| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਉਪੋਸਥਸੁਤ੍ਤવਣ੍ਣਨਾ
10. Uposathasuttavaṇṇanā
੧੯੦. ਦਸਮੇ ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਯਤੋ ਯਤੋ ਅਨੁવਿਲੋਕੇਤਿ, ਤਤੋ ਤਤੋ ਤੁਣ੍ਹੀਭੂਤਮੇવ। ਭਿਕ੍ਖੂ ਆਮਨ੍ਤੇਸੀਤਿ ਪਟਿਪਤ੍ਤਿਸਮ੍ਪਨ੍ਨੇ ਭਿਕ੍ਖੂ ਪਸਨ੍ਨੇਹਿ ਚਕ੍ਖੂਹਿ ਅਨੁવਿਲੋਕੇਤ੍વਾ ਉਪ੍ਪਨ੍ਨਧਮ੍ਮਪਾਮੋਜ੍ਜੋ ਥੋਮੇਤੁਕਾਮਤਾਯ ਆਮਨ੍ਤੇਸਿ। ਅਪਲਾਪਾਤਿ ਪਲਾਪਰਹਿਤਾ। ਇਤਰਂ ਤਸ੍ਸੇવ વੇવਚਨਂ। ਸੁਦ੍ਧਾਤਿ ਨਿਮ੍ਮਲਾ। ਸਾਰੇ ਪਤਿਟ੍ਠਿਤਾਤਿ ਸੀਲਾਦਿਸਾਰੇ ਪਤਿਟ੍ਠਿਤਾ। ਅਲਨ੍ਤਿ ਯੁਤ੍ਤਂ। ਯੋਜਨਗਣਨਾਨੀਤਿ ਏਕਂ ਯੋਜਨਂ ਯੋਜਨਮੇવ, ਦਸਪਿ ਯੋਜਨਾਨਿ ਯੋਜਨਾਨੇવ। ਤਤੋ ਉਦ੍ਧਂ ‘‘ਯੋਜਨਗਣਨਾਨੀ’’ਤਿ વੁਚ੍ਚਤਿ। ਇਧ ਪਨ ਯੋਜਨਸਤਮ੍ਪਿ ਯੋਜਨਸਹਸ੍ਸਮ੍ਪਿ ਅਧਿਪ੍ਪੇਤਂ। ਪੁਟੋਸੇਨਾਪੀਤਿ ਪੁਟੋਸਂ વੁਚ੍ਚਤਿ ਪਾਥੇਯ੍ਯਂ, ਪਾਥੇਯ੍ਯਂ ਗਹੇਤ੍વਾਪਿ ਉਪਸਙ੍ਕਮਿਤੁਂ ਯੁਤ੍ਤਮੇવਾਤਿ ਅਤ੍ਥੋ। ਪੁਟਂਸੇਨਾਤਿਪਿ ਪਾਠੋ। ਤਸ੍ਸਤ੍ਥੋ – ਪੁਟੋ ਅਂਸੇ ਅਸ੍ਸਾਤਿ ਪੁਟਂਸੋ, ਤੇਨ ਪੁਟਂਸੇਨ, ਅਂਸੇਨ ਪਾਥੇਯ੍ਯਪੁਟਂ વਹਨ੍ਤੇਨਾਪੀਤਿ વੁਤ੍ਤਂ ਹੋਤਿ।
190. Dasame tuṇhībhūtaṃ tuṇhībhūtanti yato yato anuviloketi, tato tato tuṇhībhūtameva. Bhikkhū āmantesīti paṭipattisampanne bhikkhū pasannehi cakkhūhi anuviloketvā uppannadhammapāmojjo thometukāmatāya āmantesi. Apalāpāti palāparahitā. Itaraṃ tasseva vevacanaṃ. Suddhāti nimmalā. Sāre patiṭṭhitāti sīlādisāre patiṭṭhitā. Alanti yuttaṃ. Yojanagaṇanānīti ekaṃ yojanaṃ yojanameva, dasapi yojanāni yojanāneva. Tato uddhaṃ ‘‘yojanagaṇanānī’’ti vuccati. Idha pana yojanasatampi yojanasahassampi adhippetaṃ. Puṭosenāpīti puṭosaṃ vuccati pātheyyaṃ, pātheyyaṃ gahetvāpi upasaṅkamituṃ yuttamevāti attho. Puṭaṃsenātipi pāṭho. Tassattho – puṭo aṃse assāti puṭaṃso, tena puṭaṃsena, aṃsena pātheyyapuṭaṃ vahantenāpīti vuttaṃ hoti.
ਇਦਾਨਿ ਏવਰੂਪੇਹਿ ਏવਰੂਪੇਹਿ ਚ ਗੁਣੇਹਿ ਸਮਨ੍ਨਾਗਤਾ ਏਤ੍ਥ ਭਿਕ੍ਖੂ ਅਤ੍ਥੀਤਿ ਦਸ੍ਸੇਤੁਂ ਸਨ੍ਤਿ ਭਿਕ੍ਖવੇਤਿਆਦਿਮਾਹ। ਤਤ੍ਥ ਦੇવਪ੍ਪਤ੍ਤਾਤਿ ਉਪਪਤ੍ਤਿਦੇવਨਿਬ੍ਬਤ੍ਤਕਂ ਦਿਬ੍ਬવਿਹਾਰਂ ਦਿਬ੍ਬવਿਹਾਰੇਨ ਚ ਅਰਹਤ੍ਤਂ ਪਤ੍ਤਾ। ਬ੍ਰਹ੍ਮਪ੍ਪਤ੍ਤਾਤਿ ਨਿਦ੍ਦੋਸਟ੍ਠੇਨ ਬ੍ਰਹ੍ਮਭਾવਸਾਧਕਂ ਬ੍ਰਹ੍ਮવਿਹਾਰਂ ਬ੍ਰਹ੍ਮવਿਹਾਰੇਨ ਚ ਅਰਹਤ੍ਤਂ ਪਤ੍ਤਾ। ਆਨੇਞ੍ਜਪ੍ਪਤ੍ਤਾਤਿ ਅਨਿਞ੍ਜਨਭਾવਸਾਧਕਂ ਆਨੇਞ੍ਜਂ ਆਨੇਞ੍ਜੇਨ ਚ ਅਰਹਤ੍ਤਂ ਪਤ੍ਤਾ। ਅਰਿਯਪ੍ਪਤ੍ਤਾਤਿ ਪੁਥੁਜ੍ਜਨਭਾવਂ ਅਤਿਕ੍ਕਮ੍ਮ ਅਰਿਯਭਾવਂ ਪਤ੍ਤਾ। ਏવਂ ਖੋ, ਭਿਕ੍ਖવੇ, ਭਿਕ੍ਖੁ ਦੇવਪ੍ਪਤ੍ਤੋ ਹੋਤੀਤਿਆਦੀਸੁ ਏવਂ ਰੂਪਾવਚਰਚਤੁਤ੍ਥਜ੍ਝਾਨੇ ਠਤ੍વਾ ਚਿਤ੍ਤਂ વਿવਟ੍ਟੇਤ੍વਾ ਅਰਹਤ੍ਤਂ ਪਤ੍ਤੋ ਦੇવਪ੍ਪਤ੍ਤੋ ਨਾਮ ਹੋਤਿ , ਚਤੂਸੁ ਬ੍ਰਹ੍ਮવਿਹਾਰੇਸੁ ਠਤ੍વਾ ਚਿਤ੍ਤਂ વਿવਟ੍ਟੇਤ੍વਾ ਅਰਹਤ੍ਤਂ ਪਤ੍ਤੋ ਬ੍ਰਹ੍ਮਪ੍ਪਤ੍ਤੋ ਨਾਮ, ਚਤੂਸੁ ਅਰੂਪਜ੍ਝਾਨੇਸੁ ਠਤ੍વਾ ਚਿਤ੍ਤਂ વਿવਟ੍ਟੇਤ੍વਾ ਅਰਹਤ੍ਤਂ ਪਤ੍ਤੋ ਆਨੇਞ੍ਜਪ੍ਪਤ੍ਤੋ ਨਾਮ। ਇਦਂ ਦੁਕ੍ਖਨ੍ਤਿਆਦੀਹਿ ਚਤੂਹਿ ਸਚ੍ਚੇਹਿ ਚਤ੍ਤਾਰੋ ਮਗ੍ਗਾ ਤੀਣਿ ਚ ਫਲਾਨਿ ਕਥਿਤਾਨਿ। ਤਸ੍ਮਾ ਇਮਂ ਅਰਿਯਧਮ੍ਮਂ ਪਤ੍ਤੋ ਭਿਕ੍ਖੁ ਅਰਿਯਪ੍ਪਤ੍ਤੋ ਨਾਮ ਹੋਤੀਤਿ।
Idāni evarūpehi evarūpehi ca guṇehi samannāgatā ettha bhikkhū atthīti dassetuṃ santi bhikkhavetiādimāha. Tattha devappattāti upapattidevanibbattakaṃ dibbavihāraṃ dibbavihārena ca arahattaṃ pattā. Brahmappattāti niddosaṭṭhena brahmabhāvasādhakaṃ brahmavihāraṃ brahmavihārena ca arahattaṃ pattā. Āneñjappattāti aniñjanabhāvasādhakaṃ āneñjaṃ āneñjena ca arahattaṃ pattā. Ariyappattāti puthujjanabhāvaṃ atikkamma ariyabhāvaṃ pattā. Evaṃ kho, bhikkhave, bhikkhu devappatto hotītiādīsu evaṃ rūpāvacaracatutthajjhāne ṭhatvā cittaṃ vivaṭṭetvā arahattaṃ patto devappatto nāma hoti , catūsu brahmavihāresu ṭhatvā cittaṃ vivaṭṭetvā arahattaṃ patto brahmappatto nāma, catūsu arūpajjhānesu ṭhatvā cittaṃ vivaṭṭetvā arahattaṃ patto āneñjappatto nāma. Idaṃ dukkhantiādīhi catūhi saccehi cattāro maggā tīṇi ca phalāni kathitāni. Tasmā imaṃ ariyadhammaṃ patto bhikkhu ariyappatto nāma hotīti.
ਬ੍ਰਾਹ੍ਮਣવਗ੍ਗੋ ਚਤੁਤ੍ਥੋ।
Brāhmaṇavaggo catuttho.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਉਪੋਸਥਸੁਤ੍ਤਂ • 10. Uposathasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਉਪੋਸਥਸੁਤ੍ਤવਣ੍ਣਨਾ • 10. Uposathasuttavaṇṇanā
