇инд̇абхаавам̣ н̃ад̇ваа чааригам̣ багкибид̇ваа ваалан̣д̣убагзна гхам̣санавааяаамо. ид̇ха барияод̣̇абанаад̇и бад̣̇з тад̇ваа звам̣ яож̇анаа гаад̇аб̣б̣аа гилидтасмин̃хи аад̣̇аасз ман̣д̣ид̇абасаад̇хид̇оби ад̇д̇абхааво ологияамаано на собхад̇и, барисуд̣̇д̇хз собхад̇и. звамзва гилидтзна жид̇д̇зна убавуд̇т̇о убосат̇о на махабпало ход̇и, барисуд̣̇д̇хзна бана махабпало ход̇ийд̇и. сийлубосат̇анд̇и ад̇д̇ано сийлаануссаран̣авасзна убавуд̇т̇о убосат̇о сийлубосат̇о наама. сийлзна сад̣̇д̇хинд̇и ад̇д̇ано бан̃жасийлад̣̇асасийлзна сад̣̇д̇хим̣. сийлан̃жасса аараб̣бхаад̇и бан̃жасийлам̣ д̣̇асасийлан̃жа аараб̣бха.
Sīlānīti gahaṭṭho gahaṭṭhasīlāni, pabbajito pabbajitasīlāni. Akhaṇḍānītiādīnaṃ attho visuddhimagge (visuddhi. 1.21) vitthāritova. Vālaṇḍupakanti assavālehi vā makacivālādīhi vā kataṃ aṇḍupakaṃ. Tajjaṃvāyāmanti telena temetvā malassa tintabhāvaṃ ñatvā chārikaṃ pakkhipitvā vālaṇḍupakena ghaṃsanavāyāmo. Idha pariyodapanāti pade ṭhatvā evaṃ yojanā kātabbā kiliṭṭhasmiñhi ādāse maṇḍitapasādhitopi attabhāvo olokiyamāno na sobhati, parisuddhe sobhati. Evameva kiliṭṭhena cittena upavuttho uposatho na mahapphalo hoti, parisuddhena pana mahapphalo hotīti. Sīluposathanti attano sīlānussaraṇavasena upavuttho uposatho sīluposatho nāma. Sīlena saddhinti attano pañcasīladasasīlena saddhiṃ. Sīlañcassa ārabbhāti pañcasīlaṃ dasasīlañca ārabbha.
д̣̇звад̇аа ануссарад̇ийд̇и д̣̇звад̇аа сагкидтаанз табзд̇ваа ад̇д̇ано сад̣̇д̇хаад̣̇иг̇ун̣з ануссарад̇и. угганд̇и уд̣̇д̇ханам̣. лон̣анд̇и лон̣амад̇д̇игаа. г̇зруганд̇и г̇зругажун̣н̣ам̣. наал̣игасан̣д̣аасанд̇и д̇хамананаал̣иган̃жзва баривад̇д̇анасан̣д̣аасан̃жа. д̇аж̇ж̇ам̣ вааяааманд̇и уд̣̇д̇ханз багкибанад̇хаманабаривад̇д̇анаад̣̇игам̣ ануруубам̣ вааяаамам̣. ид̇ха барияод̣̇абанаад̇и бад̣̇з тад̇ваа звам̣ яож̇анаа взд̣̇ид̇аб̣б̣аа – сам̣гилидтасуван̣н̣амаязна хи басаад̇ханабхан̣д̣зна басаад̇хид̇аа нагкад̇д̇ам̣ гийл̣амаанаа на собханд̇и, барисуд̣̇д̇хасуван̣н̣амаязна собханд̇и. звамзва сам̣гилидтажид̇д̇асса убосат̇о на махабпало ход̇и, барисуд̣̇д̇хажид̇д̇асса махабпало. д̣̇звад̇убосат̇анд̇и д̣̇звад̇аа сагкидтаанз табзд̇ваа ад̇д̇ано г̇ун̣з ануссаранд̇зна убавуд̇т̇аубосат̇о д̣̇звад̇убосат̇о наама. сзсам̣ имзсу б̣уд̣̇д̇хаануссад̇иаад̣̇ийсу гаммадтаанзсу яам̣ вад̇д̇аб̣б̣ам̣ сияаа, д̇ам̣ саб̣б̣ам̣ висуд̣̇д̇химаг̇г̇з (висуд̣̇д̇хи. 1.123 аад̣̇аяо) вуд̇д̇амзва.
Devatā anussaratīti devatā sakkhiṭṭhāne ṭhapetvā attano saddhādiguṇe anussarati. Ukkanti uddhanaṃ. Loṇanti loṇamattikā. Gerukanti gerukacuṇṇaṃ. Nāḷikasaṇḍāsanti dhamananāḷikañceva parivattanasaṇḍāsañca. Tajjaṃ vāyāmanti uddhane pakkhipanadhamanaparivattanādikaṃ anurūpaṃ vāyāmaṃ. Idha pariyodapanāti pade ṭhatvā evaṃ yojanā veditabbā – saṃkiliṭṭhasuvaṇṇamayena hi pasādhanabhaṇḍena pasādhitā nakkhattaṃ kīḷamānā na sobhanti, parisuddhasuvaṇṇamayena sobhanti. Evameva saṃkiliṭṭhacittassa uposatho na mahapphalo hoti, parisuddhacittassa mahapphalo. Devatuposathanti devatā sakkhiṭṭhāne ṭhapetvā attano guṇe anussarantena upavutthauposatho devatuposatho nāma. Sesaṃ imesu buddhānussatiādīsu kammaṭṭhānesu yaṃ vattabbaṃ siyā, taṃ sabbaṃ visuddhimagge (visuddhi. 1.123 ādayo) vuttameva.
баан̣аад̇ибаад̇анд̇и баан̣авад̇хам̣. бахааяаад̇и д̇ам̣ баан̣аад̇ибаад̇ажзд̇анаасан̇каад̇ам̣ д̣̇уссийляам̣ баж̇ахид̇ваа. бадивирад̇аад̇и бахийнагаалад̇о бадтааяа д̇ад̇о д̣̇уссийляад̇о орад̇аа вирад̇аава. нихид̇ад̣̇ан̣д̣аа нихид̇асад̇т̇аад̇и баруубагхаад̇ад̇т̇ааяа д̣̇ан̣д̣ам̣ ваа сад̇т̇ам̣ ваа аад̣̇ааяа авад̇д̇анад̇о нигкид̇д̇ад̣̇ан̣д̣аа жзва нигкид̇д̇асад̇т̇аа жаад̇и ад̇т̇о. зд̇т̇а жа табзд̇ваа д̣̇ан̣д̣ам̣ саб̣б̣амби авасзсам̣ убагаран̣ам̣ сад̇д̇аанам̣ вихим̣санабхаавад̇о сад̇т̇анд̇и взд̣̇ид̇аб̣б̣ам̣. яам̣ бана бхигкуу гад̇д̇арад̣̇ан̣д̣ам̣ ваа д̣̇анд̇агадтаваасим̣ ваа бибпалагам̣ ваа г̇ахзд̇ваа вижаранд̇и, на д̇ам̣ баруубагхаад̇ад̇т̇ааяа. д̇асмаа нихид̇ад̣̇ан̣д̣аа нихид̇асад̇т̇аад̇взва сан̇кам̣ г̇ажчанд̇и. лаж̇ж̇ийд̇и баабаж̇иг̇ужчаналагкан̣ааяа лаж̇ж̇ааяа саманнааг̇ад̇аа. д̣̇аяаабаннаад̇и д̣̇аяам̣ мзд̇д̇ажид̇д̇ад̇ам̣ аабаннаа. саб̣б̣абаан̣абхууд̇ахид̇аанугамбийд̇и саб̣б̣з баан̣абхууд̇з хид̇зна анугамбагаа, д̇ааяа зва д̣̇аяаабаннад̇ааяа саб̣б̣зсам̣ баан̣абхууд̇аанам̣ хид̇ажид̇д̇агаад̇и ад̇т̇о. ахамбаж̇ж̇аад̇и ахамби аж̇ж̇а. иминааби ан̇г̇знаад̇и иминааби г̇ун̣ан̇г̇зна. арахад̇ам̣ анугаромийд̇и яат̇аа бурад̇о г̇ажчанд̇ам̣ бажчад̇о г̇ажчанд̇о ануг̇ажчад̇и наама, звам̣ ахамби араханд̇зхи батамам̣ гад̇ам̣ имам̣ г̇ун̣ам̣ бажчаа гаронд̇о д̇зсам̣ араханд̇аанам̣ анугароми. убосат̇о жа мз убавуд̇т̇о бхависсад̇ийд̇и звам̣ гаронд̇зна маяаа арахад̇ан̃жа анугад̇ам̣ бхависсад̇и, убосат̇о жа убавуд̇т̇о бхависсад̇и.
Pāṇātipātanti pāṇavadhaṃ. Pahāyāti taṃ pāṇātipātacetanāsaṅkhātaṃ dussīlyaṃ pajahitvā. Paṭiviratāti pahīnakālato paṭṭhāya tato dussīlyato oratā viratāva. Nihitadaṇḍā nihitasatthāti parūpaghātatthāya daṇḍaṃ vā satthaṃ vā ādāya avattanato nikkhittadaṇḍā ceva nikkhittasatthā cāti attho. Ettha ca ṭhapetvā daṇḍaṃ sabbampi avasesaṃ upakaraṇaṃ sattānaṃ vihiṃsanabhāvato satthanti veditabbaṃ. Yaṃ pana bhikkhū kattaradaṇḍaṃ vā dantakaṭṭhavāsiṃ vā pipphalakaṃ vā gahetvā vicaranti, na taṃ parūpaghātatthāya. Tasmā nihitadaṇḍā nihitasatthātveva saṅkhaṃ gacchanti. Lajjīti pāpajigucchanalakkhaṇāya lajjāya samannāgatā. Dayāpannāti dayaṃ mettacittataṃ āpannā. Sabbapāṇabhūtahitānukampīti sabbe pāṇabhūte hitena anukampakā, tāya eva dayāpannatāya sabbesaṃ pāṇabhūtānaṃ hitacittakāti attho. Ahampajjāti ahampi ajja. Imināpi aṅgenāti imināpi guṇaṅgena. Arahataṃ anukaromīti yathā purato gacchantaṃ pacchato gacchanto anugacchati nāma, evaṃ ahampi arahantehi paṭhamaṃ kataṃ imaṃ guṇaṃ pacchā karonto tesaṃ arahantānaṃ anukaromi. Uposatho ca me upavuttho bhavissatīti evaṃ karontena mayā arahatañca anukataṃ bhavissati, uposatho ca upavuttho bhavissati.
ад̣̇иннаад̣̇аананд̇и ад̣̇иннасса барабариг̇г̇ахид̇асса аад̣̇аанам̣, т̇зяяам̣ жориганд̇и ад̇т̇о. д̣̇иннамзва аад̣̇ияанд̇ийд̇и д̣̇иннаад̣̇ааяий. жид̇д̇знаби д̣̇иннамзва бадиган̇канд̇ийд̇и д̣̇иннабаадиган̇кий. т̇знзд̇ийд̇и т̇зно, на т̇знзна ат̇знзна. ат̇знад̇д̇ааязва сужибхууд̇зна. ад̇д̇анаад̇и ад̇д̇абхаавзна, ат̇знам̣ сужибхууд̇ам̣ ад̇д̇абхаавам̣ гад̇ваа вихаранд̇ийд̇и вуд̇д̇ам̣ ход̇и.
Adinnādānanti adinnassa parapariggahitassa ādānaṃ, theyyaṃ corikanti attho. Dinnameva ādiyantīti dinnādāyī. Cittenapi dinnameva paṭikaṅkhantīti dinnapāṭikaṅkhī. Thenetīti theno, na thenena athenena. Athenattāyeva sucibhūtena. Attanāti attabhāvena, athenaṃ sucibhūtaṃ attabhāvaṃ katvā viharantīti vuttaṃ hoti.
аб̣рахмажарияанд̇и асздтажарияам̣. б̣рахмам̣ сздтам̣ аажаарам̣ жаранд̇ийд̇и б̣рахмажаарий. аараажаарийд̇и аб̣рахмажарияад̇о д̣̇уураажаарий. мзт̇унаад̇и рааг̇абарияудтаанавасзна сад̣̇исад̇д̇аа мзт̇унагаад̇и лад̣̇д̇хавохаарзхи бадисзвид̇аб̣б̣ад̇о мзт̇унод̇и сан̇кам̣ г̇ад̇аа асад̣̇д̇хаммаа. г̇аамад̇хаммаад̇и г̇аамаваасийнам̣ д̇хаммаа.
Abrahmacariyanti aseṭṭhacariyaṃ. Brahmaṃ seṭṭhaṃ ācāraṃ carantīti brahmacārī. Ārācārīti abrahmacariyato dūrācārī. Methunāti rāgapariyuṭṭhānavasena sadisattā methunakāti laddhavohārehi paṭisevitabbato methunoti saṅkhaṃ gatā asaddhammā. Gāmadhammāti gāmavāsīnaṃ dhammā.
мусааваад̣̇аад̇и алигаважанаа д̇ужчаважанаа. сажжам̣ вад̣̇анд̇ийд̇и сажжаваад̣̇ий. сажжзна сажжам̣ сам̣д̣̇аханд̇и гхаддзнд̇ийд̇и сажжасанд̇хаа, на анд̇аранд̇араа мусаа вад̣̇анд̇ийд̇и ад̇т̇о . яо хи бурисо гад̣̇аажи мусааваад̣̇ам̣ вад̣̇ад̇и, гад̣̇аажи сажжам̣. д̇асса мусааваад̣̇зна анд̇арид̇ад̇д̇аа сажжам̣ сажжзна на гхадийяад̇и. д̇асмаа на со сажжасанд̇хо. имз бана на д̇аад̣̇исаа, ж̇ийвид̇ахзд̇уби мусаа авад̇ваа сажжзна сажжам̣ сам̣д̣̇аханд̇иязваад̇и сажжасанд̇хаа. т̇зд̇аад̇и т̇ираа, тид̇агат̇аад̇и ад̇т̇о. зго буг̇г̇ало халид̣̇д̣̇ирааг̇о вияа т̇усараасимхи никаад̇акаан̣у вияа ассабидтз табид̇агумбхан̣д̣амива жа на тид̇агат̇о ход̇и. зго баасаан̣алзкаа вияа инд̣̇акийло вияа жа тид̇агат̇о ход̇и, асинаа сийсам̣ чинд̣̇анд̇зби д̣̇вз гат̇аа на гат̇зд̇и. аяам̣ вужжад̇и т̇зд̇о. бажжаяигаад̇и бад̇д̇ияааяид̇аб̣б̣агаа, сад̣̇д̇хааяигаад̇и ад̇т̇о. згажжо хи буг̇г̇ало на бажжаяиго ход̇и, ‘‘ид̣̇ам̣ гзна вуд̇д̇ам̣, асугзна наамаа’’д̇и вуд̇д̇з ‘‘маа д̇асса важанам̣ сад̣̇д̣̇ахат̇аа’’д̇и вад̇д̇аб̣б̣ад̇ам̣ аабаж̇ж̇ад̇и. зго бажжаяиго ход̇и, ‘‘ид̣̇ам̣ гзна вуд̇д̇ам̣, асугзнаа’’д̇и вуд̇д̇з ‘‘яад̣̇и д̇зна вуд̇д̇ам̣, ид̣̇амзва бамаан̣ам̣, ид̣̇аани бадигкибид̇аб̣б̣ам̣ над̇т̇и, звамзвам̣ ид̣̇а’’нд̇и вад̇д̇аб̣б̣ад̇ам̣ аабаж̇ж̇ад̇и. аяам̣ вужжад̇и бажжаяиго. ависам̣ваад̣̇агаа логассаад̇и д̇ааяа сажжаваад̣̇ид̇ааяа логам̣ на висам̣ваад̣̇знд̇ийд̇и ад̇т̇о.
Musāvādāti alikavacanā tucchavacanā. Saccaṃ vadantīti saccavādī. Saccena saccaṃ saṃdahanti ghaṭṭentīti saccasandhā, na antarantarā musā vadantīti attho . Yo hi puriso kadāci musāvādaṃ vadati, kadāci saccaṃ. Tassa musāvādena antaritattā saccaṃ saccena na ghaṭīyati. Tasmā na so saccasandho. Ime pana na tādisā, jīvitahetupi musā avatvā saccena saccaṃ saṃdahantiyevāti saccasandhā. Thetāti thirā, ṭhitakathāti attho. Eko puggalo haliddirāgo viya thusarāsimhi nikhātakhāṇu viya assapiṭṭhe ṭhapitakumbhaṇḍamiva ca na ṭhitakatho hoti. Eko pāsāṇalekhā viya indakhīlo viya ca ṭhitakatho hoti, asinā sīsaṃ chindantepi dve kathā na katheti. Ayaṃ vuccati theto. Paccayikāti pattiyāyitabbakā, saddhāyikāti attho. Ekacco hi puggalo na paccayiko hoti, ‘‘idaṃ kena vuttaṃ, asukena nāmā’’ti vutte ‘‘mā tassa vacanaṃ saddahathā’’ti vattabbataṃ āpajjati. Eko paccayiko hoti, ‘‘idaṃ kena vuttaṃ, asukenā’’ti vutte ‘‘yadi tena vuttaṃ, idameva pamāṇaṃ, idāni paṭikkhipitabbaṃ natthi, evamevaṃ ida’’nti vattabbataṃ āpajjati. Ayaṃ vuccati paccayiko. Avisaṃvādakālokassāti tāya saccavāditāya lokaṃ na visaṃvādentīti attho.
сураамзраяамаж̇ж̇абамаад̣̇адтаананд̇и сураамзраяамаж̇ж̇аанам̣ баанажзд̇анаасан̇каад̇ам̣ бамаад̣̇агааран̣ам̣. згабхад̇д̇игаад̇и баад̇араасабхад̇д̇ам̣ сааяамаасабхад̇д̇анд̇и д̣̇вз бхад̇д̇аани. д̇зсу баад̇араасабхад̇д̇ам̣ анд̇омаж̇жханхигзна барижчиннам̣, ид̇арам̣ маж̇жханхигад̇о уд̣̇д̇хам̣ анд̇оарун̣зна. д̇асмаа анд̇омаж̇жханхигз д̣̇асагкад̇д̇ум̣ бхун̃ж̇амаанааби згабхад̇д̇игаава хонд̇и. д̇ам̣ санд̇хааяа вуд̇д̇ам̣ – ‘‘згабхад̇д̇игаа’’д̇и. рад̇д̇ибхож̇анам̣ рад̇д̇и, д̇ад̇о убарад̇аад̇и рад̇д̇уубарад̇аа. ад̇игганд̇з маж̇жханхигз яаава суурияад̇т̇ан̇г̇аманаа бхож̇анам̣ вигаалабхож̇анам̣ наама, д̇ад̇о вирад̇ад̇д̇аа вирад̇аа вигаалабхож̇анаа.
Surāmerayamajjapamādaṭṭhānanti surāmerayamajjānaṃ pānacetanāsaṅkhātaṃ pamādakāraṇaṃ. Ekabhattikāti pātarāsabhattaṃ sāyamāsabhattanti dve bhattāni. Tesu pātarāsabhattaṃ antomajjhanhikena paricchinnaṃ, itaraṃ majjhanhikato uddhaṃ antoaruṇena. Tasmā antomajjhanhike dasakkhattuṃ bhuñjamānāpi ekabhattikāva honti. Taṃ sandhāya vuttaṃ – ‘‘ekabhattikā’’ti. Rattibhojanaṃ ratti, tato uparatāti rattūparatā. Atikkante majjhanhike yāva sūriyatthaṅgamanā bhojanaṃ vikālabhojanaṃ nāma, tato viratattā viratā vikālabhojanā.
саасанасса анануломад̇д̇аа висуугам̣ бадаан̣ибхууд̇ам̣ д̣̇ассананд̇и висуугад̣̇ассанам̣, ад̇д̇анаа нажжананажжаабанаад̣̇ивасзна нажжан̃жа г̇ийд̇ан̃жа ваад̣̇ид̇ан̃жа, анд̇амасо маяууранажжанаад̣̇ивасзнааби бавад̇д̇аанам̣ нажжаад̣̇ийнам̣ висуугабхууд̇ам̣ д̣̇ассанан̃жаад̇и нажжаг̇ийд̇аваад̣̇ид̇ависуугад̣̇ассанам̣. нажжаад̣̇ийни хи ад̇д̇анаа баяож̇зд̇ум̣ ваа барзхи баяож̇аабзд̇ум̣ ваа баяуд̇д̇аани бассид̇ум̣ ваа нзва бхигкуунам̣, на бхигкунийнам̣ вадданд̇и.
Sāsanassa ananulomattā visūkaṃ paṭāṇibhūtaṃ dassananti visūkadassanaṃ, attanā naccananaccāpanādivasena naccañca gītañca vāditañca, antamaso mayūranaccanādivasenāpi pavattānaṃ naccādīnaṃ visūkabhūtaṃ dassanañcāti naccagītavāditavisūkadassanaṃ. Naccādīni hi attanā payojetuṃ vā parehi payojāpetuṃ vā payuttāni passituṃ vā neva bhikkhūnaṃ, na bhikkhunīnaṃ vaṭṭanti.
маалаад̣̇ийсу маалаад̇и яам̣гин̃жи бубпам̣. г̇анд̇ханд̇и яам̣гин̃жи г̇анд̇хаж̇аад̇ам̣. вилзбананд̇и чавирааг̇агаран̣ам̣. д̇ад̇т̇а бил̣анд̇ханд̇о д̇хаарзд̇и наама, уунадтаанам̣ буурзнд̇о ман̣д̣зд̇и наама, г̇анд̇хавасзна чавирааг̇авасзна жа саад̣̇ияанд̇о вибхуусзд̇и наама. таанам̣ вужжад̇и гааран̣ам̣, д̇асмаа яааяа д̣̇уссийляажзд̇анааяа д̇аани маалаад̇хааран̣аад̣̇ийни махааж̇ано гарод̇и, д̇ад̇о бадивирад̇аад̇и ад̇т̇о. ужжаасаяанам̣ вужжад̇и бамаан̣аад̇игганд̇ам̣, махаасаяанам̣ агаббияад̇т̇аран̣ам̣, д̇ад̇о бадивирад̇аад̇и ад̇т̇о.
Mālādīsu mālāti yaṃkiñci pupphaṃ. Gandhanti yaṃkiñci gandhajātaṃ. Vilepananti chavirāgakaraṇaṃ. Tattha piḷandhanto dhāreti nāma, ūnaṭṭhānaṃ pūrento maṇḍeti nāma, gandhavasena chavirāgavasena ca sādiyanto vibhūseti nāma. Ṭhānaṃ vuccati kāraṇaṃ, tasmā yāya dussīlyacetanāya tāni mālādhāraṇādīni mahājano karoti, tato paṭiviratāti attho. Uccāsayanaṃ vuccati pamāṇātikkantaṃ, mahāsayanaṃ akappiyattharaṇaṃ, tato paṭiviratāti attho.
гийвамахабпалод̇и гид̇д̇агам̣ махабпало. сзсабад̣̇зсуби зсзва наяо. бахууд̇арад̇д̇арад̇анаананд̇и бахууд̇зна рад̇д̇асан̇каад̇зна рад̇анзна саманнааг̇ад̇аанам̣, сагалаж̇амб̣уд̣̇ийбад̇алам̣ бхзрид̇аласад̣̇исам̣ гад̇ваа гадиббамаан̣зхи сад̇д̇ахи рад̇анзхи буурид̇аананд̇и ад̇т̇о. иссарияаад̇хибажжанд̇и иссарабхаавзна ваа иссарияамзва ваа аад̇хибажжам̣, на зд̇т̇а саахасигагамманд̇иби иссарияаад̇хибажжам̣. раж̇ж̇ам̣ гаарзяяаад̇и зваруубам̣ жаггавад̇д̇ираж̇ж̇ам̣ гаарзяяа. ан̇г̇аананд̇иаад̣̇ийни д̇зсам̣ ж̇анабад̣̇аанам̣ наамаани. галам̣ нааг̇гхад̇и сол̣асинд̇и згам̣ ахорад̇д̇ам̣ убавуд̇т̇аубосат̇з бун̃н̃ам̣ сол̣асабхааг̇з гад̇ваа д̇ад̇о згам̣ бхааг̇ан̃жа на аг̇гхад̇и. згарад̇д̇убосат̇асса сол̣асияаа галааяа яам̣ вибаагапалам̣, д̇ам̣язва д̇ад̇о б̣ахуд̇арам̣ ход̇ийд̇и ад̇т̇о. габан̣анд̇и барид̇д̇агам̣.
Kīvamahapphaloti kittakaṃ mahapphalo. Sesapadesupi eseva nayo. Pahūtarattaratanānanti pahūtena rattasaṅkhātena ratanena samannāgatānaṃ, sakalajambudīpatalaṃ bheritalasadisaṃ katvā kaṭippamāṇehi sattahi ratanehi pūritānanti attho. Issariyādhipaccanti issarabhāvena vā issariyameva vā ādhipaccaṃ, na ettha sāhasikakammantipi issariyādhipaccaṃ. Rajjaṃ kāreyyāti evarūpaṃ cakkavattirajjaṃ kāreyya. Aṅgānantiādīni tesaṃ janapadānaṃ nāmāni. Kalaṃ nāgghati soḷasinti ekaṃ ahorattaṃ upavutthauposathe puññaṃ soḷasabhāge katvā tato ekaṃ bhāgañca na agghati. Ekarattuposathassa soḷasiyā kalāya yaṃ vipākaphalaṃ, taṃyeva tato bahutaraṃ hotīti attho. Kapaṇanti parittakaṃ.
аб̣рахмажарияаад̇и асздтажарияад̇о. рад̇д̇им̣ на бхун̃ж̇зяяа вигаалабхож̇ананд̇и убосат̇ам̣ убавасанд̇о рад̇д̇ибхож̇анан̃жа д̣̇иваавигаалабхож̇анан̃жа на бхун̃ж̇зяяа. ман̃жз чамааяам̣ва саязт̇а сант̇ад̇зд̇и мудтихад̇т̇абаад̣̇агз габбияаман̃жз ваа суд̇хаад̣̇ибаригаммагад̇ааяа бхуумияам̣ ваа д̇ин̣абан̣н̣абалаалаад̣̇ийни сант̇арид̇ваа гад̇з сант̇ад̇з ваа саязт̇аад̇и ад̇т̇о. зд̇ам̣ хи адтан̇г̇игамаахубосат̇анд̇и звам̣ баан̣аад̇ибаад̇аад̣̇ийни асамаажаранд̇зна убавуд̇т̇ам̣ убосат̇ам̣ адтахи ан̇г̇зхи саманнааг̇ад̇ад̇д̇аа адтан̇г̇иганд̇и вад̣̇анд̇и. д̇ам̣ бана убавасанд̇зна ‘‘свз убосат̇иго бхависсаамий’’д̇и аж̇ж̇зва ‘‘ид̣̇ан̃жа ид̣̇ан̃жа гарзяяаат̇аа’’д̇и аахаараад̣̇ивид̇хаанам̣ вижаарзд̇аб̣б̣ам̣. убосат̇ад̣̇ивасз баад̇ова бхигкусса ваа бхигкунияаа ваа д̣̇асасийлалагкан̣ан̃н̃уно убаасагасса ваа убаасигааяа ваа санд̇игз ваажам̣ бхинд̣̇ид̇ваа убосат̇ан̇г̇аани самаад̣̇аад̇аб̣б̣аани. баал̣им̣ аж̇аананд̇зна бана ‘‘б̣уд̣̇д̇хабан̃н̃ад̇д̇ам̣ убосат̇ам̣ ад̇хидтаамий’’д̇и ад̇хидтаад̇аб̣б̣ам̣. ан̃н̃ам̣ алабханд̇зна ад̇д̇анааби ад̇хидтаад̇аб̣б̣ам̣, важийбхзд̣̇о бана гаад̇аб̣б̣оязва . убосат̇ам̣ убавасанд̇зна баруубарод̇хабадисам̣яуд̇д̇аа гамманд̇аа на вижаарзд̇аб̣б̣аа, ааяаваяаг̇ан̣анам̣ гаронд̇зна на вийд̇инаамзд̇аб̣б̣ам̣, г̇зхз бана аахаарам̣ лабхид̇ваа нижжабхад̇д̇игабхигкунаа вияа барибхун̃ж̇ид̇ваа вихаарам̣ г̇анд̇ваа д̇хаммо ваа сод̇аб̣б̣о, адтад̇им̣сааяа аарамман̣зсу ан̃н̃ад̇арам̣ ваа манасигаад̇аб̣б̣ам̣.
Abrahmacariyāti aseṭṭhacariyato. Rattiṃ na bhuñjeyya vikālabhojananti uposathaṃ upavasanto rattibhojanañca divāvikālabhojanañca na bhuñjeyya. Mañce chamāyaṃva sayetha santhateti muṭṭhihatthapādake kappiyamañce vā sudhādiparikammakatāya bhūmiyaṃ vā tiṇapaṇṇapalālādīni santharitvā kate santhate vā sayethāti attho. Etaṃ hi aṭṭhaṅgikamāhuposathanti evaṃ pāṇātipātādīni asamācarantena upavutthaṃ uposathaṃ aṭṭhahi aṅgehi samannāgatattā aṭṭhaṅgikanti vadanti. Taṃ pana upavasantena ‘‘sve uposathiko bhavissāmī’’ti ajjeva ‘‘idañca idañca kareyyāthā’’ti āhārādividhānaṃ vicāretabbaṃ. Uposathadivase pātova bhikkhussa vā bhikkhuniyā vā dasasīlalakkhaṇaññuno upāsakassa vā upāsikāya vā santike vācaṃ bhinditvā uposathaṅgāni samādātabbāni. Pāḷiṃ ajānantena pana ‘‘buddhapaññattaṃ uposathaṃ adhiṭṭhāmī’’ti adhiṭṭhātabbaṃ. Aññaṃ alabhantena attanāpi adhiṭṭhātabbaṃ, vacībhedo pana kātabboyeva . Uposathaṃ upavasantena parūparodhapaṭisaṃyuttā kammantā na vicāretabbā, āyavayagaṇanaṃ karontena na vītināmetabbaṃ, gehe pana āhāraṃ labhitvā niccabhattikabhikkhunā viya paribhuñjitvā vihāraṃ gantvā dhammo vā sotabbo, aṭṭhatiṃsāya ārammaṇesu aññataraṃ vā manasikātabbaṃ.
суд̣̇ассанаад̇и сунд̣̇арад̣̇ассанаа. обхаасаяанд̇и обхаасаяамаанаа. анубарияанд̇ийд̇и вижаранд̇и. яаавад̇аад̇и яад̇д̇агам̣ таанам̣. анд̇алигкаг̇аад̇и аагаасан̇г̇амаа. бабхаасанд̇ийд̇и ж̇од̇анд̇и бабхаа мун̃жанд̇и. д̣̇исаавирожанаад̇и саб̣б̣ад̣̇исаасу вирожамаанаа. ат̇а ваа бабхаасанд̇ийд̇и д̣̇исаахи д̣̇исаа обхаасанд̇и. вирожанаад̇и вирожамаанаа. взл̣урияанд̇и ман̣ийд̇и вад̇вааби иминаа ж̇аад̇иман̣ибхаавам̣ д̣̇ассзд̇и. згавассигавзл̣уван̣н̣ан̃хи взл̣урияам̣ ж̇аад̇иман̣и наама. д̇ам̣ санд̇хааязвамааха. бхад̣̇д̣̇аганд̇и лад̣̇д̇хагам̣. син̇г̇ийсуван̣н̣анд̇и г̇осин̇г̇асад̣̇исам̣ худ̇ваа уббаннад̇д̇аа звам̣ наамагам̣ суван̣н̣ам̣. ган̃жананд̇и баб̣б̣ад̇зяяам̣ баб̣б̣ад̇з ж̇аад̇асуван̣н̣ам̣. ж̇аад̇аруубанд̇и сад̇т̇уван̣н̣асуван̣н̣ам̣. хадаганд̇и гибиллигаахи нийхадасуван̣н̣ам̣. наанубхаванд̇ийд̇и на баабун̣анд̇и. жанд̣̇аббабхаад̇и саамиад̇т̇з бажжад̇д̇ам̣, жанд̣̇аббабхааяаад̇и ад̇т̇о. убавассубосат̇анд̇и убавасид̇ваа убосат̇ам̣. сукуд̣̇раяаанийд̇и сукапалаани сукавзд̣̇анийяаани. саг̇г̇амубзнд̇и таананд̇и саг̇г̇асан̇каад̇ам̣ таанам̣ убаг̇ажчанд̇и, гзнажи анинд̣̇ид̇аа худ̇ваа д̣̇звалогз уббаж̇ж̇анд̇ийд̇и ад̇т̇о. сзсамзд̇т̇а яам̣ анд̇аранд̇араа на вуд̇д̇ам̣, д̇ам̣ вуд̇д̇аанусаарзнзва взд̣̇ид̇аб̣б̣анд̇и.
Sudassanāti sundaradassanā. Obhāsayanti obhāsayamānā. Anupariyantīti vicaranti. Yāvatāti yattakaṃ ṭhānaṃ. Antalikkhagāti ākāsaṅgamā. Pabhāsantīti jotanti pabhā muñcanti. Disāvirocanāti sabbadisāsu virocamānā. Atha vā pabhāsantīti disāhi disā obhāsanti. Virocanāti virocamānā. Veḷuriyanti maṇīti vatvāpi iminā jātimaṇibhāvaṃ dasseti. Ekavassikaveḷuvaṇṇañhi veḷuriyaṃ jātimaṇi nāma. Taṃ sandhāyevamāha. Bhaddakanti laddhakaṃ. Siṅgīsuvaṇṇanti gosiṅgasadisaṃ hutvā uppannattā evaṃ nāmakaṃ suvaṇṇaṃ. Kañcananti pabbateyyaṃ pabbate jātasuvaṇṇaṃ. Jātarūpanti satthuvaṇṇasuvaṇṇaṃ. Haṭakanti kipillikāhi nīhaṭasuvaṇṇaṃ. Nānubhavantīti na pāpuṇanti. Candappabhāti sāmiatthe paccattaṃ, candappabhāyāti attho. Upavassuposathanti upavasitvā uposathaṃ. Sukhudrayānīti sukhaphalāni sukhavedanīyāni. Saggamupenti ṭhānanti saggasaṅkhātaṃ ṭhānaṃ upagacchanti, kenaci aninditā hutvā devaloke uppajjantīti attho. Sesamettha yaṃ antarantarā na vuttaṃ, taṃ vuttānusāreneva veditabbanti.
махааваг̇г̇о д̣̇уд̇ияо.
Mahāvaggo dutiyo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 10. убосат̇асуд̇д̇ам̣ • 10. Uposathasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 10. убосат̇асуд̇д̇аван̣н̣анаа • 10. Uposathasuttavaṇṇanā
