| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
10. убосат̇асуд̇д̇аван̣н̣анаа
10. Uposathasuttavaṇṇanā
71. д̣̇асамз д̇ад̣̇ахууд̇и зд̇т̇а д̇асмим̣ аханийд̇и ад̇т̇од̇и ааха ‘‘д̇асмим̣ аху убосат̇з’’д̇и. убавасанд̇и зд̇т̇аад̇и убосат̇о, убосат̇ад̣̇ивасо. убавасанд̇ийд̇и жа сийлзна ваа анасанзна ваа кийрасааяанаад̣̇ивид̇хинаа ваа убзд̇аа худ̇ваа васанд̇ийд̇и ад̇т̇о. убосат̇ад̣̇ивасз хи саасанигаа сийлзна, б̣аахирагаа саб̣б̣асо аахаарасса абхун̃ж̇анзна кийрасааяанамад̇хусааяанаад̣̇ивид̇хинаа ваа убзд̇аа худ̇ваа вихаранд̇и. со банзса убосат̇ад̣̇ивасо адтамижаад̇уд̣̇д̣̇асибаннарасибхзд̣̇зна д̇ивид̇хо, д̇асмаа сзсад̣̇ваяанивааран̣ад̇т̇ам̣ ‘‘баннарасигаубосат̇ад̣̇ивасз’’д̇и вуд̇д̇ам̣. вавассаг̇г̇ад̇т̇зд̇и важасааяад̇т̇з. д̣̇ивасад̣̇д̣̇о д̣̇иваасад̣̇д̣̇о вияа д̣̇ивасабарияааяо, д̇асса висзсанабхаавзна вужжамаано д̣̇иваасад̣̇д̣̇о сависзсзна д̣̇ийбзд̇ийд̇и ааха ‘‘д̣̇ивасасса д̣̇иваа , маж̇жханхигз гаалзд̇и ад̇т̇о’’д̇и. бадижчаабзд̇ваад̇и самбадижчанам̣ гаарзд̇ваа. вибаагапалзнаад̇и сад̣̇исапалзна. на махабпало ход̇и манод̣̇ужжарид̇ад̣̇уссийлязна убаггилидтабхаавад̇о. вибаагаанисам̣сзнаад̇и уд̣̇раяапалзна. вибаагобхаасзнаад̇и бадибагкавиг̇амаж̇анид̇зна сабхаавасан̇каад̇зна вибаагобхаасзна. на махааобхаасо абарисуд̣̇д̇хабхаавад̇о. вибаагавибпаарассаад̇и вибаагавзбулласса.
71. Dasame tadahūti ettha tasmiṃ ahanīti atthoti āha ‘‘tasmiṃ ahu uposathe’’ti. Upavasanti etthāti uposatho, uposathadivaso. Upavasantīti ca sīlena vā anasanena vā khīrasāyanādividhinā vā upetā hutvā vasantīti attho. Uposathadivase hi sāsanikā sīlena, bāhirakā sabbaso āhārassa abhuñjanena khīrasāyanamadhusāyanādividhinā vā upetā hutvā viharanti. So panesa uposathadivaso aṭṭhamicātuddasipannarasibhedena tividho, tasmā sesadvayanivāraṇatthaṃ ‘‘pannarasikauposathadivase’’ti vuttaṃ. Vavassaggattheti vacasāyatthe. Divasaddo divāsaddo viya divasapariyāyo, tassa visesanabhāvena vuccamāno divāsaddo savisesena dīpetīti āha ‘‘divasassa divā, majjhanhike kāleti attho’’ti. Paṭicchāpetvāti sampaṭicchanaṃ kāretvā. Vipākaphalenāti sadisaphalena. Na mahapphalo hoti manoduccaritadussīlyena upakkiliṭṭhabhāvato. Vipākānisaṃsenāti udrayaphalena. Vipākobhāsenāti paṭipakkhavigamajanitena sabhāvasaṅkhātena vipākobhāsena. Na mahāobhāso aparisuddhabhāvato. Vipākavipphārassāti vipākavepullassa.
наахам̣ гважанийд̇иаад̣̇иважанасса мижчаабхинивзсавасзна бавад̇д̇ад̇д̇аа ‘‘ид̣̇ам̣ д̇асса мусааваад̣̇асмим̣ вад̣̇аамий’’д̇и баал̣ияам̣ вуд̇д̇ам̣, жад̇угодигасун̃н̃ад̇аад̣̇ассанавасзна бавад̇д̇ам̣ бана арияад̣̇ассанамзваад̇и на д̇ад̇т̇а мусааваад̣̇о. вуд̇д̇ан̃хзд̇ам̣ –
Nāhaṃkvacanītiādivacanassa micchābhinivesavasena pavattattā ‘‘idaṃ tassa musāvādasmiṃ vadāmī’’ti pāḷiyaṃ vuttaṃ, catukoṭikasuññatādassanavasena pavattaṃ pana ariyadassanamevāti na tattha musāvādo. Vuttañhetaṃ –
‘‘буна жабарам̣, бхигкавз, арияасааваго ид̇и бадисан̃жигкад̇и ‘наахам̣ гважани, гассажи гин̃жанад̇асмим̣, на жа мама гважани, гисмин̃жи гин̃жанад̇ад̇т̇ий’’’д̇иаад̣̇и (ма. ни. 3.70).
‘‘Puna caparaṃ, bhikkhave, ariyasāvako iti paṭisañcikkhati ‘nāhaṃ kvacani, kassaci kiñcanatasmiṃ, na ca mama kvacani, kismiñci kiñcanatatthī’’’tiādi (ma. ni. 3.70).
зд̇т̇а хи жад̇угодигасун̃н̃ад̇аа гат̇ид̇аа. гат̇ам̣? арияо (висуд̣̇д̇хи. 2.760; ма. ни. адта. 3.70) хи наахам̣ гважанийд̇и гважи ад̇д̇аанам̣ на бассад̇и, гассажи гин̃жанад̇асминд̇и ад̇д̇ано ад̇д̇аанам̣ гассажи барасса гин̃жанабхаавз убанзд̇аб̣б̣ам̣ на бассад̇и, бхаад̇идтаанз бхаад̇арам̣, сахааяадтаанз сахааяам̣, баригкаарадтаанз баригкаарам̣ ман̃н̃ид̇ваа убанзд̇аб̣б̣ам̣ на бассад̇ийд̇и ад̇т̇о. на жа мама гважанийд̇и зд̇т̇а мама-сад̣̇д̣̇ам̣ д̇аава табзд̇ваа гважани барасса жа ад̇д̇аанам̣ гважи на бассад̇ийд̇и аяамад̇т̇о. ид̣̇аани мама-сад̣̇д̣̇ам̣ аахарид̇ваа ‘‘мама гисмин̃жи гин̃жанад̇ад̇т̇ий’’д̇и со барасса ад̇д̇аанам̣ ‘‘мама гисмин̃жи гин̃жанабхаавзна ад̇т̇ий’’д̇и на бассад̇и, ад̇д̇ано бхаад̇игадтаанз бхаад̇арам̣, сахааяадтаанз сахааяам̣, баригкаарадтаанз баригкааранд̇и гисмин̃жи таанз барасса ад̇д̇аанам̣ иминаа гин̃жанабхаавзна убанзд̇аб̣б̣ам̣ на бассад̇ийд̇и ад̇т̇о. звамаяам̣ яасмаа нзва гад̇т̇ажи ад̇д̇аанам̣ бассад̇и, на д̇ам̣ барасса гин̃жанабхаавз убанзд̇аб̣б̣ам̣ бассад̇и. на гад̇т̇ажи барасса ад̇д̇аанам̣ бассад̇и, на барасса ад̇д̇аанам̣ ад̇д̇ано гин̃жанабхаавз убанзд̇аб̣б̣ам̣ бассад̇и, д̇асмаа аяам̣ сун̃н̃ад̇аа жад̇угодигаад̇и взд̣̇ид̇аб̣б̣аа.
Ettha hi catukoṭikasuññatā kathitā. Kathaṃ? Ariyo (visuddhi. 2.760; ma. ni. aṭṭha. 3.70) hi nāhaṃ kvacanīti kvaci attānaṃ na passati, kassaci kiñcanatasminti attano attānaṃ kassaci parassa kiñcanabhāve upanetabbaṃ na passati, bhātiṭṭhāne bhātaraṃ, sahāyaṭṭhāne sahāyaṃ, parikkhāraṭṭhāne parikkhāraṃ maññitvā upanetabbaṃ na passatīti attho. Na ca mama kvacanīti ettha mama-saddaṃ tāva ṭhapetvā kvacani parassa ca attānaṃ kvaci na passatīti ayamattho. Idāni mama-saddaṃ āharitvā ‘‘mama kismiñci kiñcanatatthī’’ti so parassa attānaṃ ‘‘mama kismiñci kiñcanabhāvena atthī’’ti na passati, attano bhātikaṭṭhāne bhātaraṃ, sahāyaṭṭhāne sahāyaṃ, parikkhāraṭṭhāne parikkhāranti kismiñci ṭhāne parassa attānaṃ iminā kiñcanabhāvena upanetabbaṃ na passatīti attho. Evamayaṃ yasmā neva katthaci attānaṃ passati, na taṃ parassa kiñcanabhāve upanetabbaṃ passati. Na katthaci parassa attānaṃ passati, na parassa attānaṃ attano kiñcanabhāve upanetabbaṃ passati, tasmā ayaṃ suññatā catukoṭikāti veditabbā.
яасмаа бана мижчаад̣̇идтигаанам̣ яаат̇аавад̣̇ассанасса асамбхавад̇о яат̇аавуд̇д̇ажад̇угодигасун̃н̃ад̇аад̣̇ассанам̣ на самбхавад̇и, д̇асмаа ‘‘над̇т̇и маад̇аа, над̇т̇и бид̇аа’’д̇иаад̣̇иважанам̣ (д̣̇ий. ни. 1.171) вияа мижчааг̇аахавасзна ‘‘наахам̣ гважаний’’д̇иаад̣̇и вуд̇д̇анд̇и яуд̇д̇о жзд̇т̇а мусааваад̣̇асамбхаво. гад̇т̇ажийд̇и таанз, гаалз ваа. ат̇а ‘‘нибпало’’д̇и гасмаа вуд̇д̇ам̣. ‘‘на махабпало’’д̇и сад̣̇д̣̇зна хи махабпалаабхаавова ж̇од̇ид̇о, на бана саб̣б̣ат̇аа палаабхаавод̇и ааха ‘‘б̣яан̃ж̇анамзва хи зд̇т̇а саавасзса’’нд̇иаад̣̇и. сзсабад̣̇зсубийд̇и ‘‘на махаанисам̣со’’д̇иаад̣̇ийсуби.
Yasmā pana micchādiṭṭhikānaṃ yāthāvadassanassa asambhavato yathāvuttacatukoṭikasuññatādassanaṃ na sambhavati, tasmā ‘‘natthi mātā, natthi pitā’’tiādivacanaṃ (dī. ni. 1.171) viya micchāgāhavasena ‘‘nāhaṃ kvacanī’’tiādi vuttanti yutto cettha musāvādasambhavo. Katthacīti ṭhāne, kāle vā. Atha ‘‘nipphalo’’ti kasmā vuttaṃ. ‘‘Na mahapphalo’’ti saddena hi mahapphalābhāvova jotito, na pana sabbathā phalābhāvoti āha ‘‘byañjanameva hi ettha sāvasesa’’ntiādi. Sesapadesupīti ‘‘na mahānisaṃso’’tiādīsupi.
адтахи гааран̣зхийд̇и –
Aṭṭhahi kāraṇehīti –
‘‘ат̇а ко, бханд̇з, сагго д̣̇зваанаминд̣̇о д̣̇зваанам̣ д̇аавад̇им̣саанам̣ бхаг̇авад̇о адта яат̇аабхужжз ван̣н̣з баяируд̣̇аахааси – ‘д̇ам̣ гим̣ ман̃н̃анд̇и, бхонд̇о д̣̇зваа д̇аавад̇им̣саа, яааван̃жа со бхаг̇аваа б̣ахуж̇анахид̇ааяа бадибанно б̣ахуж̇анасукааяа логаанугамбааяа ад̇т̇ааяа хид̇ааяа сукааяа д̣̇звамануссаанам̣, звам̣ б̣ахуж̇анахид̇ааяа бадибаннам̣ б̣ахуж̇анасукааяа логаанугамбааяа ад̇т̇ааяа хид̇ааяа сукааяа д̣̇звамануссаанам̣ иминаабан̇г̇зна саманнааг̇ад̇ам̣ сад̇т̇аарам̣ нзва ад̇ийд̇ам̣сз саманубассаами, на банзд̇арахи ан̃н̃ад̇ра д̇зна бхаг̇авад̇аа’’д̇и –
‘‘Atha kho, bhante, sakko devānamindo devānaṃ tāvatiṃsānaṃ bhagavato aṭṭha yathābhucce vaṇṇe payirudāhāsi – ‘taṃ kiṃ maññanti, bhonto devā tāvatiṃsā, yāvañca so bhagavā bahujanahitāya paṭipanno bahujanasukhāya lokānukampāya atthāya hitāya sukhāya devamanussānaṃ, evaṃ bahujanahitāya paṭipannaṃ bahujanasukhāya lokānukampāya atthāya hitāya sukhāya devamanussānaṃ imināpaṅgena samannāgataṃ satthāraṃ neva atītaṃse samanupassāmi, na panetarahi aññatra tena bhagavatā’’ti –
аад̣̇инаа махааг̇овинд̣̇асуд̇д̇з (д̣̇ий. ни. 2.296) вид̇т̇аарид̇зхи б̣ахуж̇анахид̇ааяа бадибаннаад̣̇ийхи б̣уд̣̇д̇хаанубхаавад̣̇ийбагзхи адтахи гааран̣зхи. ат̇а ‘‘навахи гааран̣зхий’’д̇и авад̇ваа ‘‘адтахи гааран̣зхий’’д̇и гасмаа вуд̇д̇анд̇и ааха ‘‘зд̇т̇а хи…бз… саб̣б̣з логияалогуд̇д̇араа б̣уд̣̇д̇хаг̇ун̣аа сан̇г̇ахид̇аа’’д̇и. ид̣̇ам̣ вуд̇д̇ам̣ ход̇и – имасмим̣ суд̇д̇з ‘‘ид̇иби со бхаг̇аваа’’д̇и иминаа важанзна ависзсад̇о саб̣б̣зби логияалогуд̇д̇араа б̣уд̣̇д̇хаг̇ун̣аа д̣̇ийбид̇аа, д̇асмаа д̇зна д̣̇ийбид̇аг̇ун̣з санд̇хааяа ‘‘адтахи гааран̣зхий’’д̇и вуд̇д̇анд̇и. араханд̇иаад̣̇ийхи баадиязггаг̇ун̣аава нид̣̇д̣̇идтаад̇и араханд̇иаад̣̇ийхи згзгзхи бад̣̇зхи згзгз г̇ун̣аава нид̣̇д̣̇идтаад̇и ад̇т̇о.
Ādinā mahāgovindasutte (dī. ni. 2.296) vitthāritehi bahujanahitāya paṭipannādīhi buddhānubhāvadīpakehi aṭṭhahi kāraṇehi. Atha ‘‘navahi kāraṇehī’’ti avatvā ‘‘aṭṭhahi kāraṇehī’’ti kasmā vuttanti āha ‘‘ettha hi…pe… sabbe lokiyalokuttarā buddhaguṇā saṅgahitā’’ti. Idaṃ vuttaṃ hoti – imasmiṃ sutte ‘‘itipi so bhagavā’’ti iminā vacanena avisesato sabbepi lokiyalokuttarā buddhaguṇā dīpitā, tasmā tena dīpitaguṇe sandhāya ‘‘aṭṭhahi kāraṇehī’’ti vuttanti. Arahantiādīhi pāṭiyekkaguṇāva niddiṭṭhāti arahantiādīhi ekekehi padehi ekeke guṇāva niddiṭṭhāti attho.
сахад̇анд̇иганд̇и баал̣ид̇хаммасахид̇ам̣. буриманаязнзва яож̇анаа гаад̇аб̣б̣аад̇и ‘‘гилидтасмин̃хи гааяз басаад̇ханам̣ басаад̇хзд̇ваа нагкад̇д̇ам̣ гийл̣амаанаа на собханд̇ий’’д̇иаад̣̇инаа наязна яож̇анаа гаад̇аб̣б̣аад̇и ад̇т̇о.
Sahatantikanti pāḷidhammasahitaṃ. Purimanayeneva yojanā kātabbāti ‘‘kiliṭṭhasmiñhi kāye pasādhanaṃ pasādhetvā nakkhattaṃ kīḷamānā na sobhantī’’tiādinā nayena yojanā kātabbāti attho.
сан̇гхасса ануссаран̣ам̣ наама д̇асса г̇ун̣аануссаран̣амзваад̇и ааха ‘‘адтаннам̣ арияабуг̇г̇алаанам̣ г̇ун̣з ануссарад̇ий’’д̇и. д̣̇вз д̇аяо ваарз г̇аахаабид̇ам̣ усуманд̇и д̣̇вз д̇аяо ваарз уд̣̇д̇ханам̣ ааробзд̇ваа сзд̣̇анавасзна г̇аахаабид̇ам̣ усумам̣. буриманаязнзва яож̇анаа гаад̇аб̣б̣аад̇и ‘‘гилидтасмин̃хи вад̇т̇з басаад̇ханам̣ басаад̇хзд̇ваа нагкад̇д̇ам̣ гийл̣амаанаа на собханд̇ий’’д̇иаад̣̇инаа наязна яож̇анаа гаад̇аб̣б̣аа.
Saṅghassa anussaraṇaṃ nāma tassa guṇānussaraṇamevāti āha ‘‘aṭṭhannaṃ ariyapuggalānaṃ guṇe anussaratī’’ti. Dve tayo vāre gāhāpitaṃ usumanti dve tayo vāre uddhanaṃ āropetvā sedanavasena gāhāpitaṃ usumaṃ. Purimanayeneva yojanā kātabbāti ‘‘kiliṭṭhasmiñhi vatthe pasādhanaṃ pasādhetvā nakkhattaṃ kīḷamānā na sobhantī’’tiādinā nayena yojanā kātabbā.
бахийнагаалад̇о бадтааяа…бз… вирад̇ааваад̇и зд̇зна бахаанахзд̇угаа ид̇хаад̇хиббзд̇аа вирад̇ийд̇и д̣̇ассзд̇и. гаммагкаяагаран̃аан̣зна хи баан̣аад̇ибаад̇ад̣̇уссийляасса бахийнад̇д̇аа араханд̇о ажжанд̇амзва д̇ад̇о бадивирад̇аад̇и вужжад̇и самужчзд̣̇авасзна бахаанавирад̇ийнам̣ ад̇хиббзд̇ад̇д̇аа. гин̃жааби бахаанавираман̣аанам̣ буримабажчимагаалад̇аа над̇т̇и, маг̇г̇ад̇хаммаанам̣ бана саммаад̣̇идтиаад̣̇ийнам̣ саммааваажаад̣̇ийнан̃жа бажжаяабажжаяуббаннабхаавз абзгкид̇з сахаж̇аад̇аанамби бажжаяабажжаяуббаннабхаавзна г̇ахан̣ам̣ буримабажчимабхаавзнзва ход̇ийд̇и, г̇ахан̣аббавад̇д̇иаагааравасзна бажжаяабхууд̇зсу саммаад̣̇идтиаад̣̇ийсу бахааяагад̇хаммзсу бахаанагирияааяа буримагаалавохааро, бажжаяуббаннаасу жа вирад̇ийсу вираман̣агирияааяа абарагаалавохааро жа ход̇ийд̇и бахаанам̣ ваа самужчзд̣̇авасзна, вирад̇и бадиббассад̣̇д̇хивасзна яож̇зд̇аб̣б̣аа.
Pahīnakālato paṭṭhāya…pe… viratāvāti etena pahānahetukā idhādhippetā viratīti dasseti. Kammakkhayakarañāṇena hi pāṇātipātadussīlyassa pahīnattā arahanto accantameva tato paṭiviratāti vuccati samucchedavasena pahānaviratīnaṃ adhippetattā. Kiñcāpi pahānaviramaṇānaṃ purimapacchimakālatā natthi, maggadhammānaṃ pana sammādiṭṭhiādīnaṃ sammāvācādīnañca paccayapaccayuppannabhāve apekkhite sahajātānampi paccayapaccayuppannabhāvena gahaṇaṃ purimapacchimabhāveneva hotīti, gahaṇappavattiākāravasena paccayabhūtesu sammādiṭṭhiādīsu pahāyakadhammesu pahānakiriyāya purimakālavohāro, paccayuppannāsu ca viratīsu viramaṇakiriyāya aparakālavohāro ca hotīti pahānaṃ vā samucchedavasena, virati paṭippassaddhivasena yojetabbā.
ат̇а ваа баан̣о ад̇ибаад̇ийяад̇и зд̇знаад̇и баан̣аад̇ибаад̇о, баан̣агхаад̇ахзд̇убхууд̇о д̇хаммасамуухо. го бана со? ахиригаанод̇д̇аббад̣̇осамохавихим̣саад̣̇аяо гилзсаа. д̇з хи араханд̇о арияамаг̇г̇зна бахааяа самуг̇гхаад̇зд̇ваа баан̣аад̇ибаад̇ад̣̇уссийляад̇о ажжанд̇амзва бадивирад̇аад̇и вужжанд̇и, гилзсзсу бахийнзсу гилзсанимид̇д̇асса гаммасса ануббаж̇ж̇анад̇о. ад̣̇иннаад̣̇аанам̣ бахааяаад̇иаад̣̇ийсуби зсзва наяо. вирад̇ааваад̇и авад̇хааран̣зна д̇ассаа вирад̇ияаа гаалаад̣̇ивасзна абарияанд̇ад̇ам̣ д̣̇ассзд̇и. яат̇аа хи ан̃н̃з самаад̣̇иннавирад̇игааби анавадтид̇ажид̇д̇ад̇ааяа лаабхаж̇ийвид̇аад̣̇ихзд̇у самаад̣̇аанам̣ бхинд̣̇анд̇и, на звам̣ араханд̇о, араханд̇о бана саб̣б̣асо бахийнабаан̣аад̇ибаад̇ад̇д̇аа ажжанд̇авирад̇аа зваад̇и.
Atha vā pāṇo atipātīyati etenāti pāṇātipāto, pāṇaghātahetubhūto dhammasamūho. Ko pana so? Ahirikānottappadosamohavihiṃsādayo kilesā. Te hi arahanto ariyamaggena pahāya samugghātetvā pāṇātipātadussīlyato accantameva paṭiviratāti vuccanti, kilesesu pahīnesu kilesanimittassa kammassa anuppajjanato. Adinnādānaṃ pahāyātiādīsupi eseva nayo. Viratāvāti avadhāraṇena tassā viratiyā kālādivasena apariyantataṃ dasseti. Yathā hi aññe samādinnaviratikāpi anavaṭṭhitacittatāya lābhajīvitādihetu samādānaṃ bhindanti, na evaṃ arahanto, arahanto pana sabbaso pahīnapāṇātipātattā accantaviratā evāti.
д̣̇ан̣д̣анасан̇каад̇асса баравихзтанасса жа бариваж̇ж̇анабхаавад̣̇ийбанад̇т̇ам̣ д̣̇ан̣д̣асад̇т̇аанам̣ нигкзбаважананд̇и ааха ‘‘баруубагхаад̇ад̇т̇ааяаа’’д̇иаад̣̇и. лаж̇ж̇ийд̇и зд̇т̇а вуд̇д̇алаж̇ж̇ааяа од̇д̇аббамби вуд̇д̇амзваад̇и д̣̇адтаб̣б̣ам̣. на хи баабаж̇иг̇ужчанабаабуд̇д̇аасарахид̇ам̣, баабабхаяам̣ ваа алаж̇ж̇анам̣ ад̇т̇ийд̇и. д̇хаммаг̇аруд̇ааяа ваа араханд̇аанам̣ д̇хаммасса жа ад̇д̇аа д̇хийнад̇д̇аа ад̇д̇аад̇хибад̇ибхууд̇аа лаж̇ж̇аава вуд̇д̇аа, на бана логаад̇хибад̇и од̇д̇аббам̣. ‘‘д̣̇аяам̣ мзд̇д̇ажид̇д̇ад̇ам̣ аабаннаа’’д̇и гасмаа вуд̇д̇ам̣, нану д̣̇аяаа-сад̣̇д̣̇о ‘‘ад̣̇аяаабанно’’д̇иаад̣̇ийсу гарун̣ааяа бавад̇д̇ад̇ийд̇и? сажжамзд̇ам̣, аяам̣ бана д̣̇аяаа-сад̣̇д̣̇о анурагкан̣ад̇т̇ам̣ анд̇онийд̇ам̣ гад̇ваа бавад̇д̇амаано мзд̇д̇ааяа гарун̣ааяа жа бавад̇д̇ад̇ийд̇и ид̇ха мзд̇д̇ааяа бавад̇д̇амаано вуд̇д̇о. миж̇ж̇ад̇и синияхад̇ийд̇и мзд̇д̇аа, мзд̇д̇аа зд̇асса ад̇т̇ийд̇и мзд̇д̇ам̣, мзд̇д̇ам̣ жид̇д̇ам̣ зд̇ассаад̇и мзд̇д̇ажид̇д̇о, д̇асса бхааво мзд̇д̇ажид̇д̇ад̇аа, мзд̇д̇ааижжзва ад̇т̇о.
Daṇḍanasaṅkhātassa paraviheṭhanassa ca parivajjanabhāvadīpanatthaṃ daṇḍasatthānaṃ nikkhepavacananti āha ‘‘parūpaghātatthāyā’’tiādi. Lajjīti ettha vuttalajjāya ottappampi vuttamevāti daṭṭhabbaṃ. Na hi pāpajigucchanapāputtāsarahitaṃ, pāpabhayaṃ vā alajjanaṃ atthīti. Dhammagarutāya vā arahantānaṃ dhammassa ca attā dhīnattā attādhipatibhūtā lajjāva vuttā, na pana lokādhipati ottappaṃ. ‘‘Dayaṃ mettacittataṃ āpannā’’ti kasmā vuttaṃ, nanu dayā-saddo ‘‘adayāpanno’’tiādīsu karuṇāya pavattatīti? Saccametaṃ, ayaṃ pana dayā-saddo anurakkhaṇatthaṃ antonītaṃ katvā pavattamāno mettāya karuṇāya ca pavattatīti idha mettāya pavattamāno vutto. Mijjati siniyhatīti mettā, mettā etassa atthīti mettaṃ, mettaṃ cittaṃ etassāti mettacitto, tassa bhāvo mettacittatā, mettāicceva attho.
саб̣б̣абаан̣абхууд̇ахид̇аанугамбийд̇и зд̇зна д̇ассаа вирад̇ияаа бавад̇д̇авасзна абарияанд̇ад̇ам̣ д̣̇ассзд̇и. баан̣абхууд̇зд̇и баан̣аж̇аад̇з. анугамбагаад̇и гарун̣ааяанагаа, яасмаа бана мзд̇д̇аа гарун̣ааяа висзсабажжаяо ход̇и, д̇асмаа вуд̇д̇ам̣ ‘‘д̇ааяа зва д̣̇аяаабаннад̇ааяаа’’д̇и. звам̣ язхи д̇хаммзхи баан̣аад̇ибаад̇аа вирад̇и самбаж̇ж̇ад̇и, д̇зхи лаж̇ж̇аамзд̇д̇аагарун̣аад̇хаммзхи саман̇г̇ибхааво д̣̇ассид̇о.
Sabbapāṇabhūtahitānukampīti etena tassā viratiyā pavattavasena apariyantataṃ dasseti. Pāṇabhūteti pāṇajāte. Anukampakāti karuṇāyanakā, yasmā pana mettā karuṇāya visesapaccayo hoti, tasmā vuttaṃ ‘‘tāya eva dayāpannatāyā’’ti. Evaṃ yehi dhammehi pāṇātipātā virati sampajjati, tehi lajjāmettākaruṇādhammehi samaṅgibhāvo dassito.
барабариг̇г̇ахид̇асса аад̣̇аананд̇и барасанд̇агасса аад̣̇аанам̣. т̇зно вужжад̇и жоро, д̇асса бхааво т̇зяяам̣, гааман̃жзд̇т̇а ‘‘лаж̇ж̇ий д̣̇аяаабанно’’д̇и на вуд̇д̇ам̣, ад̇хигааравасзна бана ад̇т̇ад̇о вуд̇д̇амзваад̇и д̣̇адтаб̣б̣ам̣. яат̇аа хи лаж̇ж̇аад̣̇аяо баан̣аад̇ибаад̇аббахаанасса висзсабажжаяаа, звам̣ ад̣̇иннаад̣̇аанаббахаанассабийд̇и , д̇асмаа сааби баал̣и аанзд̇ваа вад̇д̇аб̣б̣аа. зса наяо ид̇о барзсуби. ат̇а ваа сужибхууд̇знаад̇и зд̇зна хирод̇д̇аббаад̣̇ийхи саманнааг̇амо, ахиригаад̣̇ийнан̃жа бахаанам̣ вуд̇д̇амзваад̇и ‘‘лаж̇ж̇ий’’д̇иаад̣̇и на вуд̇д̇анд̇и д̣̇адтаб̣б̣ам̣.
Parapariggahitassa ādānanti parasantakassa ādānaṃ. Theno vuccati coro, tassa bhāvo theyyaṃ, kāmañcettha ‘‘lajjī dayāpanno’’ti na vuttaṃ, adhikāravasena pana atthato vuttamevāti daṭṭhabbaṃ. Yathā hi lajjādayo pāṇātipātappahānassa visesapaccayā, evaṃ adinnādānappahānassapīti , tasmā sāpi pāḷi ānetvā vattabbā. Esa nayo ito paresupi. Atha vā sucibhūtenāti etena hirottappādīhi samannāgamo, ahirikādīnañca pahānaṃ vuttamevāti ‘‘lajjī’’tiādi na vuttanti daṭṭhabbaṃ.
асздтажарияанд̇и асздтаанам̣ хийнаанам̣, асздтам̣ ваа лаамагам̣ жарияам̣, нихийнавуд̇д̇им̣ мзт̇унанд̇и ад̇т̇о. б̣рахмам̣ сздтам̣ аажааранд̇и мзт̇унавирад̇имааха. аараажаарий мзт̇унаад̇и зд̇зна – ‘‘ид̇хзгажжо на хзва ко маад̇уг̇аамзна сад̣̇д̇хим̣ д̣̇ваяам̣д̣̇ваяасамаабад̇д̇им̣ самаабаж̇ж̇ад̇и, абижа ко маад̇уг̇аамасса ужчаад̣̇анабаримад̣̇д̣̇ананхаабанасамб̣ааханам̣ саад̣̇ияад̇и, со д̇ам̣ ассаад̣̇зд̇и, д̇ам̣ нигаамзд̇и, д̇зна жа вид̇д̇им̣ аабаж̇ж̇ад̇ий’’д̇иаад̣̇инаа (а. ни. 7.50) вуд̇д̇аа сад̇д̇авид̇хамзт̇унасам̣яог̇ааби бадивирад̇и д̣̇ассид̇аад̇и д̣̇адтаб̣б̣ам̣.
Aseṭṭhacariyanti aseṭṭhānaṃ hīnānaṃ, aseṭṭhaṃ vā lāmakaṃ cariyaṃ, nihīnavuttiṃ methunanti attho. Brahmaṃ seṭṭhaṃ ācāranti methunaviratimāha. Ārācārī methunāti etena – ‘‘idhekacco na heva kho mātugāmena saddhiṃ dvayaṃdvayasamāpattiṃ samāpajjati, apica kho mātugāmassa ucchādanaparimaddananhāpanasambāhanaṃ sādiyati, so taṃ assādeti, taṃ nikāmeti, tena ca vittiṃ āpajjatī’’tiādinā (a. ni. 7.50) vuttā sattavidhamethunasaṃyogāpi paṭivirati dassitāti daṭṭhabbaṃ.
‘‘сажжад̇о т̇зд̇ад̇о’’д̇иаад̣̇ийсу (ма. ни. 1.19) вияа т̇зд̇а-сад̣̇д̣̇о т̇ирабарияааяо, т̇ирабхааво жа сажжаваад̣̇ид̇ааяа тид̇агат̇ад̇д̇аа гат̇аавасзна взд̣̇ид̇аб̣б̣од̇и ааха ‘‘тид̇агат̇аад̇и ад̇т̇о’’д̇и. на тид̇агат̇од̇и яат̇аа халид̣̇д̣̇ирааг̇аад̣̇аяо анавадтид̇асабхаавад̇ааяа на тид̇аа, звам̣ на тид̇аа гат̇аа яасса со на тид̇агат̇од̇и халид̣̇д̣̇ирааг̇аад̣̇аяо яат̇аа гат̇ааяа убамаа хонд̇и, звам̣ яож̇зд̇аб̣б̣ам̣. зса наяо ‘‘баасаан̣алзкаа вияаа’’д̇иаад̣̇ийсуби. сад̣̇д̇хаа аяад̇и бавад̇д̇ад̇и зд̇т̇аад̇и сад̣̇д̇хааяаа, сад̣̇д̇хааяаа зва сад̣̇д̇хааяигаа яат̇аа взнаяигаа. сад̣̇д̇хааяа ваа аяид̇аб̣б̣аа сад̣̇д̇хааяигаа, сад̣̇д̇хзяяаад̇и ад̇т̇о. вад̇д̇аб̣б̣ад̇ам̣ аабаж̇ж̇ад̇и висам̣ваад̣̇анад̇од̇и ад̇хиббааяо.
‘‘Saccato thetato’’tiādīsu (ma. ni. 1.19) viya theta-saddo thirapariyāyo, thirabhāvo ca saccavāditāya ṭhitakathattā kathāvasena veditabboti āha ‘‘ṭhitakathāti attho’’ti. Na ṭhitakathoti yathā haliddirāgādayo anavaṭṭhitasabhāvatāya na ṭhitā, evaṃ na ṭhitā kathā yassa so na ṭhitakathoti haliddirāgādayo yathā kathāya upamā honti, evaṃ yojetabbaṃ. Esa nayo ‘‘pāsāṇalekhā viyā’’tiādīsupi. Saddhā ayati pavattati etthāti saddhāyā, saddhāyā eva saddhāyikā yathā venayikā. Saddhāya vā ayitabbā saddhāyikā, saddheyyāti attho. Vattabbataṃ āpajjati visaṃvādanatoti adhippāyo.
згам̣ бхад̇д̇ам̣ згабхад̇д̇ам̣, д̇ам̣ зд̇зсамад̇т̇ийд̇и згабхад̇д̇игаа, згасмим̣ д̣̇ивасз згаваарамзва бхун̃ж̇анагаа. д̇аяид̣̇ам̣ рад̇д̇ибхож̇анзнаби сияаад̇и ааха ‘‘рад̇д̇уубарад̇аа’’д̇и. звамби сааяанхабхож̇анзнаби сияум̣ згабхад̇д̇игаад̇и д̇ад̣̇аасан̇гаанивад̇д̇анад̇т̇ам̣ ‘‘вирад̇аа вигаалабхож̇анаа’’д̇и вуд̇д̇ам̣. арун̣уг̇г̇аманад̇о бадтааяа яаава маж̇жханхигаа аяам̣ б̣уд̣̇д̇хаанам̣ арияаанам̣ аажин̣н̣асамаажин̣н̣о бхож̇анасса гаало наама, д̇ад̣̇ан̃н̃о вигаало. адтагат̇ааяам̣ бана д̣̇уд̇ияабад̣̇зна рад̇д̇ибхож̇анасса бадигкид̇д̇ад̇д̇аа абаран̣хо ‘‘вигаало’’д̇и вуд̇д̇о.
Ekaṃ bhattaṃ ekabhattaṃ, taṃ etesamatthīti ekabhattikā, ekasmiṃ divase ekavārameva bhuñjanakā. Tayidaṃ rattibhojanenapi siyāti āha ‘‘rattūparatā’’ti. Evampi sāyanhabhojanenapi siyuṃ ekabhattikāti tadāsaṅkānivattanatthaṃ ‘‘viratā vikālabhojanā’’ti vuttaṃ. Aruṇuggamanato paṭṭhāya yāva majjhanhikā ayaṃ buddhānaṃ ariyānaṃ āciṇṇasamāciṇṇo bhojanassa kālo nāma, tadañño vikālo. Aṭṭhakathāyaṃ pana dutiyapadena rattibhojanassa paṭikkhittattā aparaṇho ‘‘vikālo’’ti vutto.
сан̇кзбад̇о ‘‘саб̣б̣абаабасса агаран̣а’’нд̇иаад̣̇инаяаббавад̇д̇ам̣ (д̣̇ий. ни. 2.90; д̇ха. ба. 183) бхаг̇авад̇о саасанам̣ сажчанд̣̇арааг̇аббавад̇д̇ид̇о нажжаад̣̇ийнам̣ д̣̇ассанам̣ на ануломзд̇ийд̇и ааха ‘‘саасанасса анануломад̇д̇аа’’д̇и. ад̇д̇анаа баяож̇ияамаанам̣ барзхи баяож̇аабийяамаанан̃жа нажжам̣ нажжабхаавасааман̃н̃ад̇о баал̣ияам̣ згзнзва нажжасад̣̇д̣̇зна г̇ахид̇ам̣, д̇ат̇аа г̇ийд̇аваад̣̇ид̇асад̣̇д̣̇аа жаад̇и ааха ‘‘нажжананажжаабанаад̣̇ивасзнаа’’д̇и . аад̣̇и-сад̣̇д̣̇зна г̇ааяанаг̇ааяаабанаваад̣̇анаваад̣̇аабанаани сан̇г̇ан̣хаад̇и. д̣̇ассанзна жзд̇т̇а саванамби сан̇г̇ахид̇ам̣ вируубзгасзсанаязна. ааложанасабхаавад̇ааяа ваа бан̃жаннам̣ вин̃н̃аан̣аанам̣ саванагирияааяаби д̣̇ассанасан̇кзбасаб̣бхаавад̇о д̣̇ассанааижжзва вуд̇д̇ам̣. ависуугабхууд̇асса г̇ийд̇асса саванам̣ гад̣̇аажи ваддад̇ийд̇и ааха ‘‘висуугабхууд̇ам̣ д̣̇ассана’’нд̇и. д̇ат̇аа хи вуд̇д̇ам̣ барамад̇т̇аж̇од̇игааяа куд̣̇д̣̇агабаатадтагат̇ааяа ‘‘д̇хаммуубасам̣хид̇ам̣ г̇ийд̇ам̣ ваддад̇и, г̇ийд̇уубасам̣хид̇о д̇хаммо на ваддад̇ий’’д̇и.
Saṅkhepato ‘‘sabbapāpassa akaraṇa’’ntiādinayappavattaṃ (dī. ni. 2.90; dha. pa. 183) bhagavato sāsanaṃ sacchandarāgappavattito naccādīnaṃ dassanaṃ na anulometīti āha ‘‘sāsanassa ananulomattā’’ti. Attanā payojiyamānaṃ parehi payojāpīyamānañca naccaṃ naccabhāvasāmaññato pāḷiyaṃ ekeneva naccasaddena gahitaṃ, tathā gītavāditasaddā cāti āha ‘‘naccananaccāpanādivasenā’’ti . Ādi-saddena gāyanagāyāpanavādanavādāpanāni saṅgaṇhāti. Dassanena cettha savanampi saṅgahitaṃ virūpekasesanayena. Ālocanasabhāvatāya vā pañcannaṃ viññāṇānaṃ savanakiriyāyapi dassanasaṅkhepasabbhāvato dassanāicceva vuttaṃ. Avisūkabhūtassa gītassa savanaṃ kadāci vaṭṭatīti āha ‘‘visūkabhūtaṃ dassana’’nti. Tathā hi vuttaṃ paramatthajotikāya khuddakapāṭhaṭṭhakathāya ‘‘dhammūpasaṃhitaṃ gītaṃ vaṭṭati, gītūpasaṃhito dhammo na vaṭṭatī’’ti.
яам̣ гин̃жийд̇и г̇ант̇ид̇ам̣ ваа аг̇ант̇ид̇ам̣ ваа яам̣ гин̃жи бубпам̣. г̇анд̇хаж̇аад̇анд̇и г̇анд̇хаж̇аад̇ияам̣. д̇ассааби ‘‘яам̣ гин̃жий’’д̇и важанад̇о д̇хуубид̇ассаби ад̇хуубид̇ассаби яасса гассажи вилзбанаад̣̇и на ваддад̇ийд̇и д̣̇ассзд̇и. ужжаад̇и ужжасад̣̇д̣̇зна самаанад̇т̇ам̣ згам̣ сад̣̇д̣̇анд̇арам̣. сзд̇и зд̇т̇аад̇и саяанам̣. ужжаасаяанам̣ махаасаяанан̃жа саман̣асааруббарахид̇ам̣ ад̇хиббзд̇анд̇и ааха ‘‘бамаан̣аад̇игганд̇ам̣ агаббияад̇т̇аран̣а’’нд̇и, аасанд̣̇аад̣̇иаасанан̃жзд̇т̇а саяанзна сан̇г̇ахид̇анд̇и д̣̇адтаб̣б̣ам̣. яасмаа бана аад̇хаарз бадигкид̇д̇з д̇ад̣̇аад̇хаарагирияаа бадигкид̇д̇аава ход̇и, д̇асмаа ‘‘ужжаасаяанамахаасаяанаа’’ижжзва вуд̇д̇ам̣. ад̇т̇ад̇о бана д̇ад̣̇убабхог̇абхууд̇анисаж̇ж̇аанибаж̇ж̇анзхи вирад̇и д̣̇ассид̇аад̇и д̣̇адтаб̣б̣аа. ат̇а ваа ‘‘ужжаасаяанаасанамахаасаяанаасанаа’’д̇и, зд̇асмим̣ ад̇т̇з згасзсанаязна аяам̣ нид̣̇д̣̇зсо гад̇о яат̇аа ‘‘наамаруубабажжаяаа сал̣ааяад̇ана’’нд̇и. (ма. ни. 3.126; сам̣. ни. 2.1) аасанагирияаабуб̣б̣агад̇д̇аа ваа саяанагирияааяа саяанаг̇г̇ахан̣знзва аасанамби сан̇г̇ахид̇анд̇и взд̣̇ид̇аб̣б̣ам̣.
Yaṃkiñcīti ganthitaṃ vā aganthitaṃ vā yaṃ kiñci pupphaṃ. Gandhajātanti gandhajātiyaṃ. Tassāpi ‘‘yaṃ kiñcī’’ti vacanato dhūpitassapi adhūpitassapi yassa kassaci vilepanādi na vaṭṭatīti dasseti. Uccāti uccasaddena samānatthaṃ ekaṃ saddantaraṃ. Seti etthāti sayanaṃ. Uccāsayanaṃ mahāsayanañca samaṇasārupparahitaṃ adhippetanti āha ‘‘pamāṇātikkantaṃ akappiyattharaṇa’’nti, āsandādiāsanañcettha sayanena saṅgahitanti daṭṭhabbaṃ. Yasmā pana ādhāre paṭikkhitte tadādhārakiriyā paṭikkhittāva hoti, tasmā ‘‘uccāsayanamahāsayanā’’icceva vuttaṃ. Atthato pana tadupabhogabhūtanisajjānipajjanehi virati dassitāti daṭṭhabbā. Atha vā ‘‘uccāsayanāsanamahāsayanāsanā’’ti, etasmiṃ atthe ekasesanayena ayaṃ niddeso kato yathā ‘‘nāmarūpapaccayā saḷāyatana’’nti. (Ma. ni. 3.126; saṃ. ni. 2.1) āsanakiriyāpubbakattā vā sayanakiriyāya sayanaggahaṇeneva āsanampi saṅgahitanti veditabbaṃ.
‘‘гийваа’’д̇и аяам̣ нибаад̇о. ‘‘гид̇д̇ага’’нд̇и имасса ад̇т̇ам̣ б̣од̇хзд̇ийд̇и ааха ‘‘гийвамахабпалод̇и гид̇д̇агам̣ махабпало’’д̇и. сзсабад̣̇зсууд̇и ‘‘гийвамахаанисам̣со’’д̇иаад̣̇ийсу. рад̇д̇а-сад̣̇д̣̇о рад̇анабарияааяод̇и ааха ‘‘бахууд̇арад̇д̇арад̇анаананд̇и бахууд̇зна рад̇д̇асан̇каад̇зна рад̇анзна саманнааг̇ад̇аана’’нд̇и. баал̣ияам̣ бана ‘‘бахууд̇асад̇д̇арад̇анаана’’нд̇иби баато д̣̇иссад̇и. бхзрид̇аласад̣̇исам̣ гад̇ваад̇и бхзрид̇алам̣ вияа самам̣ гад̇ваа. д̇ад̇о згам̣ бхааг̇ам̣ на аг̇гхад̇ийд̇и яат̇аавуд̇д̇ам̣ жаггавад̇д̇ираж̇ж̇ам̣ д̇ад̇о сол̣асабхааг̇ад̇о згам̣ бхааг̇ам̣ на аг̇гхад̇и. д̇ад̇о б̣ахуд̇арам̣ ход̇ийд̇и жаггавад̇д̇ираж̇ж̇асирид̇о б̣ахуд̇арам̣ ход̇и.
‘‘Kīvā’’ti ayaṃ nipāto. ‘‘Kittaka’’nti imassa atthaṃ bodhetīti āha ‘‘kīvamahapphaloti kittakaṃ mahapphalo’’ti. Sesapadesūti ‘‘kīvamahānisaṃso’’tiādīsu. Ratta-saddo ratanapariyāyoti āha ‘‘pahūtarattaratanānanti pahūtena rattasaṅkhātena ratanena samannāgatāna’’nti. Pāḷiyaṃ pana ‘‘pahūtasattaratanāna’’ntipi pāṭho dissati. Bheritalasadisaṃ katvāti bheritalaṃ viya samaṃ katvā. Tato ekaṃ bhāgaṃ na agghatīti yathāvuttaṃ cakkavattirajjaṃ tato soḷasabhāgato ekaṃ bhāgaṃ na agghati. Tato bahutaraṃ hotīti cakkavattirajjasirito bahutaraṃ hoti.
жаад̇умахаарааж̇ийгаананд̇иаад̣̇ийсу жаад̇умахаарааж̇игаа наама синзрубаб̣б̣ад̇асса взмаж̇жхз хонд̇и, д̇зсу б̣ахуу баб̣б̣ад̇адтааби аагаасадтааби, д̇зсам̣ барамбараа жаггаваал̣абаб̣б̣ад̇ам̣ бад̇д̇аа, кид̣д̣аабад̣̇осигаа, манобад̣̇осигаа, сийд̇авалаахагаа, ун̣хавалаахагаа, жанд̣̇имаа, д̣̇звабуд̇д̇о, суурияо, д̣̇звабуд̇д̇од̇и зд̇з саб̣б̣з жаад̇умахаарааж̇игад̣̇звалогадтагаа зва. д̇зд̇д̇им̣са ж̇анаа д̇ад̇т̇а уббаннаад̇и д̇аавад̇им̣саа. абижа д̇аавад̇им̣саад̇и д̇зсам̣ д̣̇зваанам̣ наамамзваад̇и вуд̇д̇ам̣. д̇зби ад̇т̇и баб̣б̣ад̇адтагаа, ад̇т̇и аагаасадтагаа, д̇зсам̣ барамбараа жаггаваал̣абаб̣б̣ад̇ам̣ бад̇д̇аа, д̇ат̇аа яаамаад̣̇ийнам̣. згад̣̇звалогзби хи д̣̇зваанам̣ барамбараа жаггаваал̣абаб̣б̣ад̇ам̣ аббад̇д̇аа наама над̇т̇и. д̇ад̇т̇а д̣̇иб̣б̣асукам̣ яаад̇аа баяаад̇аа самбад̇д̇аад̇и яаамаа. д̇удтаа бахадтаад̇и д̇усид̇аа. багад̇ибадияад̇д̇аарамман̣ад̇о ад̇ирзгзна рамид̇угаамагаалз яат̇ааружид̇з бхог̇з нимминид̇ваа нимминид̇ваа раманд̇ийд̇и ниммаанарад̇и. жид̇д̇аажаарам̣ н̃ад̇ваа барзхи ниммид̇зсу бхог̇зсу васам̣ вад̇д̇знд̇ийд̇и бараниммид̇авасавад̇д̇ий.
Cātumahārājīkānantiādīsu cātumahārājikā nāma sinerupabbatassa vemajjhe honti, tesu bahū pabbataṭṭhāpi ākāsaṭṭhāpi, tesaṃ paramparā cakkavāḷapabbataṃ pattā, khiḍḍāpadosikā, manopadosikā, sītavalāhakā, uṇhavalāhakā, candimā, devaputto, sūriyo, devaputtoti ete sabbe cātumahārājikadevalokaṭṭhakā eva. Tettiṃsa janā tattha uppannāti tāvatiṃsā. Apica tāvatiṃsāti tesaṃ devānaṃ nāmamevāti vuttaṃ. Tepi atthi pabbataṭṭhakā, atthi ākāsaṭṭhakā, tesaṃ paramparā cakkavāḷapabbataṃ pattā, tathā yāmādīnaṃ. Ekadevalokepi hi devānaṃ paramparā cakkavāḷapabbataṃ appattā nāma natthi. Tattha dibbasukhaṃ yātā payātā sampattāti yāmā. Tuṭṭhā pahaṭṭhāti tusitā. Pakatipaṭiyattārammaṇato atirekena ramitukāmakāle yathārucite bhoge nimminitvā nimminitvā ramantīti nimmānarati. Cittācāraṃ ñatvā parehi nimmitesu bhogesu vasaṃ vattentīti paranimmitavasavattī.
д̇ад̇т̇а жаад̇умахаарааж̇игаанам̣ д̣̇зваанам̣ мануссаг̇ан̣анааяа навуд̇ивассасад̇асахассаани ааяуббамаан̣ам̣. д̇аавад̇им̣саанам̣ д̣̇зваанам̣ д̇иссо жа вассагодияо садти жа вассасад̇асахассаани. яаамаанам̣ д̣̇зваанам̣ жуд̣̇д̣̇аса жа вассагодияо жад̇д̇аари жа вассасад̇асахассаани. д̇усид̇аанам̣ д̣̇зваанам̣ сад̇д̇абан̃н̃ааса жа вассагодияо садти жа вассасад̇асахассаани. ниммаанарад̇ийнам̣ д̣̇зваанам̣ д̣̇вз жа вассагодисад̇аани д̇иссо жа вассагодияо жад̇д̇аари жа вассасад̇асахассаани. бараниммид̇авасавад̇д̇ийнам̣ д̣̇зваанам̣ нава жа вассагодисад̇аани згавийса годияо жа садти жа вассасад̇асахассаани.
Tattha cātumahārājikānaṃ devānaṃ manussagaṇanāya navutivassasatasahassāni āyuppamāṇaṃ. Tāvatiṃsānaṃ devānaṃ tisso ca vassakoṭiyo saṭṭhi ca vassasatasahassāni. Yāmānaṃ devānaṃ cuddasa ca vassakoṭiyo cattāri ca vassasatasahassāni. Tusitānaṃ devānaṃ sattapaññāsa ca vassakoṭiyo saṭṭhi ca vassasatasahassāni. Nimmānaratīnaṃ devānaṃ dve ca vassakoṭisatāni tisso ca vassakoṭiyo cattāri ca vassasatasahassāni. Paranimmitavasavattīnaṃ devānaṃ nava ca vassakoṭisatāni ekavīsa koṭiyo ca saṭṭhi ca vassasatasahassāni.
мудтихад̇т̇абаад̣̇агзд̇и баад̣̇ад̇алад̇о яаава аданияаа хздтиманд̇о, д̇аава мудтирад̇анаббамаан̣абаад̣̇агз. д̇ан̃жа ко маж̇жхимасса бурисасса хад̇т̇зна, яассид̣̇аани вад̣дхагийхад̇т̇од̇и саман̃н̃аа. сийласамаад̣̇аанад̇о бадтааяа ан̃н̃ам̣ гин̃жи агад̇ваа д̇хаммассаванзна ваа гаммадтаанаманасигаарзна ваа вийд̇инаамзд̇аб̣б̣анд̇и ааха ‘‘д̇ам̣ бана убавасанд̇зна…бз… вижаарзд̇аб̣б̣а’’нд̇и.
Muṭṭhihatthapādaketi pādatalato yāva aṭaniyā heṭṭhimanto, tāva muṭṭhiratanappamāṇapādake. Tañca kho majjhimassa purisassa hatthena, yassidāni vaḍḍhakīhatthoti samaññā. Sīlasamādānato paṭṭhāya aññaṃ kiñci akatvā dhammassavanena vā kammaṭṭhānamanasikārena vā vītināmetabbanti āha ‘‘taṃ pana upavasantena…pe… vicāretabba’’nti.
ваажам̣ бхинд̣̇ид̇ваа убосат̇ан̇г̇аани самаад̣̇аад̇аб̣б̣аанийд̇и ‘‘иман̃жа рад̇д̇им̣ иман̃жа д̣̇иваса’’нд̇и гаалабарижчзд̣̇ам̣ гад̇ваа ‘‘убосат̇ан̇г̇авасзна адта сигкаабад̣̇аани самаад̣̇ияаамий’’д̇и згад̇о гад̇ваа буна бажжзгам̣ ‘‘баан̣аад̇ибаад̇аа взраман̣исигкаабад̣̇ам̣ самаад̣̇ияаами…бз… ужжаасаяанамахаасаяанаа взраман̣исигкаабад̣̇ам̣ самаад̣̇ияаамий’’д̇и звам̣ важийбхзд̣̇ам̣ гад̇ваа яат̇аабаал̣и самаад̣̇аад̇аб̣б̣аани. баал̣им̣ аж̇аананд̇зна бана ад̇д̇ано бхаасааяа бажжзгам̣ ваа ‘‘б̣уд̣̇д̇хабан̃н̃ад̇д̇ам̣ убосат̇ам̣ ад̇хидтаамий’’д̇и згад̇о ад̇хидтаанавасзна ваа самаад̣̇аад̇аб̣б̣аани, ан̃н̃ам̣ алабханд̇зна ад̇хидтаад̇аб̣б̣аани. убаасагасийлан̃хи ад̇д̇анаа самаад̣̇ияанд̇знаби самаад̣̇иннам̣ барасанд̇игз самаад̣̇ияанд̇знаби, згаж̇жхам̣ самаад̣̇иннамби самаад̣̇иннамзва ход̇и бажжзгам̣ самаад̣̇иннамби. д̇ам̣ бана згаж̇жхам̣ самаад̣̇ияад̇о згааязва вирад̇и згаа жзд̇анаа ход̇и. саа бана саб̣б̣авирад̇ижзд̇анаанам̣ гижжагаарийд̇и д̇знаби саб̣б̣асигкаабад̣̇аани самаад̣̇иннаанзва. бажжзгам̣ самаад̣̇ияад̇о бана наанаавирад̇ижзд̇анааяо яат̇аасагам̣ гижжавасзна уббаж̇ж̇анд̇и , саб̣б̣асамаад̣̇аанз бана важийбхзд̣̇о гаад̇аб̣б̣оязва. баруубарод̇хабадисам̣яуд̇д̇аа баравихим̣саасам̣яуд̇д̇аа.
Vācaṃ bhinditvā uposathaṅgāni samādātabbānīti ‘‘imañca rattiṃ imañca divasa’’nti kālaparicchedaṃ katvā ‘‘uposathaṅgavasena aṭṭha sikkhāpadāni samādiyāmī’’ti ekato katvā puna paccekaṃ ‘‘pāṇātipātā veramaṇisikkhāpadaṃ samādiyāmi…pe… uccāsayanamahāsayanā veramaṇisikkhāpadaṃ samādiyāmī’’ti evaṃ vacībhedaṃ katvā yathāpāḷi samādātabbāni. Pāḷiṃ ajānantena pana attano bhāsāya paccekaṃ vā ‘‘buddhapaññattaṃ uposathaṃ adhiṭṭhāmī’’ti ekato adhiṭṭhānavasena vā samādātabbāni, aññaṃ alabhantena adhiṭṭhātabbāni. Upāsakasīlañhi attanā samādiyantenapi samādinnaṃ parasantike samādiyantenapi, ekajjhaṃ samādinnampi samādinnameva hoti paccekaṃ samādinnampi. Taṃ pana ekajjhaṃ samādiyato ekāyeva virati ekā cetanā hoti. Sā pana sabbaviraticetanānaṃ kiccakārīti tenapi sabbasikkhāpadāni samādinnāneva. Paccekaṃ samādiyato pana nānāviraticetanāyo yathāsakaṃ kiccavasena uppajjanti , sabbasamādāne pana vacībhedo kātabboyeva. Parūparodhapaṭisaṃyuttā paravihiṃsāsaṃyuttā.
нану жа ‘‘ман̣и’’нд̇и вуд̇д̇з взл̣урияамби сан̇г̇ахид̇амзва, гимад̇т̇ам̣ бана взл̣урияанд̇и ааха ‘‘взл̣урияанд̇и…бз… д̣̇ассзд̇ий’’д̇и. ‘‘ман̣и’’нд̇и вад̇ваава ‘‘взл̣урияа’’нд̇и иминаа ж̇аад̇иман̣ибхаавам̣ д̣̇ассзд̇ийд̇и яож̇зд̇аб̣б̣ам̣. згавассигавзл̣уван̣н̣анд̇и ж̇аад̇ид̇о згавассаад̇игганд̇авзл̣уван̣н̣ам̣. лад̣̇д̇хаганд̇и сунд̣̇арам̣. жанд̣̇аббабхаа д̇аараг̇ан̣аава саб̣б̣зд̇и яат̇аа жанд̣̇аббабхааяа галам̣ саб̣б̣з д̇аарааг̇ан̣аа наанубхаванд̇ийд̇и аяамзд̇т̇а ад̇т̇од̇и ааха ‘‘жанд̣̇аббабхаад̇и саамиад̇т̇з бажжад̇д̇а’’нд̇и.
Nanu ca ‘‘maṇi’’nti vutte veḷuriyampi saṅgahitameva, kimatthaṃ pana veḷuriyanti āha ‘‘veḷuriyanti…pe… dassetī’’ti. ‘‘Maṇi’’nti vatvāva ‘‘veḷuriya’’nti iminā jātimaṇibhāvaṃ dassetīti yojetabbaṃ. Ekavassikaveḷuvaṇṇanti jātito ekavassātikkantaveḷuvaṇṇaṃ. Laddhakanti sundaraṃ. Candappabhā tāragaṇāva sabbeti yathā candappabhāya kalaṃ sabbe tārāgaṇā nānubhavantīti ayamettha atthoti āha ‘‘candappabhāti sāmiatthe paccatta’’nti.
убосат̇асуд̇д̇аван̣н̣анаа нидтид̇аа.
Uposathasuttavaṇṇanā niṭṭhitā.
махааваг̇г̇аван̣н̣анаа нидтид̇аа.
Mahāvaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 10. убосат̇асуд̇д̇ам̣ • 10. Uposathasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 10. убосат̇асуд̇д̇аван̣н̣анаа • 10. Uposathasuttavaṇṇanā
